Xalq xo‘jaligi va aholining davlat, safarbarlik va kechiktirib bo‘lmaydigan ehtiyojlarini ta’minlash, O‘zbekiston Respublikasi iqtisodiyotining barqaror faoliyat ko‘rsatishi, tabiiy ofatlar, halokatlar, avariyalar va boshqa favqulodda vaziyatlarni bartaraf etish uchun moddiy boyliklarning maxsus fondini yaratish maqsadida Vazirlar Mahkamasi qaror qiladi:

1. SSSR Moddiy rezervlar davlat qo‘mitasining O‘rta Osiyo hududiy boshqarmasi negizida O‘zbekiston Respublikasi Vazirlar Mahkamasi huzurida Davlat moddiy rezervlar Bosh boshqarmasi (“O‘zdavrezerv”) tashkil etilsin.

SSSR Moddiy rezervlar davlat qo‘mitasi O‘rta Osiyo hududiy boshqarmasining O‘zbekiston Respublikasi hududida joylashgan asosiy mablag‘lari, shu jumladan, binolari va inshootlari, korxonalari va tashkilotlari, 1-ilovaga muvofiq, “O‘zdavrezerv”ga berilsin.

2. “O‘zdavrezerv” zimmasiga quyidagilar yuklatilsin:

O‘zbekiston Respublikasi Hukumatining moddiy boyliklarning davlat va safarbarlik rezervlarini yaratish va ularni berish, “qaytarish, yangilash va almashtirish bo‘yicha topshiriqlarini hamda alohida qarorlarini bajarishni ta’minlash;

respublika hududida joylashgan vazirliklar, davlat qo‘mitalari, idoralar, korxonalar, tashkilotlar va muassasalarning (ularning idoraviy mansubligidan va mulkchilik shaklidan qat’i nazar) safarbarlik rezervlari bilan bog‘liq faoliyatini nazorat qilish.

3. O‘zbekiston Respublikasi Iqtisodiyot qo‘mitasi, Moliya vazirligi, Moddiy-texnika ta’minoti davlat-kooperativ qo‘mitasi har yili yillik topshiriqlarni va budjetni tuzishda “O‘zdavrezerv” apparati va unga qarashli korxonalarning normal ishlashini ta’minlash, moddiy-texnika bazasini rivojlantirish uchun unga tegishli hajmda kapital mablag‘lar, moddiy va moliyaviy resurslar, shuningdek, davlat va safarbarlik rezervlarida to‘planadigan moddiy boyliklar haqini to‘lash uchun mablag‘lar ajratishni nazarda tutsinlar.

4. O‘zbekiston Respublikasi Iqtisodiyot qo‘mitasi Moddiy-texnika ta’minoti davlat-kooperativ qo‘mitasi, “O‘zdavrezerv”, Mudofaa ishlari vazirligi, Savdo vazirligi, Vazirlar Mahkamasining Favqulodda vaziyatlar bo‘yicha komissiyasi va boshqa manfaatdor vazirliklar va idoralar bilan birgalikda har yili davlat va safarbarlik rezervlarining moddiy boyliklarini jamg‘arish, brondan chiqarish, yangilash, qaytarish va almashtirish rejalari loyihalarini ishlab chiqsin va Vazirlar Mahkamasiga tasdiqlash uchun taqdim etsin.

5. Belgilab qo‘yilsinki, O‘zbekiston Respublikasi davlat moddiy va safarbarlik rezervlari daxlsizdir.

Davlat va safarbarlik rezervlaridan moddiy boyliklarni berish O‘zbekiston Respublikasi Vazirlar Mahkamasi tasdiqlagan brondan chiqarish, yangilash va almashtirish yillik rejalariga muvofiq, shuningdek O‘zbekiston Respublikasi Vazirlar Mahkamasining farmoyishlari asosida amalga oshiriladi.

Davlat va safarbarlik rezervlarining moddiy boyliklarini o‘zboshimchalik bilan sarflashda hamda uning daxlsizligini boshqacha buzishlarda aybdor bo‘lgan mansabdor shaxslar O‘zbekiston Respublikasi qonunlarida belgilangan tartibda javobgarlikka tortiladilar.

