Hududlarning tuproq-iqlim sharoitlarini inobatga olgan holda ingichka tolali g‘o‘zaning tola sifati yuqori bo‘lgan, kasallik va zararkunandalarga chidamli, tezpishar, serhosil navlarini yaratish, ularning ekin maydonlarini kengaytirish, yangi va istiqbolli navlari urug‘larini ko‘paytirish hamda yetishtirish agrotexnologiyalarini ishlab chiqishni rag‘batlantirish mexanizmini joriy etish maqsadida Vazirlar Mahkamasi qaror qiladi:

1. O‘zbekiston Respublikasi Qishloq xo‘jaligi vazirligi, Iqtisodiyot va sanoat vazirligi, Moliya vazirligi va “O‘zto‘qimachiliksanoat” uyushmasining:

2020-yil hosilidan boshlab Surxondaryo, Qashqadaryo, Buxoro va Navoiy viloyatlarida ingichka tolali g‘o‘za navlarini joylashtirish va yetishtirishni keng yo‘lga qo‘yish;

ingichka tolali g‘o‘zaning “istiqbolli nav” sifatida ekib kelinayotgan navlarini ularning ishlab chiqarishdagi ko‘rsatkichlaridan kelib chiqqan holda O‘zbekiston Respublikasi hududida ekish uchun tavsiya qilingan qishloq xo‘jaligi ekinlarining davlat reyestriga (keyingi o‘rinlarda davlat reyestri deb ataladi) kiritish;

Surxondaryo viloyatida 40 ming gektar maydonda ingichka tolali g‘o‘za navlarini ilmiy asoslangan holda joylashtirish;

Qashqadaryo viloyatida 6 500 gektar, Buxoro viloyatida 5 000 gektar, Navoiy viloyatida 1 000 gektar maydonga ingichka tolali g‘o‘za navlarini joylashtirish va keng ishlab chiqarish sinovini olib borish, ijobiy natijalar olingan taqdirda yetishtirilgan paxta hosilini qayta ishlash uchun zamonaviy texnologiyalar bilan jihozlangan qayta ishlash korxonalarini tashkil etish to‘g‘risidagi takliflari ma’qullansin.

2. O‘zbekiston Respublikasi Qishloq xo‘jaligi vazirligi va Vazirlar Mahkamasi huzuridagi Agrosanoat majmui ustidan nazorat qilish inspeksiyasiga har yilgi talabdan kelib chiqqan holda:

dastlabki elita-urug‘chilik xo‘jaliklarida ko‘paytirilayotgan ingichka tolali g‘o‘zaning ertapishar, tola hosildorligi va sifati yuqori bo‘lgan navlarining original urug‘larini izchil ko‘paytirish hamda yangi va istiqbolli navlar orasidan eng yaxshilarini tanlab borish. Bunda ekish uchun tavsiya qilinayotgan ingichka tolali g‘o‘za navlarining nav tozaligiga alohida e’tibor qaratish;

respublika hududlarining tuproq-iqlim sharoitiga mos, ertapishar, tola hosildorligi va sifati yuqori bo‘lgan ingichka tolali g‘o‘za navlaridan yetarli miqdorda urug‘lik materiallarini tayyorlash;

urug‘liklarni yetishtirish sxemalarining texnologik talablariga muvofiq ingichka tolali g‘o‘za navlarining sifatli urug‘lik paxta xomashyosini va chigitlarini ishlab chiqarish vazifalari yuklansin.

3. O‘zbekiston Respublikasi Qishloq xo‘jaligi vazirligi Innovatsion rivojlanish vazirligi bilan birgalikda ikki oy muddatda Paxta seleksiyasi, urug‘chiligi va yetishtirish agrotexnologiyalari ilmiy-tadqiqot institutida “Ingichka tolali g‘o‘za navlari seleksiyasi va urug‘chiligi” laboratoriyasini tashkil etsin va uning faoliyatini yo‘lga qo‘ysin.

4. O‘zbekiston Respublikasi Innovatsion rivojlanish vazirligi, Fanlar akademiyasi, Qishloq xo‘jaligi vazirligi huzuridagi Qishloq xo‘jaligi va oziq-ovqat ta’minoti ilmiy-ishlab chiqarish markazi bir oy muddatda ingichka tolali g‘o‘za navlari genetikasi, seleksiyasi, urug‘chiligi va yetishtirish agrotexnologiyalarini va ingichka tolali paxta xomashyosini tozalash uskunalarini takomillashtirish bo‘yicha davlat ilmiy dasturlari grant tanlovlarini o‘tkazsin va tanlov g‘olibi bo‘lgan ilmiy loyihalarning 2020-yildan boshlab moliyalashtirilishini ta’minlasin.

5. O‘zbekiston Respublikasi Qishloq xo‘jaligi vazirligi, “O‘zto‘qimachiliksanoat” uyushmasi bir oy muddatda paxta-to‘qimachilik ishlab chiqarishlari va klasterlar bilan ilmiy-tadqiqot institutlari o‘rtasida ilmiy va amaliy hamkorlik qilish bo‘yicha shartnoma tuzish mexanizmini ishlab chiqsin va joriy etsin.

6. O‘zbekiston Respublikasi Qishloq xo‘jaligi vazirligi Innovatsion rivojlanish vazirligi bilan birgalikda respublikada yaratilgan g‘o‘za navlari originatorlari tizimidagi dastlabki elita urug‘chilik xo‘jaliklari hamda ingichka tolali g‘o‘zaning davlat reyestriga kiritilgan va istiqbolli navlari urug‘larini ko‘paytirish bilan shug‘ullanuvchi elita urug‘chilik xo‘jaliklarining faoliyati samaradorligini oshirish va ularning laboratoriyalarini zamonaviy asbob-uskunlar bilan jihozlash chora-tadbirlarini ko‘rsin.

7. Mazkur qarorning bajarilishini nazorat qilish O‘zbekiston Respublikasi Bosh vazirining Agrar va oziq – ovqat sohalarini rivojlantirish masalalari bo‘yicha maslahatchisi A.D. Vaxabov va O‘zbekiston Respublikasi qishloq xo‘jaligi vaziri J.A. Xodjayev zimmasiga yuklansin.