Oʻzbekiston Respublikasi Savdo-sanoat palatasi (bundan buyon matnda Palata deb yuritiladi) tadbirkorlik faoliyati subyektlarini ixtiyoriylik asosida birlashtiruvchi nodavlat notijorat tashkilotidir.

“Oʻzbekiston Respublikasi Savdo-sanoat palatasi” nomidan faqat ushbu Qonunning qoidalariga muvofiq tarzda foydalanilishi mumkin. Boshqa tashkilotlar oʻz nomlarida “savdo-sanoat palatasi”, “savdo palatasi”, “sanoat palatasi” degan soʻz birikmalaridan hamda ular asosida tuzilgan soʻz birikmalaridan foydalanishga haqli emas.

Palata toʻgʻrisidagi qonun hujjatlari ushbu Qonun va boshqa qonun hujjatlaridan iboratdir.

Agar Oʻzbekiston Respublikasining xalqaro shartnomasida Oʻzbekiston Respublikasining Palata toʻgʻrisidagi qonun hujjatlarida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

Palata tadbirkorlikni rivojlantirish uchun qulay sharoitlar yaratish, ishchanlik muhitini takomillashtirish, Palata aʼzolarining huquqlari va qonuniy manfaatlarini ifoda etish hamda himoya qilish, tadbirkorlarning chet ellik sheriklar bilan aloqalarini yoʻlga qoʻyishga koʻmaklashish maqsadida tashkil etiladi.

Palataning vazifalari quyidagilardan iborat:

Oʻzbekiston Respublikasida tadbirkorlikni, eng avvalo kichik va xususiy tadbirkorlikni rivojlantirishga koʻmaklashish;

tadbirkorlarga chet ellik sheriklar bilan amaliy muloqotlar va aloqalarni kengaytirishda, eksport mahsulotini tashqi bozorlarga olib chiqishda, shuningdek raqobatbardosh tayyor mahsulot chiqarishni taʼminlovchi yangi ishlab chiqarishlar barpo etish hamda mavjud ishlab chiqarishlarni texnikaviy jihatdan qayta jihozlash uchun toʻgʻridan toʻgʻrichet el investitsiyalarini jalb etishda koʻmaklashish;

boshqa davlatlarning savdo-sanoat palatalari va tadbirkorlar jamoat birlashmalari bilan hamkorlikni yoʻlga qoʻyish hamda rivojlantirish;

tadbirkorlarga keng turdagi xizmatlar koʻrsatish, shu jumladan axborot taʼminoti va maslahat yordami berish, Oʻzbekiston Respublikasining ishlab chiqaruvchilari haqidagi, ular tomonidan ishlab chiqarilayotgan mahsulot va investitsiyaviy imkoniyatlar toʻgʻrisidagi axborotni, shuningdek potensial sheriklarga va zamonaviy texnologiyalar xarid qilish imkoniyatlariga oid maʼlumotlarni oʻz ichiga oluvchi biznes-kataloglar eʼlon qilinishini tashkil etish;

tadbirkorlikni rivojlantirish uchun qulay muhitni shakllantirish, xalqaro huquq va biznes yuritish amaliyotining umum eʼtirof etilgan normalarini joriy qilish, tadbirkorlik faoliyatini amalga oshirishning huquqiy va iqtisodiy sharoitlarini yaxshilashga qaratilgan qonun hujjatlarini takomillashtirish yuzasidan takliflar tayyorlash chora-tadbirlarini koʻrish;

tadbirkorlarning huquqlari va qonuniy manfaatlarini ifoda etish hamda himoya qilish, shu jumladan davlat hamda xoʻjalik boshqaruvi organlari bilan munosabatlarda, shuningdek sudda ifoda etish hamda himoya qilish;

tadbirkorlik faoliyati uchun kadrlar taʼlimi va ularni tayyorlash tizimi rivojlantirilishini, tadbirkorlarni oʻqitish va ularning malakasini oshirish tashkil etilishini qoʻllab-quvvatlash.

Palata qonun hujjatlariga muvofiq boshqa vazifalarni ham bajarishi mumkin.

Davlat organlari Palataga u oʻz vazifalarini bajarishida koʻmaklashadilar hamda Palataning huquqlari va qonuniy manfaatlariga rioya etilishini taʼminlaydilar.

