Oʻzbekiston Respublikasi Prezidentining “Dori vositalarini davlat roʻyxatidan oʻtkazish tartibi va ularning aylanishini takomillashtirish boʻyicha qoʻshimcha chora-tadbirlar toʻgʻrisida” 2018-yil 24-sentabrdagi PQ-3948-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasidan tashqarida amalga oshirilgan dori vositalarini roʻyxatdan oʻtkazish natijalarini tan olish tartibi toʻgʻrisidagi nizom 1-ilovaga muvofiq tasdiqlansin.

2. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirishlar va qoʻshimcha kiritilsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Abduhakimov va Oʻzbekiston Respublikasi Sogʻliqni saqlash vaziri A.K. Shadmanov zimmasiga yuklansin.

1. Ushbu Nizom Oʻzbekiston Respublikasidan tashqarida amalga oshirilgan dori vositalarini roʻyxatdan oʻtkazish natijalarini tan olish tartibini belgilaydi.

2. Ushbu Nizom talablari Oʻzbekiston Respublikasi Prezidentining “Dori vositalarini davlat roʻyxatidan oʻtkazish tartibi va ularning aylanishini takomillashtirish boʻyicha qoʻshimcha chora-tadbirlar toʻgʻrisida” 2018-yil 24-sentabrdagi PQ-3948-son qarori bilan tasdiqlangan Dori vositalarini roʻyxatdan oʻtkazish natijalari Oʻzbekiston Respublikasida tan olinadigan mamlakatlar va xalqaro tashkilotlar roʻyxatida koʻrsatilgan mamlakatlar hamda xalqaro tashkilotlar tomonidan roʻyxatga olingan va Oʻzbekiston Respublikasiga import qilinadigan dori vositalariga joriy etiladi.

3. Mazkur Nizomda quyidagi asosiy tushunchalar qoʻllaniladi:

dori vositalari — kasalliklarning oldini olish, ularga tashxis qoʻyish va davolash, shuningdek, odam organizmining holati va funksiyalarini oʻzgartirish uchun tibbiyot amaliyotida qoʻllashga ruxsat etilgan dori moddalari (substansiyalar) va yordamchi moddalar asosida olingan vositalar, dori moddalari (substansiyalar), dori preparatlari;

dori moddalari (substansiyalar) — farmakologik, immunologik yoki metabolik faollikka ega boʻlgan yoxud tashxis qoʻyish maqsadida foydalaniladigan, tibbiyot amaliyotida qoʻllashga ruxsat etilgan tabiiy yoki sintetik moddalar;

dori preparatlari — dozalangan, idishga joylangan-oʻralgan, qoʻllash uchun tayyor dori vositalari;

dori vositasining normativ hujjati — dori vositalarining sifat koʻrsatkichlari, meʼyorlari va sifatini nazorat qilish usullarini, ularning fizik-kimyoviy, fizik, biologik, biokimyoviy, mikrobiologik xususiyatlari va sifatini nazorat qilishning boshqa usullarini oʻz ichiga olgan hujjat;

dori vositasini tibbiyotda qoʻllashga doir yoʻriqnoma — dori vositasining farmakologik xususiyatlari, qoʻllanilishi, qoʻllash mumkin boʻlmagan holatlar, qoʻllashning oʻziga xosligi, dozaning oshirib yuborilishi, boshqa dori vositalari bilan oʻzaro taʼsiri, saqlash sharoitlari, chiqarish shakllari, ishlab chiqaruvchi haqidagi va boshqa maʼlumotlarni oʻz ichiga olgan hujjat;

ariza beruvchi — Oʻzbekiston Respublikasidan tashqarida amalga oshirilgan dori vositalarini roʻyxatdan oʻtkazish natijalarini tan olish (keyingi oʻrinlarda tan olish deb ataladi) uchun ariza, hujjatlar va materiallarni taqdim etish vakolatiga ega dori vositalarini ishlab chiqaruvchi tashkilot, roʻyxatdan oʻtkazish guvohnomasining egasi yoki ularning ishonchli vakillari;

4. Dori vositasi taqdim etiladigan hujjatlarni oʻrganish va tan olish haqidagi yozuvni Tibbiyot amaliyotida qoʻllanilishiga ruxsat etilgan dori vositalari, tibbiy buyumlar va tibbiy texnika davlat reyestriga (keyingi oʻrinlarda Davlat reyestri deb ataladi) kiritish orqali Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligining Dori vositalari, tibbiy buyumlar va tibbiy texnika ekspertizasi va standartlashtirish davlat markazi (keyingi oʻrinlarda Davlat markazi deb ataladi) tomonidan tan olinadi.

