Mamlakatda zamonaviy axborot texnologiyalari va kommunikatsiyalarini rivojlantirish, raqobatbardosh va eksport uchun moʻljallangan dasturiy mahsulotlar hamda xizmatlarning mahalliy ishlab chiqarilishini rivojlantirish, yangi axborot tizimlari va resurslarini joriy qilishni kengaytirish maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligi, Innovatsion rivojlanish vazirligi hamda Fanlar akademiyasining Mirzo Ulugʻbek nomidagi Oʻzbekiston Milliy universiteti huzurida Intellektual dasturiy tizimlar ilmiy-amaliy markazini (keyingi oʻrinlarda Markaz deb ataladi) tashkil etish toʻgʻrisidagi taklifiga rozilik berilsin.

2. Markazning asosiy vazifalari etib quyidagilar belgilansin:

iqtidorli talabalar va yoshlarning dasturiy mahsulotlarni loyihalashtirish boʻyicha koʻnikmalarini rivojlantirish, ularda innovatsion fikrlashni shakllantirish, intellektual salohiyatlarini namoyon etishlariga hamda dasturiy taʼminot sohasida biznes rejalarini ishlab chiqish va amalga oshirishga koʻmaklashish;

texnologik jarayonlarni loyihalashtirish, boshqaruv faoliyatini intellektuallashtirish va avtomatlashtirishning ilmiy-texnikaviy masalalari yechimiga yoʻnaltirilgan dasturiy mahsulotlarni yaratish;

dasturiy mahsulotlar transferi, ularni tijoratlashtirish va startap loyihalarni amalga oshirish orqali mahalliy dasturiy mahsulotlar ishlab chiqish sanoatini rivojlantirishga koʻmaklashish;

dasturiy mahsulotlar sohasida ilmiy izlanishlarni olib borish, mazkur yoʻnalishlarda fundamental, amaliy innovatsiya loyihalarini amalga oshirish;

dasturiy mahsulotlar ishlab chiqish boʻyicha jahonning yetakchi kompaniya va universitetlari bilan hamkorlikni yoʻlga qoʻyish, sohadagi ilgʻor tajribalarni ommalashtirish, stajirovka va malaka oshirish kurslarini tashkil etish.

3. Oʻzbekiston Respublikasi Oliy va oʻrta maxsus taʼlim vazirligi bir hafta muddatda Oʻzbekiston Milliy universitetining (keyingi oʻrinlarda Universitet deb ataladi) budjetdan tashqari (toʻlov-kontrakt mablagʻlari) manbalari hisobiga saqlanadigan Universitet rektorining ilmiy konsultanti lavozimini joriy etsin.

Belgilansinki, Universitet rektorining ilmiy konsultanti mehnatiga haq toʻlash miqdori mos ravishda Universitet prorektorlari mehnatiga haq toʻlash bazaviy lavozim maoshi miqdorlariga tenglashtiriladi.

4. Mirzo Ulugʻbek nomidagi Oʻzbekiston Milliy universiteti huzuridagi Intellektual dasturiy tizimlar ilmiy-amaliy markazining tuzilmasi ilovaga muvofiq tasdiqlansin.

Markaz direktoriga, zarur hollarda, Oʻzbekiston Milliy universiteti rektori va uning ilmiy konsultanti bilan kelishgan holda Markaz tuzilmasiga xodimlarning tasdiqlangan umumiy cheklangan soni va mehnatga haq toʻlash fondi doirasida oʻzgartirishlar kiritish huquqi berilsin.

