Zamonaviy mehmonxona xizmatlari koʻrsatish uchun sharoitlar yaratish va mehmonxona komplekslaridan samarali foydalanishni taʼminlash maqsadida Vazirlar Mahkamasi qaror qiladi:

1. Ilovaga muvofiq roʻyxat boʻyicha mehmonxona komplekslaridagi davlat aktivlarini (keyingi oʻrinlarda obyektlar deb ataladi) investorlar tomonidan ularni modernizatsiya va rekonstruksiya qilish majburiyatini olgan holda ommaviy savdolarda sotish toʻgʻrisida Oʻzbekiston Respublikasi Investitsiyalar boʻyicha davlat qoʻmitasi, Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Oʻzbekiston Respublikasi Turizmni rivojlantirish davlat qoʻmitasi, Qashqadaryo viloyati va Toshkent shahar hokimliklarining taklifiga rozilik berilsin.

2. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi balansda turgan tashkilotlar bilan birgalikda ikki oy muddatda, belgilangan tartibda, obyektlarni baholash va ommaviy savdolarga qoʻyishni taʼminlasin.

3. Oʻzbekiston Respublikasi Investitsiyalar boʻyicha davlat qoʻmitasi va Oʻzbekiston Respublikasi Turizmni rivojlantirish davlat qoʻmitasi:

potensial, shu jumladan, xorijiy investorlarni keng xabardor qilish va obyektlarni sotib olishga jalb etish boʻyicha zarur choralar koʻrsinlar;

obyektlarni sotish yakunlariga koʻra har bir obyektni modernizatsiya va rekonstruksiya qilish boʻyicha “yoʻl xaritalari” ishlab chiqishda koʻmaklashsinlar.

4. Davlat mulklarini xorijiy investorlarga sotishda tender savdolari oʻtkazish boʻyicha davlat komissiyasi (S.R. Xolmuradov) ushbu qarorga ilovada koʻrsatilgan mehmonxona komplekslaridagi davlat aktivlarini, qonunchilikda belgilangan tartibda, investorlarga sotilishini taʼminlasin.

5. Belgilab qoʻyilsinki:

obyektlarni sotishda sotib olish toʻlovlarini toʻlashning maksimal muddati toʻlovlarni teng ulushlar bilan har chorakda toʻlagan holda 3 yilni tashkil qiladi;

“Shahrisabz yulduzi” mehmonxona kompleksini sotishdan tushadigan mablagʻlar imzolangan bitimga muvofiq, “Shahrisabz yulduzi” mehmonxona kopmleksini qurish uchun Polsha Hukumati tomonidan ajratilgan kreditni qoplashga Oʻzbekiston Respublikasi Turizmni rivojlantirish davlat qoʻmitasi tomonidan ilgari yoʻnaltirilgan summalarni toʻlash uchun Oʻzbekiston Respublikasi Turizmni rivojlantirish davlat qoʻmitasi huzuridagi budjetdan tashqari Turizm sohasini qoʻllab-quvvatlash jamgʻarmasiga yoʻnaltiriladi, Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi tasarrufida qoldiriladigan mablagʻlar bundan mustasno;

ushbu bandning uchinchi xat boshiga muvofiq Oʻzbekiston Respublikasi Turizmni rivojlantirish davlat qoʻmitasi huzuridagi budjetdan tashqari Turizm sohasini qoʻllab-quvvatlash jamgʻarmasiga tushgan mablagʻlardan Oʻzbekiston Respublikasi Vazirlar Mahkamasining Taʼlim, sogʻliqni saqlash, jismoniy tarbiya, sport va turizm masalalari kompleksi rahbari bilan kelishgan holda foydalaniladi.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Oʻzbekiston Respublikasi Investitsiyalar boʻyicha davlat qoʻmitasi raisi S.R. Xolmuradov, Oʻzbekiston Respublikasi Bosh vazirining oʻrinbosari A.A. Abduxakimov hamda Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisi zimmasiga yuklansin.