Qimmatli qogʻozlar bozorini tartibga solish va korporativ boshqaruv sohasidagi islohotlarni yanada chuqurlashtirish, shuningdek, Oʻzbekiston Respublikasi Prezidentining 2021-yil 13-apreldagi “Kapital bozorini rivojlantirish chora-tadbirlari toʻgʻrisida”gi PF-6207-son Farmoni va 2021-yil 3-apreldagi “Davlat hokimiyati va boshqaruvi organlarining tuzilmasini maqbullashtirish va shtat birliklari sonini qisqartirish toʻgʻrisida”gi PQ-5053-son qarori ijrosini taʼminlash maqsadida:

1. 2021-yil 1-maydan boshlab:

Kapital bozorini rivojlantirish agentligi tugatilsin;

tugatilayotgan Kapital bozorini rivojlantirish agentligining qimmatli qogʻozlar bozorini, shu jumladan qimmatli qogʻozlar savdosining tashkilotchilari va Qimmatli qogʻozlar markaziy depozitariysini tartibga solish, shuningdek, korporativ boshqaruvni rivojlantirish hamda lotereyalarni tashkil etish faoliyati boʻyicha vazifa, funksiya va vakolatlari Moliya vazirligiga oʻtkazilsin.

2. Moliya vazirligiga kapital bozorini rivojlantirish sohasida quyidagi vazifalar yuklatilsin:

qimmatli qogʻozlar bozorini shakllantirish, rivojlantirish, tartibga solish, nazorat qilish va korporativ boshqaruv sohasida yagona davlat siyosatini amalga oshirish;

qimmatli qogʻozlar amaliyoti bilan shugʻullanuvchi investorlar hamda qimmatli qogʻozlar egalarining huquqlari va qonuniy manfaatlari himoya qilinishini taʼminlash;

qimmatli qogʻozlar bozori, aksiyadorlik jamiyatlari va aksiyadorlarning huquqlarini himoya qilish toʻgʻrisidagi qonun hujjatlariga rioya qilinishini nazorat qilish;

mahalliy kapital bozorining rivojlanish holati va uning professional qatnashchilari toʻgʻrisida investorlar va jamoatchilikni xabardor qilish;

qimmatli qogʻozlar savdosining tashkilotchilari va qimmatli qogʻozlar bozoridagi professional ishtirokchilarning faoliyatini, shuningdek, bukmekerlik va lotereyalarni tashkil etish faoliyatini tartibga solish;

qimmatli qogʻozlar bozorini tartibga solish sohasida normativ-huquqiy hujjatlar ishlab chiqish, professional ishtirokchilarning mutaxassislarini attestatsiyadan oʻtkazish va malaka guvohnomalarini berish;

qimmatli qogʻozlarni chiqarish va roʻyxatdan oʻtkazish, ular yuzasidan hisobot berish hamda qimmatli qogʻozlar egalarining reyestrlarini va qimmatli qogʻozlarga doir bitimlarni hisobga olish reyestrini yuritish talablarini belgilash;

oʻz mablagʻlari yetarli darajada boʻlishiga doir majburiy normativlarni va qimmatli qogʻozlarga doir operatsiyalar boʻyicha tavakkalchiliklarni cheklovchi koʻrsatkichlarni oʻrnatish;

qimmatli qogʻozlar bozorining holati va uning ishtirokchilari haqida, shuningdek, qonunchilikda nazarda tutilgan maʼlumotlar oshkoraligini taʼminlash orqali jamoatchilikni xabardor qilish;

kapital bozorini rivojlantirish va tartibga solish masalalari boʻyicha xorijiy va xalqaro institutlar bilan samarali hamkorlik qilish.

3. Tugatilayotgan Kapital bozorini rivojlantirish agentligining jami 110 nafar shtat birligi (shundan, 90 nafar boshqaruv xodimi) hisobidan Moliya vazirligining markaziy apparati tuzilmasida boshqaruv xodimlari cheklangan soni 54 nafardan (shundan, 16 nafar hududlarda faoliyat koʻrsatuvchi markaziy apparat xodimlari) iborat Kapital bozorini rivojlantirish departamenti tashkil etilsin.

