Mamlakat iqtisodiyotidagi bozor islohotlarining axborot-tahliliy taʼminoti, rivojlantirishning makroiqtisodiy, tarmoq va mintaqaviy dasturlarini ishlab chiqish boʻyicha ishlarni yanada takomillashtirish va muvofiqlashtirish, shuningdek, boshqarishning funksional tizimini shakllantirish maqsadida Vazirlar Mahkamasi qaror qiladi:

1. Vazirlar Mahkamasining Umumiqtisodiyot va Hududiy-tashkiliy boʻlimlari negizida shtatdagi xodimlari soni 32 nafardan iborat boʻlgan Oʻzbekiston Respublikasi Vazirlar Mahkamasining Axborot-tahlil boshqarmasi tashkil etilsin.

2. Axborot-tahlil boshqarmasi tuzilmasi, shtatlar jadvali va Boshqarma toʻgʻrisidagi nizom 1, 2 va 3-ilovalarga muvofiq tasdiqlansin.

3. Quyidagilar Axborot-tahlil boshqarmasining asosiy vazifalari etib belgilansin:

bozor islohotlari amalga oshirilishi va ijtimoiy-iqtisodiy vaziyat tizimli va kompleks oʻrganilishini tashkil etish, iqtisodiyotdagi sifat oʻzgarishlarini rivojlantirish, tarkibiy va institutsional oʻzgarishlar tendensiyasini baholash;

muhim iqtisodiy va ijtimoiy muammolar maqsadli dasturlari tahlil qilinishi va ekspert baholanishini taʼminlash hamda ularning amalga oshirilishini nazorat qilish;

kompleks tahlil qilish va umumlashtirish asosida makro darajada, shuningdek, tarmoq va hududlar boʻyicha iqtisodiy va ijtimoiy oʻzgarishlar ahvolini aks ettiruvchi tahliliy materiallarni tayyorlash;

Vazirlar Mahkamasi komplekslari, departamentlari va boʻlimlarining, ijro etuvchi hokimiyat mahalliy organlarining ijtimoiy-iqtisodiy islohotlarni amalga oshirish va maqsadli xamda tarmoqlar, iqtisodiyot sektorlari va hududlarni rivojlantirish kompleks dasturlarini ishlab chiqish masalalaridagi faoliyatini muvofiqlashtirish va ularning izchillik bilan roʻyobga chiqarilishining amaliy nazorat qilinishini taʼminlash;

qisqa muddatli davrda makroiqtisodiy va ijtimoiy siyosat samaradorligini oshirish boʻyicha takliflar hamda oʻrta muddatli va uzoq muddatli davrlarda iqtisodiy islohotlar strategiyasining variantlari boʻyicha takliflar ishlab chiqish.

4. Axborot-tahlil boshqarmasiga quyidagi huquqlar berilsin:

Axborot-tahlil boshqarmasi uchun belgilangan vazifalar doirasida “Oʻzistiqbolstat” davlat qoʻmitasi, Moliya vazirligi, Mehnat vazirligi, Tashqi iqtisodiy aloqalar vazirligi, Markaziy bank va tijorat banklaridan, boshqa vazirliklar va idoralardan zarur statistika va tahliliy axborotlarni, budjet statistikasi va sotsiologik soʻrovlar maʼlumotlarini soʻrash va olish;

Vazirlar Mahkamasining komplekslari, departamentlari va boʻlimlaridan, ijro etuvchi hokimiyat mahalliy organlaridan Axborot-tahlil boshqarmasiga yuklangan vazifalarni amalga oshirish uchun zarur boʻlgan barcha axborotlarni olish;

markaziy iqtisodiyot idoralari xodimlarini, mahalliy va xorijiy ekspertlarni jalb etgan holda maxsus sotsiologik, budjet tekshiruvlarini, tahliliy va axborot tadqiqotlari oʻtkazish boʻyicha vaqtinchalik ekspert tahliliy guruhlarini tuzish;

ijtimoiy-iqtisodiy hamkorlik va axborot-tahliliy tadqiqotlar xalqaro loyihalarida qatnashish;

“Internet” va “Oʻznet” axborot tarmoqlariga toʻgʻridan toʻgʻri ulanish huquqini olish.

6. Axborot-tahlil boshqarmasi:

Oʻzbekiston Respublikasi Prezidentining farmonlari va farmoyishlari, Vazirlar Mahkamasining qarorlari va farmoyishlari, Oliy Majlis sessiyalari materiallari (kelishuv boʻyicha) majburiy ravishda yuboriladigan tashkilotlar roʻyxatiga;

“Oʻzistiqbolstat” davlat qoʻmitasi, Moliya vazirligi, Markaziy bank, Davlat soliq qoʻmitasi, Mehnat vazirligi, Tashqi iqtisodiy aloqalar vazirligi, boshqa vazirliklar va idoralarning statistika axborotlari byulletenlari majburiy ravishda yuboriladigan reyestrga kiritilsin.

