Oʻzbekiston Respublikasi Prezidentining “Oʻzbekiston Respublikasida gripp va boshqa oʻtkir respirator infeksiyalarning tarqalishiga qarshi kurashish tizimini yanada takomillashtirish chora-tadbirlari toʻgʻrisida” 2018-yil 18-maydagi PQ-3729-son qaroriga muvofiq, shuningdek, gripp yuqtirish va uning ogʻir asoratlarini boshidan oʻtkazish xavfi yuqori boʻlgan aholi oʻrtasida grippning oldi olinishini taʼminlash maqsadida Vazirlar Mahkamasi qaror qiladi:

1. Gripp yuqtirish va uning ogʻir asoratlarini boshidan oʻtkazish xavfi yuqori boʻlgan hamda mavsumdan oldin emlanadigan shaxslar kontingenti ilovaga muvofiq belgilansin.

2. Belgilansinki, gripp yuqtirish va uning ogʻir asoratlarini boshidan oʻtkazish xavfi yuqori boʻlgan, “Mehribonlik” uylari, qariyalar va nogironlar uchun “Saxovat” internat uylari, nogironlar hamda nogiron bolalar uchun “Muruvvat” internat uylari, bolalar shaharchalari, bolalar uylarida, shuningdek, jismoniy yoki ruhiy rivojlanishida nuqsoni boʻlgan bolalar uchun ixtisoslashtirilgan taʼlim muassasalarida (maktablar, maktab-internatlarda) yashayotgan shaxslar kontingenti mavsumdan oldin Oʻzbekiston Respublikasi Davlat budjeti va qonun hujjatlarida taqiqlanmagan boshqa mablagʻlar hisobidan, qolgan kontingent oʻz mablagʻlari va boshqa mablagʻlar hisobidan emlanadi.

3. Oʻzbekiston Respublikasi Moliya vazirligi 2019-yildan boshlab, Sogʻliqni saqlash vazirligining asoslangan hisob-kitoblari boʻyicha gripp yuqtirish va uning ogʻir asoratlarini boshidan oʻtkazish xavfi yuqori boʻlgan, “Mehribonlik” uylari, qariyalar va nogironlar uchun “Saxovat” internat uylari, nogironlar hamda nogiron bolalar uchun “Muruvvat” internat uylari, bolalar shaharchalari, bolalar uylarida, shuningdek, jismoniy yoki ruhiy rivojlanishida nuqsoni boʻlgan bolalar uchun ixtisoslashtirilgan taʼlim muassasalarida (maktablar, maktab-internatlarda) yashayotgan shaxslar kontingentini emlash uchun zarur mablagʻlar ajratishni nazarda tutsin.

4. Oʻzbekiston Respublikasi Sogʻliqni saqlash vazirligi:

gripp yuqtirish va uning ogʻir asoratlarini boshidan oʻtkazish xavfi yuqori boʻlgan, “Mehribonlik” uylari, qariyalar va nogironlar uchun “Saxovat” internat uylari, nogironlar hamda nogiron bolalar uchun “Muruvvat” internat uylari, bolalar shaharchalari, bolalar uylarida, shuningdek, jismoniy yoki ruhiy rivojlanishida nuqsoni boʻlgan bolalar uchun ixtisoslashtirilgan taʼlim muassasalarida (maktablar, maktab-internatlarda) yashayotgan shaxslar kontingenti mavsumdan oldin oʻz vaqtida emlanishini;

aholi oʻrtasida va ommaviy axborot vositalarida gripp yuqtirish xavfi hamda uning ogʻir asoratlari toʻgʻrisida, shuningdek, gripp yuqtirish va uning ogʻir asoratlarini boshidan oʻtkazish xavfi yuqori boʻlgan shaxslar kontingentini emlash masalalari boʻyicha maʼrifat ishlari oʻtkazilishini taʼminlasin.

5. Oʻzbekiston Respublikasi Moliya vazirligi Oʻzbekiston Respublikasi Davlat budjetidan ushbu qarorga muvofiq ajratiladigan budjet mablagʻlaridan maqsadli va samarali foydalanilishi yuzasidan qatʼiy nazoratni taʼminlasin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Abduhakimov va Oʻzbekiston Respublikasi Sogʻliqni saqlash vaziri A.K. Shadmanov zimmasiga yuklansin.

1. Homilador ayollar.

2. 6 oylikdan katta bolalar va nafas olish organlari va yurak-qon tomir tizimlarining maʼlum surunkali kasalliklariga chalingan katta yoshlilar.

3. 60 yoshdan oshgan shaxslar.

4. 6 oylikdan 59 oylikkacha boʻlgan bolalar.

5. Tibbiyot xodimlari.

6. “Mehribonlik” uylari, qariyalar va nogironlar uchun “Saxovat” internat uylari, nogironlar hamda nogiron bolalar uchun “Muruvvat” internat uylari, bolalar shaharchalari, bolalar uylarida, shuningdek, jismoniy yoki ruhiy rivojlanishida nuqsoni boʻlgan bolalar uchun ixtisoslashtirilgan taʼlim muassasalarida (maktablar, maktab-internatlarda) yashayotgan shaxslar.