5. Tan olish davlat roʻyxatidan oʻtkazish natijalarini va tan olish toʻgʻrisidagi yozuvni Davlat reyestriga kiritishni va ariza beruvchilarga ularning xohishiga koʻra ushbu reyestrdan koʻchirma berishni nazarda tutadi.

6. Tan olish natijalari Davlat reyestriga yozuv shaklida besh yil muddatga kiritiladi.

Dastlabki tan olish muddati tugagandan soʻng ariza beruvchining arizasiga koʻra, tan olish natijalari Davlat reyestriga ularning amal qilish muddati cheklanmagan holda kiritilishi mumkin.

7. Quyidagilar:

dori vositalari;

Oʻzbekiston Respublikasida roʻyxatdan oʻtkazilgan dori vositalarining yangi kombinatsiyalari;

Oʻzbekiston Respublikasida avval roʻyxatdan oʻtkazilgan (tan olingan), biroq boshqacha dori shakllarida, dozalarda yoki boshqa ishlab chiqaruvchi tomonidan ishlab chiqarilgan dori vositalari;

Oʻzbekiston Respublikasida avval roʻyxatdan oʻtkazilgan (tan olingan) boshqa oʻramdagi va/yoki boshqa markirovkali dori vositalari tan olinishi lozim.

8. Davlat reyestridagi tan olish toʻgʻrisidagi yozuv dori vositasining davlat roʻyxatidan oʻtkazilgani va Oʻzbekiston Respublikasi Sogʻliqni saqlash vazirligi tomonidan uni tibbiyot amaliyotida qoʻllashga ruxsat berilganini tasdiqlaydi.

9. Tarkibidagi dori moddalari turli xil, ammo savdo nomi bir xil boʻlgan dori vositalarini, shuningdek, tarkibidagi dori moddalari bir xil, ammo savdo nomi turli xil boʻlgan dori vositalarining bitta ishlab chiqaruvchisini tan olishga yoʻl qoʻyilmaydi.

10. Ariza beruvchi dori vositalarining tan olinishi uchun Davlat markaziga mazkur Nizomga 1-ilovaga* muvofiq shakldagi arizani:

a) tibbiyotda qoʻllashga doir yoʻriqnoma, yoʻriqnomaning davlat va rus tillariga rasmiy tasdiqlangan tarjimasini;

b) dori vositasining kuyidagilar koʻrsatilgan hujjatlarini:

dori shakli;

dozasi;

dori vositasining Roʻyxatda koʻrsatilgan mamlakat tibbiyot amaliyotida muddati tugagunicha qoʻllashga ruxsat etilgan sana yoki uning Roʻyxatda koʻrsatilgan xalqaro tashkilot tomonidan tasdiqlangan sifati, bezararligi va samaradorligi;

dori preparatining tegishli bozor uchun ruxsat etilgan oʻziga xos raqami (avtorizatsiya);

v) markirovka qoʻyilgan namunaning qogʻoz yoki elektron shakldagi asl nusxasini;

g) dori moddalari, yot moddalarning sifatini tasdiqlovchi hujjatlar ilova qilingan referens standartlarini;

d) ishlab chiqaruvchi firmaning normativ hujjati talablariga muvofiq uch marta sinov oʻtkazish uchun yetarli boʻlgan miqdordagi dori vositasining tahlil qilingani haqidagi sertifikat ilova qilingan namunasini;

e) xorijiy yoki davlatlararo farmatsevtika mahsulotlarini tartibga soluvchi xorijiy vakolatli organ tomonidan berilgan farmatsevtika mahsulotining sertifikati (FMS) yoki uning belgilangan tartibda tasdiqlangan nusxasi. Bunda farmatsevtika mahsuloti sertifikatining (FMS) ekvivalenti boʻlgan hujjat yoki uning belgilangan tartibda tasdiqlangan nusxasini;

j) dori vositasi normativ hujjatining loyihasini ilova qilgan holda taqdim etadi.

