Uy-joylar va uy-joy boʻlmagan binolarni boshqalarga berish va meros qilish tartibida mulkchilik huquqining oʻtishi masalalarini tartibga solish maqsadida Vazirlar Mahkamasi qaror qiladi:

Oʻzbekiston Respublikasi Vazirlar Mahkamasining ayrim qarorlariga ilovaga muvofiq oʻzgartirish va qoʻshimchalar kiritilsin.

I. Oʻzbekiston Respublikasi Vazirlar Mahkamasining “Davlat uy-joy fondini xususiylashtirish toʻgʻrisida” Oʻzbekiston Respublikasi Qonunining qabul qilinishi munosabati bilan normativ hujjatlarni tasdiqlash toʻgʻrisida” 1994-yil 4-apreldagi 180-son qarori (Oʻzbekiston Respublikasi QT, 1994-y., 4-son, 20-modda)ning:

1-bandi ikkinchi xat boshi quyidagi tahrirda bayon qilinsin:

“Xususiylashtirilgan kvartiralar (kvartiralarning bir qismi), uylar (uylarning bir qismi)ni boshqalarga berish va meros qilib qoldirishda mulkchilik huquqi oʻtishi haqidagi shartnomalarni rasmiylashtirish tartibi toʻgʻrisidagi Nizom 1-ilovaga muvofiq”;

2-band oʻz kuchini yoʻqotgan deb hisoblansin;

1-ilova matni quyidagi tahrirda bayon qilinsin:

1. Xususiylashtirilgan uy-joylarga pulli, imtiyozli yoki bepul asosda mulk qilib berilgan kvartiralar (kvartiralarning bir qismi), uylar (uylarning bir qismi) kiradi.

2. Xususiylashtirilgan kvartira (kvartiraning bir qismi), uy (uyning bir qismi) mulkdori jismoniy va yuridik shaxslarning huquqlarini va qonun bilan himoya qilinadigan manfaatlarini buzmagan holda ushbu uy-joyga egalik qilish, undan foydalanish va uni tasarruf etish huquqiga egadir.

Xususiylashtirilgan uy-joyning mulkdori mazkur uy-joyni oʻz xohishiga koʻra har qanday jismoniy yoki yuridik shaxslarga yoki koʻchmas mulk bilan operatsiyalarni amalga oshirishga vakil qilingan organga berish va vasiyat qilib qoldirish, shuningdek, uni koʻchmas mulk savdosi boʻyicha kimoshdi savdosiga qoʻyish huquqiga egadir.

Kvartirani (kvartiraning bir qismini), uyni (uyning bir qismini) jismoniy yoki yuridik shaxslarga berishda mulkdor boshqalarga berish shartnomasini tasdiqlatish uchun notarial idoraga, kimoshdi savdosi orqali sotishda esa – koʻchmas mulk savdosini amalga oshirishga vakil qilingan organga murojaat qiladi.

3. Boshqalarga berilayotgan xususiylashtirilgan uy-joyning qiymati tomonlarning kelishuviga koʻra, biroq boshqalarga berish paytida uy-joyning texnik xatlov kadastr byurosi xizmati tomonidan baholangan qiymatidan past boʻlmagan miqdorda belgilanadi. Meros tartibida oʻtadigan uy-joyning qiymati merosxoʻrlik tayinlangan kunda texnik xatlov kadastr byurosi xizmati tomonidan belgilangan baholash maʼlumotlari hisobga olingan holda belgilanadi.

4. Xususiylashtirilgan kvartirani (kvartiraning bir qismini), uyni (uyning bir qismini) sotib olish, almashtirish huquqiga Oʻzbekiston Respublikasi fuqarolari va boshqa davlatlarning fuqarolari, shu jumladan, MDH qatnashchilari boʻlgan davlatlarning fuqarolari, va doimiy yashovchi hamda Oʻzbekiston Respublikasi ichki ishlar organlari tomonidan belgilangan tartibda berilgan yashash uchun ruxsatnomasi boʻlgan fuqarolar ega boʻladilar.

5. Yuridik yoki jismoniy shaxslar tomonidan mulkdordan sotib olingan uy-joydan faqat uy-joy sifatida foydalanilishi mumkin.

6. Xususiylashtirilgan uy-joyni boshqalarga berish xohishini bildirgan mulkdor quyidagi hujjatlarni taqdim etadi:

pasport yoki uning oʻrnini bosuvchi hujjat;

xususiylashtirilgan uy-joyga mulkchilik huquqini beruvchi davlat dalolatnomasi yoxud joylardagi davlat hokimiyati organi, birlashma, korxona, tashkilot maʼmuriyatining qarori yoki Oʻzbekiston Respublikasi Vazirlar Kengashi va Oʻzbekiston kasaba uyushmalari federatsiyasi kengashining 1989-yil 21-iyundagi 203-son qaroriga muvofiq notarial tartibda tasdiqlangan uy-joyning oldi-sotdi shartnomasi;

kvartiraga (kvartiraning bir qismiga), uyga (uyning bir qismiga) xatlov hujjatlar yigʻma jildi;

oilaning birgalikda yashovchi barcha voyaga yetgan aʼzolarining, shuningdek, kvartiralar (kvartiralarning bir qismi)ni yoki uy (uyning bir qismi)ni xususiylashtirishga rozilik bergan shaxslarning notarial tartibda tasdiqlangan roziligi;

ilova qilinayotgan shakldagi maʼlumotnoma yoki uy daftari;

boshqalarga berish paytida texnik xatlov kadastr byurosi xizmatlari tomonidan beriladigan uy-joyning texnik holati va qiymati toʻgʻrisidagi belgilangan namunadagi xatlov maʼlumotnomasi.

