Oʻzbekiston Respublikasi Prezidentining 2016-yil 22-fevraldagi PF-4782-son “Aholining hojatmand qatlamlarini ijtimoiy qoʻllab-quvvatlash hamda tibbiy-ijtimoiy yordam koʻrsatish tizimini yanada takomillashtirish chora-tadbirlari toʻgʻrisida”gi Farmoniga asosan buyuraman:

1. Yolgʻiz keksalar va nogironlarni Oʻzbekiston Respublikasi Sogʻliqni saqlash vazirligi tizimidagi Urush va mehnat faxriylari uchun respublika pansionati, “Saxovat” va “Muruvvat” internat uylariga rasmiylashtirish qoidalari ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Qoidalar Oʻzbekiston Respublikasining “Oʻzbekiston Respublikasida nogironlarni ijtimoiy himoya qilish toʻgʻrisida”gi Qonuni, Vazirlar Mahkamasining 2011-yil 23-avgustdagi 240-sonli qarori bilan tasdiqlangan “Saxovat” keksalar va nogironlar uchun internat uylari toʻgʻrisidagi nizom, “Muruvvat” nogironlar uchun internat uylari toʻgʻrisidagi nizom, “Muruvvat” nogiron bolalar uchun internat uylari toʻgʻrisidagi nizom hamda Urush va mehnat faxriylari uchun respublika pansionati toʻgʻrisidagi nizomga muvofiq yolgʻiz keksalar va nogironlarni (bundan buyon matnda vasiylikka olinuvchilar deb yuritiladi) Oʻzbekiston Respublikasi Sogʻliqni saqlash vazirligi tizimidagi Urush va mehnat faxriylari uchun respublika pansionati, “Saxovat” va “Muruvvat” internat uylariga (bundan buyon matnda tibbiy-ijtimoiy muassasalar deb yuritiladi) rasmiylashtirish qoidalarini belgilaydi.

1. Vasiylikka olinuvchilarni tibbiy-ijtimoiy muassasalarga yuborish, shuningdek bittasidan ikkinchisiga oʻtkazish (koʻchirish) masalasini koʻrib chiqish uchun Oʻzbekiston Respublikasi sogʻliqni saqlash vazirining buyrugʻi bilan Vasiylikka olinuvchilarni tibbiy-ijtimoiy muassasalarga yuborish, shuningdek bittasidan ikkinchisiga oʻtkazish (koʻchirish) boʻyicha doimiy faoliyat yurituvchi maxsus komissiya (bundan buyon matnda Maxsus komissiya deb yuritiladi) tuziladi.

Maxsus komissiya tarkibi kamida 5 nafar aʼzodan, shu jumladan Maxsus komissiya raisi va kotibidan iborat boʻladi.

2. Qoraqalpogʻiston Respublikasi Sogʻliqni saqlash vazirligi, viloyatlar sogʻliqni saqlash boshqarmalari hamda Toshkent shahar sogʻliqni saqlash bosh boshqarmasi (bundan buyon matnda hududiy boshqarma deb yuritiladi) boshliqlarining buyruqlari bilan tegishlicha ularning huzurida tibbiy-ijtimoiy muassasalarga rasmiylashtirish uchun vasiylikka olinuvchilar tomonidan taqdim etilgan hujjatlarni oʻrganib chiqish boʻyicha ishchi guruhlar (bundan buyon matnda ishchi guruh deb yuritiladi) tashkil etiladi.

3. Maxsus komissiya hududiy boshqarmalarning vasiylikka olinuvchilarni tibbiy-ijtimoiy muassasalarga rasmiylashtirish masalalari boʻyicha ishlarini muvofiqlashtirib boradi.