Davlat organlarining va ular mansabdor shaxslarining Palata faoliyatiga hamda Palataning davlat organlari va ularning mansabdor shaxslari faoliyatiga aralashuviga yoʻl qoʻyilmaydi.

Palata muassislarning tashabbusiga koʻra ixtiyoriy birlashish prinsipi asosida tashkil etiladi.

Palata muassislari Palataning taʼsis konferensiyasini chaqiradilar, unda Palataning ustavi qabul qilinadi hamda boshqaruv va nazorat organlari tuziladi.

Palata Qoraqalpogʻiston Respublikasi, viloyatlar va Toshkent shahrida tuziladigan hududiy boshqarmalari bilan birgalikda yagona tizimni tashkil etadi.

Qoraqalpogʻiston Respublikasi, viloyatlar va Toshkent shahrida tegishincha Palataning bitta hududiy boshqarmasi tuzilishi mumkin.

Palataning hududiy boshqarmasi yuridik shaxs hisoblanadi va Palata tomonidan tasdiqlanadigan nizom asosida faoliyat koʻrsatadi.

Palataning hududiy boshqarmalari, zaruratga qarab, yuridik shaxs boʻlmagan tuman va shahar filiallarini tuzishi mumkin.

Oʻzbekiston Respublikasining tadbirkorlik faoliyati subyektlari, ularning birlashmalari, shuningdek tadbirkorlik faoliyatini qoʻllab-quvvatlash uchun tuzilgan boshqa tashkilotlar Palata aʼzosi boʻlishi mumkin.

Palata aʼzolari teng huquq va majburiyatlarga ega.

Palataga aʼzolik tadbirkorlik faoliyati subyekti yoki tadbirkorlik faoliyati subyektlarining birlashmasi yoxud tadbirkorlik faoliyatini qoʻllab-quvvatlash uchun tuzilgan boshqa tashkilot bilan Palata oʻrtasida shartnoma tuzish yoʻli bilan rasmiylashtiriladi.

Palataning ustavida quyidagilar boʻlishi lozim:

Palataning nomi va joylashgan yeri (pochta manzili);

Palataning maqsad va vazifalari;

Palataning hududiy boshqarmalarini, shuningdek ularning tuman va shahar filiallarini tuzish tartibi;

Palataning boshqaruv va nazorat organlarini shakllantirish tartibi hamda ularning vakolatlari doirasi, muddati va qarorlar qabul qilish tartibi;

Palata aʼzoligiga qabul qilish hamda aʼzolikdan chiqish shartlari va tartibi;

Palata aʼzolarining huquqlari va majburiyatlari;

Palataning pul mablagʻlari va boshqa mol-mulkini shakllantirish manbalari;

Palata tugatilgan taqdirda uning mol-mulkidan foydalanish tartibi;

Palataning ustaviga oʻzgartirishlar va qoʻshimchalar kiritish tartibi;

Palatani qayta tashkil etish va tugatish tartibi.

Palata ustavida qonun hujjatlariga zid boʻlmagan boshqa qoidalar ham boʻlishi mumkin.

Palatani davlat roʻyxatidan oʻtkazish qonun hujjatlarida belgilangan tartibda Oʻzbekiston Respublikasi Adliya vazirligi tomonidan amalga oshiriladi.

Palataning hududiy boshqarmalarini davlat roʻyxatidan oʻtkazish, shuningdek ularning tuman va shahar filiallarini qayd etish qonun hujjatlarida belgilangan tartibda tegishincha Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari tomonidan amalga oshiriladi.

Palataning ustaviga kiritiladigan oʻzgartirishlar va qoʻshimchalar Palata qanday tartibda roʻyxatdan oʻtkazilgan boʻlsa, shunday tartibda roʻyxatdan oʻtkazilishi lozim.

Palataning boshqaruv organlari quyidagilardir:

Palata qurultoyi;

Palata markaziy kengashi;

Palata ijroiya qoʻmitasi.

Palata boshqaruvining oliy organi uch yilda kamida bir marta chaqiriladigan Palata qurultoyidir.

Qurultoylar oraligʻidagi davrda Palata faoliyatiga rahbarlikni Palata markaziy kengashi amalga oshiradi.

Palata faoliyatiga joriy rahbarlikni Palata ijroiya qoʻmitasi amalga oshiradi va u Palata qurultoyi hamda markaziy kengashiga hisobdordir.