5. Belgilab qoʻyilsinki:

Markaz Universitetning yuridik shaxs maqomiga ega boʻlgan tijoratchi tashkilot boʻlmagan muassasa shaklidagi tarkibiy boʻlinmasi hisoblanib, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blanklarga, mustaqil balansga hamda Oʻzbekiston Respublikasi Moliya vazirligining Gʻaznachiligida shaxsiy hisobvaraqlariga ega boʻladi;

Markazning ilmiy va rahbar xodimlarining lavozim maoshlari budjet mablagʻlari hisobidan fundamental, amaliy hamda innovatsiya ishlarining davlat ilmiy-texnika dasturlarini amalga oshirishda ishtirok etayotgan ilmiy-tadqiqot muassasalari ilmiy va rahbar xodimlarining bazaviy lavozim maoshlari miqdoriga, boshqa xodimlarning lavozim maoshlari esa — Oʻzbekiston Respublikasi Fanlar akademiyasi ilmiy-tadqiqot muassasalarining tegishli lavozimlari uchun belgilangan lavozim maoshlari miqdoriga tenglashtiriladi;

Markaz direktori Oʻzbekiston Respublikasi Oliy va oʻrta maxsus taʼlim vazirligi bilan kelishgan holda Universitet rektori tomonidan lavozimga tayinlanadi va lavozimdan ozod etiladi;

Universitet rektorining ilmiy konsultanti Markazga umumiy rahbarlik qiladi va uning faoliyatini muvofiqlashtiradi;

Markazning moddiy-texnika bazasini shakllantirish hamda zamonaviy laboratoriya jihozlari bilan taʼminlash uchun talab etiladigan mablagʻlar 2019-yilda Oʻzbekiston Respublikasi Vazirlar Mahkamasining zaxira jamgʻarmasi mablagʻlari hisobidan qoplanadi;

Markaz oʻziga yuklangan vazifalarni bajarishda Respublika ilmiy-ixtisoslashtirilgan markazlar, shuningdek, Oʻzbekiston Respublikasi Fanlar akademiyasining institutlari va boshqa ilmiy-tadqiqot muassasalari bilan yaqindan hamkorlik qiladi.

6. Oʻzbekiston Respublikasi Oliy va oʻrta maxsus taʼlim vazirligi bir oy muddatda:

Markaz ustavi belgilangan tartibda tasdiqlanishini;

Markazning oliy taʼlim va ilmiy-tadqiqot muassasalari, matematika va informatika sohasida katta amaliy tajribaga ega boʻlgan mutaxassislardan iborat yuqori malakali kadrlar bilan toʻldirilishini;

Markaz faoliyatini samarali tashkil etish boʻyicha aniq chora-tadbirlar rejasi tasdiqlanishini taʼminlasin.

7. Markaz:

Oʻzbekiston Respublikasi Innovatsion rivojlanish vazirligi binosi qurilishi tugallangunga qadar Universitetning Toshkent shahar, Olmazor tumani, Universitet koʻchasi, 4-uy manzilida joylashgan binosiga tekin foydalanish huquqi asosida hamda tegishli kommunal va foydalanish xarajatlarini qoplamagan holda;

Oʻzbekiston Respublikasi Innovatsion rivojlanish vazirligining Toshkent shahar, Olmazor tumani, Universitet koʻchasi manzilidagi binosiga, bino qurilishi tugallanganidan soʻng tekin foydalanish huquqi asosida joylashtirilsin.

8. Markaz faoliyatini moliyalashtirish manbalari etib quyidagilar belgilansin:

Oʻzbekiston Respublikasi Davlat budjeti mablagʻlari (ilmiy va yordamchi xodimlardan tashqari Markaz xodimlari mehnatiga haq toʻlash uchun);

Oʻzbekiston Respublikasi Innovatsion rivojlanish vazirligi tomonidan oʻtkaziladigan tanlovlar natijalari boʻyicha ajratiladigan grantlar;

shartnoma asosida koʻrsatiladigan xizmatlardan olinadigan daromadlar;

xalqaro moliya va boshqa institutlar kreditlari, xorijiy tashkilotlarning grantlari;

jismoniy va yuridik shaxslar, shu jumladan Oʻzbekiston Respublikasi norezidentlarining homiylik xayriyalari;

qonun hujjatlarida taqiqlanmagan boshqa manbalar.

9. Markazga bitta yengil xizmat avtotransport vositasi uchun limit ajratilsin.

10. Oʻzbekiston Respublikasi Oliy va oʻrta maxsus taʼlim vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov hamda oliy va oʻrta maxsus taʼlim vaziri I.U. Madjidov zimmasiga yuklansin.