4. Vasiylikka olinuvchi Vazirlar Mahkamasining 2011-yil 23-avgustdagi 240-sonli qarori bilan tasdiqlangan “Saxovat” keksalar va nogironlar uchun internat uylari toʻgʻrisidagi nizom, “Muruvvat” nogironlar uchun internat uylari toʻgʻrisidagi nizom, “Muruvvat” nogiron bolalar uchun internat uylari toʻgʻrisidagi nizom hamda Urush va mehnat faxriylari uchun respublika pansionati toʻgʻrisidagi nizomda nazarda tutilgan tegishli tibbiy-ijtimoiy muassasasiga rasmiylashtirish uchun talab etiladigan hujjatlarni tuman (shahar) tibbiyot birlashmalariga topshiradi. Bunda, sogʻliqning holati toʻgʻrisidagi tibbiy hujjatlar mazkur Qoidalarning ilovasida koʻrsatilgan roʻyxatga muvofiq taqdim etiladi.

5. Tuman (shahar) tibbiyot birlashmalari vasiylikka olinuvchilar tomonidan taqdim etilgan hujjatlarning toʻliqligini tekshirib, ularni har bir vasiylikka olinuvchi boʻyicha alohida jildlarga joylashtirgan holda hujjatlar qabul qilib olingan kundan boshlab 10 kun ichida hududiy boshqarmalarga yuboradi.

Hujjatlarning oʻz vaqtida hududiy boshqarmalarga yuborilishi uchun tuman (shahar) tibbiyot birlashmalari boshliqlari shaxsan javobgar hisoblanadi.

6. Hududiy boshqarmalar huzuridagi ishchi guruhlar tomonidan tuman (shahar) tibbiyot birlashmalaridan kelib tushgan vasiylikka olinuvchilarning hujjatlari 10 ish kuni ichida atroflicha oʻrganib chiqilib, tegishli qaror chiqarish uchun Maxsus komissiyaga taqdim etiladi.

7. Maxsus komissiya taqdim etilgan hujjatlarni vasiylikka olinuvchilarning istagi, shuningdek tibbiy-ijtimoiy muassasalardagi boʻsh oʻrinlar mavjudligini inobatga olgan holda oʻrganib chiqadi va ularni mazkur muassasalarga yuborish (qabul qilish) yoki yuborishda (qabul qilishda) rad etish toʻgʻrisida qaror qabul qiladi.

8. Vasiylikka olinuvchilarni tibbiy-ijtimoiy muassasalarga yuborishni (qabul qilishni) asossiz rad etishga yoʻl qoʻyilmaydi.

9. Maxsus komissiya qarori u qabul qilingan kundan boshlab 3 kun ichida tegishlicha hududiy boshqarmalarga vasiylikka olinuvchilarning hujjatlari bilan birga yuboriladi. Bunda vasiylikka olinuvchini Urush va mehnat faxriylari uchun respublika pansionatiga qabul qilish toʻgʻrisidagi Maxsus komissiya qarori pansionatning oʻziga ham yuboriladi.

10. Hududiy boshqarma boshligʻi tomonidan Maxsus komissiya qarori kelib tushgan kundan boshlab 3 kun ichida uning asosida vasiylikka olinuvchini tegishlicha “Saxovat” yoki “Muruvvat” internat uyiga yuborish toʻgʻrisida buyruq qabul qilinadi va u tegishlicha “Saxovat” yoki “Muruvvat” internat uyiga hamda tuman (shahar) tibbiyot birlashmasiga yuboriladi. Bunda vasiylikka olinuvchining hujjatlari buyruq bilan birga tuman (shahar) tibbiyot birlashmasiga yuboriladi.

Vasiylikka olinuvchini Urush va mehnat faxriylari uchun respublika pansionatiga qabul qilish toʻgʻrisidagi Maxsus komissiya qarori u kelib tushgan kundan boshlab 3 kun ichida uning nusxasi vasiylikka olinuvchining hujjatlari bilan birga hududiy boshqarma tomonidan tuman (shahar) tibbiyot birlashmasiga xat orqali toʻgʻridan-toʻgʻri yuboriladi.

11. Maxsus komissiya qarorida vasiylikka olinuvchini tegishli tibbiy-ijtimoiy muassasasiga yuborishda (qabul qilishda) rad etilgan boʻlsa, hududiy boshqarma bu haqda tuman (shahar) tibbiyot birlashmasini qaror kelib tushgan kundan boshlab 3 kun ichida xat orqali xabardor qiladi va mazkur xat bilan birga Maxsus komissiyaning tegishli qarori nusxasini hamda vasiylikka olinuvchining hujjatlarini yuboradi.