6. “O‘zdavravrezerv”ga bo‘sh ombor maydonlarini respublika korxonalari, muassasalari va tashkilotlariga ijaraga berishga va O‘zbekiston Respublikasi Vazirlar Mahkamasining qarori bilan tashkil etilayotgan respublika tovar ayirboshlash fondini saqlash va berish a’mollarini amalga oshirishga ruxsat berilsin.

7. “O‘zdavrezerv”ning markaziy apparati tarkibi 2-ilovaga muvofiq tasdiqlansin.

“O‘zdavrezerv” markaziy apparati xodimlarining eng ko‘p soni 47 kishidan (ma’muriy binoni qo‘riqlovchi va unga xizmat ko‘rsatuvchi xodimlardan tashqari) va yillik mehnat haqi fondi 275 ming so‘mdan iborat qilib belgilansin.

“O‘zdavrezerv”ga bir nafar boshliq o‘rinbosariga ega bo‘lishga ruxsat etilsin. “O‘zdavrezerv”da 5 kishidan iborat Kengash tashkil etiladi.

8. “O‘zdavrezerv”ning rahbar xodimlari va mutaxassislari mehnat haqi to‘lash, shuningdek, tibbiy va maishiy xizmat ko‘rsatish sharoitlari bo‘yicha O‘zbekiston Respublikasi vazirliklari va idoralari markaziy apparati xodimlarining tegishli toifalariga tenglashtirilsin.

9. O‘zbekiston Respublikasi Vazirlar Mahkamasi huzuridagi Davlat moddiy rezervlar Bosh boshqarmasining ilova qilinayotgan Nizomi tasdiqlansin. “O‘zdavrezerv” ikki oy muddat ichida O‘zbekiston Respublikasi Iqtisodiyot qo‘mitasi, Moddiy-texnika ta’minoti davlat-kooperativ qo‘mitasi, Moliya vazirligi, Adliya vazirligi va boshqa manfaatdor tashkilotlar bilan kelishilgan davlat va safarbarlik rezervlari to‘g‘risidagi Nizom loyihasini ishlab chiqsin va tasdiqlash uchun taqdim etsin.

10. O‘zbekiston Respublikasi Moliya vazirligi “O‘zdavrezerv” va Davlat banki bilan birgalikda davlat va safarbarlik rezervlarining material va tovarlari uchun hisob-kitoblar tartibi to‘g‘risidagi yo‘riqnomani ishlab chiqsin va tasdiqlasin.

“Sentralniy” kombinati, Toshkent sh.

“Magnit” kombinati, Toshkent viloyatidagi Ohangaron sh.

“Peredovik” kombinati, Samarqand viloyatidagi Juma sh.

“Svoboda” kombinati, Samarqand viloyatidagi Krasnogvardeysk sh.

Rahbariyat

Birinchi bo‘lim

Ikkinchi bo‘lim (oziq-ovqat)

Uchinchi bo‘lim (reja-iqtisodiyot)

Ettinchi bo‘lim (sanoat-xomashyo va yonilg‘i)

To‘qqizinchi bo‘lim (ekspluatatsiya va qurilish)

O‘ninchi bo‘lim (tovar ayirboshlash)

O‘n birinchi bo‘lim (harbiy-safarbarlik)

O‘n ikkinchi bo‘lim (favqulodda vaziyatlar bo‘yicha)

Buxgalteriya

1. O‘zbekiston Respublikasi Vazirlar Mahkamasi huzuridagi Davlat moddiy rezervlar Bosh boshqarmasi (“O‘zdavrezerv”) respublika rezerv fondlarini tashkil etish sohasida respublika davlat boshqaruv organi bo‘lib, boshqa mintaqalar bilan o‘zaro foydali almashuv operatsiyalarini amalga oshirish uchun davlat moddiy rezervini, moddiy-texnika va oziq-ovqat resurslarining respublika tovar ayirboshlash fondini jamg‘arishni amalga oshiradi va ularni saqlashni ta’minlaydi, shuningdek, ularning idoraviy mansubligi va mulkchilik shaklidan qat’i nazar, korxonalarda tashkilotlarda va muassasalarda safarbarlik rezervi moddiy boyliklarining jamg‘arilishini hamda saqlanishini nazorat qiladi.

