Davlat bojlari, gerb yig‘imi hamda notariuslar va FHDY organlari tomonidan ko‘rsatiladigan pullik xizmatlar uchun to‘lovlarni amalga oshirishda aholiga qo‘shimcha qulayliklar yaratish, O‘zbekiston Respublikasi Davlat budjeti va adliya organlarining budjetdan tashqari jamg‘armalariga mablag‘larning to‘liq va o‘z vaqtida tushishini ta’minlash hamda tijorat banklari maxsus kassalari faoliyati samaradorligini oshirish maqsadida Vazirlar Mahkamasi qaror qiladi:

1. O‘zbekiston Respublikasi Adliya vazirligi, Moliya vazirligi va Markaziy bankining:

notarial xizmatlar va FHDY organlari xizmatlari uchun to‘lovlarni amalga oshirishda interaktiv axborot-kommunikatsiya vositalaridan, jumladan, bankomat, terminal, infokioska va mobil ilovalarni joriy qilish hamda ulardan keng foydalanish;

notariuslar va FHDY organlari undiradigan hamda tijorat banklarining notarial idoralar va FHDY organlari binolari va xonalarida ochilgan maxsus kassalari o‘rnatilgan bankomat, terminal va infokioskalari orqali tushayotgan davlat boji to‘lovlari qonunchilikka muvofiq taqsimlangunga qadar ular summasining bir foizi miqdorida tijorat banklari mukofot olish to‘g‘risidagi takliflariga rozilik berilsin.

2. Notarial idoralar va FHDY organlar binosida maxsus kassalar va to‘lov punktlari ochilganligi uchun tijorat banklari va to‘lov punktlari agentlik tarmoqlari ijara to‘lovi, kommunal va ekspluatatsion xizmatlar to‘lovlaridan ozod qilinsin, kommunal va ekspluatatsion xizmatlar xarajatlari keyinchalik adliya organlari va mahalliy davlat xokimiyati organlari mablag‘lari hisobiga qoplansin.

3. Tijorat banklariga:

notarial idoralar va FHDY organlari binolari va xonalarida ochilgan maxsus kassalar ish rejimini tegishli ravishda notarial idoralar va FHDY organlari ish rejimi bilan muvofiqlashtirish, shuningdek, ularni bank plastik kartalaridan to‘lovlarni qabul qilish bo‘yicha hisob-kitob terminallari bilan jihozlash;

notarial idoralar va FHDY organlari binolari va xonalarida ochilgan maxsus kassalarning yuqori tezlikdagi jahon Internet tarmog‘iga ulanishini ta’minlash tavsiya etilsin.

4. Mazkur qarorning bajarilishini nazorat qilish O‘zbekiston Respublikasi Adliya vaziri R.K. Davletov zimmasiga yuklansin.