Palata quyidagi huquqlarga ega:

Oʻzbekiston Respublikasida va chet davlatlarda tashkilotlar tuzish, oʻz vakolatxonalarini ochish;

tadbirkorlik faoliyati subyektlariga ixtirolar, foydali modellar va sanoat namunalarini patentlashda, tovar belgilari, xizmat koʻrsatish belgilari hamda tovar kelib chiqqan joy nomlarini roʻyxatdan oʻtkazishda koʻmaklashish;

Oʻzbekiston Respublikasida va uning hududidan tashqarida koʻrgazmalar hamda yarmarkalar tashkil etish va oʻtkazish;

tadbirkorlik faoliyati subyektlariga huquqiy va boshqa xil yordam koʻrsatish;

gazetalar, jurnallar va boshqa bosma materiallar nashr etish, shuningdek tadbirkorlik faoliyatini taʼminlash uchun noshirlik va reklama xizmatlari koʻrsatish;

xalqaro va chet el tashkilotlarida tadbirkorlik faoliyati bilan bogʻliq sohada Palata aʼzolarining manfaatlarini ifoda etish;

tadbirkorlik subyektlarining faoliyati masalalariga taalluqli normativ-huquqiy hujjatlarni ishlab chiqish va muhokama qilishda ishtirok etish;

iqtisodiy nizolarni hal qilish uchun qonun hujjatlariga muvofiq hakamlik sudlarini, shu jumladan xalqaro tijorat arbitraj sudini tashkil etish;

chet ellik sheriklar murojaat etgan hollarda tovarlarning kelib chiqishi toʻgʻrisidagi sertifikatlarni tasdiqlash;

Palata aʼzosi boʻlmish tadbirkorlik subyektlari faoliyatini tekshirishlarda ishtirok etish;

tadbirkorlik faoliyati subyektlariga chet el va xalqaro tashkilotlarning moliyaviy hamda texnik yordamini jalb etishda koʻmaklashish;

davlat boji toʻlamasdan sudga Palata aʼzolari manfaatlarini koʻzlab daʼvo taqdim etish, shuningdek davlat va xoʻjalik boshqaruvi organlarining qarorlari, ular mansabdor shaxslarining harakatlari (harakatsizligi) ustidan shikoyat berish.

Palata qonun hujjatlariga muvofiq boshqa huquqlarga ham ega boʻlishi mumkin.

Binolar, inshootlar, asbob-uskunalar, inventar, pul mablagʻlari, shu jumladan chet el valyutasidagi mablagʻlar, qimmatli qogʻozlar hamda oʻz ustavida belgilangan vazifalarni bajarishi uchun zarur boshqa mol-mulk Palataning mulki boʻlishi mumkin.

Palataning mulki Qonun bilan muhofaza qilinadi.

Palataning mol-mulkini shakllantirish manbalari quyidagilardan iborat:

Palata aʼzolarining kirish va aʼzolik badallari;

Palata tadbirkorlik faoliyatidan oladigan va faqat oʻz ustavida belgilangan vazifalarini bajarish uchun foydalanadigan daromadlar (foyda);

Palata tomonidan tashkil etilgan tashkilotlardan ajratmalar;

grantlar va homiylardan keladigan mablagʻlar;

qonun hujjatlarida taqiqlanmagan boshqa tushumlar.

Palata aʼzolari Palata ustavida belgilanadigan tartibda hamda miqdorlarda kirish va aʼzolik badallari toʻlaydi.

Qonun hujjatlariga muvofiq Palata xalqaro nodavlat notijorat tashkilotlariga kirishi, toʻgʻridan toʻgʻrixalqaro muloqotlar va aloqalar olib borishi, hamkorlik toʻgʻrisida tegishli bitimlar tuzishi mumkin.

Palatani tashkil etish va uning faoliyat yuritishi sohasidagi nizolar qonun hujjatlarida belgilangan tartibda hal etiladi.

Palata oʻz majburiyatlari boʻyicha oʻziga qarashli barcha mol-mulk bilan javob beradi. Palata oʻz aʼzolarining majburiyatlari boʻyicha javob bermaydi. Palata aʼzolari Palataning majburiyatlari boʻyicha javob bermaydi.

Palata toʻgʻrisidagi qonun hujjatlarini buzganlikda aybdor shaxslar belgilangan tartibda javobgar boʻladilar.