2. Quyidagilar “O‘zdavrezerv”ning asosiy vazifalari hisoblanadi:

davlat rezervidagi moddiy boyliklarni jamg‘arish va ularni berish bo‘yicha davlat rejalarining, O‘zbekiston Respublikasi Vazirlar Mahkamasining topshiriqlari va alohida qarorlarining bajarilishini ta’minlash;

korxonalar, tashkilotlar va muassasalarning (ularning idoraviy mansubligi va mulkchilik shaklidan qat’i nazar), shuningdek, ularning yuqori organlarining safarbarlik rezervi bilan bog‘liq faoliyatini nazorat qilishni amalga oshirish;

tasarrufidagi korxonalarda asosiy fondlarning o‘z vaqtida ishga tushirilishini va ulardan, shuningdek, “O‘zdavrezerv” tizimini saqlash uchun ajratiladigan budjet ajratmalaridan hamda korxonalarni, tabiatni muhofaza qilish inshootlarini, uy-joylarni va boshqa ijtimoiy soha obyektlarini qurishga, texnikaviy qayta jihozlashga, kengaytirishga va qayta qurishga mo‘ljallangan kapital mablag‘lardan samarali foydalanishni ta’minlash;

davlat rezervi moddiy boyliklarining, shuningdek, respublika tovar ayirboshlash fondining sifat va miqdor jihatidan saqlanishini ta’minlash;

yagona texnika siyosati o‘tkazish, korxonalarni qurishda va ulardan foydalanishda fan va texnikaning eng yangi yutuqlarini, ilg‘or tajribani joriy etish;

“O‘zdavrezerv” apparatini va uning korxonalarini kadrlar bilan ta’minlash, ularni qayta tayyorlash va malakasini oshirishni tashkil etish, yuqori malakali mutaxassislarni, mohir tashkilotchilarni, o‘z ishini yaxshi biladiganlarni hamda jamoada obro‘-e’tibor va ishonch qozonganlarni rahbarlik ishlariga ko‘tarish;

xavf-xatarsiz mehnat sharoitlari yaratish, ishlab chiqarishda shikastlanishlarning oldini olishning yangi vosita va usullarini joriy etish, ishchi va xizmatchilarning ijtimoiy-maishiy turmush sharoitlarini yaxshilash.

3. “O‘zdavrezerv” o‘ziga yuklatilgan vazifalarga muvofiq quyidagi funksiyalarni bajaradi:

Iqtisodiyot qo‘mitasi, Moddiy-texnika ta’minoti davlat-kooperativ qo‘mitasi, Mudofaa ishlari vazirligi; Savdo vazirligi va respublikaning boshqa manfaatdor tashkilotlari bilan birgalikda:

davlat va safarbarlik rezervlari tarkibiga kiritiladigan, shuningdek, respublika tovar ayirboshlash fondini tashkil etish uchun moddiy boyliklar nomenklaturasi va ularni jamg‘arish normalari;

davlat va safarbarlik rezervlari moddiy boyliklarini, respublika ayirboshlash fondini tashkil etish uchun moddiy boyliklarni jamg‘arish, brondan chiqarish, yangilash, almashtirish, shuningdek, “O‘zdavrezerv” tizimini iqtisodiy va ijtimoiy rivojlantirish rejalari loyihalarini ishlab chiqishda ishtirok etadi;

davlat rezervini, respublika ayirboshlash fondini saqlash uchun mo‘ljallangan yangi korxonalar quriladigan joylarni O‘zbekiston Respublikasi Iqtisodiyot qo‘mitasi, Mudofaa ishlari vazirligi mahalliy boshqaruv organlari bilan, Qurolli Kuchlar uchun mo‘ljallangan davlat rezervi moddiy boyliklarining kamaymaydigan zaxiralarini hududiy joylashtirishni Mudofaa ishlari vazirligi bilan kelishilgan holda belgilaydi va tasdiqlaydi;

davlat va safarbarlik rezervlari moddiy boyliklarini, shuningdek, respublika ayirboshlash fondining moddiy boyliklarini jamg‘arish, berish, qaytarish, yangilash va almashtirish bo‘yicha O‘zbekiston Respublikasi Vazirlar Mahkamasi tomonidan tasdiqlangan rejalar va topshiriqlarning bajarilishini ta’minlaydi;