Mazkur bandning kichik bandlaridan birida nazarda tutilgan hujjat ushbu bandning boshqa kichik bandida koʻrsatilgan maʼlumotni oʻz ichiga olgan boʻlsa, uni alohida hujjat shaklida taqdim etish talab etilmaydi.

11. Ariza beruvchi Oʻzbekiston Respublikasidan tashqarida roʻyxatdan oʻtkazilgan dori moddalarining (substansiyalarining) tan olinishi va bu haqida Davlat reyestriga yozuv kiritilishi uchun Davlat markaziga mazkur Nizomga 2-ilovaga* muvofiq shaklda quyidagilar ilova qilingan arizani taqdim etadi:

a) tegishli ishlab chiqarish amaliyoti (GMP) sertifikatining nusxasi;

b) dori moddasi (substansiya) normativ hujjatining loyihasi;

v) markirovkalashning rangli maketi;

g) dori moddalari, yot moddalarning sifatini tasdiqlovchi hujjatlar ilova qilingan referens standartlari;

d) ishlab chiqaruvchi firmaning normativ hujjati talablariga muvofiq uch marta sinov oʻtkazish uchun yetarli boʻlgan miqdordagi dori vositasining tahlil qilingani haqidagi sertifikat ilova qilingan namunasi.

12. Ariza beruvchidan mazkur Nizomda nazarda tutilmagan hujjatlarni taqdim etishni talab qilishga yoʻl qoʻyilmaydi.

13. Zarur hujjatlar ilova qilingan ariza Davlat markaziga bevosita, pochta aloqasi vositalari orqali yoki elektron shaklda, ular olingani haqidagi bildirishnomani olgan holda taqdim etiladi. Elektron shaklda taqdim etilgan hujjatlar ariza beruvchining elektron raqamli imzosi bilan tasdiqlanadi.

Dori vositalarining namunalari bevosita yoki pochta aloqasi vositalari orqali taqdim etiladi.

14. Ariza va hujjatlar Davlat markazining masʼul shaxsi tomonidan roʻyxat boʻyicha qabul qilinadi va uning nusxasi shu kunning oʻzida ariza beruvchiga ular qabul qilingan sana toʻgʻrisidagi belgi qoʻyilgan holda yuboriladi (topshiriladi).

15. Tan olish toʻgʻrisidagi ariza koʻrib chiqilganligi uchun ariza berilgan kundagi eng kam oylik ish haqining ellik baravari miqdorida yigʻim undiriladi.

Yigʻim summasi Davlat markazi hisobraqamiga oʻtkaziladi.

Ariza beruvchi bergan arizasidan voz kechgan taqdirda, toʻlangan yigʻim summasi qaytarilmaydi.

16. Ariza Davlat markazi tomonidan 15 ish kunidan oshmaydigan muddatda koʻrib chiqiladi. Ushbu muddat ariza beruvchi tomonidan tan olish toʻgʻrisidagi arizani koʻrib chiqish uchun yigʻim toʻlangan kundan boshlab hisoblanadi.

17. Davlat markazi roʻyxatdan oʻtkazish hujjatlarini baholash doirasida dori vositasining roʻyxatdan oʻtkazish hujjatlarini mustaqil ravishda yoki mustaqil ekspertlarni jalb etgan holda oʻrganishi mumkin.