12. Tuman (shahar) tibbiyot birlashmasi unga hududiy boshqarma boshligʻining buyrugʻi, vasiylikka olinuvchini Urush va mehnat faxriylari uchun respublika pansionatiga qabul qilish toʻgʻrisidagi Maxsus komissiya qarori nusxasi yoxud vasiylikka olinuvchini tegishli tibbiy-ijtimoiy muassasasiga yuborishda (qabul qilishda) rad etilganligi toʻgʻrisidagi Maxsus komissiya qarori nusxasi kelib tushgan kunning oʻzida vasiylikka olinuvchini (uning qonuniy vakilini) bu haqida xabardor qilishi hamda unga (uning qonuniy vakiliga) tegishli buyruq (qaror) nusxasini va tibbiy-ijtimoiy muassasaga rasmiylashtirish uchun topshirgan hujjatlarini (tibbiy-ijtimoiy muassasaga rasmiylashtirish uchun berilgan arizadan tashqari) qaytarishi shart.

13. Vasiylikka olinuvchi (uning qonuniy vakili) hududiy boshqarma boshligʻining “Saxovat” yoki “Muruvvat” internat uyiga yuborish toʻgʻrisidagi buyrugʻi yoxud Urush va mehnat faxriylari uchun respublika pansionatiga qabul qilish toʻgʻrisidagi Maxsus komissiya qarori nusxasini hamda rasmiylashtirish uchun topshirgan hujjatlarini olgandan soʻng, tegishli tibbiy-ijtimoiy muassasaga murojaat qiladi. Bunda vasiylikka olinuvchi (uning qonuniy vakili) tegishli tibbiy-ijtimoiy muassasaga rasmiylashtirish uchun topshirilgan hujjatlarini (tibbiy-ijtimoiy muassasaga rasmiylashtirish uchun berilgan arizadan tashqari) taqdim etishi lozim.

14. Vasiylikka olingan bir tibbiy-ijtimoiy muassasadan boshqasiga tegishli tibbiy-ijtimoiy muassasada boʻsh oʻrinlar mavjud boʻlgan taqdirda oʻtkazilishi (koʻchirilishi) mumkin.

15. Vasiylikka olinganni bir tibbiy-ijtimoiy muassasadan boshqasiga oʻtkazish (koʻchirish):

u istiqomat qilayotgan tibbiy-ijtimoiy muassasa joylashgan hududning ob-havosi sogʻligʻiga salbiy taʼsir koʻrsatganda (tibbiy xulosa bilan asoslanganda);

uning qonuniy vakili bir hududdan boshqa hududga koʻchib oʻtganda (qonuniy vakilining doimiy yashash joyidan maʼlumotnoma bilan asoslanganda) amalga oshiriladi.

16. Vasiylikka olingan bir tibbiy-ijtimoiy muassasadan boshqasiga oʻtish (koʻchish) uchun u yoki uning qonuniy vakili tegishli tibbiy-ijtimoiy muassasasi joylashgan hududdagi hududiy boshqarmaga ariza bilan murojaat qiladi. Arizaga mazkur Qoidalarning 15-bandida koʻrsatilgan vasiylikka olinganni bir tibbiy-ijtimoiy muassasadan boshqasiga oʻtkazish (koʻchirish) uchun asos boʻlib hisoblanuvchi hujjatlar ilova qilinishi lozim.

17. Hududiy boshqarma huzuridagi ishchi guruhi tomonidan vasiylikka olinganning bir tibbiy-ijtimoiy muassasadan boshqasiga oʻtkazish (koʻchirish) haqidagi arizasi 10 ish kuni ichida atroflicha oʻrganib chiqiladi va tegishli qaror chiqarish uchun Maxsus komissiyaga taqdim etiladi.

Zarur hollarda ishchi guruhi tomonidan tegishli tibbiy-ijtimoiy muassasadan vasiylikka olinganning sogʻligʻi holati toʻgʻrisidagi tibbiy hujjatlari ishchi tartibda soʻrab olinishi mumkin.