O‘zbekiston Respublikasi Vazirlar Mahkamasining topshirig‘i bo‘yicha O‘zbekiston Respublikasi vazirliklari va idoralarining rezervlarning moddiy boyliklarini olish va qaytarish muddatlarini ko‘chirish haqidagi iltimosnomalarini ko‘rib chiqadi va O‘zbekiston Respublikasi Vazirlar Mahkamasiga tegishli xulosalarni taqdim etadi;

davlat va safarbarlik rezervlari moddiy boyliklarini hamda respublika ayirboshlash fondi moddiy boyliklarini jamg‘arish bo‘yicha xarajatlarni belgilangan tartibda mablag‘ bilan ta’minlashni va ular uchun hisob-kitoblarni amalga oshiradi;

tasarrufidagi korxonalarda buxgalteriya va statistika hisobini tashkil etadi, hisobga olish formalarini tasdiqlaydi, belgilangan tartibda buxgalteriya va statistika hisobotini oladi va taqdim etadi, hisobga olishning ilg‘or usullarini joriy qiladi;

davlat, safarbarlik rezervlari moddiy boyliklarining, shuningdek, respublika ayirboshlash fondi moddiy boyliklarining yagona hisobini tashkil etishni ta’minlaydi, ularning mavjud miqdori va harakatining yig‘ma hisobini amalga oshiradi, O‘zbekiston Respublikasi Vazirlar Mahkamasiga va Iqtisodiyot qo‘mitasiga moddiy boyliklarni jamg‘arish hamda davlat va safarbarlik rezervlariga qaytarish bo‘yicha rejalarning bajarilishi to‘g‘risida, shuningdek, safarbarlik rezervidagi va respublika ayirboshlash fondidagi moddiy boyliklar miqdori to‘g‘risida hisobotlar yuboradi, O‘zbekiston Respublikasi Vazirlar Mahkamasiga davlat rezervidagi moddiy boyliklar miqdori to‘g‘risida yig‘ma hisobotlar taqdim etadi, Qurolli Kuchlar uchun mo‘ljallangan davlat rezervidagi moddiy boyliklar miqdori to‘g‘risida (nomenklatura, hajmlar va saqlash punktlari bo‘yicha) Mudofaa ishlari vazirligiga har yili xabar qilib turadi;

tasarrufidagi korxonalarning butun xo‘jalik faoliyatiga rahbarlik qilishni ta’minlaydi, mehnatni tashkil etishni yaxshilash, tejamkorlik tartibini kuchaytirish va davlat rezervini saqlash xarajatlarini kamaytirishga doir chora-tadbirlarni amalga oshiradi;

davlat mulkini muhofaza qilishni ta’minlaydi hamda tasarrufidagi korxonalarda umumiy va yong‘indan saqlashni tashkil etish bo‘yicha tadbirlarni amalga oshiradi;

tasarrufidagi korxonalarda safarbarlik tayyorgarligi va fuqaro mudofaasi bo‘yicha tadbirlarni tashkil etadi va amalga oshiradi;

davlat rezervi moddiy boyliklarini uzoq vaqt saqlash bilan bog‘liq bo‘lgan ilmiy-tadqiqot va tajriba ishlarini o‘tkazishni ta’minlaydi, ushbu moddiy boyliklarni uzoq vaqt saqlashni ta’minlashga doir tajribani umumlashtiradi va chora-tadbirlarni amalga oshiradi

4. “O‘zdavrezerv” quyidagi huquqlarga egadir:

a) korxonalar, tashkilotlar va muassasalar (ularning idoraviy mansubligidan va mulkchilik shaklidan qat’i nazar), shuningdek, ularning yuqori organlari tomonidan safarbarlik rezervi moddiy boyliklarini jamg‘arish, yangilash, almashtirish rejalarining bajarilishi, ularni olish va qaytarish tartibiga rioya qilinishi, shuningdek, ushbu boyliklarning tasdiqlangan nomenklaturaga, davlat standartlariga yoki texnikaviy shartlarga muvofiqligi ustidan nazoratni amalga oshirish;