18. Tan olish va bu haqidagi yozuvni Davlat reyestriga kiritish Davlat markazi tomonidan ushbu Nizomga 3-ilovaga muvofiq quyidagi tartibda amalga oshiriladi:

a) Roʻyxatdan oʻtkazish boʻlimi:

ariza qabul qilinganidan soʻng ariza hamda unga ilova qilingan hujjatlar va namunalarni birlamchi (dastlabki) oʻrganadi;

ariza beruvchi bilan tan olish masalalari yuzasidan tegishli yozishmalar olib boradi;

birlamchi (dastlabki) oʻrganishning ijobiy natijalari asosida ariza beruvchiga arizani koʻrib chiqish uchun yigʻim undirilishi boʻyicha hisobraqamni rasmiylashtiradi;

ariza beruvchi belgilangan yigʻim summasini 30 kundan oshmaydigan muddatda toʻlagandan soʻng ariza va unga ilova qilinadigan hujjatlar hamda namunalarni keyinchalik oʻrganish uchun Farmakologiya qoʻmitasiga, Farmakopeya qoʻmitasiga, Narkotiklarni nazorat qilish qoʻmitasiga (dori vositalari tarkibida giyohvand vositalar, psixotrop moddalar va prekursorlar mavjud boʻlgan taqdirda) taqdim etadi;

b) Farmakopeya qoʻmitasi 12 ish kuni davomida:

ariza beruvchi tomonidan taqdim etilgan hujjatlarni oʻrganib chiqadi;

dori vositasining normativ hujjatini tasdiqlaydi;

ariza beruvchi taqdim etgan hujjatlar va ekspertlar xulosalari asosida tan olish yoki tan olishni rad etish toʻgʻrisidagi tavsiyalarni Oʻzbekiston Respublikasi Sogʻliqni saqlash vazirligi tomonidan belgilangan tartibda tashkil etilgan Ekspertlar kengashiga (keyingi oʻrinlarda Ekspertlar kengashi deb ataladi) kiritadi;

v) Farmakologiya qoʻmitasi 12 ish kuni davomida:

ariza beruvchi tomonidan taqdim etilgan hujjatlarni oʻrganishni amalga oshiradi;

ariza beruvchi taqdim etgan hujjatlar va ekspertlar xulosalari asosida Ekspertlar kengashiga tan olish yoki tan olishni rad etish toʻgʻrisida tavsiyalar kiritadi;

dori vositalarini tibbiyotda qoʻllash boʻyicha yoʻriqnomalarni yoki ularga kiritiladigan oʻzgartirishlarni maʼqullaydi;

g) Narkotiklarni nazorat qilish qoʻmitasi 3 ish kuni davomida:

ariza beruvchi taqdim etgan hujjatlar oʻrganadi;

ariza beruvchi tomonidan tarkibida giyohvand vositalar, psixotrop moddalar va prekursorlar boʻlgan dori vositalarining hujjatlarini oʻrganib chiqishda tibbiyotda qoʻllanishi davlat nazoratida boʻlgan Giyohvand vositalar, psixotrop moddalar va prekursorlar roʻyxatida ushbu moddalarning mavjudligini, shuningdek, ularni shifokor retsepti boʻyicha berish zarurligini koʻrib chiqadi hamda Farmakologiya va Farmakopeya qoʻmitalariga takliflar kiritadi;

19. Ekspertlar kengashi Farmakopeya, Farmakologiya qoʻmitalari tavsiyalari asosida bir kun muddatda dori vositasini tan olish va Davlat reyestriga kiritish yoki tan olishni rad etish toʻgʻrisida qaror qabul qiladi.

20. Davlat markazi Ekspertlar kengashi tomonidan qaror qabul qilingan kundan keyingi bir ish kunidan kechikmay ariza beruvchini qabul qilingan qaror toʻgʻrisida yozma ravishda yoki elektron shaklda Internet tarmogʻi orqali xabardor qilishi shart.

21. Davlat reyestrida keltirilgan maʼlumotlar Oʻzbekiston Respublikasi Sogʻliqni saqlash vazirligi va Davlat markazi veb-saytlari orqali umumiy tanishish uchun ochiqdir.

Ariza beruvchi Davlat reyestridan koʻchirmani Internet tarmogʻi orqali mazkur Nizomga 4-ilovaga* muvofiq shakl boʻyicha mustaqil ravishda bepul shakllantirish va qogʻozga chiqarib olish huquqiga egadir.

