Davlat ehtiyojlari uchun sotib olinadigan paxta xomashyosi yetishtirishni koʻpaytirishni ragʻbatlantirish hamda paxta yetishtiruvchi xoʻjaliklarning moliyaviy holatini yanada mustahkamlash maqsadida Vazirlar Mahkamasi qaror qiladi:

1. Oʻzbekiston Respublikasi Moliya vazirligi, Iqtisodiyot vazirligi, Qishloq va suv xoʻjaligi vazirligi, “Oʻzpaxtasanoateksport”, “Oʻzagrotexsanoatxolding” xolding kompaniyalari hamda Oʻzbekiston Fermyerlari kengashining 2017-yil hosili:

paxta xomashyosi xarid narxlarini 1-ilovaga* muvofiq miqdorda belgilash;

mashinada terilgan paxta xomashyosi xarid narxlarini 2-ilovaga* muvofiq miqdorda belgilash;

qoʻlda terilgan paxta xomashyosining 1 kilogrammi uchun birinchi bosqichda — 450 soʻmdan, ikkinchi bosqichda 2017-yil 1-oktabrdan boshlab — 500 soʻmdan toʻlash;

mashinada terilgan paxta xomashyosining 1 tonnasi uchun 260 000 soʻmdan toʻlash toʻgʻrisidagi taklifi maʼqullansin.

Oʻzbekiston Respublikasi Moliya vazirligi, Qishloq va suv xoʻjaligi vazirligi “Oʻzpaxtasanoateksport” xolding kompaniyasi, Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda paxta yetishtiruvchi fermer xoʻjaliklariga 2017-yil hosili paxta xomashyosi xarid narxlarining bir hafta muddatda yetkazilishini taʼminlasinlar.

2. Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarining davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasi (keyingi oʻrinlarda Jamgʻarma deb ataladi), Oʻzbekiston Respublikasi Markaziy banki “Oʻzpaxtasanoateksport” xolding kompaniyasi, “Agrobank” ATB va boshqa tijorat banklari, Qoraqalpogʻiston Respublikasi Vazirlar Kengashi hamda viloyatlar hokimliklari bilan birgalikda paxta yigʻim-terimida, uni tashishda va tayyorlashda qatnashayotgan xodimlarga ish haqining oʻz vaqtida toʻlanishini taʼminlasinlar.

Paxta yetishtiruvchi fermer xoʻjaliklariga amalda topshirilgan paxta xomashyosi uchun terimchilarga terim pullarini ushbu qarorda belgilangan tarif stavkalaridan kelib chiqqan holda har besh kunda, zarurat boʻlganda esa — har kuni toʻlash tavsiya etilsin.

3. Qoraqalpogʻiston Respublikasi Vazirlar Kengashi, viloyatlar va tumanlar hokimliklari paxta terimchilariga terim pullarining ushbu qarorda belgilangan tarif stavkalari boʻyicha oʻz vaqtida toʻlanishi yuzasidan qatʼiy nazorat oʻrnatsinlar.

4. Paxta yigʻim-terimini uyushqoqlik bilan oʻtkazish uchun joylarda kamida 100 nafar terimchidan iborat boʻlgan terimchilar otryadlari tashkil etilishi maʼlumot uchun qabul qilinsin.

“Oʻzpaxtasanoat” aksiyadorlik jamiyati paxta yigʻim-terimi mavsumida tashkil etiladigan terimchilar otryadlari rahbarlarini paxta tozalash korxonalari bilan tuziladigan fuqarolik-huquqiy shartnomalar asosida ishga qabul qilsin.

5. “Agrobank” aksiyadorlik tijorat bankiga — “Oʻzpaxtasanoat” aksiyadorlik jamiyati tashkilotlariga terimchilar otryadlari rahbarlariga oʻz vaqtida ish haqi toʻlash uchun 45 mlrd soʻm miqdorida kredit mablagʻlari ajratish tavsiya etilsin.

6. Oʻzbekiston Respublikasi Moliya vazirligi “Oʻzpaxtasanoateksport” xolding kompaniyasi bilan birgalikda 2017-yil hosili paxta tolasi uchun ulgurji narxlar preyskurantini ishlab chiqish va tasdiqlashda paxta tozalash korxonalarining terimchilar otryadlari rahbarlari ish haqini toʻlash boʻyicha xarajatlarini nazarda tutsin.

7. “Oʻzpaxtasanoateksport” xolding kompaniyasi:

Jamgʻarma bilan birgalikda paxta yetishtiruvchi fermer xoʻjaliklari bilan paxta xomashyosining 90 foizi uchun — joriy yilda va qolgan 10 foizi uchun — 2018-yilning 1-apreligacha preyskurant narxlar boʻyicha oʻz vaqtida hisob-kitob qilinishini;

“Oʻzpaxtasanoat” aksiyadorlik jamiyati bilan birgalikda 2018-yilning 10-yanvarigacha boʻlgan muddatda Jamgʻarmaga 2017-yil hosili paxta xomashyosi uchun yakuniy 10 foizli toʻlovlar uchun mablagʻlar yigʻma maʼlumoti taqdim etilishini taʼminlasin.

8. Paxta yetishtiruvchi fermer xoʻjaliklari bilan hisob-kitoblarning toʻgʻri va oʻz vaqtida amalga oshirilishi hamda ajratilgan mablagʻlardan maqsadli foydalanilishi yuzasidan masʼuliyat “Oʻzpaxtasanoateksport” xolding kompaniyasi va “Oʻzpaxtasanoat” aksiyadorlik jamiyati rahbarlari zimmasiga yuklansin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — qishloq va suv xoʻjaligi vaziri Z.T. Mirzayev hamda “Oʻzpaxtasanoateksport” xolding kompaniyasi raisi A.S. Kamalov zimmasiga yuklansin.