b) korxonalarda, tashkilotlarda (ularning idoraviy mansubligi va mulkchilik shaklidan qat’i nazar) saqlanayotgan davlat va safarbarlik rezervi moddiy boyliklarining hisobga olinishini, harakatini, miqdorini va sifatini taftish qilish va tekshirish kamchiliklarni bartaraf etish hamda davlat va safarbarlik rezervlarini saqlashni tartibga solish bo‘yicha ular uchun bajarish shart bo‘lgan ko‘rsatmalar berish;

v) harbiy-safarbarlik organlari va boshqa organlarning, korxonalar, tashkilotlar va muassasalarning (ularning idoraviy mansubligidan va mulkchilik shaklidan qat’i nazar), shuningdek, ularning yuqori organlarining davlat va safarbarlik rezervlari bilan bog‘liq bo‘lgan masalalar bo‘yicha ishlarini tekshirish;

g) O‘zbekiston Respublikasi Iqtisodiyot qo‘mitasi, Moddiy-texnika ta’minoti davlat-kooperativ qo‘mitasi va Davlat statistika qo‘mitasidan davlat rezervidagi moddiy boyliklar nomenklaturasini va jamg‘arish normalarini ishlab chiqish uchun hamda ularni hududiy joylashtirish uchun zarur bo‘lgan ma’lumotlarni olish;

d) davlat rezervi moddiy boyliklarini yetkazib berish, qabul qilib olish (saqlashga qo‘yish), saqlash, almashtirish, berish hamda ushbu moddiy boyliklar bilan boshqa operatsiyalarni o‘tkazishning o‘ziga xos xususiyatlarini belgilovchi, ko‘rsatib o‘tilgan moddiy boyliklarni yetkazib beruvchilar, mas’ul saqlovchilar va oluvchi (iste’molchi)lar (ularning idoraviy mansubligi va mulkchilik shaklidan qat’i nazar), shuningdek, ularning yuqori organlari uchun bajarish majburiy bo‘lgan yo‘riqnomalarni ishlab chiqish va belgilangan tartibda tasdiqlash;

e) O‘zbekiston Respublikasi Moliya vazirligi va Davlat banki bilan birgalikda davlat va safarbarlik rezervlari moddiy boyliklarini, respublika rezerv fondi moddiy boyliklarini mablag‘, kredit bilan ta’minlash va buxgalteriya hisobi tartibi to‘g‘risida korxonalar, tashkilotlar va muassasalar (ularning idoraviy mansubligi va mulkchilik shaklidan qat’i nazar), shuningdek, ularning yuqori organlari uchun bajarish majburiy bo‘lgan yo‘riqnomalarni ishlab chiqishda va tasdiqlashda qatnashish;

j) davlat rezervining mas’ul saqlovchilaridan va safarbarlik rezervi moddiy boyliklarini saqlovchilardan ular tomonidan belgilangan tartibda o‘tkazilgan davlat va safarbarlik rezervlari moddiy boyliklarini ro‘yxatdan o‘tkazish yakunlari to‘g‘risidagi hujjatli ma’lumotlarni taqdim etishni talab qilish;

z) “O‘zdavrezerv” Kengashida korxonalar, tashkilotlar va muassasalar (ularning idoraviy mansubligi va mulkchilik shaklidan qat’i nazar), shuningdek, ularning yuqori organlari rahbar xodimlarining davlat va safarbarlik rezervlari bilan bog‘liq ishlarining ahvoli haqidagi hamda ushbu ishda aniqlangan kamchiliklarni bartaraf etish bo‘yicha ko‘rilgan chora-tadbirlar haqidagi hisobotlarini tinglash;

i) korxonalar, tashkilotlar va muassasalardan (ularning idoraviy mansubligidan va mulkchilik shaklidan qat’i nazar), shuningdek, ularning yuqori organlaridan davlat va safarbarlik rezervlari bilan ishlashdagi qoida buzishlar haqida tushuntirish xatlari va boshqa materiallarni talab qilish;

k) davlat va safarbarlik rezervlari bilan bog‘liq masalalar bo‘yicha ilmiy tadqiqotlarni va ishlanmalarni bajarish yuzasidan buyurtmachi sifatida belgilangan tartibda shartnomalar tuzish;

l) mahsulot yetkazib beruvchi korxonalardan va mas’ul saqlovchilardan moddiy boyliklarni davlat rezerviga yetkazib berish (jo‘natish, saqlashga qo‘yish) hamda ular o‘rnining o‘zgarishi haqida hisobotlar olish.

