Oʻzbekiston Respublikasi Prezidentining “Toshkent axborot texnologiyalari universitetining faoliyatini yanada takomillashtirish chora-tadbirlari toʻgʻrisida” 2017-yil 15-martdagi PQ-2834-son qarorini bajarish yuzasidan Vazirlar Mahkamasi qaror qiladi:

1. Muhammad al-Xorazmiy nomidagi Toshkent axborot texnologiyalari universiteti huzuridagi Ilmiy-innovatsion rivojlantirish jamgʻarmasi mablagʻlarini shakllantirish va undan foydalanish tartibi toʻgʻrisidagi nizom 1-ilovaga muvofiq tasdiqlansin.

2. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirish va qoʻshimchalar kiritilsin.

3. Vazirliklar va idoralar bir oy muddatda oʻzlarining normativ-huquqiy hujjatlarini ushbu qarorga muvofiqlashtirsinlar.

4. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Taʼlim va ilm-fan masalalari axborot-tahlil departamentiga va Yoshlar siyosati, madaniyat, axborot tizimlari va telekommunikatsiyalar masalalari axborot-tahlil departamentiga yuklansin.

1. Ushbu Nizom Muhammad al-Xorazmiy nomidagi Toshkent axborot texnologiyalari universiteti huzuridagi Ilmiy-innovatsion rivojlantirish jamgʻarmasi (keyingi oʻrinlarda Jamgʻarma deb ataladi) mablagʻlarini shakllantirish va ulardan foydalanish tartibini belgilaydi.

2. Jamgʻarma Muhammad al-Xorazmiy nomidagi Toshkent axborot texnologiyalari universiteti (keyingi oʻrinlarda Universitet deb ataladi) va uning hududiy filiallarining hamda Universitet huzuridagi Axborot-kommunikatsiya texnologiyalari ilmiy-innovatsion markazining (keyingi oʻrinlarda Markaz deb ataladi) axborot-kommunikatsiya texnologiyalari sohasida taʼlim sifatini oshirishga hamda ilmiy-tadqiqot faoliyatiga qaratilgan ustuvor va ijtimoiy ahamiyatga ega loyihalarni moliyalashtirish maqsadida tashkil etildi.

3. Jamgʻarma mablagʻlari Oʻzbekiston Respublikasi Moliya vazirligining gʻaznachiligida ochilgan Universitet maxsus budjetdan tashqari shaxsiy gʻazna hisobvaragʻida jamlanadi.

Jamgʻarma yuridik shaxs maqomiga ega boʻlmagan holda tashkil etiladi.

4. Quyidagilar Jamgʻarma mablagʻlaridan foydalanishning asosiy yoʻnalishlari etib hisoblanadi:

Universitet uchun oʻquv darsliklar va ilmiy adabiyotlarni yaratish va nashr etish, shu jumladan xorijiy adabiyotlarni xarid qilish;

Universitetning iqtidorli talabalari uchun beriladigan Muhammad al-Xorazmiy nomidagi stipendiya xarajatlarini qoplash;

“Muhammad al-Xorazmiy avlodlari” nomli ilmiy jurnal nashr etilishini moliyaviy qoʻllab-quvvatlash;

Universitet va Markazning axborot texnologiyalari va kommunikatsiyalarini rivojlantirish sohasidagi ilmiy-tadqiqot va tajriba-konstruktorlik ishlarini tanlov asosida moliyalashtirish, ularning ilmiy va oʻquv laboratoriyalarini zamonaviy asbob-uskunalar, zarur sarflanuvchi materiallar va butlovchi qismlar bilan taʼminlash;

Universitetning iqtidorli talabalari, professor-oʻqituvchilari va yosh ilmiy xodimlarini yetakchi xorijiy oliy taʼlim muassasalari hamda ilmiy-tadqiqot markazlarida tayyorlash, qayta tayyorlash va malakasini oshirish;

Universitetda dars berish va Markazda ilmiy tadqiqotlar oʻtkazish uchun yuqori malakali xorijiy mutaxassislar va olimlarni jalb qilish.

5. Jamgʻarmani boshqarish Universitetning Vasiylik kengashi tomonidan amalga oshiriladi.

Universitet Vasiylik kengashining tarkibi qonun hujjatlarida belgilangan tartibda tasdiqlanadi.

6. Universitetning Vasiylik kengashi ushbu Nizom talablaridan kelib chiqqan holda Jamgʻarmaning mablagʻlaridan foydalanishning ustuvor yoʻnalishlari va shartlarini belgilaydi.

