Rangli metall parchalari va chiqindilarini toʻplash, topshirish hamda qayta ishlash tizimini yanada takomillashtirish, ularni tayyorlashni ragʻbatlantirish, xomashyo resurslarini qayta ishlash va samarali ishlatish quvvatlaridan yuqori darajada foydalanishni taʼminlash, shuningdek zamonaviy korporativ boshqaruv uslublarini faol joriy qilish maqsadida Vazirlar Mahkamasi qaror qiladi:

1. “Toshkent rangli metall parchalari, chiqindilarini tayyorlash va qayta ishlash zavodi” AJ aksiyadorlarining korxona nomini “Oʻzbekiston rangli metall parchalari, chiqindilarini tayyorlash va qayta ishlash zavodi” AJga (keyingi oʻrinlarda “Oʻzikkilamchiranglimetall” AJ deb ataladi) oʻzgartirish toʻgʻrisidagi taklifiga rozilik berilsin.

Belgilansinki, “Oʻzikkilamchiranglimetall” AJ Oʻzbekiston Respublikasi Vazirlar Mahkamasining Geologiya, yoqilgʻi-energetika kompleksi, kimyo, neft-kimyo va metallurgiya sanoati masalalari kompleksi tarkibiga kiradi.

2. Quyidagilar “Oʻzikkilamchiranglimetall” AJ ning asosiy vazifalari va faoliyat yoʻnalishlari etib belgilansin:

birinchi — Oʻzbekiston Respublikasi hududida va uning tashqarisida, jumladan rangli metall parchalari va chiqindilari muntazam hosil boʻladigan yuridik shaxslar bilan fyuchers shartnomalari, shuningdek “Oʻzikkilamchiranglimetall” AJga metall parchalari topshiruvchilardan rangli metall parchalari hamda chiqindilarini toʻplash va topshirish uchun yuridik shaxslar bilan topshiriq shartnomalarini tuzish orqali rangli metall parchalari va chiqindilarini tayyorlash hamda metall parchalari topshiruvchilardan qabul qilish boʻyicha samarali tizimni tashkil etish;

ikkinchi — ishlab chiqarishni yangi turdagi mahsulotlar tayyorlashni oʻzlashtirish boʻyicha modernizatsiyalash va diversifikatsiyalash, rangli metallarni qayta ishlaydigan zamonaviy, energiya tejaydigan texnologiyalar hamda uskunalarni joriy etish, shuningdek xomashyo bazasini kengaytirish;

uchinchi — ishlab chiqarishning barqaror oʻsish surʼatlarini taʼminlash, yuqori qoʻshilgan qiymatga ega mahsulotlarning eksport hajmlarini, jumladan yangi bozorlarni oʻzlashtirish hisobidan oshirish, tashqi bozorlardagi pozitsiyalarni mustahkamlash;

toʻrtinchi — mahsulot tannarxini, xususan, butlovchi buyumlar va materiallar ishlab chiqarishni mahalliylashtirish darajasini chuqurlashtirish, ishlab chiqarish va operatsiya xarajatlarini maqbullashtirish, tovarlar hamda xizmatlar importi hajmlarini qisqartirish hisobidan pasaytirishga doir aniq maqsadli ishlarni tizimli ravishda amalga oshirish;

beshinchi — ishlab chiqarishni modernizatsiyalash, texnik va texnologik jihatdan qayta jihozlash jarayonlariga innovatsiya ishlanmalarini joriy etish, ilm-fan va ishlab chiqarishning yanada yaqin aloqasini taʼminlash;

oltinchi — oliy va oʻrta maxsus, kasb-hunar taʼlimi hamda ilmiy muassasalar bilan kooperatsiya aloqalarini kuchaytirish orqali muhandis-texnik va boshqaruv kadrlari malakasini oshirish, ularni qayta tayyorlashni tashkil etish.

Oʻzbekiston Respublikasi Bosh vazirining oʻrinbosari Gʻ.I. Ibragimov va “Oʻzikkilamchiranglimetall” AJ bosh direktori F.R. Abdullayev zimmasiga “Oʻzikkilamchiranglimetall” AJ asosiy vazifalari va faoliyati yoʻnalishlarining toʻliq hamda sifatli bajarilishi yuzasidan shaxsiy masʼuliyat yuklansin.

