Mamlakatimizda o‘tgan davr mobaynida davlat, o‘ta muhim, toifalangan va boshqa obyektlarni, shuningdek, jismoniy va yuridik shaxslarning mulkini ishonchli qo‘riqlashni ta’minlovchi sifat jihatidan yangi tizimni joriy etish bo‘yicha salmoqli ishlar amalga oshirildi.

Biroq, qo‘riqlash faoliyatini tashkil etishda hozirga qadar bir qator muammolar mavjud bo‘lib, bular ichki ishlar organlarining mulkni qo‘riqlash bo‘yicha xizmatlari qamrovining torligi, zamonaviy axborot-kommunikatsiya texnologiyalarini joriy etish darajasining pastligi, mavjud qo‘riqlash tizimi va texnologiyalarining yetarlicha samarali emasligi, ushbu sohada sifatli servis xizmatini ko‘rsatishning yagona texnik talablari va mexanizmlarining yo‘qligida namoyon bo‘lmoqda.

O‘zbekiston Respublikasi Ichki ishlar vazirligi huzuridagi Qo‘riqlash departamentining jismoniy va yuridik shaxslar mulkining qo‘riqlanishini ta’minlash bo‘yicha faoliyati samaradorligini oshirish, shuningdek, mulkka bo‘lgan tajovuzni profilaktika qilish va oldini olishda aholining zamonaviy axborot-kommunikatsiya texnologiyalaridan keng foydalanishi uchun qulay shart-sharoit yaratish maqsadida:

1. O‘zbekiston Respublikasi Ichki ishlar vazirligi, Bosh prokuraturasi, Axborot texnologiyalari va kommunikatsiyalarini rivojlantirish vazirligi hamda Fuqarolarning o‘zini o‘zi boshqarish organlari faoliyatini muvofiqlashtirish bo‘yicha respublika kengashining huquqbuzarliklar profilaktikasi va jinoyatchilikka qarshi kurashish tizimiga quyidagilarni nazarda tutuvchi “Xavfsiz xonadon” konsepsiyasi (keyingi o‘rinlarda — Konsepsiya)ni joriy etish to‘g‘risidagi taklifi ma’qullansin:

2022-yil 31-dekabrga qadar respublikaning barcha hududlarida Toshkent shahrida amalga oshirilgan texnik qo‘riqlash va harakatlanish punktlariga xabarni uzatish va markazlashgan kuzatuvning avtomatlashtirilgan tizimi (keyingi o‘rinlarda — avtomatlashtirilgan tizim)ni bosqichma-bosqich joriy etish;

O‘zbekiston Respublikasi Ichki ishlar vazirligi huzuridagi Qo‘riqlash departamenti hududiy bo‘linmalarining ichki ishlar organlari jamoat tartibini saqlash kuchlarining patrul guruhlari bilan uzviy hamkorligini tashkil etish va bunda qo‘riqlanadigan obyektlardan kelib tushgan xabar joyiga eng yaqin patrul guruhining tez yetib borishini ta’minlash mexanizmlarini belgilash;

mulkni qo‘riqlash bo‘yicha xizmat turlarini kengaytirish, shu jumladan transport vositalari va boshqa harakatlanuvchi obyektlarni qo‘riqlovga olish imkoniyatini beruvchi zamonaviy axborot-kommunikatsiya texnologiyalarini joriy etish;

yangi turar joylar qurilishida O‘zbekiston Respublikasi Ichki ishlar vazirligi huzuridagi Qo‘riqlash departamenti va Favqulodda vaziyatlar vazirligi bilan kelishilgan holda ularni majburiy tarzda qo‘riqlash-yong‘in tashvishgohlari va gazoanalizatorlar bilan jihozlash;

respublika mahallalarini ularning xavfsizlik darajasining choraklik reytingini joriy etgan holda baholash hamda har yili “Eng xavfsiz mahalla” respublika tanlovini o‘tkazish.