7. Universitet Vasiylik kengashi yigʻilishlari har chorakda kamida bir marta oʻtkaziladi.

8. Jamgʻarma mablagʻlarini shakllantirish va ulardan foydalanish monitoringini olib borish, mablagʻlarning hisob va hisobotini yuritish hamda joriy xizmat koʻrsatish ishlari Universitetning moliya-iqtisod boʻlimi hamda buxgalteriyasi tomonidan amalga oshiriladi.

9. Jamgʻarma mablagʻlari quyidagi manbalar hisobidan shakllantiriladi:

mobil aloqa xizmatlari koʻrsatadigan yuridik shaxslar (uyali aloqa kompaniyalari) tomonidan abonent raqamidan foydalanganlik uchun toʻlanadigan toʻlovdan tushadigan mablagʻlarning 1,0 foiz miqdoridagi ajratmalar;

Jamgʻarmaning vaqtincha boʻsh mablagʻlarini Oʻzbekiston Respublikasining tijorat banklaridagi depozitlarda joylashtirishdan tushgan daromadlar;

yuridik va jismoniy shaxslar, xalqaro tashkilotlarning homiylik xayriyalari, grantlari;

qonun hujjatlarida taʼqiqlanmagan boshqa tushumlar.

10. Jamgʻarmaning joriy yilda foydalanilmagan mablagʻlari olib qoʻyilmaydi va keyingi yilda ushbu Nizomda koʻrsatilgan maqsadlar uchun sarflanadi.

11. Jamgʻarma mablagʻlaridan Oʻzbekiston Respublikasi Axborot texnologiyalari va kommunikatsiyalarini rivojlantirish vazirligida ekspertizadan oʻtgan va Universitet Vasiylik kengashiga taqdim qilingan axborot va telekommunikatsiya texnologiyalarini rivojlantirish boʻyicha aniq loyihalarni ushbu Nizomning 4-bandida koʻrsatilgan maqsadlar uchun Universitet Vasiylik kengashi tomonidan moliya yili uchun tasdiqlangan daromadlar va xarajatlar smetasi doirasida moliyalashtirish uchun foydalaniladi.

12. Jamgʻarma mablagʻlarining hisob va hisoboti Universitetining budjetdan tashqari mablagʻlaridan boʻlak holda alohida yuritiladi.

13. Jamgʻarma daromadlari va xarajatlari smetasining ijrosi toʻgʻrisidagi yillik hisobot Universitet Vasiylik kengashi yigʻilishida koʻrib chiqiladi hamda har yili 15-martgacha tasdiqlanadi.

14. Jamgʻarma mablagʻlaridan asosli va maqsadli foydalanilishi ustidan nazorat qilish Oʻzbekiston Respublikasi Moliya vazirligi tomonidan amalga oshiriladi.

1. Vazirlar Mahkamasining “Toshkent axborot texnologiyalari universiteti faoliyatini tashkil etish toʻgʻrisida” 2002-yil 7-noyabrdagi 385-son qarorida (Oʻzbekiston Respublikasi QHT, 2002-y., 21-son, 169-modda):

a) 1-banddagi “Toshkent axborot texnologiyalari universiteti” soʻzlari “Muhammad al-Xorazmiy nomidagi Toshkent axborot texnologiyalari universiteti” soʻzlari bilan almashtirilsin;

b) 2-banddagi “Toshkent axborot texnologiyalari universitetining” soʻzlari “Muhammad al-Xorazmiy nomidagi Toshkent axborot texnologiyalari universitetining” soʻzlari bilan almashtirilsin;

2. Vazirlar Mahkamasining “Oliy taʼlim muassasalari pedagog kadrlarini qayta tayyorlash va ularning malakasini oshirish tizimini yanada takomillashtirish chora-tadbirlari toʻgʻrisida” 2012-yil 26-sentabrdagi 278-son qarorida (Oʻzbekiston Respublikasi QHT, 2012-yil, 39-son, 453-modda):

a) qarorga 1-ilova “Pedagog kadrlarni qayta tayyorlash va ularning malakasini oshirish tarmoq markazlari” boʻlimining 2-bandi “Mintaqaviy va tarmoq markazining nomi” ustunidagi “Toshkent axborot texnologiyalari universiteti” soʻzlari “Muhammad al-Xorazmiy nomidagi Toshkent axborot texnologiyalari universiteti” soʻzlari bilan almashtirilsin.

b) 2-ilovadagi “Toshkent axborot texnologiyalari universiteti” bloki “Muhammad al-Xorazmiy nomidagi Toshkent axborot texnologiyalari universiteti” bloki bilan almashtirilsin.