3. Quyidagilar:

“Oʻzikkilamchiranglimetall” AJning tashkiliy tuzilmasi 1-ilovaga muvofiq;

“Oʻzikkilamchiranglimetall” AJ ijro etuvchi apparatining boshqaruv xodimlari cheklangan soni 77 nafardan iborat tuzilmasi 2-ilovaga muvofiq tasdiqlansin.

“Oʻzikkilamchiranglimetall” AJ aksiyadorlari umumiy yigʻilishi qarori bilan “Oʻzikkilamchiranglimetall” AJ ijro etuvchi apparati tuzilmasiga oʻzgartirishlar kiritilishi mumkinligi maʼlumot uchun qabul qilinsin.

4. Belgilab qoʻyilsinki, “Oʻzikkilamchiranglimetall” AJ bosh direktori aksiyadorlar umumiy yigʻilishida saylanadi va Oʻzbekiston Respublikasi Vazirlar Mahkamasi tomonidan lavozimga tayinlanadi.

5. Oʻzbekiston Respublikasi Iqtisodiyot vazirligi “Oʻzikkilamchiranglimetall” AJ (F.R. Abdullayev) bilan birgalikda 2018 — 2020-yillarda “Oʻzikkilamchiranglimetall” AJni rivojlantirish dasturini uch oy muddatda ishlab chiqsin va Oʻzbekiston Respublikasi Vazirlar Mahkamasiga kiritsin.

6. Oʻzbekiston Respublikasi hududida rangli metall parchalari va chiqindilarini faqat “Oʻzikkilamchiranglimetall” AJ tayyorlashi belgilab qoʻyilsin.

7. “Oʻzikkilamchiranglimetall” AJga:

yuridik va jismoniy shaxslar bilan topshirilgan siniq parchalar uchun metall parchalari topshiruvchilar tomonidan rangli metall parchalari hamda chiqindilari topshirilishini ragʻbatlantiruvchi erkin (shartnomaviy) narxlar boʻyicha hisob-kitob qilish;

yuridik va jismoniy shaxslarga xalq hunarmandchiligi va amaliy sanʼatni rivojlantirishni qoʻllab-quvvatlash uchun rangli metall parchalari hamda chiqindilarini sotishga ruxsat berilsin.

8. Qoraqalpogʻiston Respublikasi Vazirlar Kengashining Raisi, viloyatlar va Toshkent shahar hokimlari, davlat va xoʻjalik boshqaruvi organlari rahbarlari, shuningdek tashkiliy-huquqiy shakli hamda idoraviy mansubligidan qatʼi nazar, tadbirkorlik faoliyati bilan shugʻullanadigan yuridik shaxslarga rangli metall parchalari va chiqindilarini toʻplash, saqlash, ulardan foydalanish hamda “Oʻzikkilamchiranglimetall” AJga topshirish boʻyicha shaxsiy javobgarlik yuklansin.

9. Quyidagilarning erkin (shartnomaviy) narxda “Oʻzikkilamchiranglimetall” AJga majburiy tartibda topshirilishi belgilab qoʻyilsin:

tarkibida rangli metallar boʻlgan, tashkiliy-huquqiy shaklidan qatʼi nazar korxonalarda bankrotlik jarayonlarini oʻtkazish, ularni tugatish, rekonstruksiya qilish hamda modernizatsiyalash davomida hisobdan chiqariladigan jismonan va maʼnan eskirgan uskunalar;

barcha turdagi elektr dvigatellar, transformatorlar, avtotransport vositalari, elektron va maishiy texnikani taʼmirlash hamda ularga servis xizmatlari koʻrsatadigan tashkilotlarning xoʻjalik-ishlab chiqarish faoliyatida hosil boʻladigan rangli metall parchalari va chiqindilari.

