Oʻzbekiston Respublikasi Prezidentining 2017-yil 17-fevraldagi PF-4960-son “Oʻzbekiston Respublikasi Qurolli Kuchlari pensionerlarini ijtimoiy himoya qilishni yanada takomillashtirish chora-tadbirlari toʻgʻrisida”gi Farmoniga muvofiq Oʻzbekiston Respublikasi Mudofaa vazirligi, Bandlik va mehnat munosabatlari vazirligi va Moliya vazirligi qaror qiladi:

1. Harbiy xizmatchilar orasidan pensionerlarni oliy harbiy taʼlim muassasalarining ilmiy xodimlari va oʻqituvchilari lavozimlariga ishga qabul qilish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Prezidentining 2017-yil 17-fevraldagi PF-4960-son “Oʻzbekiston Respublikasi Qurolli Kuchlari pensionerlarini ijtimoiy himoya qilishni yanada takomillashtirish chora-tadbirlari toʻgʻrisida”gi Farmoni hamda Vazirlar Mahkamasining 2006-yil 10-fevraldagi 20-son “Oliy taʼlim muassasalariga pedagog xodimlarni tanlov asosida ishga qabul qilish tartibi toʻgʻrisidagi nizomni tasdiqlash haqida”gi qaroriga muvofiq harbiy xizmatchilar orasidan pensionerlarni (bundan buyon matnda pensionerlar deb yuritiladi) oliy harbiy taʼlim muassasalarining ilmiy xodimlari va oʻqituvchilari lavozimlariga ishga qabul qilish tartibini belgilaydi.

1. Mazkur Nizom talablari Oʻzbekiston Respublikasi Mudofaa vazirligining oliy harbiy taʼlim muassasalariga (bundan buyon matnda oliy harbiy taʼlim muassasalari deb yuritiladi) tatbiq etiladi.

2. Pensionerlarni ishga qabul qilish ularni yoshlarni vatanparvarlik, Vatanga muhabbat va sodiqlik ruhida tarbiyalash jarayoniga yanada kengroq jalb etish maqsadida amalga oshiriladi.

3. Ishga qabul qilinadigan pensionerlar Oʻzbekiston Respublikasi fuqarolari orasidan tanlab olinadi.

4. Tegishli maʼlumotga, kasbiy tayyorgarlikka va yuksak axloqiy sifatlarga ega boʻlgan shaxslar oliy harbiy taʼlim muassasalarida pedagogik faoliyat bilan shugʻullanishi mumkin.

5. Oliy harbiy taʼlim muassasalarining ilmiy xodimlari va oʻqituvchilari lavozimlariga ishga qabul qilishda ilmiy daraja va ilmiy unvonga hamda chuqur kasbiy bilim va tajribaga ega boʻlgan nomzodlarga ustunlik beriladi.

6. Pensionerlar oliy harbiy taʼlim muassasalarining ilmiy xodimlari va oʻqituvchilari lavozimlariga Vazirlar Mahkamasining 2006-yil 10-fevraldagi 20-son qarori bilan tasdiqlangan Oliy taʼlim muassasalariga pedagog xodimlarni tanlov asosida ishga qabul qilish tartibi toʻgʻrisidagi nizomda belgilangan tartibda tanlab olinadi.

7. Oliy harbiy taʼlim muassasalarining ilmiy xodimlari va oʻqituvchilari lavozimlariga tanlovda ishtirok etish xohishini bildirgan pensionerlar taʼlim muassasasiga quyidagi hujjatlarni topshirishi lozim:

ariza;

pensiya guvohnomasi nusxasi;

Oʻzbekiston Respublikasi Qurolli Kuchlari rezervidagi harbiy xizmatchining guvohnomasi;

belgilangan shaklda toʻldirilgan soʻrovnoma;

tarjimai hol;

tegishli ilmiy darajasi haqidagi diplomning nusxasi (mavjud boʻlsa);

tegishli ilmiy unvoni haqidagi attestatning nusxasi (mavjud boʻlsa);

ilmiy ishlar roʻyxati (mavjud boʻlsa);

ilmiy ishlar hamda ixtirolarga tegishli hujjatlar va boshqa mualliflik huquqini tasdiqlovchi hujjatlar nusxasi (mavjud boʻlsa).

8. Pensionerlar oliy harbiy taʼlim muassasalarining ilmiy xodimlari va oʻqituvchilari lavozimlariga qonunchilik hujjatlarida belgilangan tartibda oliy harbiy taʼlim muassasalarining rahbari tomonidan tayinlanadi.

9. Mazkur Nizom talablarining buzilishida aybdor boʻlgan shaxslar qonunchilik hujjatlariga muvofiq javob beradi.