3. Vazirlar Mahkamasining “Axborot-kommunikatsiya texnologiyalarini rivojlantirish jamgʻarmasini yanada rivojlantirish va uning mablagʻlaridan samarali foydalanish toʻgʻrisida” 2012-yil 19-dekabrdagi 356-son qarori (Oʻzbekiston Respublikasi QT, 2012-yil, 12-son, 87-modda) bilan tasdiqlangan Axborot-kommunikatsiya texnologiyalarini rivojlantirish jamgʻarmasi toʻgʻrisidagi nizomning 4-bandi uchinchi xatboshidagi “15” raqami “14” raqami bilan almashtirilsin.

4. Vazirlar Mahkamasining “Toshkent axborot texnologiyalari universiteti va uning mintaqaviy filiallari tashkiliy tuzilmasini takomillashtirish toʻgʻrisida” 2013-yil 28-iyundagi 188-son qarorining (Oʻzbekiston Respublikasi QHT, 2013-y., 27-son, 352-modda) rus tilidagi matnida:

a) qarorning nomidagi, 1 va 2-bandlardagi “texnologiy” soʻzidan keyin “imeni Muxammada al-Xorazmiy” soʻzlari qoʻshilsin;

b) 1, 2, 3-ilovalarning nomidagi “texnologiy” soʻzidan keyin “imeni Muxammada al-Xorazmiy” soʻzlari qoʻshilsin.

5. Vazirlar Mahkamasining “Toshkent axborot texnologiyalari universiteti va Toshkent davlat yuridik universitetida oʻquv yuklamasining hajmlarini tasdiqlash toʻgʻrisida” 2013-yil 23-dekabrdagi 337-son qarorining (Oʻzbekiston Respublikasi QHT, 2013-y., 52-son, 691-modda) rus tilidagi matnida:

a) qaror nomidagi “texnologiy” soʻzidan keyin “imeni Muxammada al-Xorazmiy” soʻzlari qoʻshilsin;

b) 1-banddagi “texnologiy” soʻzidan keyin “imeni Muxammada al-Xorazmiy” soʻzlari qoʻshilsin;

v) qarorga 1-ilovaning nomidagi “texnologiy” soʻzidan keyin “imeni Muxammada al-Xorazmiy” soʻzlari qoʻshilsin.

6. Vazirlar Mahkamasining “Davlat va xoʻjalik boshqaruvi, mahalliy davlat hokimiyati organlari xodimlarining axborot-kommunikatsiya texnologiyalari sohasi boʻyicha malakasini oshirishga doir qoʻshimcha chora-tadbirlar toʻgʻrisida” 2014-yil 27-martdagi 73-son qarorining (Oʻzbekiston Respublikasi QT, 2014-y., 3-son, 30-modda) rus tilidagi matnida:

a) 1-banddagi “texnologiy” soʻzidan keyin “imeni Muxammada al-Xorazmiy” soʻzlari qoʻshilsin;

b) qarorga 3a-ilovaning nomidagi “texnologiy” soʻzidan keyin “imeni Muxammada al-Xorazmiy” soʻzlari qoʻshilsin.

7. Vazirlar Mahkamasining 2015-yil 10-apreldagi 87-son qarori (Oʻzbekiston Respublikasi QT, 2015-y., 4-son, 72-modda) bilan tasdiqlangan Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi toʻgʻrisidagi nizomda:

a) 13-bandning yigirma ikkinchi xatboshidagi “Toshkent axborot texnologiyalari universitetida” soʻzlari “Muhammad al-Xorazmiy nomidagi Toshkent axborot texnologiyalari universitetida” soʻzlari bilan almashtirilsin;

b) 20-bandning ikkinchi xatboshidagi “Toshkent axborot texnologiyalari universitetining” soʻzlari “Muhammad al-Xorazmiy nomidagi Toshkent axborot texnologiyalari universitetining” soʻzlari bilan almashtirilsin.

8. Vazirlar Mahkamasining “Elektron hukumatning idoralararo maʼlumotlar uzatish tarmogʻini tashkil etish chora-tadbirlari toʻgʻrisida” 2016-yil 12-avgustdagi 262-son qaroriga (Oʻzbekiston Respublikasi QT, 2016-y., 8-son, 78-modda) 2-ilovaning 14 va 15-bandlarining “Masʼul bajaruvchilar” ustunidagi “Toshkent axborot texnologiyalari universiteti” soʻzlari “Muhammad al-Xorazmiy nomidagi Toshkent axborot texnologiyalari universiteti” soʻzlari bilan almashtirilsin.