7. Oʻzbekiston Respublikasi Moliya vazirligi Axborot-tahlil boshqarmasini kompyuter texnikasi bilan jihozlash, kompyuter aloqasi xalqaro tarmoqlariga ulash boʻyicha xarajatlarni toʻlash uchun, xorijiy va vatanimiz davriy bosma nashrlariga obunani rasmiylashtirish uchun zarur mablagʻlar ajratishni nazarda tutsin.

8. Oʻzbekiston Respublikasi Prezidenti Apparati Ishlar boshqarmasi bir hafta muddatda Axborot-tahlil boshqarmasini joylashtirish masalasini hal qilsin, bunda tegishli infrastruktura va texnika bilan taʼminlash zaruriyatini nazarda tutsin.

9. Axborot-tahlil boshqarmasi boshligʻi maqomiga koʻra Bosh vazir oʻrinbosariga, boshqarma boshligʻining oʻrinbosarlari — boʻlim boshliqlari — Oʻzbekiston Respublikasi vaziriga tenglashtirilsin.

10. Xodimlarning lavozim maoshlariga yuqori malakasi, chet tillarni bilishi, kompyuter texnikasidan foydalangan holda ishlashi uchun mehnatga haq toʻlash fondi doirasida maxsus ustamalar belgilashga ruxsat berilsin.

11. Oʻzbekiston Respublikasi Adliya vazirligi ikki hafta muddatda qonunchilik va boshqa normativ hujjatlarga mazkur qarordan kelib chiquvchi oʻzgartirishlarni kiritish toʻgʻrisida taklif kiritsin.

12. Mazkur qarorning bajarilishini nazorat qilish Oʻzbekiston Respublikasi Bosh vaziri Oʻ. Sultonov zimmasiga yuklansin.

Shtatdagi xodimlar soni 32 kishi (shu jumladan, 3 nafar katta inspektor)

Oʻzbekiston Respublikasi Vazirlar Mahkamasining Axborot-tahlil boshqarmasi (keyingi oʻrinlarda — Boshqarma deb ataladi) Vazirlar Mahkamasining “Oʻzbekiston Respublikasi Vazirlar Mahkamasining Axborot-tahlil boshqarmasini tashkil etish toʻgʻrisida” 1997-yil 16-apreldagi 199-son qaroriga muvofiq tashkil etilgan.

Boshqarma faoliyati mamlakat iqtisodiyotidagi bozor islohotlarini axborot-tahlil taʼminotini amalga oshirishga, markaziy iqtisodiyot idoralari va tarmoq boshqaruv organlarining axborot-tahliliy va prognoz faoliyatini muvofiqlashtirishga, makroiqtisodiy, tarmoq va mintaqaviy rivojlantirish strategiyasini ishlab chiqishga, qisqa muddatli davrda makroiqtisodiy va ijtimoiy siyosat samaradorligini oshirish boʻyicha takliflar hamda oʻrta muddatli va uzoq muddatli davrlarda iqtisodiy islohotlar strategiyasining variantlari boʻyicha takliflar ishlab chiqishga yoʻnaltirilgan.

Boshqarma oʻz faoliyatida Oʻzbekiston Respublikasi Konstitutsiyasiga, qonunlariga va Oliy Majlisning boshqa qarorlariga, Oʻzbekiston Respublikasi Prezidentining farmonlari va farmoyishlariga, Vazirlar Mahkamasining qarorlari va farmoyishlariga, boshqa normativ hujjatlarga va mazkur Nizomga amal qiladi.

Boshqarma tuzilmasiga:

Boshqarma boshligʻi;

Boshqarma boshligʻining oʻrinbosari — Makroiqtisodiy rivojlanish tahlili va strategiyasi boʻlimi boshligʻi;

Budjet-soliq, kredit siyosati va pul muomalasi shuʼbasi;

Xususiylashtirish, kichik va oʻrta tadbirkorlikni rivojlantirish shuʼbasi;

Aholi turmush darajasi shuʼbasi;

Boshqarma boshligʻining oʻrinbosari — Hududlar va tarmoqlarni rivojlantirish dasturlari boʻlimi boshligʻi;

Mintaqalarda iqtisodiy islohotlarni rivojlantirish dasturlari shuʼbasi;

Tarmoq va mikroiqtisodiy rivojlantirish dasturlari shuʼbasi;

Boshqarma boshligʻining yordamchisi kiradi.