22. Quyidagilar tan olish va Davlat reyestriga yozuvni kiritishni rad etishga asos hisoblanadi:

ariza beruvchi tomonidan ekspertiza uchun zarur boʻlgan hujjatlarning va dori vositalari namunalarining toʻliq hajmda taqdim etilmasligi;

ariza beruvchi tomonidan taqdim etilgan hujjatlarda ishonchsiz yoki buzib koʻrsatilgan maʼlumotlarning mavjudligi.

Tan olish va Davlat reyestriga yozuvni kiritishning boshqa asoslarga koʻra, shu jumladan maqsadga muvofiq emasligi sabablari boʻyicha rad etilishiga yoʻl qoʻyilmaydi

23. Tan olish va Davlat reyestriga yozuvni kiritish rad etilgani toʻgʻrisidagi bildirishnomada rad etishning sabablari va ariza beruvchi koʻrsatilgan sabablarni bartaraf etib, hujjatlarni qayta koʻrib chiqish uchun taqdim etishi mumkin boʻlgan muddat koʻrsatiladi.

Ariza beruvchi rad etish sabablarini bartaraf etib, hujjatlarni qayta koʻrib chiqish uchun taqdim etish huquqiga ega boʻlgan muddat rad etish toʻgʻrisidagi yozma yoki elektron shakldagi bildirishnoma olingan kundan boshlab oʻn besh ish kunidan kam boʻlmasligi kerak.

24. Ariza beruvchi rad etish uchun asos boʻlgan sabablarni bartaraf etgan taqdirda, hujjatlar Davlat markazi tomonidan rad etish sabablari bartaraf etilgani toʻgʻrisidagi ariza hamda rad etish sabablari bartaraf etilganligini tasdiqlovchi tegishli hujjatlar olingan kundan boshlab besh ish kunidan oshmaydigan muddatda qayta koʻrib chiqiladi.

Arizani qayta koʻrib chiqish uchun yigʻim undirilmaydi.

25. Hujjatlarni qayta koʻrib chiqishda rad etish haqidagi bildirishnomada bayon qilinmagan sabablarning keltirilishiga yoʻl qoʻyilmaydi, avval koʻrsatilgan sabablar bartaraf etilganini tasdiqlovchi hujjatlar bilan bogʻliq boʻlgan sabablar bundan mustasno.

26. Rad etish haqidagi bildirishnomada koʻrsatilgan muddat oʻtgandan keyin taqdim etilgan ariza yangi taqdim etilgan hisoblanadi va Davlat markazi tomonidan umumiy asoslarda koʻrib chiqiladi.

27. Ariza beruvchi tan olishning va Davlat reyestriga yozuvning kiritilishini rad etilishi, shuningdek, Davlat markazi mansabdor shaxsining harakati (harakatsizligi) yuzasidan belgilangan tartibda shikoyat qilish huquqiga ega.

28. Davlat reyestridagi yozuv bilan tasdiqlangan tan olishning amal qilish muddati oʻtgach, dori vositalari davlat roʻyxatidan oʻtkazilganining amal qilish davrida ishlab chiqarilgan boʻlsa, ularni sotish va tibbiyot amaliyotida qoʻllashga ruxsat etiladi.

29. Roʻyxatdan oʻtkazish hujjatlarida keltirilgan maʼlumotlar oʻzgargan taqdirda, ariza beruvchi Davlat markaziga oʻzgartirish va qoʻshimchalar kiritish toʻgʻrisidagi ariza bilan ushbu oʻzgartirishlarni tasdiqlovchi tegishli hujjatlarni ilova qilgan holda murojaat qiladi.

30. Taklif etilayotgan oʻzgartirish va qoʻshimchalar dori vositasining sifati, samaradorligi va xavfsizligining yomonlashuviga olib kelishi mumkin boʻlgan holatlarda, Davlat markazi roʻyxatdan oʻtkazish hujjatlariga oʻzgartirish va qoʻshimchalar kiritishni rad etadi.