5. “O‘zdavrezerv” o‘z faoliyatida O‘zbekiston Respublikasi qonunlariga, O‘zbekiston Respublikasi Oliy Kengashining boshqa qarorlariga, O‘zbekiston Respublikasi Prezidenti farmonlariga, O‘zbekiston Respublikasi Vazirlar Mahkamasining qarorlari va farmoyishlariga, Davlat moddiy rezervi to‘g‘risidagi Nizomga, Safarbarlik rezervi to‘g‘risidagi Nizomga, ushbu Nizomga amal qiladi hamda tasarrufidagi korxonalarda amaldagi qonunlarga rioya etilishini ta’minlaydi.

6. “O‘zdavrezerv”ga O‘zbekiston Respublikasi Vazirlar Mahkamasi huzuridagi Davlat moddiy rezervlar Bosh boshqarmasi boshlig‘i rahbarlik qiladi.

Bosh boshqarma boshlig‘i va uning o‘rinbosarlarini O‘zbekiston Respublikasi Vazirlar Mahkamasi tayinlaydi.

7. Bosh boshqarma boshlig‘i bosh boshqarmaga yuklatilgan vazifalar va funksiyalarning bajarilishi uchun shaxsan javob beradi, o‘z o‘rinbosarlari va tarkibiy bo‘linmalar boshliqlarining javobgarlik darajasini belgilaydi.

8. “O‘zdavrezerv” amaldagi qonunlar asosida va uni bajarish maqsadida, o‘z vakolati doirasida, tasarrufidagi korxonalar uchun bajarish majburiy bo‘lgan buyruqlar, yo‘riqnomalar chiqaradi va ko‘rsatmalar beradi, shuningdek, davlat va safarbarlik rezervlari masalalari bo‘yicha barcha korxonalar, tashkilotlar, muassasalar (ularning idoraviy mansubligidan va mulkchilik shaklidan qat’i nazar) va ularning yuqori organlari uchun bajarish majburiy bo‘lgan yo‘riqnomalar chiqaradi va ko‘rsatmalar beradi. Zarur hollarda “O‘zdavrezerv” O‘zbekiston Respublikasi vazirliklari va idoralari bilan birga qarorlar va buyruqlar chiqaradi.

9. “O‘zdavrezerv”da Bosh boshqarma boshlig‘i (Kengash raisi) va lavozim bo‘yicha uning o‘rinbosarlari, shuningdek, Bosh boshqarmaning boshqa rahbar xodimlaridan iborat tarkibda Kengash tuziladi. Kengash a’zolarini O‘zbekiston Respublikasi Vazirlar Mahkamasi tasdiqlaydi.

10. “O‘zdavrezerv” Kengashi o‘z majlislarida Bosh boshqarma oldida turgan vazifalarning bajarilishini tashkil etish, kadrlarni tanlash, joy-joyiga qo‘yish va tarbiyalash, tasarrufidagi, korxonalarni ijtimoiy-iqtisodiy rivojlantirish, o‘zining tarkibiy bo‘linmalari faoliyatiga doir muhim masalalarni, shuningdek, Bosh boshqarma vakolatiga kiradigan boshqa masalalarni ko‘rib chiqadi.

11. “O‘zdavrezerv” apparati tarkibi va xodimlari soni O‘zbekiston Respublikasi Vazirlar Mahkamasi tomonidan tasdiqlanadi.

“O‘zdavrezerv” apparati shtatlari ro‘yxatini va uning tarkibiy bo‘linmalari to‘g‘risidagi nizomlarni Bosh boshqarma boshlig‘i tasdiqlaydi.

12. “O‘zdavrezerv” va uning tasarrufidagi korxonalar respublika budjeti mablag‘lari hisobiga saqlanadi.

13. “O‘zdavrezerv” O‘zbekiston Respublikasining Davlat gerbi tasvirlangan va o‘z nomi o‘zbek va rus tillarida yozilgan muhrga ega bo‘ladi.