7. Oʻzbekiston Respublikasining boshqa mintaqalarida yashovchi fuqarolar Toshkent shahridagi xususiylashtirilgan kvartiralarni (kvartiralarning bir qismini), uylarni (uylarning bir qismini) sotib olayotganlarida pasport yoki uning oʻrnini bosuvchi hujjat bilan birga maxsus komissiyaning Toshkent shahrida roʻyxatdan oʻtkazishga ruxsat berish toʻgʻrisidagi qarorini taqdim etadilar.

Boshqa davlatlarning fuqarolari, shu jumladan, MDH qatnashchilari boʻlgan davlatlar fuqarolari, va fuqaroligi boʻlmagan shaxslar, kvartiralarni (kvartiralarning bir qismini), uylarni (uylarning bir qismini) sotib olayotganlarida Oʻzbekiston Respublikasi ichki ishlar organlari tomonidan belgilangan tartibda berilgan yashash uchun ruxsatnomani taqdim etadilar, ular tomonidan Toshkent shahridagi xususiylashtirilgan kvartiralar (kvartiralarning bir qismi), uylar (uylarning bir qismi) sotib olingan taqdirda esa Maxsus komissiyaning Toshkent shahrida roʻyxatdan oʻtkazishga ruxsat berish toʻgʻrisidagi qarorini ham taqdim etadilar, Oʻzbekiston Respublikasi Vazirlar Mahkamasining “Xorijiy fuqarolar va fuqaroligi boʻlmagan shaxslar tomonidan Oʻzbekiston Respublikasida uy-joy sotib olinishini hamda doimiy yashash uchun Toshkent shahriga kelishni tartibga solish toʻgʻrisida” 1999-yil 27-fevraldagi 92-son qarorining 4-bandida koʻrsatib oʻtilgan shaxslar bundan mustasno.

8. Oldi-sotdi, ayirboshlash, hadya qilish shartnomalarini notarial tasdiqlashda va xususiylashtirilgan uy-joyga merosxoʻrlik huquqi toʻgʻrisida guvohnoma berishda Oʻzbekiston Respublikasi Vazirlar Mahkamasi tomonidan belgilangan stavkalar boʻyicha davlat boji undiriladi.

9. Oldi-sotdi, ayirboshlash va hadya qilish bitishuvlari amalga oshirilgandan soʻng, shuningdek, mulkchilik huquqi merosxoʻrlik tartibida oʻtgandan soʻng, boshqalarga berish yoki meros qilib qoldirish vaqtidan qatʼi nazar, kvartira (kvartiraning bir qismi), uy (uyning bir qismi) xususiylashtirilgan uy-joy maqomini yoʻqotadi.

10. Notarial tartibda rasmiylashtirilgan, texnik xatlov byurosida roʻyxatdan oʻtkazilgan oldi-sotdi, ayirboshlash va hadya qilish shartnomasi, shuningdek, qonun bilan belgilangan tartibda berilgan merosxoʻrlik huquqi toʻgʻrisidagi guvohnoma ilgari xususiylashtirilgan sotib olingan uy-joyga egalik qilish huquqini beruvchi huquqni belgilovchi hujjat boʻlib hisoblanadi.”

II. Oʻzbekiston Respublikasi Vazirlar Mahkamasining 1994-yil 3-noyabrdagi 533-son (Oʻzbekiston Respublikasi QT, 1994-yil, 11-son, 49-modda) qarori bilan tasdiqlangan Davlat boji stavkalarining 4-bandidagi:

“b” kichik band quyidagi tahrirda bayon qilinsin:

“b) kvartiralarni (kvartiralarning bir qismini), shu jumladan, xususiylashtirilgan kvartiralar (kvartiralarning bir qismi), uylar, dala hovlilar, garajlar, boshqa binolar, inshootlar va imoratlarning oldi-sotdi, ayirboshlash, renta olish, umrbod taʼminlash sharti bilan boshqalarga berish va hadya qilish shartnomalarini tasdiqlaganlik uchun:

— mulkdorning eri yoki xotiniga, ota-onalariga, bolalariga, nabiralariga, buvilariga, buvalariga, tugʻishgan aka-ukalari va opa-singillariga — shartnoma summasining 1 foizi miqdorida, biroq bitishuv tuzilayotgan paytda tegishli ravishda texnik xatlov kadastr byurosi yoki koʻchmas mulk davlat kadastri xizmatlari tomonidan belgilangan xatlov bahosining 1 foizidan kam boʻlmagan miqdorda;

— boshqa jismoniy va yuridik shaxslarga — shartnoma summasining 10 foizi miqdorida, biroq bitishuv tuzilayotgan paytda tegishli ravishda texnik xatlov kadastr byurosi yoki koʻchmas mulk davlat kadastri xizmatlari tomonidan belgilangan xatlov bahosining 10 foizidan kam boʻlmagan miqdorda;

— xususiylashtirilgan kvartiralar (kvartiralarning bir qismi), uylar (uylarning bir qismi) kimoshdi savdosi orqali sotilganda — sotilish bahosining 15 foizi miqdorida”;

“v” kichik band oʻz kuchini yoʻqotgan deb hisoblansin;

“l” kichik band quyidagi tahrirda bayon qilinsin:

“l) meros huquqi haqida guvohnoma berilganligi uchun:

— birinchi navbatdagi merosxoʻrlarga — meros summasining 0,3 foizi miqdorida;

— ikkinchi navbatdagi merosxoʻrlarga — meros summasining 1 foizi miqdorida;

— qolgan merosxoʻrlarga — meros summasining 2 foizi miqdorida.