Mamlakatda investitsiya muhitini yanada yaxshilash, xususiylashtirish, ishlab chiqarishni modernizatsiya qilish, texnik jihatdan qayta jihozlash va rekonstruksiya qilish, respublikaning ortiqcha ishchi kuchi mavjud boʻlgan mintaqalarida yangi ish joylarini yaratish dasturlarini amalga oshirishga toʻgʻridan-toʻgʻri xususiy xorijiy investitsiyalarni keng jalb etish, shuningdek xorijiy investorlar uchun ishonchli huquqiy himoya va kafolatlarni taʼminlash maqsadida:

1. 2005-yilning 1-iyulidan boshlab toʻgʻridan-toʻgʻri xususiy xorijiy investitsiyalarni jalb etadigan va ilovaga muvofiq roʻyxat boʻyicha iqtisodiyot tarmoqlarida mahsulotlarni ishlab chiqarishga ixtisoslashtirilgan korxonalar yuridik shaxslarning foydasidan olinadigan soliq, mulk soligʻi, ijtimoiy infratuzilmani rivojlantirish va obodonlashtirish soligʻi, mikrofirma va kichik korxonalar uchun belgilangan yagona soliq toʻlashdan, shuningdek Respublika yoʻl jamgʻarmasiga majburiy ajratmalar toʻlashdan ozod qilinsin.

Belgilansinki, toʻgʻridan-toʻgʻri xususiy xorijiy investitsiyalar hajmi quyidagicha boʻlganda mazkur soliq imtiyozlari beriladi:

300 ming AQSH dollaridan 3 million AQSH dollarigacha — 3 yil muddatga;

3 milliondan ortiq AQSH dollaridan 10 million AQSH dollarigacha — 5 yil muddatga;

10 million AQSH dollaridan ortiq boʻlganda — 7 yil muddatga.

2. Ushbu Farmonning 1-bandida koʻrsatilgan soliq imtiyozlari quyidagi shartlar asosida qoʻllanilishi belgilab qoʻyilsin:

mazkur korxonalarni Toshkent shahri va Toshkent viloyatini istisno qilgan holda, respublikaning barcha shaharlari va qishloq aholi punktlarida joylashtirish;

xorijiy investorlar tomonidan toʻgʻridan-toʻgʻri xususiy xorijiy investitsiyalarni Oʻzbekiston Respublikasining kafolati berilmagan holda amalga oshirish;

korxonaning ustav kapitalida xorijiy ishtirokchilarning ulushi kamida 33 foizni tashkil etishi lozim;

xorijiy investitsiyalarni erkin almashtiriladigan valyuta yoki yangi zamonaviy texnologik uskuna tarzida qoʻyish;

mazkur imtiyozlarni qoʻllanish muddati davomida imtiyozlardan olingan daromadning kamida 50 foizini korxonani yanada rivojlantirish maqsadida qayta investitsiyalashga yoʻnaltirish.

3. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi zimmasiga toʻgʻridan-toʻgʻri xususiy xorijiy investitsiyalar jalb etiladigan korxonalarning ushbu Farmon ilovasida koʻrsatilgan iqtisodiyot tarmoqlariga taalluqli ekanini aniqlash vazifasi yuklatilsin.

4. Quyidagilar belgilansin:

keyingi qonun hujjatlarida investitsiyalash shart-sharoitlari yomonlashgan taqdirda mazkur Farmonning 1-bandidagi imtiyozlar qancha muddatga berilgan boʻlsa, ana shu muddat mobaynida amal qiladi.

5. Ushbu Farmonning 1-bandiga muvofiq imtiyoz olgan korxonalar shunday imtiyoz berilgan muddat tugashidan keyin bir yil barvaqtroq faoliyatini toʻxtatgan taqdirda foydani oʻz mamlakatiga oʻtkazish va xorijiy investorning kapitalini chet elga olib chiqib ketish faqat berilgan imtiyozlar summasini budjetga qaytargandan keyin amalga oshiriladi.

6. Oʻzbekiston Respublikasi Moliya vazirligi Davlat soliq qoʻmitasi, Iqtisodiyot vazirligi, Savdo-sanoat palatasi bilan birgalikda bir oy muddatda ushbu Farmonda belgilangan toʻgʻridan-toʻgʻri xususiy xorijiy investitsiyalar uchun soliq imtiyozlarini qoʻllash tartibi toʻgʻrisidagi nizomni ishlab chiqsin va belgilangan tartibda tasdiqlasin.

7. Oʻzbekiston Respublikasining “Chet ellik investorlar huquqlarining kafolatlari va ularni himoya qilish choralari toʻgʻrisida”gi Qonuni 3-moddasining toʻrtinchi qismida xorijiy investorlar uchun belgilangan kafolatlar quyidagi hollarda qoʻllanilishi maʼlumot uchun qabul qilinsin:

xorijiy investorlarga toʻlanadigan, dividend tarzida olinadigan daromadlar boʻyicha foyda soligʻi (stavkalari) koʻpayishi;

