Davlat mulki qoʻmitasi va huquqni muhofaza qilish organlari tomonidan “Oʻzgoʻshtsutsanoat” uyushmasi korxonalaridagi ishlarning ahvolini oʻrganish jiddiy kamchiliklarni hamda davlat tasarrufidan chiqarish va xususiylashtirish jarayonlariga rasmiyatchilik bilan munosabatda boʻlish hollarini aniqladi.

Uyushma va uning tarkibiy boʻlinmalari rahbarlari amaldagi qonun hujjatlari va Vazirlar Mahkamasining 1996-yil 18-yanvardagi 30-son qarorining tarmoqda bozor islohotlarini chuqurlashtirish, xoʻjalik yurituvchi subyektlarga kengroq iqtisodiy mustaqillik berish, ishlab chiqarish samaradorligini oshirishda ularning hissalarini koʻpaytirish va goʻsht-sut sanoati korxonalarida moliyaviy barqarorlikni taʼminlash zarurligi toʻgʻrisidagi talablari bajarilishini taʼminlamadilar.

Tarmoqda davlat tasarrufidan chiqarish va xususiylashtirishning birinchi bosqichi rasmiyatchilik bilan oʻtkazildi, u mulkchilik shakllarini bundan keyin oʻzgartirish va uyushma korxonalari ishini tubdan yaxshilash uchun zarur shart-sharoitlar yaratishning mustahkam negiziga aylanmadi. Aksiyalarning egalari amalda ovoz berish huquqiga ega emaslar, ular ishlab chiqarishni boshqarishda qatnashmayaptilar, goʻsht kombinatlari va sut zavodlarining direktorlari oʻz faoliyatini boshlagan aksionerlik jamiyatlarining asosiy masalalarini hamon yakkaboshchilik bilan hal etmoqdalar.

Koʻplab korxonalarda rahbarlarning maʼmuriy-buyruqbozlik boshqaruv usuli saqlanib qolmoqda, ularning koʻplariga boqimandachilik, tashabbusning yoʻqligi va ishlarni bozor qayta oʻzgartirishlariga mos amaliy tarzda tashkil etish xos emas. Ular tarmoqqa xorijiy sarmoyalarni jalb etishda, qoʻshma korxonalar tashkil etishda, ilgʻor texnologiyalarni joriy etishda va ishlab chiqarishni modernizatsiya qilishda izchillik koʻrsatmayaptilar.

Bularning barchasi amalda davlat tasarrufidan chiqarish va xususiylashtirishning asosiy prinsiplarini badnom qilmoqda, mulkdorlar sinfi shakllanishiga toʻsqinlik qilmoqda, mehnat jamoalarining amalga oshirilayotgan islohotlarning zarurligiga ishonchini muayyan darajada yoʻqqa chiqarmoqda.

Koʻrsatib oʻtilgan va boshqa kamchiliklar hozir ishlab turgan yangi tarkibiy boʻlinmalar — aksionerlik jamiyatlari va jamoa xoʻjaliklari, shuningdek umuman uyushmaning iqtisodiy va moliyaviy ahvoli yomonlashishining asosiy sabablaridan biri boʻldi. Tarmoqda goʻsht, qaymogʻi olinmagan sut va boshqa mahsulotlarni qayta ishlash qisqardi, ularning turlari kengaymayapti, ular raqobatga bardoshli emas.

Vazirlar Mahkamasi qaror qiladi:

1. “Oʻzgoʻshtsutsanoat” uyushmasining raisi A. Hidoyatovga tarmoqda davlat tasarrufidan chiqarishning birinchi bosqichini amalga oshirishga doir respublika Hukumati qarorlarining bajarilishi ustidan zarur nazorat oʻrnatmaganligi koʻrsatib oʻtilsin.

2. Oʻzbekiston goʻsht va sut sanoati davlat-aksionerlik uyushmasi tizimida mulkni davlat tasarrufidan chiqarishning birinchi bosqichi yakunlarini qayta koʻrib chiqish maqsadga muvofiq deb hisoblansin.

3. “Oʻzgoʻshtsutsanoat” uyushmasi korxonalarida goʻsht-sut sanoatining xususiyatini va tarmoqda vujudga kelgan vaziyatni hisobga olgan holda xususiylashtirish va aksiyalashtirish konsepsiyasini ishlab chiqish maqsadida ilovaga* muvofiq tarkibda maxsus Hukumat komissiyasi tuzilsin.

4. Komissiya (V.A. Chjen, M.Z. Usmonov)ga 20 kun muddatda tarmoqda Xususiylashtirish va aksiyalashtirish dasturi loyihasini ishlab chiqish va Vazirlar Mahkamasiga kiritish topshirilsin, bunda:

uyushmaning chorvachilik xoʻjaliklari, qayta ishlovchi va boshqa korxonalariga imtiyozli soliq solish, imtiyozli kreditlar ajratish, ozuqalar, yonilgʻi-moylash va boshqa materiallar bilan taʼminlash boʻyicha davlat yoʻli bilan qoʻllab-quvvatlash choralari;

goʻsht-sut sanoati tarkibiy boʻlinmalarini chuqur xususiylashtirish, aksiyalarning ikkilamchi emissiyasini oʻtkazish, aksiyalarni sotish hamda kichik quvvatli korxonalarni xususiy mulk qilib ham Oʻzbekiston Respublikasining rezidentlariga, ham norezidentlariga sotish;

ishlab chiqarishni modernizatsiya qilish hamda goʻsht va sutni chuqur qayta ishlashning ilgʻor texnologiyalarini joriy etish, bu maqsadlarda chet el sarmoyalarini faol jalb etish, goʻsht kombinatlari va sut zavodlari negizida chet el firmalari bilan ularning ustav fondidagi ulushini cheklanmagan holda qoʻshma korxonalar tuzish;

“Oʻzgoʻshtsutsanoat” uyushmasining asosiy tarkibiy va ishlab chiqarish boʻgʻinlarini, shuningdek uning markaziy apparatini kadrlar bilan mustahkamlash masalalarini hal etishga alohida eʼtibor berilsin.

5. Mazkur qarorning bajarilishini nazorat qilish Bosh vazirning oʻrinbosarlari V.A. Chjen, M.Z. Usmonov zimmasiga yuklansin.