31. Davlat reyestriga oʻzgartirish va qoʻshimchalar kiritish toʻgʻrisidagi ariza oʻn ish kunidan oshmaydigan muddatda koʻrib chiqiladi.

32. Tan olishning amal qilish muddati ariza beruvchining Davlat markaziga taqdim etgan arizasiga binoan uzaytirilishi mumkin. Tan olishning amal qilish muddatini uzaytirish toʻgʻrisidagi ariza Davlat markaziga uning amal qilish muddati tugashidan ikki oy oldin taqdim etilishi kerak.

Birinchi marta tan olishning amal qilish muddatini uzaytirish toʻgʻrisidagi ariza mazkur bandda koʻrsatilgan muddat oʻtgandan keyin taqdim etilganda, ariza birinchi marta tan olish uchun taqdim etilgandek hisoblanadi va Davlat markazi tomonidan umumiy asoslarda koʻrib chiqiladi.

33. Tan olishning amal qilish muddati birinchi marta tan olish uchun nazarda tutilgan tartibda uzaytiriladi.

Birinchi marta tan olishning amal qilishi muddati oʻtgandan soʻng tan olish natijalari Davlat reyestriga ularning amal qilish muddati cheklanmagan holda kiritiladi.

34. Davlat reyestriga oʻzgartirish va qoʻshimchalar kiritish, shuningdek, tan olishning amal qilish muddatini uzaytirish toʻgʻrisidagi arizani koʻrib chiqish uchun tan olish toʻgʻrisidagi arizani koʻrib chiqishga toʻlanadigan summaning yarmi miqdorida yigʻim undiriladi.

35. Davlat markazi quyidagi hollarda tan olishning amal qilishini toʻxtatadi va uni Davlat reyestridan chiqaradi:

dori vositasi Oʻzbekiston Respublikasida va Roʻyxatda koʻrsatilgan mamlakatlarda qoʻllash taqiqlanganda;

dori vositasi qoʻllanilganda tibbiyotda qoʻllashga doir yoʻriqnomada koʻrsatilmagan jiddiy nojoʻya taʼsirlar aniqlanganda;

dori vositasi qoʻllanilganda fuqarolar sogʻligi uchun ogʻir asoratlar aniqlanganda;

ariza beruvchining xohishiga koʻra.

36. Soxta hujjatlardan foydalangan holda tan olish amalga oshirilgani va Davlat reyestriga bu haqida yozuv kiritilgani aniqlangan taqdirda, sud tartibida tan olishning amal qilishi bekor qilinadi hamda Davlat reyestridan bu haqidagi yozuv chiqarib tashlanadi.

37. Ariza beruvchi ishonchsiz yoki notoʻgʻri maʼlumotlarni taqdim etgani uchun qonun hujjatlariga muvofiq javob beradi.

38. Mazkur Nizom talablarining buzilishida aybdor boʻlgan shaxslar qonun hujjatlarida belgilangan tartibda javobgar boʻladi.

1. Vazirlar Mahkamasining 2016-yil 27-oktabrdagi 365-son qarori (Oʻzbekiston Respublikasi QT, 2016, 10-son, 100-modda) bilan tasdiqlangan Dori vositalarining xavfsizligi toʻgʻrisidagi umumiy texnik reglamentning 3-bandiga quyidagi mazmundagi oʻn yettinchi xatboshi qoʻshilsin:

“dorivor angro-mahsulot — yirik qadoqda ishlab chiqariladigan va sotiladigan, shuningdek, keyinchalik tayyor dori vositalarini ishlab chiqarish (tayyorlash) uchun ishlatiladigan dori vositasi”.

