Oʻzbekiston Respublikasining “Valyutani tartibga solish toʻgʻrisida”gi Qonuniga muvofiq Vazirlar Mahkamasi qaror qiladi:

1. Jismoniy shaxslar tomonidan Oʻzbekiston Respublikasi naqd valyutasi va naqd chet el valyutasini Oʻzbekiston Respublikasining bojxona chegarasi orqali olib kirish va olib chiqib ketish qoidalari 1-ilovaga muvofiq tasdiqlansin.

3. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

4. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — “Oʻzagrotexsanoatxolding” AJ boshqaruvi raisi N.S. Otajonov va Oʻzbekiston Respublikasi Davlat bojxona qoʻmitasi raisi M.V. Toxiriy zimmasiga yuklansin.

1. Mazkur Qoidalar Oʻzbekiston Respublikasining “Valyutani tartibga solish toʻgʻrisida”gi Qonuniga muvofiq jismoniy shaxslar (Oʻzbekiston Respublikasining rezidentlari va norezidentlari) tomonidan Oʻzbekiston Respublikasining naqd valyutasini va naqd chet el valyutasini Oʻzbekiston Respublikasiga olib kirish va olib chiqib ketish tartibini belgilaydi.

Ushbu Qoidalar diplomatik daxlsizlikka ega boʻlgan shaxslarga nisbatan tatbiq etilmaydi.

2. Jismoniy shaxslar tomonidan olib kirilayotgan va olib chiqib ketilayotgan 70 000 000 (yetmish million) soʻm ekvivalentidan ortiq miqdordagi Oʻzbekiston Respublikasining naqd valyutasi va (yoki) naqd chet el valyutasi (keyingi oʻrinlarda — naqd valyuta mablagʻlari) yoʻlovchi bojxona deklaratsiyasini toʻldirish va bojxona organi xodimiga taqdim etish yoʻli bilan bojxona nazoratidan oʻtkaziladi.

Yoʻlovchi bojxona deklaratsiyasida olib kirilayotgan yoki olib chiqib ketilayotgan mablagʻlarning jami summasi koʻrsatiladi.

3. Jismoniy shaxsning xohishiga koʻra ekvivalenti 70 000 000 (yetmish million) soʻmga teng yoki undan oshmaydigan miqdordagi naqd valyuta mablagʻlari ham deklaratsiya qilinishi mumkin.

4. Jismoniy shaxslar tomonidan Oʻzbekiston Respublikasi hududiga bojxona nazorati qoidalariga rioya qilgan holda, naqd valyuta mablagʻlarini olib kirish cheklanmagan miqdorda amalga oshiriladi.

5. Jismoniy shaxslar tomonidan ekvivalenti 100 000 000 (yuz million) soʻmga teng yoki undan oshmaydigan miqdordagi naqd valyuta mablagʻlarini Oʻzbekiston Respublikasidan tashqariga bojxona nazorati qoidalariga rioya etilgan holda cheklovlarsiz olib chiqiladi.

Belgilangan summadan ortiq miqdordagi naqd valyuta mablagʻlarining Oʻzbekiston Respublikasi hududidan tashqariga olib chiqilishiga yoʻl qoʻyilmaydi, ushbu qoidalarning 6-bandida belgilangan holatlar bundan mustasno.

6. Jismoniy shaxslar tomonidan ekvivalenti 100 000 000 (yuz million) soʻmdan ortiq miqdordagi naqd valyuta mablagʻlarini Oʻzbekiston Respublikasidan tashqariga olib chiqib ketishga quyidagi holatlarda yoʻl qoʻyiladi:

rezidentlar tomonidan — xorijiy davlatlarga xizmat safariga ketayotgan Hukumat delegatsiyasi aʼzolari uchun Vazirlar Mahkamasining farmoyishi asosida;

norezidentlar tomonidan — Oʻzbekiston Respublikasiga kirish chogʻida rasmiylashtirilgan yoʻlovchi bojxona deklaratsiyasi asosida deklaratsiya qilingan mablagʻlar doirasida, shuningdek, respublikada belgilangan tartibda tashkil qilingan xalqaro musobaqalar (tanlovlar, olimpiadalar) sovrindorlari yoki qatnashchilari tomonidan mablagʻlarning qonuniyligini tasdiqlovchi hujjatlar asosida.

