Qayd etilsinki, keyingi yillarda kommunal xoʻjaligini isloh qilish, uy-joy fondidan foydalanish va unga xizmat koʻrsatish tizimiga bozor mexanizmlarini joriy etish boʻyicha zarur qonunchilik va normativ-huquqiy baza yaratildi, uy-joy mulkdorlari bilan kommunal xizmat koʻrsatuvchilar oʻrtasida shartnomaviy munosabatlar mustahkamlanmoqda.

Shu bilan birga uy-joy mulkdorlari shirkatlarini tashkil qilish jarayoni va ularning faoliyati yuzaki olib borilmoqda, amalda tasodifiy kishilar ixtiyoriga berib qoʻyilgan, koʻp xonadonli uy-joy fondidan foydalanish va ularni saqlash nihoyatda qoniqarsiz ahvolda, koʻrsatilgan kommunal xizmatlar uchun isteʼmolchilarning toʻlov intizomi hamon pastligicha qolmoqda.

Uy-joy mulkdorlari shirkatlarining faoliyatini yanada takomillashtirish, ularning mahalliy hokimiyat organlari hamda xizmat koʻrsatuvchi ekspluatatsiya va taʼmirlash tashkilotlari bilan oʻzaro hamkorligini kuchaytirish maqsadida:

1. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining shaharlar—viloyat markazlarida, Toshkent shahri tumanlarida, shuningdek aholisi 60 ming kishidan oshadigan, koʻp xonadonli uylarga ega boʻlgan shaharlarda Uy-joy mulkdorlari shirkatlarining uyushmalarini (bundan buyon matnda UMSH Uyushmalari deb yuritiladi) tashkil etish toʻgʻrisidagi takliflari qabul qilinsin.

Belgilab qoʻyilsinki, tashkil etiladigan UMSH Uyushmalarining muassislari tarkibiga uy-joy mulkdorlarining shirkatlari (bundan buyon matnda — UMSH deb yuritiladi), kommunal xizmat koʻrsatuvchi tashkilotlarning taʼmirlash-qayta tiklash, avariya xizmatlari, shuningdek tegishli hududlardagi koʻp xonadonli uy-joy fondidan foydalanish va taʼmirlash bilan shugʻullanuvchi boshqa pudrat tashkilotlari kiradilar.

2. Quyidagilar UMSH Uyushmalarining asosiy vazifalari etib belgilansin:

uy-joylar hamda uylar yaqin atrofidagi hududlarni texnikaviy va sanitariya jihatdan yaxshi holatda saqlash, uy-joy fondini kuz-qish fasliga tayyorlash va undan foydalanish masalalarida UMSHning mahalliy davlat hokimiyati organlari bilan oʻzaro hamkorligini taʼminlash;

uy-joy fondining texnikaviy holatini saqlash, uy-joylarni kapital va joriy taʼmirlash, shuningdek avariya-qayta tiklash ishlarini oʻtkazish masalalari boʻyicha UMSHning ekspluatatsiya, avariya-taʼmirlash va xizmat koʻrsatish korxonalari bilan oʻzaro munosabatlarini takomillashtirish;

UMSHning moddiy-texnika resurslari va sifatli uy-joy kommunal xizmatlariga boʻlgan talab-ehtiyojlarini qondiradigan toʻlaqonli bozor infratuzilmasini tashkil qilishga koʻmaklashish;

UMSHning qonuniy huquq va manfaatlarini himoya qilishda yordam koʻrsatish;

uy-joy mulkdorlari shirkatlarining kadrlari hamda rahbarlarini tayyorlash va qayta tayyorlashni tashkil qilish.

Oʻzbekiston Respublikasi Vazirlar Mahkamasining Kommunal soha, transport, kapital qurilish, qurilish industriyasi masalalari boʻyicha axborot-tahlil departamenti, “Oʻzkommunxizmat” Agentligi, Adliya vazirligi bir oy muddatda UMSH shahar va tuman Uyushmalarining Namunaviy nizomini ishlab chiqsin va belgilangan tartibda tasdiqlasin.

