Vazirlar Mahkamasi qaror qiladi:

1. O‘zbekiston Respublikasi Mehnat vazirligining Mehnatni muhofaza qilish boshqarmasi to‘g‘risidagi ilova qilinayotgan Nizom tasdiqlansin.

2. Mehnat vazirligining Toshkent mehnatni muhofaza qilish ilmiy-tadqiqot institutiga respublika tashkiloti maqomini berish to‘g‘risidagi taklifi qabul qilinsin.

1. O‘zbekiston Respublikasi Vazirlar Mahkamasining “Mehnatni muhofaza qilishni davlat tomonidan boshqarish to‘g‘risida” 1994-yil 7-noyabrdagi 538-son qaroriga muvofiq O‘zbekiston Respublikasi Mehnat vazirligi mehnatni muhofaza qilishni davlat tomonidan boshqarish masalalarida bosh organ hisoblanadi.

2. O‘zbekiston Respublikasi Mehnat vazirligining mehnatni muhofaza qilish masalalari bo‘yicha o‘z vakolati doirasida qabul qilgan qarorlari vazirliklar, idoralar, korporatsiyalar, konsernlar, uyushmalar, faoliyat turlari va mulkchilik shakllaridan qat’iy nazar, korxonalar, muassasalar va tashkilotlar, shuningdek, mahalliy boshqaruv organlari, mansabdor shaxslar tomonidan bajarilishi majburiy hisoblanadi.

3. O‘zbekiston Respublikasi Mehnat vazirligining mehnatni muhofaza qilish sohasidagi asosiy vazifalari quyidagilar hisoblanadi:

mehnatni muhofaza qilish bo‘yicha normativ bazani takomillashtirishga oid takliflarni hamda mulkchilik va xo‘jalik yuritish shakllaridan qat’iy nazar, barcha korxonalar uchun mehnatni muhofaza qilish sohasida yagona talablarni ishlab chiqish va Hukumatga kiritish;

mehnatni muhofaza qilish kompleks davlat dasturlarini ishlab chiqish va ularning bajarilishini nazorat qilish;

statistika organlari bilan birgalikda Xalqaro mehnat tashkiloti tavsiyalariga muvofiq ishlab chiqarishdagi baxtsiz hodisalarni hisobga olish va hisobot shakllariga oid metodika hamda takliflarni tayyorlash;

mehnatkashlarni yakka tartibda va jamoani himoyalash vositalari hamda ishlab chiqarish muhitini nazorat qilish priborlarining ishlab chiqilishi, ishlab chiqarilishi va ular bilan ta’minlash ustidan nazorat qilish;

mehnatni muhofaza qilish bo‘yicha davlat nazoratini olib borish va hamma joyda qonunchilik va boshqa normativ hujjatlarga rioya qilinishini tekshirish, O‘zbekiston Respublikasi Sanoatda va konchilikda ishlarning bexatar olib borilishini nazorat qilish davlat qo‘mitasi vakolatiga kiritilgan masalalar bundan mustasnodir.

4. Mehnatni muhofaza qilish sohasidagi vazifalarni amalga oshirish Mehnat vazirligining Mehnatni muhofaza qilish boshqarmasiga va uning Qoraqalpog‘iston Respublikasi Mehnat vazirligi, viloyatlar va Toshkent shahar mehnat, ish bilan ta’minlash va aholini ijtimoiy himoya qilish boshqarmalaridagi tegishli bo‘linmalar zimmasiga yuklanadi.

Yangi tashkil etilgan bo‘linmalar faoliyati, shu jumladan, mehnatni muhofaza qilish qoida va normalariga rioya qilinishini nazorat qilish hamda tekshirish masalalarida, mazkur Nizom va O‘zbekiston Respublikasi Mehnat vazirligi tomonidan tasdiqlanadigan yo‘riqnomalar bilan tartibga solinadi.

5. Mehnatni muhofaza qilish boshqarmasi mehnatni muhofaza qilish bo‘yicha O‘zbekiston Respublikasi Mehnat vazirligining zimmasiga yuklangan vazifalarga muvofiq:

“Mehnatni muhofaza qilish to‘g‘risida” O‘zbekiston Respublikasi Qonuni talablariga barcha vazirliklar, idoralar, korporatsiyalar, konsernlar, uyushmalar, birlashmalar, faoliyat turlari va mulkchilik shakllaridan qat’iy nazar, muassasalar, tashkilotlar va korxonalar, mahalliy boshqaruv organlari, mansabdor shaxslar, fuqarolar tomonidan rioya qilinishini va ularning bajarilishini ta’minlaydi;

mehnatni muhofaza qilish bo‘yicha maqsadli va tarmoq dasturlarining ishlab chiqilishini, amalga oshirilishini nazorat qiladi;

mehnatni muhofaza qilish bo‘yicha tarmoqlararo normativ hujjatlar, standartlar, qoidalar va qonun hujjatlari loyihalarining ishlab chiqilishini, tasdiqlanishini va zarur bo‘lgan hollarda bekor qilinishini tashkil qiladi;

har yili Mehnat vazirligining respublika Hukumatiga mehnatni muhofaza qilishning ahvoli, ishlab chiqarishdagi jarohatlanish va kasb kasalliklari sabablari to‘g‘risidagi axborotini, ularni bartaraf qilish yo‘llari to‘g‘risidagi takliflar bilan tayyorlaydi;

O‘zbekiston Respublikasining manfaatdor organlari bilan birgalikda sanoat korxonalari mahsulotlarining mehnatni muhofaza qilish talablariga muvofiqligi yuzasidan sertifikatsiyalash bo‘yicha nazoratni amalga oshiradi;

mehnat sharoitlari bo‘yicha ekspertiza o‘tkazilishini nazorat qiladi va uning natijalari bo‘yicha xulosalar beradi;

Toshkent respublika mehnatni muhofaza qilish ilmiy-tadqiqot instituti va Davlat mehnat sharoitlari ekspertizasi markaziy laboratoriyasi faoliyatini muvofiqlashtiradi;

ommaviy axborot vositalari orqali mehnatni muhofaza qilishning targ‘ib qilinishini uyushtiradi.

6. Mehnat vazirligi oldida turgan vazifalarni hal etish maqsadida Mehnatni muhofaza qilish boshqarmasiga quyidagi huquqlar beriladi:

mehnatni muhofaza qilish masalalari bilan tanishish maqsadida vazirliklar, idoralar, korporatsiyalar, konsernlar, uyushmalar, korxonalar, birlashmalar, muassasalar va tashkilotlar ishlarini tekshirish, mulkchilik shakllaridan qat’iy nazar, korxonalarga mehnatni muhofaza qilish masalalari bo‘yicha tanishish maqsadida to‘siqsiz kirish;

tegishli vazirliklar, idoralar, korporatsiyalar, konsernlar, uyushmalar, loyiha-konstruktorlik tashkilotlari va korxonalari bilan kelishgan holda ularning mutaxassislarini tekshirish o‘tkazishga jalb qilish;

vazirliklar va idoralarga, korporatsiyalar, konsernlar va uyushmalarga, shuningdek, mahalliy boshqaruv organlariga tekshirish vaqtida aniqlangan mehnatni muhofaza qilishdagi qoida buzilishlarni bartaraf qilish to‘g‘risida bajarilishi majburiy bo‘lgan taqdimnomalar kiritish, korxonalar va tashkilotlar rahbarlariga xavfsizlik texnikasi hamda ishlarni xavf-xatarsiz amalga oshirish bo‘yicha qoidalar, normalar, standartlarning buzilish holatlarini bartaraf qilish to‘g‘risida ko‘rsatmalar berish;

mansabdor shaxslar mehnat va mehnatni muhofaza qilish to‘g‘risidagi qonunchilikni buzganliklari uchun ularga eng kam oylik ish haqining 2 baravaridan 5 baravarigacha miqdorda jarima solish (1995-yil 1-apreldan kuchga kiritiladi);

statistika organlari bilan birgalikda ishlab chiqarishdagi baxtsiz hodisalar ko‘rsatkichlari va ularni hisobga olish shakllarini ishlab chiqish;

statistika organlaridan, vazirliklar, idoralar, korporatsiyalar, konsernlar, uyushmalardan va boshqa muassasa hamda tashkilotlardan mehnatni muhofaza qilishning ahvoli to‘g‘risida zarur axborotlar olish;

mehnatni muhofaza qilish to‘g‘risidagi normativ-metodik va normativ-texnik hujjatlarning loyihalarini, ishlarni tashkil qilish va mehnatni muhofaza qilish xizmatlari to‘g‘risidagi nizomlarni, qurilish normalari va qoidalarining mehnatni muhofaza qilishga doir bo‘limlarini belgilangan tartibda ko‘rib chiqish, kelishish va tasdiqlash;

yangi va rekonstruksiya qilingan ishlab chiqarish obyektlarini qabul qilish bo‘yicha davlat komissiyalari ishida qatnashish;

oliy o‘quv yurtlarida mehnatni muhofaza qilish bo‘yicha mutaxassislarni tayyorlab chiqarishda davlat imtihon komissiyalari ishida ishtirok etish.