Bunda norezident jismoniy shaxslar tomonidan Oʻzbekiston Respublikasiga kirish chogʻida toʻldirilgan yoʻlovchi bojxona deklaratsiyasida koʻrsatilgan naqd valyuta mablagʻlaridan respublika hududida qonunchilik hujjatlarida belgilangan talablarga muvofiq foydalanilgan qoldiq miqdori doirasidagi naqd valyuta mablagʻlarini Oʻzbekiston Respublikasi hududidan olib chiqishga yoʻl qoʻyiladi.

7. Ekvivalenti 100 000 000 (yuz million) soʻmdan ortiq boʻlgan naqd valyuta mablagʻlarini olib chiqib ketish uchun asos boʻlgan hujjatni boshqa shaxslarga berishga yoʻl qoʻyilmaydi.

Jismoniy shaxslar tomonidan naqd valyuta mablagʻlarini Oʻzbekiston Respublikasidan tashqariga olib chiqib ketish uchun asos boʻladigan hujjatlardan bir marotaba foydalanishga yoʻl qoʻyiladi va ushbu hujjatlar kelgusida naqd valyuta mablagʻlarini takroran olib chiqib ketish uchun asos hisoblanmaydi.

8. Jismoniy shaxslar Oʻzbekiston Respublikasining bojxona chegarasidan oʻtayotganlarida naqd valyuta mablagʻlarining haqqoniy va toʻgʻri deklaratsiyalanganligi uchun qonun hujjatlarida belgilangan tartibda javob beradilar.

9. Jismoniy shaxs bojxona organlari xodimlarining xatti-harakatlari yuzasidan qonun hujjatlarida belgilangan tartibda shikoyat qilishlari mumkin.

1. Oʻzbekiston Respublikasi Vazirlar Mahkamasining “Respublikada naqd xorijiy valyutaning muomalada boʻlishini tartibga solish chora-tadbirlarini amalga oshirish toʻgʻrisida” 1996-yil 31-oktabrdagi 376-son qarori.

2. Oʻzbekiston Respublikasi Vazirlar Mahkamasining “Oʻzbekiston Respublikasi Hukumatining qarorlarini toʻliq yoki qisman oʻz kuchini yoʻqotgan deb hisoblash hamda ayrim qarorlariga oʻzgartirishlar kiritish toʻgʻrisida” 1998-yil 16-apreldagi 161-son qaroriga 2-ilovaning 9-bandi.

3. Oʻzbekiston Respublikasi Vazirlar Mahkamasining “Valyuta bozorini yanada erkinlashtirish chora-tadbirlari toʻgʻrisida” 2001-yil 22-iyundagi 263-qaroriga ilovaning 1-bandi toʻrtinchi xatboshi (Oʻzbekiston Respublikasi QT, 2001-y., 6-son, 30-modda).

4. Oʻzbekiston Respublikasi Vazirlar Mahkamasining “Oʻzbekiston Respublikasi bojxona chegaralari orqali jismoniy shaxslar tomonidan naqd xorijiy valyutani olib kirish va olib chiqib ketish tartibiga oʻzgartirish kiritish toʻgʻrisida” 2009-yil 5-oktabrdagi 268-son qarori (Oʻzbekiston Respublikasi QHT, 2009-y., 41-son, 442-modda).

5. Oʻzbekiston Respublikasi Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasining “Oʻzbekiston Respublikasining Bojxona kodeksini tasdiqlash toʻgʻrisida” 2016-yil 20-yanvardagi OʻRQ-400-son hamda “Oʻzbekiston Respublikasining Bojxona kodeksi qabul qilinishi munosabati bilan Oʻzbekiston Respublikasining ayrim qonun hujjatlariga oʻzgartishlar kiritish, shuningdek baʼzilarini oʻz kuchini yoʻqotgan deb topish toʻgʻrisida” 2016-yil 20-yanvardagi OʻRQ-401-son qonunlari)“ 2016-yil 20-iyundagi 211-son qaroriga 1-ilovaning 3-bandi (Oʻzbekiston Respublikasi QT, 2016-y., 6-son, 59-modda).