3. Quyidagilar tasdiqlansin;

1 va 2-ilovalarga* muvofiq shahar, tuman Uy-joy mulkdorlari shirkatlari uyushmasining namunaviy tashkiliy tuzilmasi va boshqaruv apparati tuzilmasi;

3-ilovaga* muvofiq uy-joy mulkdorlari shirkatlarini davlat roʻyxatiga olish tartibi va hisobga qoʻyish toʻgʻrisidagi nizom.

Belgilansinki, Uyushmaga kiruvchi uy-joy mulkdorlari shirkatlarining rahbarlari, taʼmirlash-qayta tiklash va avariya xizmatlarining, uy-joylardan foydalanish va kommunal xizmat koʻrsatish korxonalari (tashkilotlari)ning vakillari UMSH Uyushmalari aʼzolari umumiy yigʻilishining qatnashchilari hisoblanadilar.

4. Qoraqalpogʻiston Respublikasi Vazirlar Kengashi, viloyatlar, shahar va tumanlar hokimliklari zimmasiga UMSH Uyushmalari bilan ishlarni muvofiqlashtirish va oʻzaro hamkorlik qilish boʻyicha quyidagi vazifa hamda vakolatlar yuklatilsin:

uy-joy fondidan foydalanish, joriy va kapital taʼmirlashni oʻz vaqtida amalga oshirish masalalarida UMSH faoliyati samaradorligini muntazam tahlil qilib borish;

koʻp xonadonli uy-joy fondida oʻtkaziladigan taʼmirlash-qayta tiklash ishlarining tasdiqlangan qurilish norma va qoidalariga muvofiqligini nazorat qilish;

UMSH tomonidan amaldagi qonunchilik buzilganligi aniqlangan hollarda uy-joy mulkdorlarining navbatdan tashqari yigʻilishlarini chaqirish;

UMSH raislari va ijrochi direktorlarini tayinlash toʻgʻrisida tavsiyanomalar, shuningdek ularni uy-joy mulkdorlarining qonuniy huquq va manfaatlariga rioya etmagan, amaldagi qonunchilikni buzgan taqdirda lavozimidan ozod qilish toʻgʻrisida takliflar kiritish.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari shahar va tumanlarda uy-joy kommunal xoʻjaligi masalalariga mutasaddilik qiluvchi hokim oʻrinbosari boshchiligida uy-joy fondini saqlash monitoringi Komissiyalarini tuzsinlar, ularning tarkibiga kadastr, soliq, moliya xizmatlarining, arxitektura-qurilish nazorati, ichki ishlar organlarining, mahallalar, UMSH Uyushmalarining vakillarini jalb etsinlar.

6. Oʻzbekiston Respublikasi Bosh vazirining oʻrinbosari A.Oʻ. Toʻxtayev, Vazirlar Mahkamasining Kommunal soha, transport, kapital qurilish, qurilish industriyasi masalalari boʻyicha axborot-tahlil departamenti Oʻzbekiston Respublikasi Oliy va oʻrta maxsus taʼlim vazirligi, “Oʻzkommunxizmat” Agentligi, Qoraqalpogʻiston Respublikasi Vazirlar Kengashi, viloyat, shahar va tumanlar hokimliklari, UMSH Uyushmalari bilan birgalikda 2005-yilning birinchi yarmida UMSH rahbar xodimlarini, jumladan tarmoq kollejlari bazasida oʻqitishni tashkil qilsinlar.

7. Oʻzbekiston Respublikasi Prezidentining 2004-yil 5-iyuldagi F–1992-son Farmoyishi bilan tuzilgan Ishchi guruh (R.S. Azimov), Qoraqalpogʻiston Respublikasi Vazirlar Kengashi, viloyatlar, Toshkent shahri, shahar va tumanlarning hokimliklari:

2005-yilning fevral-mart oylarida bitta UMSHga birlashtiriladigan xonadonlar (uylar) sonini qayta koʻrib chiqish va maqbullashtirish maqsadida koʻp xonadonli uylardagi uy-joy egalarining navbatdan tashqari yigʻilishlarini oʻtkazishni taʼminlasin;

2005-yilning 1-apreliga qadar muddatda UMSH hududiy uyushmalarining taʼsis yigʻilishlarini oʻtkazsin;

2005-yilning 1-mayiga qadar muddatda tuzilayotgan UMSH Uyushmalarini zarur xonalar, anjomlar, shuningdek tashkiliy texnika bilan taʼminlasin.

