Koronavirus pandemiyasi sharoitida ijtimoiy ahvoli va turmush sharoiti og‘irlashgan oilalarning bandligini ta’minlash orqali ularga daromad manbaini yaratish hamda Namangan viloyatidagi kichik sanoat zonalarini rivojlantirishni moliyaviy resurslar bilan ta’minlash maqsadida:

1. O‘zbekiston Respublikasi Iqtisodiy taraqqiyot va kambag‘allikni qisqartirish vazirligi hamda Moliya vazirligining Tiklanish va taraqqiyot jamg‘armasidan (keyingi o‘rinlarda — Jamg‘arma):

a) “Har bir oila — tadbirkor” dasturi uchun qo‘shimcha ravishda 98 million AQSH dollari ekvivalentidagi mablag‘larni:

“Agrobank” ATBga — 40 million AQSH dollari ekvivalentida;

AT Xalq bankiga — 30 million AQSH dollari ekvivalentida;

“Mikrokreditbank” ATBga — 28 million AQSH dollari ekvivalentida;

b) mikromoliyaviy xizmatlar ko‘rsatuvchi tashkilotlar hamda nodavlat notijorat tashkilotlariga yoshlar va xotin-qizlarni kichik tadbirkorlikka jalb qilish loyihalarini qo‘llab-quvvatlashga — 2 million AQSH dollari ekvivalentida;

v) Namangan viloyatidagi kichik sanoat zonalari faoliyatini yanada rivojlantirish uchun Namangan viloyati hokimligiga 50 million AQSH dollari ajratish haqidagi takliflariga rozilik berilsin.

2. Belgilab qo‘yilsinki:

a) mazkur qarorga asosan ajratilgan mablag‘lardan foydalanish mos ravishda:

O‘zbekiston Respublikasi Prezidentining 2019-yil 24-oktabrdagi “Oilaviy tadbirkorlikni rivojlantirish davlat dasturlari doirasida amalga oshirilayotgan loyihalarni kreditlash tartibini takomillashtirishning qo‘shimcha chora-tadbirlari to‘g‘risida”gi PQ-4498-son qarorida belgilangan tartib va shartlarda Jamg‘arma hamda vakolatli banklar o‘rtasida tuzilgan kredit shartnomalariga tegishli o‘zgartirish va qo‘shimchalar kiritish orqali amalga oshiriladi;

Jamg‘arma hamda O‘zbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondi o‘rtasida tuziladigan shartnoma orqali amalga oshiriladi;

Namangan viloyatida yangi kichik sanoat zonalarida infratuzilmani shakllantirish va tadbirkorlikni qo‘llab-quvvatlash, shu jumladan Namangan shahridagi “Yuksalish” kichik sanoat zonasi hududida 2020-2021-yillarda polimer, yengil sanoat, elektr texnikasi, kimyo va qurilish mahsulotlarini xalqaro talablar asosida sinov o‘tkazadigan laboratoriya, moliya, transport-logistika xizmatlarini o‘z ichiga oladigan kompleks xizmatlar markazini tashkil etish maqsadlariga yo‘naltiriladi;

b) Namangan viloyatiga kichik sanoat zonalari faoliyatini yanada rivojlantirish uchun ajratilgan mablag‘lardan foydalanish tartibi O‘zbekiston Respublikasi Vazirlar Mahkamasi tasdiqlaydigan Kengash tomonidan belgilanadi.

3. O‘zbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondi, Markaziy banki, Bandlik va mehnat munosabatlari vazirligi ikki hafta muddatda mikromoliyaviy xizmatlar ko‘rsatuvchi tashkilotlar hamda nodavlat notijorat tashkilotlariga yoshlar va xotin-qizlarni tadbirkorlikka jalb qilish loyihalarini qo‘llab-quvvatlash uchun mablag‘larni ajratish tartibini Vazirlar Mahkamasiga kiritsin.

4. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari J.A. Qo‘chqorov va O‘zbekiston Respublikasi Markaziy banki raisi M.B. Nurmuratov zimmasiga yuklansin.