2. O‘zbekiston Respublikasi Ichki ishlar vazirligining Ichki ishlar vazirligi huzuridagi Qo‘riqlash departamenti (keyingi o‘rinlarda — Qo‘riqlash departamenti) tarkibida quyidagilarni tashkil etish to‘g‘risidagi taklifiga rozilik berilsin:

a) asosiy faoliyat yo‘nalishi etib qo‘riqlanadigan obyektlarda o‘rnatiladigan qo‘riqlashning texnik vositalari va tizimlarini montaj, demontaj qilish, ta’mirlash, ularga texnik xizmat ko‘rsatish va ekspluatatsiya qilish bo‘yicha ishlarni bajarishni belgilagan holda Qo‘riqlashning texnik vositalarini joriy qilish ilmiy-tadqiqot markazi” davlat muassasasini (keyingi o‘rinlarda — Ilmiy-tadqiqot markazi);

b) asosiy vazifalari etib quyidagilarni belgilagan holda Qo‘riqlash departamentining umumiy shtatlari soni doirasida 5 shtat birligida matbuot bo‘limini:

aholining O‘zbekiston Respublikasi Ichki ishlar vazirligi huzuridagi Qo‘riqlash departamentining qo‘riqlash xizmatlaridan foydalanishga bo‘lgan qiziqishini oshirishga qaratilgan axborot-tushuntirish mazmunidagi chora-tadbirlarni amalga oshirish;

aholiga O‘zbekiston Respublikasi Ichki ishlar vazirligi huzuridagi Qo‘riqlash departamentining qo‘riqlash bo‘linmalari faoliyati natijalari to‘g‘risida ma’lumotlarni, shu jumladan uning rasmiy veb-saytining samarali faoliyat ko‘rsatishini tashkil etish orqali o‘z vaqtida yetkazish bo‘yicha kompleks choralarni ko‘rish.

3. Belgilab qo‘yilsinki:

Ilmiy-tadqiqot markazi o‘z faoliyatini O‘zbekiston Respublikasi Ichki ishlar vazirligi huzuridagi Qo‘riqlash departamenti bo‘linmalari bilan qo‘riqlanadigan obyektlarda o‘rnatilgan qo‘riqlashning texnik vositalari va tizimlariga xizmat ko‘rsatish bo‘yicha tuzilgan shartnomalar asosida amalga oshiradi;

qo‘riqlanadigan obyektlarda o‘rnatilgan qo‘riqlashning texnik vositalari va tizimlariga, shu jumladan avtomatlashtirilgan tizimning texnik infratuzilma obyektlariga xizmat ko‘rsatish faqat Ilmiy-tadqiqot markazi tomonidan amalga oshiriladi.

4. 2019-yil 1-yanvardan boshlab shunday amaliyot joriy etilsinki, unga ko‘ra jismoniy shaxslarning uy-joylari va xonadonlariga ularga qo‘riqlash xizmatini ko‘rsatish mobaynida foydalanishga beriladigan qo‘riqlashning texnik vositalari jihozlarini o‘rnatish hamda bepul texnik xizmat ko‘rsatish bo‘yicha ishlarni bajarish O‘zbekiston Respublikasi Milliy gvardiyasi Qo‘riqlash bosh boshqarmasi mablag‘lari hisobidan amalga oshiriladi.

5. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi:

“O‘zbektelekom” AJ hududiy filiallari avtomatik telefon stansiyalari binolarida avtomatlashtirilgan tizimning jihozlarini o‘rnatish uchun zarur bo‘lgan joylarni o‘rnatilgan tartibda ajratish;

avtomatlashtirilgan tizimning to‘laqonli faoliyat ko‘rsatishi uchun aloqa tariflariga, shuningdek, “O‘zbektelekom” AJ optik tolali aloqa kabellarini yotqizish bo‘yicha xizmatlariga imtiyoz taqdim etilishini ta’minlasin.