4. Belgilansinki:

Kapital bozorini rivojlantirish departamentining oʻz faoliyatini bevosita hududlarda olib boradigan xodimlari mehnatga haq toʻlash shartlari boʻyicha Moliya vazirligi markaziy apparati xodimlariga tenglashtiriladi va ushbu xodimlarning hududlardagi faoliyati bilan bogʻliq xarajatlar Moliya vazirligi tomonidan moliyalashtiriladi;

Moliya vazirligi Kapital bozorini rivojlantirish agentligining barcha huquqlari, majburiyatlari va shartnomalari boʻyicha huquqiy vorisi hisoblanadi;

Kapital bozorini rivojlantirish agentligi tomonidan avval berilgan hujjatlar va ilgari qabul qilingan qarorlar oʻz kuchini saqlab qoladi va ushbu organni tugatish munosabati bilan ularni bekor qilish yoki oʻzgartirish talab etilmaydi;

Kapital bozorini rivojlantirish agentligi va uning hududiy boshqarmalarida koʻrib chiqish jarayonida boʻlgan hujjatlar (tegishli faoliyatni litsenziyalash, qimmatli qogʻozlar chiqarishni roʻyxatga olish, murojaatlar va boshqa hujjatlar) 2021-yil 1-maydan boshlab Moliya vazirligiga oʻtkaziladi va koʻrib chiqish natijalari Moliya vazirligi tomonidan rasmiylashtiriladi;

Kapital bozorini rivojlantirish departamenti shtatlari birinchi navbatda tugatilayotgan Kapital bozorini rivojlantirish agentligi tizimi xodimlari hisobidan butlanadi;

5. 2021-yil 1-maydan boshlab quyidagi mablagʻlar Moliya vazirligining budjetdan tashqari jamgʻarmasiga yoʻnaltirilsin:

fond birjasida qimmatli qogʻozlar savdosini amalga oshirishda sotuvchi tomonidan toʻlanadigan yigʻim;

emissiyaviy qimmatli qogʻozlarning dastlabki chiqarilishini davlat roʻyxatidan oʻtkazish uchun toʻlanadigan yigʻim;

emissiyaviy qimmatli qogʻozlarni yiriklashtirish jarayonida ularning nominal qiymati oshirilganda emitent tomonidan toʻlanadigan yigʻim;

qimmatli qogʻozlarning chiqarilishini davlat roʻyxatidan oʻtkazish va (yoki) avval roʻyxatdan oʻtgan qimmatli qogʻozlarning chiqarilishiga oʻzgartirishlar boʻyicha hujjatlar koʻrib chiqilganligi uchun toʻlanadigan yigʻim;

lotereyalarni tashkil etish faoliyatini tartibga solish bilan bogʻliq yigʻimlar;

qimmatli qogʻozlar bozorida operatsiyalarni oʻtkazish huquqini beruvchi malaka attestatini olishga talabgorlarni (jismoniy shaxslarni) attestatsiyadan (qayta attestatsiyadan) oʻtkazish uchun undiriladigan yigʻim;

qimmatli qogʻozlar savdosining tashkilotchilari va qimmatli qogʻozlar bozoridagi professional ishtirokchilarning faoliyatini amalga oshirishi uchun litsenziya olish toʻgʻrisidagi arizalarni koʻrib chiqish uchun undiriladigan yigʻim;

belgilangan tartibda Moliya vazirligi tomonidan undiriladigan boshqa yigʻimlar.

6. Bosh vazir oʻrinbosari J.A. Qoʻchqorov, Moliya vazirligi (T.A. Ishmetov) 2021-yil 1-mayga qadar:

Kapital bozorini rivojlantirish agentligi huzuridagi Kapital bozorini rivojlantirishga koʻmaklashish jamgʻarmasining hamda rivojlantirish jamgʻarmasining qoldiq mablagʻlari Moliya vazirligining budjetdan tashqari jamgʻarmasiga oʻtkazilishini;

Kapital bozorini rivojlantirish agentligi mol-mulkining Moliya vazirligiga topshirilishini taʼminlasin.

7. Moliya vazirligining Kapital bozorini rivojlantirish departamenti Toshkent shahri, Mustaqillik shoh koʻchasi, 107-uy manziliga joylashtirilsin va ushbu bino birinchi qavatining chap qanoti va tegishli yertoʻla qismi Moliya vazirligiga operativ foydalanish huquqi asosida biriktirilsin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Moliya vazirligi Kapital bozorini rivojlantirish departamentining hududiy shuʼbalari xodimlari Kapital bozorini rivojlantirish agentligi hududiy boshqarmalarining hozirgi joylashuvi boʻyicha binolarda (xonalarda) joylashtirilishini taʼminlasin.

8. Moliya vazirligi (T.A. Ishmetov) manfaatdor vazirlik va idoralar bilan birgalikda ikki oy muddatda:

Oʻzbekiston Respublikasining “2021-yil uchun Oʻzbekiston Respublikasining Davlat budjeti toʻgʻrisida”gi Qonuniga mazkur qarordan kelib chiqadigan oʻzgartishlar kiritishni nazarda tutuvchi qonun loyihasini;

qonunchilikka mazkur qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

9. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.