xorijiy investorning chet elga oʻtkaziladigan daromadlari (foydasi)ni oʻz mamlakatiga qaytarish tartibotini murakkablashtiruvchi yoki ularning miqdorini kamaytiruvchi qoʻshimcha talablar joriy etilishi, bunda davlat xorijiy investitsiyalar ishtirokidagi korxonaning toʻlovga qobiliyatsizligi va bankrotligi yoki kredit beruvchilarning huquqlarini himoya qilish, xorijiy investor — jismoniy shaxs sodir etgan jinoiy qilmish yoki maʼmuriy huquqbuzarlik hollarida yoxud sud yoki hakamlikning qaroriga muvofiq daromad (foyda)ni oʻz mamlakatiga qaytarishni toʻxtatib turishning boshqa zarurati boʻlganda xorijiy investor mablagʻlarini qonun hujjatlarini kamsitmaydigan tarzda qoʻllash shartlari asosida oʻz mamlakatiga qaytarilishini toʻxtatib turish hollari mustasno;

investitsiyalarning miqdori boʻyicha investitsiyalash hajmlariga miqdoriy cheklashlar hamda boshqa qoʻshimcha talablar, shu jumladan xorijiy investitsiyalar ishtirokidagi korxonalarda xorijiy investitsiyalarning minimal miqdorini koʻpaytirish tarzidagi talablar joriy etilishi;

respublika korxonalarining ustav jamgʻarmalarida xorijiy investorning ulush bilan ishtirok etishi boʻyicha cheklashlar joriy etilishi;

xorijiy investorlarning vizalarini rasmiylashtirish va uzaytirish borasidagi qoʻshimcha tartibotlar, shuningdek xorijiy investitsiyalarni amalga oshirish boʻyicha boshqa qoʻshimcha talablar joriy etilishi.

8. Oʻzbekiston Respublikasi Vazirlar Mahkamasi oʻn kun muddatda Oʻzbekiston Respublikasining “Chet ellik investorlar huquqlarining kafolatlari va ularni himoya qilish choralari toʻgʻrisida”gi Qonuni 3-moddasining toʻrtinchi qismida belgilangan kafolatlarni qoʻllash tartibi toʻgʻrisidagi nizomni tasdiqlasin.

Bunda, yuqorida koʻrsatilgan barcha investitsiyalash shart-sharoitlari yomonlashgan taqdirda xorijiy investor mazkur kafolatni qoʻllash toʻgʻrisida tegishli vakolatli organni xabardor qilishi nazarda tutilsin.

9. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda mazkur Farmon qabul qilinishi munosabati bilan amaldagi qonunchilik hujjatlariga oʻzgartirish va qoʻshimchalar kiritish toʻgʻrisida Vazirlar Mahkamasiga takliflar kiritsin.

10. Ushbu Farmonning ijrosini nazorat qilish Oʻzbekiston Respublikasi Bosh vazirining birinchi oʻrinbosari R. Azimov zimmasiga yuklatilsin.

1. Radioelektron sanoati buyumlari hamda kompyuter va hisoblash texnikasi butlovchi buyumlarini ishlab chiqarish.

2. Yengil sanoat:

tayyor ip gazlama, jun gazlama va aralash gazlamalar, shuningdek trikotaj gazlama ishlab chiqarish;

tayyor tikuvchilik, trikotaj, paypoq mahsulotlari va toʻqimachilik galantereyasi ishlab chiqarish;

tabiiy terilar ishlab chiqarish, koʻn-galantereya sanoati, poyabzal sanoati.

3. Ipakchilik sanoati:

shoyi gazlamalar va ipakdan tayyor buyumlar ishlab chiqarish.

4. Qurilish materiallari sanoati:

Oʻzbekiston Respublikasi Prezidentining 2005-yil 24-martdagi PF–3586-sonli Farmoni 1a-ilovasida koʻrsatilgan qurilish materiallarining yangi turlarini ishlab chiqarish.

5. Parranda goʻshti va tuxumni sanoat miqyosida yetishtirish.

6. Oziq-ovqat sanoati:

mahalliy xom ashyodan sanoat miqyosida qayta ishlangan tayyor oziq-ovqat mahsulotlari ishlab chiqarish (alkogolli, alkogolsiz ichimliklar va tamaki mahsulotlari bundan mustasno).

7. Goʻsht-sut sanoati:

goʻsht va sut mahsulotlarining tayyor turlari, pishloq va sariyogʻ, shuningdek hayvonlarning ichki organlaridan qayta ishlangan mahsulotlar ishlab chiqarish.

8. Baliq va baliq mahsulotlarini qayta ishlash hamda konservalash.

9. Kimyo sanoati.

10. Neft-kimyo sanoati.

11. Tibbiyot sanoati, shuningdek veterinariya uchun dori vositalarini ishlab chiqarish.

12. Qadoqlash materiallarini ishlab chiqarish.

13. Muqobil energiya manbalari negizida elektr stansiyalari qurish.

14. Koʻmir sanoati:

koʻmirni boyitish;

koʻmir briketlarini ishlab chiqarish;

slanets sanoati.

15. Ishlab chiqarishga moʻljallangan elektroferrosplav va metall buyumlarni ishlab chiqarish.

16. Mashinasozlik va metallga ishlov berish:

mashinasozlik;

traktor va qishloq xoʻjalik mashinasozligi;

qurilish, yoʻl va kommunal mashinasozlik;

yengil va oziq-ovqat sanoati hamda maishiy asboblar mashinasozligi.

17. Stanoksozlik va asbobsozlik sanoati.

18. Shisha va chinni-fayans sanoati.

19. Mikrobiologiya sanoati.

20. Oʻyinchoqlar ishlab chiqarish.