6. Belgilansinki:

jamoat xavfsizligini, jismoniy va yuridik shaxslarning mulkini qo‘riqlashni to‘laqonli ta’minlash uchun O‘zbekiston Respublikasi Ichki ishlar vazirligi huzuridagi Qo‘riqlash departamenti tomonidan hududlarda patrullikni tashkil etish bilan bog‘liqlikda videokuzatuv va texnik vositalarning butun kompleksidan foydalaniladi;

Qo‘riqlash departamentiga, istisno tariqasida, avtomatlashtirilgan tizimni joriy etish maqsadida mahalliy va xorijiy korxonalar bilan tovarlarni xarid qilish va yetkazib berish, shuningdek, xizmat ko‘rsatish bo‘yicha konkurs (tender) savdolarini o‘tkazmasdan shartnomalar tuzishga ruxsat etiladi;

O‘zbekiston Respublikasi Prezidentining “O‘zbekiston Respublikasining soliq siyosatini takomillashtirish konsepsiyasi to‘g‘risida” 2018-yil 29-iyundagi PF-5468-son Farmoniga muvofiq 2019-yil 1-yanvardan boshlab davlat maqsadli jamg‘armalariga undiriladigan majburiy ajratmalar bekor qilinishi munosabati bilan O‘zbekiston Respublikasi Ichki ishlar vazirligi huzuridagi Qo‘riqlash departamentining bo‘shaydigan moliyaviy mablag‘lari jismoniy shaxslarning xonadonlari va uy-joylariga bosqichma-bosqich qo‘riqlov jihozlarini bepul o‘rnatish va ularga xizmat ko‘rsatishga yo‘naltiriladi.

7. Qurilish vazirligi uch oy muddatda O‘zbekiston Respublikasi Vazirlar Mahkamasiga yangi turar joylar qurishda ularni qo‘riqlash-yong‘in tashvishgohlari va gazoanalizatorlar bilan jihozlash majburiyligini ko‘zda tutuvchi takliflarni kiritsin.

8. O‘zbekiston Respublikasi Ichki ishlar vazirligi:

O‘zbekiston Respublikasi Axborot texnologiyalari va kommunikatsiyalarini rivojlantirish vazirligi bilan birgalikda bir oy muddatda avtomatlashtirilgan tizimni respublikaning barcha hududlarida joriy etish hamda bosqichma-bosqich rivojlantirish bo‘yicha Texnik topshiriq va dastlabki texnik-iqtisodiy hisob-kitoblarni ishlab chiqsin va tasdiqlasin;

Fuqarolarning o‘zini o‘zi boshqarish organlari faoliyatini muvofiqlashtirish bo‘yicha respublika kengashi bilan birgalikda bir oy muddatda ushbu qaror talablariga muvofiq, namunali fuqarolar yig‘inlarini rag‘batlantirish mexanizmini nazarda tutgan holda, respublika mahallalarini baholash tartibini tasdiqlasin;

bir oy muddatda “Qo‘riqlash Servis” DUK nizomini tasdiqlashni, davlat ro‘yxatidan o‘tkazishni va ustav fondini shakllantirishni ta’minlasin;

Moliya vazirligi bilan birgalikda ikki oy muddatda ilg‘or xorijiy tajribani o‘rganish asosida O‘zbekiston Respublikasi Vazirlar Mahkamasiga jismoniy va yuridik shaxslarning mulkini qo‘riqlashni ta’minlash sohasida davlat-xususiy sheriklik mexanizmlarini joriy etish bo‘yicha takliflar kiritsin;

O‘zbekiston Respublikasi Ichki ishlar vazirligi huzuridagi Qo‘riqlash departamenti qo‘riqlash bo‘linmalari mutaxassislarini chaqirishning yagona qisqa raqamini, shuningdek, texnik qo‘riqlash va harakatlanish punktlariga ulanish uchun onlayn ariza rasmiylashtirish tartibini kiritish choralarini ko‘rsin.

9. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov, O‘zbekiston Respublikasi Prezidenti Administratsiyasi rahbari Z.Sh. Nizomiddinov va O‘zbekiston Respublikasi Prezidenti maslahatchisining birinchi o‘rinbosari B.M. Mavlonov zimmasiga yuklansin.