Qishloq xoʻjaligi mahsulotlari yetishtirishni koʻpaytirishni ragʻbatlantirish, respublika xalq xoʻjaligi va aholisining unga boʻlgan ehtiyojlarini taʼminlash maqsadida, shuningdek, jamoa xoʻjaliklari, davlat xoʻjaliklari va boshqa qishloq xoʻjaligi korxonalarining iqtisodiy ahvolini mustahkamlash, bozor munosabatlariga oʻtish sharoitida qishloq xoʻjaligi xodimlarining moddiy manfaatdorligini oshirishni koʻzlab, Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi, viloyatlar boshqaruv organlari, Iqtisodiyot qoʻmitasi, qishloq xoʻjaligi vazirligi, Davlat suv xoʻjaligi qurilishi qoʻmitasi, Davlat oʻrmonchilik qoʻmitasi, Oʻzbekiston qishloq xoʻjalik fanlari akademiyasining, “Uzplodoovoshchvinprom” konsernining, “Uzkoopzagot-torg”ning Oʻzbekiston Respublikasi boʻyicha 1992-yilda qishloq xoʻjaligi mahsulotlari, xomashyo tayyorlash hajmlari va ularni yetkazib berish uchun davlat buyurtmasi toʻgʻrisidagi taklifi 1-ilovaga* muvofiq qabul qilinsin.

2. Belgilab qoʻyilsinki, 1992-yilda jamoa xoʻjaliklari, davlat xoʻjaliklari va boshqa qishloq xoʻjaligi korxonalari paxta tolasi, pilla, don, sholi, quruq mevalar, chorva, parranda, sut, tuxum boʻyicha belgilangan topshiriqning 85 foizini hamda meva-sabzavot mahsulotlari va kartoshka boʻyicha belgilangan topshiriqning 50 foizini cheklangan xarid narxlarida respublika fondiga yetkazib beradilar.

Mahsulotning belgilangan topshiriqdan qolgan qismi va topshiriqdan ortiqcha olingan mahsulot yetishtiruvchilarning oʻz xohishlariga koʻra shartnomaviy (erkin) xarid narxlarida sotiladi.

3. Davlat buyurtmasiga binoan yetkazib beriladigan oziq-ovqat va texnika ahamiyatidagi qishloq xoʻjaligi mahsulotlari asosiy turlarining cheklangan xarid narxlari 2- va 3-ilovalarga muvofiq tasdiqlansin.

Oʻzbekiston Respublikasi Davlat narxlar qoʻmitasi mana shu ilovalarga muvofiq yangi cheklangan xarid narxlarining preyskurantlarini 10 kun muddat ichida aniqlasin.

Mazkur ilovalarda hisobga olinmagan qishloq xoʻjaligi mahsulotlarining boshqa turlariga (paxtadan tashqari) shartnomaviy (erkin) xarid narxlari belgilanadi.

4. Respublikaning tayyorlov tashkilotlari ushbu qarorga muvofiq qishloq xoʻjaligi mahsulotlari va xomashyo xarid qilish toʻgʻrisidagi oldindan tuzilgan shartnomalarga zarur aniqliklar kiritsinlar.

5. Qishloq xoʻjaligi vazirligi, Davlat suv xoʻjaligi qurilishi qoʻmitasi, Davlat oʻrmonchilik qoʻmitasi, Oʻzbekiston qishloq xoʻjaligi fanlari akademiyasi, “Uzplodoovoshchvinprom” konserni, “Uzkoopzagottorg”, Qoraqalpogʻiston Respublikasi Vazirlar Kengashi va mahalliy boshqaruv organlari:

1992-yilda Qoraqalpogʻiston Respublikasi va viloyatlarning qishloq xoʻjaligini rivojlantirishning taxminiy yigʻma koʻrsatkichlari boʻyicha zarur materiallarni 1992-yilning 15-fevraligacha respublika komissiyasining koʻrib chiqishi uchun taqdim etsinlar;

jamoa xoʻjaliklari, davlat xoʻjaliklari, mahalliy qishloq xoʻjaligi organlari rahbarlari va mutaxassislarining diqqat-eʼtiborini gʻoʻza hamda boshqa qishloq xoʻjaligi ekinlarini almashlab ekish sxemalariga muvofiq joylashtirish, sabzavot va ozuqa ekinlari dalalarining qisqarishiga yoʻl qoʻymaslik, bogʻ, tokzorlar maydonlarining qatʼiy hisobini tartibga solish zarurligiga qaratsinlar;

qishloq xoʻjaligi mahsulotlari yetishtirish hajmlarini koʻpaytirish va ulardan oqilona foydalanish, xoʻjalik yuritishning yangi shakl va usullarini — dehqon (fermer) xoʻjaliklarini, xoʻjaliklar ichidagi va boshqa kooperativlarni joriy etish borasidagi ishlarni hamma joyda avj oldirsinlar.

6. Shu narsa belgilab qoʻyilsinki, qishloq xoʻjaligi mahsulotlari va xomashyoni respublikadan tashqariga olib chiqib ketish asosan respublika korxonalari, xoʻjaliklari va aholisi katta taqchillikni sezayotgan oziq-ovqat, xalq isteʼmoli mollari va ishlab chiqarish-texnika ahamiyatidagi mahsulotlarni barter yoʻli bilan ayirboshlash asosida shartnomalarga binoan amalga oshiriladi.