Quyidagilar Boshqarmaning asosiy vazifalari hisoblanadi:

bozor islohotlari amalga oshirilishini va ijtimoiy-iqtisodiy vaziyat tizimli va kompleks oʻrganilishini tashkil etish, iqtisodiyotdagi sifat oʻzgarishlarini, rivojlantirish, tarkibiy va institutsional oʻzgarishlar tendensiyalarini baholash;

makro darajada, shuningdek, tarmoqlar va hududlar boʻyicha iqtisodiy islohotlarning borishini kompleks tahlil qilish va umumlashtirish;

Vazirlar Mahkamasi komplekslari, departamentlari va boʻlimlarining, ijro etuvchi hokimiyat mahalliy organlarining iqtisodiy islohotlarning borishini tahlil qilish va tarmoqlar, iqtisodiyot sektorlari va hududlarni rivojlantirish dasturlarini ishlab chiqish masalalaridagi faoliyatini muvofiqlashtirish;

markaziy iqtisodiyot idoralari va tarmoq boshqaruv organlarining axborot-tahliliy va prognoz faoliyatini muvofiqlashtirish asosida makroiqtisodiy ahvol va ijtimoiy vaziyat monitoringini taʼminlash;

makroiqtisodiy va ijtimoiy vaziyat, makro darajada, shuningdek, tarmoqlar va hududlar boʻyicha iqtisodiy islohotlarning borishi, xususiylashtirish va institutsional islohotlarni rivojlantirish, tovarlar, sarmoya, mehnat bozorini shakllantirish, fond bozori faoliyati masalalari boʻyicha tahliliy materiallar tayyorlash;

qisqa muddatli davrda makroiqtisodiy va ijtimoiy siyosat samaradorligini oshirish boʻyicha takliflar hamda oʻrta muddatli va uzoq muddatli davrlarda iqtisodiy islohotlar strategiyasining variantlari boʻyicha takliflar ishlab chiqish;

vazirliklar va idoralar tomonidan tayyorlanadigan muhim iqtisodiy va ijtimoiy muammolarning maqsadli dasturlarini ekspert baholash;

aholini va xalqaro jamoatchilikni Oʻzbekistondagi makroiqtisodiy va ijtimoiy ahvol toʻgʻrisida tanishtirish uchun har xil maqolalar, ommaviy axborot vositalari, xalqaro moliya va boshqa tashkilotlar bilan birgalikda ishlash orqali axborot-tahlil makoni yaratish.

Boshqarma quyidagi huquqlarga ega:

Axborot-tahlil boshqarmasi uchun belgilangan vazifalar doirasida “Oʻzistiqbolstat” davlat qoʻmitasi, Moliya vazirligi, Davlat soliq qoʻmitasi, Mehnat vazirligi, Tashqi iqtisodiy aloqalar vazirligi, Markaziy bank va tijorat banklaridan, boshqa vazirliklar va idoralardan zarur statistika va tahliliy axborotlarni, budjet statistikasi, sotsiologik soʻrovlar maʼlumotlarini soʻrash va olish;

markaziy iqtisodiyot idoralari va tarmoq boshqaruv organlarining tarmoqlar va hududlarini rivojlantirish kompleks dasturlarini ishlab chiqish masalalaridagi axborot-tahliliy va prognoz faoliyatlarini muvofiqlashtirish;

Vazirlar Mahkamasining komplekslari, departamentlari va boʻlimlaridan, ijro etuvchi hokimiyat mahalliy organlaridan Boshqarmaga yuklangan vazifalarni amalga oshirish uchun zarur boʻlgan axborotlarni soʻrash;

Vazirlar Mahkamasining komplekslari va boʻlimlarining, ijro etuvchi hokimiyat mahalliy organlarining iqtisodiy islohotlarning borishi natijalarini tahlil qilish va umumlashtirish, tarmoqlarni, iqtisodiyot sektorlarini va mintaqalarni iqtisodiy rivojlantirish strategiyasini ishlab chiqish masalalari boʻyicha faoliyatini muvofiqlashtirish;

markaziy iqtisodiyot idoralari xodimlarini, mahalliy va xorijiy ekspertlarni jalb etgan holda maxsus sotsiologik, budjet tekshiruvlarini, tahliliy va axborot tadqiqotlari oʻtkazish boʻyicha vaqtinchalik ekspert tahliliy guruhlarini tuzish;

ijtimoiy-iqtisodiy tadqiqotlarga “Oʻzistiqbolstat” davlat qoʻmitasi, Davlat mulki qoʻmitasi, Moliya vazirligi, Mehnat va aholini ijtimoiy muhofaza qilish vazirligi, Markaziy bank va boshqalar huzuridagi ilmiy-tadqiqot institutlari va markazlar xodimlarini jalb qilish;

xalqaro konferensiyalar, kongresslar, simpoziumlar va yigʻilishlar ishida, shuningdek, ijtimoiy-iqtisodiy hamkorlik va axborot-tahliliy tadqiqotlar xalqaro loyihalarida qatnashish;

