Yakka tartibda uy-joy qurayotgan koʻp bolali va kam daromadli oilalarni davlat tomonidan qoʻllab-quvvatlashni kuchaytirish, budjet ajratmalaridan maqsadli va samarali foydalanish maqsadida Vazirlar Mahkamasi qaror qiladi:

1. Yakka tartibda imorat quruvchilarga va uy-joy qurilishi shirkatlariga korxonalar tomonidan imtiyozli baholarda sotilayotgan devorbop materiallarning oʻrta hisobda 30 foiz qiymati amaldagi qonun hujjatlariga muvofiq davlat budjetidan qoplanayotganligi maʼlumot uchun qabul qilinsin.

2. Qoʻrgʻonlar, ovullar, qishloqlar va mahallalar fuqarolar yigʻinlari kengashlariga koʻp bolali va kam daromadli oilalarning ularga yakka tartibda uy-joy qurish uchun imtiyozli baholarda devorbop materiallar sotish haqidagi arizalarini birinchi navbatda va ustuvor ravishda koʻrib chiqish toʻgʻrisida mahalliy hokimiyat va boshqaruv organlariga iltimosnoma kiritish huquqi berilsin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Moliya vazirligining Nazorat-taftish bosh boshqarmasi bilan birgalikda kompensatsiya qilinadigan mablagʻlarning ortiqcha sarflanishiga yoʻl qoʻymasligi, shuningdek koʻp bolali va kam daromadli oilalarning yakka tartibda uy-joy qurish uchun ularga devorbop materiallarni imtiyozli baholarda sotish haqidagi arizalari tumanlar va shaharlar hokimliklari tomonidan oʻz vaqtida va asosli koʻrib chiqilishi ustidan muntazam nazoratni taʼminlasinlar.

4. Oʻzbekiston Respublikasi Moliya vazirligi 2000-yil uchun budjet prognozlarida yakka tartibda imorat quruvchilar va uy-joy qurilishi shirkatlariga imtiyozli baholarda mahsulotlar sotayotgan devorbop materiallar ishlab chiqaruvchi korxonalarning kompensatsiya xarajatlari uchun 85 mln soʻm miqdorida mablagʻlarni nazarda tutsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.