7. Qishloq xoʻjaligi korxonalariga, tayyorlov tashkilotlariga, kooperativlarga, dehqon (fermer) xoʻjaliklariga, ijarachilarga, shaxsiy yordamchi xoʻjaliklarning egalariga hamda fuqarolarga qishloq xoʻjaligi mahsulotlari va xomashyoni olib chiqib ketish uchun ruxsatnoma Qoraqalpogʻiston Respublikasi Vazirlar Kengashining, mahalliy boshqaruv organlarining maxsus komissiyalari tomonidan beriladi va “Uzplodoovoshchvinprom” va “Uzkoopzagottorg”ning viloyat boʻlimlarida roʻyxatga olinadi.

Quritilgan sabzavotlarni, kishmish va mayiz, meva-sabzavot konservalarini, jumladan, tomat pastasini va vino mahsulotlarini olib chiqib ketish uchun ruxsatnoma faqat Vazirlar Mahkamasi huzuridagi Respublika komissiyasi tomonidan beriladi.

8. 1992-yilning 1-fevralidan boshlab respublikadan tashqariga olib chiqib ketiladigan qishloq xoʻjaligi mahsulotlari uchun 4-ilovaga muvofiq boj olish joriy etilsin.

Belgilab qoʻyilsinki, boj davrlar boʻyicha har tonnasi uchun quyidagi davrlarda soʻm bilan undirib olinadi: I davr — yanvar—aprel, II — may—iyun, III — iyul—sentyabr va IV davr — oktyabr—dekabr.

9. Oʻzbekiston Respublikasi Moliya vazirligi, Davlat soliq bosh boshqarmasi qishloq xoʻjaligi mahsulotlari va xomashyoni respublikadan tashqariga olib chiqib ketish uchun bojni hisoblab chiqish hamda toʻlash tartibini bir hafta muddat ichida banklarga va soliq inspeksiyalariga yetkazsinlar.

10. Vazirlar Mahkamasining, Qoraqalpogʻiston Respublikasi Vazirlar Kengashining, mahalliy boshqaruv organlarining maxsus komissiyalari bergan ruxsatnoma va boj toʻlaganligi toʻgʻrisidagi hujjat; korxonalar, jamoa xoʻjaliklari, davlat xoʻjaliklari, tashkilotlar va muassasalar uchun — xizmat koʻrsatuvchi bank boʻlimining toʻlov kafolat hujjati; fermerlar, ijarachilar, shaxsiy yordamchi xoʻjaliklarning egalari va boshqa fuqarolar uchun jamgʻarma bankining kvitansiyasi qishloq xoʻjaligi mahsulotlari va xomashyoni olib chiqib ketish uchun asos boʻlishi belgilab qoʻyilsin.

Oʻzbekiston Respublikasi Ichki ishlar vazirligi, Davlat soliq bosh boshqarmasi, Davlat statistika qoʻmitasi 15 kun muddat ichida qishloq xoʻjaligi mahsulotlari va xomashyoni respublikadan tashqariga olib ketish uchun ruxsatnomaning namunaviy shaklini, shuningdek, uni rasmiylashtirish va berish tartibi toʻgʻrisida Nizom ishlab chiqsinlar va tasdiqlasinlar hamda ularni mahalliy boshqaruv organlariga yetkazsinlar.

11. Oʻrta Osiyo temir yoʻli boshqarmasi, Oʻzbekiston fuqaro aviatsiyasi boshqarmasi, Oʻzbekiston Respublikasi Avtomobil transporti vazirligi transport vositalarini berish chogʻida ushbu qarorning 6—10-bandlariga qatʼiy amal qilsinlar.

12. Oʻzbekiston Respublikasi Ichki ishlar vazirligi transportning barcha turlarida qishloq xoʻjaligi mahsulotlari va xomashyoni respublikadan tashqariga olib chiqib ketish tartibini taʼminlash ustidan qattiq nazorat oʻrnatsin.

Ruxsatnoma va boj toʻlanganligi toʻgʻrisidagi kvitansiya boʻlmagan taqdirda mahsulotni respublikadan tashqariga olib chiqib ketish taqiqlanadi va u “Uzkoopzagottorg”ning tayyorlov tashkilotlariga topshiriladi.

13. Qoraqalpogʻiston Respublikasi Vazirlar Kengashi, mahalliy boshqaruv organlari va Oʻzbekiston Respublikasi Ichki ishlar vazirligining organlari respublika ichkarisida qishloq xoʻjaligi mahsulotlari va xomashyoning hech qanday toʻsiqsiz tashilishini hamda ularning Toshkent shahriga yetkazib berilishini taʼminlasinlar.

14. Oʻzbekiston Respublikasi Prezidenti huzuridagi Vazirlar Mahkamasining 1991-yil 5-apreldagi 89-son, 1991-yil 29-iyundagi 180-son, 1991-yil 20-iyuldagi 196-son qarorlari oʻz kuchini yoʻqotgan deb hisoblansin.

15. Mazkur qaror qanday bajarilayotganligini nazorat qilish vazifasi Oʻzbekiston Respublikasi Prezidenti huzuridagi Vazirlar Mahkamasi Raisining birinchi oʻrinbosari oʻrtoq I. H Joʻrabekovga yuklatilsin. Uning amalga oshirilishi 1992-yilning aprelida koʻrib chiqilsin.