Boshqarma vakolatiga kiruvchi masalalar boʻyicha respublika vazirliklari, idoralari, boshqaruv va hokimiyat mahalliy organlari, xorijiy davlatlar tadqiqot va statistika tashkilotlari bilan mustaqil ravishda yozishmalar olib borish;

“Internet” va “Oʻznet” axborot tarmoqlariga ulanish.

Boshqarma:

Vazirlar Mahkamasi rahbariyati koʻrib chiqishi uchun mamlakat ijtimoiy-iqtisodiy rivojlanishi tendensiyalarini tavsiflovchi tahliliy materiallar taqdim etishga;

qisqa muddatli, oʻrta muddatli va uzoq muddatli istiqbolda ijtimoiy-iqtisodiy rivojlantirish strategiyasi variantlari boʻyicha takliflar ishlab chiqishga;

respublikani ijtimoiy-iqtisodiy rivojlantirish dasturlarining, shuningdek, tarmoqlarni, iqtisodiyot sektorlarini va hududlarni rivojlantirishning maqsadli va kompleks dasturlari amalga oshirilishi ustidan amaliy nazoratni taʼminlashga;

ijtimoiy-iqtisodiy islohotlarni yanada chuqurlashtirishga yoʻnaltirilgan qonunchilik va normativ hujjatlar loyihalarini puxta ishlab chiqishga majburdir.

Boshqarma oʻz faoliyatini Vazirlar Mahkamasi rahbariyati bilan kelishilgan va Boshqarma boshligʻi tomonidan tasdiqlanadigan yillik va choraklik ish rejalari asosida amalga oshiradi.

Boshqarma oʻz ishini Vazirlar Mahkamasi komplekslari, departamentlari va boʻlimlari, vazirliklar va idoralar, iqtisodiyot idoralari institutlari va markazlari hamda xalqaro moliya va boshqa tashkilotlar faoliyatini muvofiqlashtirish asosida tashkil etadi.

Boshqarma boshligʻi:

Boshqarmaga yuklangan vazifalarning bajarilishi uchun shaxsan javob beradi;

Boshqarmaning axborot-tahliliy faoliyatida olingan natijalarni Vazirlar Mahkamasi rahbariyatiga yetkazadi;

Boshqarma boshligʻi oʻrinbosarlari — boʻlim boshliqlari oʻrtasida vazifalarni taqsimlaydi, ularning bajarilishini nazorat qiladi;

Boshqarma xodimlari tomonidan davlat va mehnat intizomiga rioya qilinishini taʼminlaydi.

Boshqarma boshligʻi quyidagi huquqlarga ega:

Boshqarmaga yuklangan vazifalar doirasida va uning vakolatiga kiruvchi uning joriy faoliyati masalalari yuzasidan mustaqil ravishda qaror qabul qilish;

Boshqarmaga yuklangan vazifalar doirasida vazirliklar, idoralar, uyushmalar, konsernlar, korporatsiyalar, hududiy boshqaruv organlaridan tarmoqlarda va mintaqalarda ijtimoiy-iqtisodiy islohotlarni amalga oshirish yuzasidan qabul qilingan qarorlar oʻz vaqtida sifatli bajarilishini talab qilishga, shuningdek, ularning bajarilishi boʻyicha tezkor va statistika axborotini soʻrashga haqlidir;

Vazirlar Mahkamasi rahbariyatiga Boshqarmaga ishga tavsiya qilinayotgan nomzodlar toʻgʻrisida hamda Boshqarma xodimlarining lavozim maoshlariga shaxsiy ustamalar miqdorlarini belgilash haqida takliflar kiritish;

Bosh vazir bilan kelishgan holda Boshqarma tuzilmasini oʻzgartirish boʻyicha takliflar kiritish;

Boshqarma xodimlarining xalqaro konferensiyalar, seminarlar, simpoziumlarda, ham respublikada, ham chet ellarda malaka oshirish kurslarida qatnashishi masalasini belgilangan tartibda hal qilish;

Boshqarma tomonidan oʻz vakolatlari doirasida tayyorlangan joʻnatiluvchi xat-xabarlarni imzolash.