8. Shunday tartib oʻrnatilsinki, bunda:

1991-yilgacha boʻlgan davrda qurilgan koʻp xonadonli uy-joy binolarini kapital taʼmirlash dasturlariga uy-joy mulkdorlari shirkatlari tomonidan uy-joy binosini kapital taʼmirlash umumiy smeta qiymatining kamida 30 foizi hajmida moliyalashtirilgan uylar kiritiladi;

koʻp xonadonli uy-joy binolarida joylashgan boshqa maqsadlarda foydalanilayotgan xonalarning egalari turar-joy binosining umumiy mulkini saqlash va taʼmirlashda ishtirok etishlari majburiydir.

Oʻzbekiston Respublikasi Moliya vazirligi, Qoraqalpogʻiston Respublikasi Vazirlar Kengashi, viloyatlar, Toshkent shahri, shahar va tumanlar hokimliklari mahalliy budjetlarga rejadan ortiqcha tushgan mablagʻlar hisobidan taʼmirlash-qayta tiklash ishlari uchun UMSHga budjetdan ssudalar bersin.

9. Oʻzbekiston Respublikasi “Davarxitektqurilish” qoʻmitasi “Oʻzkommunxizmat” Agentligi, “Sanoatkontexnazorat”, Iqtisodiyot vazirligi, Moliya vazirligi bilan birgalikda uch oy muddatda belgilangan tartibda quyidagilarni ishlab chiqsin va tasdiqlasin:

koʻp xonadonli uylarda xonalarni rekonstruksiyalash, oʻzgartirish va qayta uskunalash boʻyicha binolar xavfsizligini taʼminlaydigan qurilish norma va qoidalari;

har bir xonadonda sovuq va issiq suv uchun bittadan oshmaydigan hisoblagich asbob oʻrnatilishini koʻzda tutadigan uy ichi va xonadon ichi kommunal tarmoqlarining sxemalari eng maqbul boʻlgan koʻp xonadonli uylarning namunaviy loyihalari.

10. Qoraqalpogʻiston Respublikasi Vazirlar Kengashi, viloyatlar hokimliklari uch oy muddatda:

hududiy kommunal-foydalanish birlashmalarini tugatib, ularning vazifalarini kommunal xizmatini rivojlantirish masalalariga masʼul boʻlgan hokim oʻrinbosari kotibiyati ixtiyoriga topshirsinlar;

viloyat “Kommundrenaj” ishlab chiqarish korxonalarini shahar va tuman hokimliklari bilan shartnomalar asosida ixtisoslashtirilgan drenaj ishlarini bajaruvchi pudrat korxonalariga aylantirsinlar.

Shahar va tumanlarni obodonlashtirish, koʻchalarni yoritish, drenaj ishlarini bajarish masalalari nodavlat mulkchilik shaklida barpo etilayotgan korxonalar tomonidan mahalliy hokimiyat organlari, UMSH Uyushmalari, uy-joy mulkdorlari shirkatlari bilan shartnoma asosida hal etilishi belgilab qoʻyilsin.

11. Oʻzbekiston Respublikasi Adliya vazirligi “Oʻzkommunxizmat” Agentligi, Iqtisodiyot vazirligi, Moliya vazirligi hamda boshqa manfaatdor vazirliklar va idoralar bilan birgalikda quyidagilarni Vazirlar Mahkamasiga kiritsin:

bir oy muddatda amaldagi qonunchilikka ushbu qarordan kelib chiqadigan oʻzgartirish va qoʻshimchalar kiritish toʻgʻrisida takliflar;

ikki oy muddatda — “Uy-joy mulkdorlari shirkatlari toʻgʻrisida” Oʻzbekiston Respublikasining yangi tahrirdagi Qonuni loyihasi.

12. Ushbu qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklatilsin.