Oʻzbekiston Respublikasining Bojxona kodeksi, Oʻzbekiston Respublikasining “Davlat bojxona xizmati toʻgʻrisida”gi, “Mahsulot taqsimotiga oid bitimlar toʻgʻrisida”gi qonunlari va Oʻzbekiston Respublikasi Prezidentining 2017-yil 3-maydagi PQ-2948-son “Oʻzbekiston Respublikasi Surxondaryo viloyatida gaz-kimyo kompleksini qurish, “Mustaqillikning 25 yilligi” konida dastlabki qidiruv va uni ishlatish bilan birga “Oʻzbekiston mustaqilligi” investitsiya blokida geologiya-qidiruv ishlari olib borish haqida”gi qarori hamda Vazirlar Mahkamasining 2017-yil 1-iyundagi 333-son “Oʻzbekiston Respublikasi Surxondaryo viloyatida gaz-kimyo kompleksini qurish, “Mustaqillikning 25 yilligi” konida dastlabki qidiruv va uni ishlatish bilan birga “Oʻzbekiston mustaqilligi” investitsiya blokiga nisbatan mahsulot taqsimotiga oid bitimni amalga oshirish choralari haqida”gi qaroriga muvofiq Oʻzbekiston Respublikasi Davlat bojxona qoʻmitasi, Investitsiyalar boʻyicha davlat qoʻmitasi va Tashqi savdo vazirligi qaror qiladi:

1. Oʻzbekiston Respublikasi Surxondaryo viloyatida gaz-kimyo kompleksini qurish, “Mustaqillikning 25 yilligi” konida dastlabki qidiruv va uni ishlatish bilan birga “Oʻzbekiston mustaqilligi” investitsiya blokiga nisbatan mahsulot taqsimotiga oid bitimni amalga oshirish doirasida Oʻzbekiston Respublikasi bojxona chegarasi orqali olib oʻtiladigan tovarlarning bojxona rasmiylashtiruvi tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasining Bojxona kodeksi, Oʻzbekiston Respublikasining “Davlat bojxona xizmati toʻgʻrisida”gi, “Yer qaʼri toʻgʻrisida”gi va “Mahsulot taqsimotiga oid bitimlar toʻgʻrisida”gi qonunlari, Oʻzbekiston Respublikasi Prezidentining 2017-yil 3-maydagi PQ-2948-son “Oʻzbekiston Respublikasi Surxondaryo viloyatida gaz-kimyo kompleksini qurish, “Mustaqillikning 25 yilligi” konida dastlabki qidiruv va uni ishlatish bilan birga “Oʻzbekiston mustaqilligi” investitsiya blokida geologiya-qidiruv ishlari olib borish haqida”gi qarori hamda Vazirlar Mahkamasining 2017-yil 1-iyundagi 333-son “Oʻzbekiston Respublikasi Surxondaryo viloyatida gaz-kimyo kompleksini qurish, “Mustaqillikning 25 yilligi” konida dastlabki qidiruv va uni ishlatish bilan birga “Oʻzbekiston mustaqilligi” investitsiya blokiga nisbatan mahsulot taqsimotiga oid bitimni amalga oshirish choralari haqida”gi qaroriga muvofiq koʻrsatilgan Bitim doirasida Oʻzbekiston Respublikasi bojxona chegarasi orqali olib oʻtilayotgan tovarlarni bojxona rasmiylashtiruvini amalga oshirish tartibini belgilaydi.

1. Mazkur Nizomda quyidagi asosiy tushunchalardan foydalaniladi:

vakolatli organ — “Oʻzbekneftgaz” AJ;

Investorlar — “Gas Project Development Central Asia AG” kompaniyasi, “Altmax Nolding Ltd” kompaniyasi va “Oʻzneftegazqazibchiqarish” AJ, shuningdek ularning huquqiy vorislari va yoʻl qoʻyiladigan sessionarlari;

MTB — Oʻzbekiston Respublikasi Surxondaryo viloyatida gaz-kimyo kompleksini qurish, “Mustaqillikning 25 yilligi” konida dastlabki qidiruv va uni ishlatish bilan birga “Oʻzbekiston mustaqilligi” investitsiya blokiga nisbatan 2017-yil 5-apreldagi mahsulot taqsimotiga oid bitim;

neft-gaz mahsuloti — neft-gaz operatsiyalarini amalga oshirish jarayonida aniqlangan, qazib olingan, tayyorlangan, qayta ishlangan va (yoki) saqlangan hamda tegishli yetkazish joyiga texnologik yoʻqotishlarni ayirib tashlagan holda yetkazilgan neft, tabiiy gaz, kondensat, boshqa uglevodorod mahsulotlari va yoʻldosh mahsulotlar;