2. Oʻzbekiston Respublikasi Vazirlar Mahkamasining 2017-yil 6-apreldagi 185-son qarori (Oʻzbekiston Respublikasi QT, 2017-y., 4-son, 40-modda) bilan tasdiqlangan Dori vositalarini va tibbiy buyumlarni chakana realizatsiya qilish tartibi toʻgʻrisidagi nizomda:

a) 10-bandning uchinchi xatboshi quyidagi tahrirda bayon etilsin:

“Chetdan olib kelinadigan, shuningdek, mamlakatimiz ishlab chiqaruvchilaridan sotib olinadigan dori vositalari va tibbiyot buyumlari ijtimoiy dorixonalar tomonidan ularni yetkazib berishda ishtirok etuvchi vositachilar sonidan qatʼi nazar, xarid qilish narxi yoki ulgurji narxning 10 foizidan ortiq boʻlmagan cheklangan savdo ustamasi koʻllanilgan holda chakana sotiladi”;

b) 24-bandning ikkinchi xatboshi quyidagi tahrirda bayon qilinsin:

“Ijtimoiy dorixonalar Ijtimoiy ahamiyatga ega dori vositalari va tibbiyot buyumlarining qonunchilikka muvofiq tasdiqlangan roʻyxatini davlat va rus tillarida 12 shrift oʻlchamidan kam boʻlmagan oʻlchamda koʻrinadigan joyga osib qoʻyishlari shart”.

3. Vazirlar Mahkamasining 2017-yil 12-maydagi 284-son qarori (Oʻzbekiston Respublikasi QT, 2017-y., 5-son, 71-modda) bilan tasdiqlangan Dori vositalari va tibbiy buyumlarni chakana savdosini litsenziyalash toʻgʻrisidagi Nizomga 5-ilovaning 5.5-bandidagi “belgilangan narxlari bilan ijtimoiy ahamiyatga ega dori vositalari va tibbiy buyumlarning davlat va rus tillaridagi 12-shriftdan kam boʻlmagan oʻlchamdagi tasdiqlangan roʻyxati” satri chiqarib tashlansin;

4. Vazirlar Mahkamasining 2017-yil 18-sentabrdagi 741-son qarori (Oʻzbekiston Respublikasi QT, 2017-y., 9-son, 214-modda) bilan tasdiqlangan Ijtimoiy ahamiyatga ega dori vositalari va tibbiyot buyumlariga ehtiyojni aniqlash tartibi toʻgʻrisidagi nizom 2-bandining toʻrtinchi xatboshi quyidagi tahrirda bayon etilsin:

“ijtimoiy ahamiyatga ega dori vositalari va tibbiyot buyumlari — ijtimoiy ahamiyatga ega va atrofdagilar uchun xavf tugʻdiradigan kasalliklarning oldini olish hamda davolash uchun talab yuqori boʻlgan va aholi, tibbiyot tashkilotlari tomonidan koʻp foydalaniladigan, Oʻzbekiston Respublikasi Sogʻliqni saqlash vazirligi tasdiqlaydigan Ijtimoiy ahamiyatga ega dori vositalari va tibbiyot buyumlarining roʻyxatiga kiritilgan dori vositalari va tibbiyot buyumlari”.

5. Vazirlar Mahkamasining “Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligi faoliyatini tashkil etish toʻgʻrisida” 2017-yil 18-dekabrdagi 993-son qarorida (Oʻzbekiston Respublikasi QT, 2017-y., 12-son, 291-modda):

a) 4-ilovada:

8-bandning yettinchi xatboshidagi “shuningdek, ularga qatʼiy narxlarni belgilash boʻyicha takliflar tayyorlash va kiritish” soʻzlari chiqarib tashlansin;

9-bandning “e” kichik bandida:

birinchi xatboshidagi “shuningdek, ularga qatʼiy narxlarni belgilash boʻyicha takliflar tayyorlash va kiritish” soʻzlari chiqarib tashlansin;

uchinchi xatboshidagi “ijtimoiy ahamiyatli dori vositalari va tibbiy buyumlarning qatʼiy narxlarini belgilash boʻyicha Oʻzbekiston Respublikasi Sogʻliqni saqlash vaziriga takliflar kiritadi” soʻzlari chiqarib tashlansin;

b) 5-ilova 6-bandining “e” kichik bandida:

“shuningdek, ularga qatʼiy narxlarni belgilash boʻyicha takliflar tayyorlash va kiritish” soʻzlari chiqarib tashlansin;

uchinchi xatboshi chiqarib tashlansin.