10. “Oʻzikkilamchiranglimetall” AJ (F.R. Abdullayev), “Oʻzmetkombinat” AJ (A.X. Xursanov) Oʻzbekiston Respublikasi Iqtisodiyot vazirligi (D.D. Asamov) topshirilgan qora va rangli metall parchalari hamda chiqindilarini tayyorlash, saqlash hamda ular uchun hisob-kitob qilish tartibini takomillashtirishga doir takliflarni 15 kun muddatda Oʻzbekiston Respublikasi Vazirlar Mahkamasiga kiritsin.

11. Oʻzbekiston Respublikasi Ichki ishlar vazirligi (P.R. Bobojonov):

Oʻzbekiston Respublikasi Davlat bojxona qoʻmitasi (M.V. Toxiriy) bilan birgalikda ishlab chiqarish-texnik, maishiy va boshqa buyumlar parchalari hamda rangli metall chiqindilarining respublika tashqarisiga noqonuniy olib chiqilishining oldini olish boʻyicha doimiy ravishda tezkor tadbirlar oʻtkazsin;

Qoraqalpogʻiston Respublikasi Vazirlar Kengashi, viloyatlar, shahar va tumanlar hokimliklari, “Oʻzikkilamchiranglimetall” AJ (F.R. Abdullayev), Oʻzbekiston Respublikasi Davlat soliq qoʻmitasi (B.R. Parpiyev) bilan birgalikda:

tarkibida rangli metallar boʻlgan uskunalar, parchalar va chiqindilarni qabul qiladigan noqonuniy punktlar faoliyat koʻrsatishi, shuningdek yuridik va jismoniy shaxslarning ularni toʻplash, tayyorlash, saqlash, foydalanish hamda topshirish boʻyicha noqonuniy faoliyatiga chek qoʻyish;

tashkilotlar, muassasalar, qurilish maydonlari va boshqa obyektlarda tarkibida rangli metallar boʻlgan uskunalar, parchalar va chiqindilarni, shu jumladan qabristonlardagi rangli metallardan tayyorlangan yodgorliklar hamda panjaralarning oʻgʻirlanishi, ularga zarar yetkazilishi va noqonuniy muomalada boʻlishining oldini olish;

aholi oʻrtasida rangli metall parchalari va chiqindilarining muomalada boʻlish tartibi, shuningdek ularni oʻgʻirlash, noqonuniy tayyorlash va respublika tashqarisiga kontrabanda yoʻli bilan olib chiqib ketish uchun javobgarlik choralari haqida profilaktika ishlari boʻyicha amalga oshirilayotgan chora-tadbirlarni kuchaytirsin.

12. Oʻzbekiston Respublikasi Davlat soliq qoʻmitasi (B.R. Parpiyev) ishlab chiqarish-xoʻjalik faoliyatida rangli metall parchalari va chiqindilari hosil boʻladigan tadbirkorlik subyektlarining moliyaviy-xoʻjalik faoliyatini reja asosida muvofiqlashtirilgan tekshiruvlarni belgilangan tartibda oʻtkazishda xoʻjalik subyektlari tomonidan rangli metall parchalari hamda chiqindilarining muomalada boʻlish tartibiga rioya etilishini oʻrganish uchun “Oʻzikkilamchiranglimetall” AJ mutaxassislarini majburiy tartibda jalb qilsin.

13. Oʻzbekiston Milliy axborot agentligi, Oʻzbekiston milliy teleradiokompaniyasi, Oʻzbekiston matbuot va axborot agentligi rangli metallar, ularning parchalari va chiqindilarini tayyorlash, sotib olish, foydalanish hamda sotish tartibi buzilishining oldini olish va bunga qarshi kurashish boʻyicha amalga oshirilayotgan ishlarning mazmun-mohiyatini aholi oʻrtasida muntazam yoritilishini taʼminlasinlar.

14. Oʻzbekiston Respublikasi Iqtisodiyot vazirligi Adliya vazirligi va boshqa manfaatdor vazirliklar, idoralar bilan birgalikda qonunchilikka ushbu qarordan kelib chiqadigan oʻzgartirishlar va qoʻshimchalar haqidagi takliflarni Oʻzbekiston Respublikasi Vazirlar Mahkamasiga bir oy muddatda kiritsin.

15. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov va “Oʻzikkilamchiranglimetall” AJ bosh direktori F.R. Abdullayev zimmasiga yuklansin.