Oʻzbekiston Respublikasi Prezidentining “Yoshlarning tadbirkorlik faoliyatini qoʻllab-quvvatlash va bandligiga koʻmaklashish, ularni ijtimoiy himoya qilish hamda boʻsh vaqtini mazmunli tashkil etishga oid qoʻshimcha chora-tadbirlar toʻgʻrisida” 2021-yil 20-apreldagi PF-6208-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Oʻzbekiston Respublikasi Yoshlar ishlari agentligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev va Oʻzbekiston Respublikasi Yoshlar ishlari agentligi direktori A.Z. Saʼdullayev zimmasiga yuklansin.

1. Vazirlar Mahkamasining 2009-yil 11-fevraldagi 40-son qarori (Oʻzbekiston Respublikasi QT, 2009-y., 2-son, 11-modda) bilan tasdiqlangan Kasb-hunar kollejlari oʻquvchilari tomonidan korxonalar, muassasalar va tashkilotlarda ishlab chiqarish amaliyotini oʻtash tartibi toʻgʻrisidagi nizomning 12-bandi:

a) quyidagi mazmundagi uchinchi xatboshi bilan toʻldirilsin:

“oilasi “Temir daftar”ga kiritilgan oʻquvchi yoshlarga ishlab chiqarish va xizmat koʻrsatish korxonalarida olti oydan koʻp boʻlmagan muddatdagi ishlab chiqarish amaliyoti davri uchun Davlat budjeti mablagʻlari hisobidan bazaviy hisoblash miqdorining ikki baravari miqdorida har oylik subsidiya ajratilishini”;

b) uchinchi xatboshi toʻrtinchi xatboshi deb hisoblansin.

2. Vazirlar Mahkamasining “Davlat mulkini ijaraga berish tartibini takomillashtirish chora-tadbirlari toʻgʻrisida” 2009-yil 8-apreldagi 102-son qarori (Oʻzbekiston Respublikasi QT, 2009-y., 4-son, 26-modda) quyidagi mazmundagi 3²-band bilan toʻldirilsin:

“3². “Yoshlar daftari”ga kiritilgan ishsiz yoshlarni ishga qabul qilgan tadbirkorlik subyektlariga davlat mulkini ijaraga olishda ijara toʻlovlari boʻyicha Oʻzbekiston Respublikasi Prezidentining “Yoshlarning tadbirkorlik faoliyatini qoʻllab-quvvatlash va bandligiga koʻmaklashish, ularni ijtimoiy himoya qilish hamda boʻsh vaqtini mazmunli tashkil etishga oid qoʻshimcha chora-tadbirlar toʻgʻrisida” 2021-yil 20-apreldagi PF-6208-son Farmoniga 1-ilovada belgilangan imtiyozlar qoʻllanilishi nazarda tutilsin”.

3. Vazirlar Mahkamasining “Yoshlarni ijtimoiy qoʻllab-quvvatlash boʻyicha qoʻshimcha chora-tadbirlar toʻgʻrisida” 2021-yil 11-martdagi 132-son qarorida:

a) 2-band quyidagi mazmundagi xatboshi bilan toʻldirilsin:

“Bunda, Qoraqalpogʻiston Respublikasi budjeti, viloyatlar va Toshkent shahar mahalliy budjetlarida shakllangan qoʻshimcha manbalarning kamida 15 foizi miqdoridagi mablagʻlar har chorakda tegishli hududning qoʻshimcha manbalari nisbatan kam miqdorda shakllangan tumanlar (shaharlar)ning “Yoshlar daftari”ga kiritilgan yoshlarni qoʻllab-quvvatlash jamgʻarmalariga ushbu jamgʻarmalar Vasiylik kengashining ushbu qarorda belgilangan xarajatlarni qoplashga koʻmaklashish haqidagi talabnomasiga asosan yoʻnaltiriladi”;

b) 3-bandda:

beshinchi xatboshi “bir yilda” soʻzlaridan keyin “30 foizi, biroq” soʻzlari bilan toʻldirilsin;

yettinchi xatboshi quyidagi tahrirda bayon etilsin:

“mamlakatimizdagi professional va oliy taʼlim muassasalarida taʼlim olayotgan “Temir daftar”ga kiritilgan oilalar farzandlarining, shuningdek, “Yoshlar daftariga” kiritilgan yoshlarning toʻlov-kontrakt summasining 50 foizigacha, ammo BHMning 50 baravaridan oshmagan miqdorda toʻlab berishga”;

v) 1-ilovada:

5-bandda:

beshinchi xatboshisi “bir yilda” soʻzlaridan keyin “30 foizi, biroq” soʻzlari bilan toʻldirilsin;

yettinchi xatboshi quyidagi tahrirda bayon etilsin:

“mamlakatimizdagi professional va oliy taʼlim muassasalarida taʼlim olayotgan “Temir daftar”ga kiritilgan oilalar farzandlarining, shuningdek, “Yoshlar daftariga” kiritilgan yoshlarning toʻlov-kontrakt summasining 50 foizigacha, ammo BHMning 50 baravaridan oshmagan miqdorda toʻlab berishga”.

4. Vazirlar Mahkamasining 2021-yil 28-apreldagi 250-son qarori bilan tasdiqlangan “Yoshlar daftari”ni yuritish orqali yoshlarning muammolarini tizimli ravishda hal etish va ularni ijtimoiy qoʻllab-quvvatlash boʻyicha vaqtinchalik tartibda:

a) 2-bandning yettinchi xatboshisi “yoshlarni ijtimoiy qoʻllab-quvvatlash maqsadida” soʻzlaridan keyin “shuningdek, yoshlarning besh tashabbus doirasidagi tadbirlarini moliyalashtirish uchun” soʻzlari bilan toʻldirilsin;

b) 23-band oʻz kuchini yoʻqotgan deb hisoblansin;

v) 25-band “bir yilda” soʻzlaridan keyin “30 foizi, biroq” soʻzlari bilan toʻldirilsin;

g) 30-bandda:

uchinchi xatboshi chiqarib tashlansin;

toʻrtinchi-beshinchi xatboshilar tegishlicha uchinchi-toʻrtinchi xatboshilar deb hisoblansin;

d) 6-paragrafning nomi va 35-band “farzandlarining” soʻzlaridan keyin “, shuningdek, “Yoshlar daftariga” kiritilgan yoshlarning” soʻzlari bilan toʻldirilsin;

e) 36-bandda:

uchinchi xatboshi chiqarib tashlansin;

toʻrtinchi-beshinchi xatboshilar tegishlicha uchinchi-toʻrtinchi xatboshilar deb hisoblansin.