Oʻzbekiston Respublikasi Prezidentining “Oʻzbekiston Respublikasining 2017-yilgi asosiy makroiqtisodiy koʻrsatkichlari prognozi va davlat budjeti parametrlari toʻgʻrisida” 2016-yil 27-dekabrdagi PQ-2699-son qarorini bajarish yuzasidan hamda mahalliy hokimiyat organlarining barcha zarur soliqlarning toʻliq yigʻilishi, soliq solinadigan bazani kengaytirish, shuningdek mahalliy budjetlar xarajatlarining samaradorligini oshirish hisobiga mahalliy budjetlarning daromad qismini mustahkamlashdan manfaatdorligini kuchaytirish maqsadida Vazirlar Mahkamasi qaror qiladi:

1. Vazirlar Mahkamasining 2017-yil 27-fevraldagi 105-son qarori (Oʻzbekiston Respublikasi QT, 2017-y., 2-son, 19-modda) bilan tasdiqlangan Yuridik shaxsning alohida boʻlinmalari boʻyicha soliqlarni toʻlash tartibi toʻgʻrisidagi nizomga quyidagi mazmundagi 9¹-band qoʻshilsin:

“9¹. Yuridik shaxs alohida boʻlinma boʻyicha daromadlar va xarajatlar hisobini alohida yuritgan taqdirda, yuridik shaxs qoʻshilgan qiymat soligʻi summasini tovarlarni (ishlar, xizmatlarni) realizatsiya qilish boʻyicha soliq solinadigan aylanmadan kelib chiqqan holda hamda har bir alohida boʻlinma boʻyicha hisobga olinadigan qoʻshilgan qiymat soligʻi summasini aniqlash huquqiga ega boʻladi”.

2. Belgilab qoʻyilsinki, “Olmaliq KMK” AJ Zafarobod sement zavodi boʻyicha alohida hisob yuritadi va qoʻshilgan qiymat soligʻini alohida boʻlinma joylashgan joyda toʻlaydi.

3. “Olmaliq KMK” AJ qoʻshilgan qiymat soligʻini alohida boʻlinma joylashgan joyda toʻlash uchun Zafarobod sement zavodi boʻyicha qoʻshilgan qiymat soligʻi ushbu qarorga muvofiq qayta hisoblab chiqilishini taʼminlasin.

4. Oʻzbekiston Respublikasi Davlat soliq qoʻmitasi ushbu qarorga muvofiq “Olmaliq KMK” AJning Zafarobod sement zavodi boʻyicha soliq majburiyatlariga tegishli oʻzgartirishlar kiritsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari J.A. Qoʻchqorov, Gʻ.I. Ibragimov hamda Oʻzbekiston Respublikasi moliya vaziri B.A. Xoʻjayev zimmasiga yuklansin.