neft-gaz operatsiyalari — shartnoma maydoni va shartnomadan tashqari maydon doirasida geologiya-qidiruv ishlari bilan bogʻliq boʻlgan loyihalashtirish, tovarlar, ishlar va xizmatlarni xarid qilish, yer qaʼrini geologik oʻrganish, shu jumladan qidiruv (baholash) quduqlarini burgʻulash, sanoat konlarini obodonlashtirish va ishlatish, qazib chiqarish, barqarorlashtirish, tayyorlash (shu jumladan tabiiy gazni tayyorlash), ajratib olish (shu jumladan, tayyor oltingugurtni olish), qoʻzgʻatish, dam berib haydash, yigʻish, saqlash, ortish, yuklab joʻnatish, qayta ishlash, shartnoma maydonida qazib olingan uglevodorodlar va oltingugurtni yetkazish joyiga yetkazib berish, shartnoma maydoniga nisbatan yoʻq qilish va konservatsiya qilish operatsiyalari boʻyicha faoliyat, shuningdek mazkur operatsiyalar bilan bevosita bogʻliq boʻlgan va MTBni bajarish doirasida hamda maqsadlarida amalga oshiriladigan boshqa faoliyat;

Operator — MTBda nazarda tutilgan ishlarni bajarishni tashkil qilish uchun tuzilgan “Surhan Gas Chemical Operating Company” MCHJ XK;

pudratchi — Investor va (yoki) Operator bilan MTB boʻyicha neft-gaz operatsiyalari bilan bogʻliq boʻlgan tovarlarni yetkazib berish, ishlarni bajarish yoki xizmatlar koʻrsatish toʻgʻrisida shartnoma (kontrakt) tuzgan har qanday jismoniy yoki yuridik shaxs. Ushbu tushuncha, pudratchi bilan MTB boʻyicha neft-gaz operatsiyalari bilan bogʻliq boʻlgan tovarlarni yetkazib berish, ishlarni bajarish yoki xizmatlar koʻrsatish toʻgʻrisida shartnomalar (kontraktlar) tuzilgan ikkilamchi pudratchilarni ham oʻz ichiga oladi;

tovarlar — Investor, Operator, ularni MTB boʻyicha neft-gaz operatsiyalarini bajarish uchun jalb qilingan pudratchilari tomonidan olib kiriladigan oziq-ovqat va nooziq-ovqat isteʼmol tovarlar, uskunalar, moddiy-texnik resurslar, transport vositalari va boshqa koʻchar mulk, shuningdek ehtiyot qismlar, jihozlar va qismlar, YOMM (yoqilgʻi-moylash materiallari), neft-gaz operatsiyalarini bajarish uchun loyiha va texnik hujjatlar.

Mazkur Nizomda alohida izoh berilmagan boshqa barcha tushunchalar ushbu tushunchalar uchun MTBda va bojxona qonunchiligida berilgan maʼnoni anglatadi.

2. Tovarlarni yetkazib berish (olib kirish) shartnomalari (kontraktlari) eksport mamlakatniki kabi import mamlakatning ham Tashqi iqtisodiy faoliyat tovarlar nomenklaturasi (bundan buyon matnda TIF TN deb yuritiladi) boʻyicha kodiga shartli havolaga ega boʻlishi mumkin.

TIF TN boʻyicha yakuniy kod kelib tushgan tovarni bojxona rasmiylashtiruvini amalga oshirish paytida aniqlanadi.

Bunda, agar TIF TN boʻyicha tovarlarning kodi dastlabki oltita belgi darajasida oʻzgarmasa shartnomalarga oʻzgartirish kiritilmagan holda bojxona rasmiylashtiruvi amalga oshiriladi.

3. Iqtisodiy siyosat choralari qoʻllaniladigan tovarlar qonunchilik hujjatlarida va MTBda belgilangan tartibda va shartlarda olib kiriladi.

4. Investor va (yoki) Operator va ularning pudratchilari tomonidan olib kirilib, erkin muomalaga chiqarishga moʻljallangan hamda vaqtincha olib kirish rejimiga joylashtirilib, olib chiqilayotgan tovarlarning bojxona rasmiylashtiruvi MTBning 21-moddasiga muvofiq bojxona toʻlovlarini (bojxona yigʻimlaridan tashqari) toʻlashdan ozod etilgan holda amalga oshiriladi.

5. Investor va (yoki) Operator tomonidan olib kirilayotgan tovarlarning, shuningdek vaqtincha olib kirish rejimiga joylashtirilib, olib chiqilayotgan tovarlarning bojxona rasmiylashtiruvi paytida berilgan imtiyozlar hisobini yuritish uchun bojxona yuk deklaratsiyasi (bundan buyon matnda BYD deb yuritiladi) bojxona toʻlovlarini hisobga olgan holda toʻldiriladi.

6. Investor, Operator tomonidan Oʻzbekiston Respublikasi bojxona chegarasidan olib oʻtiladigan tovarlarga nisbatan bojxona rasmiylashtiruvi uchun bojxona yigʻimlarining oʻz vaqtida va toʻliq toʻlanishi uchun Investor va/yoki Operator javobgar boʻladi. Bunda pudratchi tomonidan Oʻzbekiston Respublikasi bojxona chegarasi orqali olib oʻtilayotgan tovarlarga nisbatan bojxona rasmiylashtiruvi uchun bojxona yigʻimlarining oʻz vaqtida va toʻliq toʻlanishi uchun Investor va/yoki Operator va pudratchi oʻrtasida tuzilgan shartnomalar (kontraktlar) shartlariga muvofiq pudratchi javobgar boʻladi.

7. Operator neft-gaz operatsiyalarini amalga oshirish uchun qonunchilik hujjatlariga muvofiq bojxona omborini tashkil etish huquqiga ega.

8. Tovarlar erkin muomalaga chiqarish (import) bojxona rejimiga Bojxona yuk deklaratsiyasini toʻldirish tartibi toʻgʻrisidagi yoʻriqnomaning (roʻyxat raqami 2773, 2016-yil 6-aprel) 5-bobiga muvofiq BYD quyidagi xususiyatlarni inobatga olgan holda toʻldiriladi:

24-grafaning chap kichik boʻlmasida bitimning kodi “79” koʻrsatiladi;

37-grafaning oxirgi uchta raqamiga Tovarlarni olib oʻtish xususiyatlari tasniflagichiga asosan “062” kodi koʻrsatiladi;

44-grafada quyidagilar koʻrsatiladi:

301 tartib raqami va “KNT” harfli kodi ostida — Operator va pudratchilar tomonidan olib kirilayotgan tovarlarga nisbatan tegishli shartnomaning (kontraktning) raqami, sanasi va qiymati;

MTBning raqami va sanasi;

Investor va (yoki) Operator va pudratchi tomonidan olib kirilayotgan tovarlarga nisbatan Investor va (yoki) Operator xatining raqami va sanasi.

9. Erkin muomalaga chiqarish (import) bojxona rejimiga muvofiq bojxona rasmiylashtiruvi amalga oshirilayotgan tovarlarga nisbatan tovarlarni chiqarib yuborish (rasmiylashtirish) muvofiqlik sertifikati va ekologik sertifikat mavjud boʻlmagan hollarda ularni keyinchalik taqdim etilishi bilan qoʻllanilishi mumkin.

10. Erkin muomalaga chiqarish (import) bojxona rejimiga joylashtirilgan tovarlar Investor va (yoki) Operator yoxud pudratchining arizasiga muvofiq Oʻzbekiston Respublikasi bojxona hududidan tashqariga reeksport bojxona rejimida Oʻzbekiston Respublikasi Bojxona kodeksining 6-bobida belgilangan tartib va shartlarga amal qilgan holda olib chiqilishi mumkin.

11. Investor, Operator yoki pudratchining erkin muomalaga chiqarish uchun moʻljallangan tovarlari bojxona ombori bojxona rejimiga joylashtirilishi mumkin.

12. Tovarlarni vaqtincha olib kirish bojxona rejimida Oʻzbekiston Respublikasi hududiga olib kirish Oʻzbekiston Respublikasi Bojxona kodeksining 11-bobi asosida Investor va (yoki) Operator yoki pudratchining arizasiga muvofiq amalga oshiriladi.

13. Tovarlar vaqtincha olib kirish bojxona rejimiga Investor va (yoki) Operator yoxud pudratchi tomonidan olib kirish maqsadlariga koʻra koʻrsatilgan muddatga Bojxona yuk deklaratsiyasini toʻldirish tartibi toʻgʻrisidagi yoʻriqnomaning (roʻyxat raqami 2773, 2016-yil 6-aprel) 8-bobiga muvofiq BYD quyidagi xususiyatlarni inobatga olgan holda toʻldiriladi:

24-grafaning chap kichik boʻlmasida bitimning kodi “79” koʻrsatiladi;

37-grafaning oxirgi uchta raqamiga Tovarlarni olib oʻtish xususiyatlari tasniflagichiga asosan “062” kodi koʻrsatiladi;

44-grafada quyidagilar koʻrsatiladi:

301 tartib raqami va “KNT” harfli kodi ostida — Operator va pudratchilar tomonidan olib kirilayotgan tovarlarga nisbatan tegishli shartnomaning (kontraktning) raqami, sanasi va qiymati;

MTBning raqami va sanasi;

Investor va (yoki) Operator va pudratchi tomonidan olib kirilayotgan tovarlarga nisbatan Investor va (yoki) Operator xatining raqami va sanasi.

14. MTBning butun amal qilish muddati davomida tovarlarning vaqtincha olib kirilishini BYDda koʻrsatilgan dastlabki muddatidan koʻproq muddatga uzaytirish Oʻzbekiston Respublikasi Bojxona kodeksining 64-moddasiga muvofiq bojxona organlari tomonidan amalga oshiriladi.

15. Investor, Operator va pudratchilar:

a) bojxona organiga olib oʻtilayotgan tovarlarni koʻrsatish va bojxona organiga ularni tegishli bojxona rejimida rasmiylashtirish uchun zarur hujjatlarni taqdim etishga;

b) qonunchilik hujjatlarida belgilangan bojxona yigʻimlarni toʻlashga;

v) neft-gaz operatsiyalariga moʻljallangan tovarlar tasarrufdan chiqarilgan hollarda, qonun hujjatlarida belgilangan tartibda bojxona toʻlovlarini toʻlashga;

g) vaqtincha olib kirish muddatlari tugaganida tovarlarni Oʻzbekiston Respublikasi hududidan tashqariga olib chiqish yoki ularni qonunchilik hujjatlariga muvofiq boshqa bojxona rejimiga joylashtirishga majbur.

16. Ushbu Nizomning 14-bandida nazarda tutilgan majburiyatlar tuzilgan shartnomalar asosida Investor, Operator yoki pudratchilar, ikkilamchi pudratchilar tomonidan vakolat berilgan shaxslar tomonidan bajarilishi mumkin.

17. Operator, zarur hollarda, Investorlarning topshirigʻiga binoan va vakolatli organning roziligi bilan kernlarning, qatlam suyuqliklari namunalarini va neft-gaz operatsiyalar jarayonida olingan axborot va maʼlumot hujjatlarini ishlov berish, tahlil qilish va oʻrganishni amalga oshirish maqsadida tegishli bojxona organlariga yozma murojaat asosida Oʻzbekiston Respublikasi tashqarisiga/ichkarisiga olib chiqishi/kirishi mumkin.

18. Operator, zarur hollarda, Investorlarning topshirigʻiga binoan va vakolatli organning roziligi bilan Oʻzbekiston Respublikasi tashqarisiga/ichkarisiga loyihaviy, texnik, hisob hujjatlari, seysmik yozuvlar maʼlumotlarining aslini va boshqa geologik maʼlumotlarni ishlov berish, tahlil etish va oʻrganish maqsadida olib chiqishi/kirishi mumkin. Operator olib chiqib ketilgan koʻrsatilgan yozuvlar va maʼlumotlarni Oʻzbekiston Respublikasiga qaytarib olib kelishga majbur.

19. Investorlar, Operator, pudratchilar, ikkilamchi pudratchilar, yetkazib beruvchilar va boshqa shaxslarning neft-gaz operatsiyalarini MTB boʻyicha bajarish uchun jalb qilinadigan va Oʻzbekiston Respublikasi hududida doimiy turar joyiga ega boʻlmagan xodimlari, qonunchilik hujjatlarida belgilangan tartibda, har qanday maishiy buyumlarni va boshqa shaxsiy narsalarni, shu jumladan mebel, maishiy texnika va hokazolarni, ushbu xodimlar va ularning oila aʼzolari tomonidan faqat shaxsiy maqsadlarda foydalanish sharti bilan hech qanday bojxona toʻlovlarisiz (bojxona yigʻimlaridan tashqari) Oʻzbekiston Respublikasiga olib kirish va Oʻzbekiston Respublikasidan qaytarib olib chiqib ketishga haqlidir.

Oʻzbekiston Respublikasi hududida bunday buyumlarga nisbatan boʻlgan mulk huquqini boshqa shaxsga berish qonunchilik hujjatlariga muvofiq bojxona toʻlovlari va soliq solinishiga olib keladi.

20. Mulk huquqi Investordan va/yoki Operatordan Oʻzbekiston Respublikasiga yoki u tomondan vakolatli organga (tashkilotga) oʻtganda, Investor, Operator yoki pudratchi tomonidan olib kiriladigan tovarlar bojxona toʻlovlaridan ozod qilinadi.

21. Olib kirilgan tovarlardan maqsadga nomuvofiq foydalanilgan holda, shu jumladan, ular tasarrufdan chiqarilganda, bojxona organi belgilangan tartibda Oʻzbekiston Respublikasining qonunchilik hujjatlariga muvofiq toʻlanishi lozim boʻlgan barcha bojxona toʻlovlarini undiradi.

22. Mazkur Nizom “Uzbekneftegaz” AJ va Operator bilan kelishilgan.