18. Maxsus komissiya hududiy boshqarmalar tomonidan kiritilgan hujjatlarni tibbiy-ijtimoiy muassasalardagi boʻsh oʻrinlar mavjudligini inobatga olgan holda oʻrganib chiqadi.

Vasiylikka olinganni bir tibbiy-ijtimoiy muassasadan boshqasiga oʻtkazish (koʻchirish) toʻgʻrisida Maxsus komissiya qarori qabul qilinadi va u Maxsus komissiya tomonidan 3 kun ichida tegishlicha hududiy boshqarma(lar)ga, vasiylikka olingan Urush va mehnat faxriylari uchun respublika pansionatidan koʻchirilayotganda esa, pansionatning oʻziga ham yuboriladi.

19. Hududiy boshqarma(lar) boshligʻi Maxsus komissiya qarori kelib tushgan kundan boshlab 3 kun ichida uning asosida tegishlicha vasiylikka olinganni tibbiy-ijtimoiy muassasadan chiqarish yoki qabul qilish toʻgʻrisida buyruq qabul qiladi. Bunda vasiylikka olingan Urush va mehnat faxriylari uchun respublika pansionatidan koʻchirilayotganda uni chiqarish toʻgʻrisida pansionat direktorining buyrugʻi qabul qilinadi.

Hududiy boshqarma boshligʻining buyrugʻi tegishli tibbiy-ijtimoiy muassasaga yuboriladi.

20. Vasiylikka olingan 18 yoshga toʻlganda u “Muruvvat” nogiron bolalar uchun internat uyidan “Muruvvat” nogironlar uchun internat uyiga unda boʻsh oʻrinlar mavjud boʻlgan taqdirda oʻtkaziladi.

21. “Muruvvat” nogiron bolalar uchun internat uyi tomonidan yilning har choragi yakunida 18 yoshga toʻlgan vasiylikka olinganlar roʻyxati tuzilib, tegishlicha hududiy boshqarmaga taqdim etiladi.

22. Hududiy boshqarma huzuridagi ishchi guruhi taqdim etilgan 18 yoshga toʻlgan vasiylikka olinganlar roʻyxatini 10 ish kuni ichida oʻrganib chiqib, ularni “Muruvvat” nogironlar uchun internat uylariga oʻtkazish masalasini hal qilish uchun Maxsus komissiyaga taklif kiritadi.

23. Maxsus komissiya hududiy boshqarmalar tomonidan kiritilgan takliflarni “Muruvvat” nogironlar uchun internat uylaridagi mavjud boʻsh oʻrinlarni inobatga olgan holda oʻrganib chiqadi.

18 yoshga toʻlgan vasiylikka olinganlarni “Muruvvat” nogironlar uchun internat uylariga joylashtirish boʻyicha Maxsus komissiya qarori qabul qilinadi va u Maxsus komissiya tomonidan ijro uchun tegishlicha hududiy boshqarmalarga yuboriladi.

24. Hududiy boshqarmalar boshliqlari tomonidan Maxsus komissiya qarori kelib tushgan kundan boshlab 3 kun ichida uning asosida tegishlicha 18 yoshga toʻlgan vasiylikka olinganlarni “Muruvvat” nogiron bolalar uchun internat uyidan chiqarish yoki ularni “Muruvvat” nogironlar uchun internat uyiga qabul qilish toʻgʻrisida buyruq qabul qilinadi.

Hududiy boshqarma boshligʻining buyrugʻi tegishli “Muruvvat” nogiron bolalar uchun internat uyi hamda “Muruvvat” nogironlar uchun internat uyiga yuboriladi.

25. Vasiylikka olinganni bir tibbiy-ijtimoiy muassasadan boshqasiga oʻtkazishda (koʻchirishda) u tark etayotgan tibbiy-ijtimoiy muassasa zarur transport vositasini hamda kuzatib borish uchun tibbiyot xodimini ajratgan holda uning oʻtkazilayotgan (koʻchirilayotgan) tegishli tibbiy-ijtimoiy muassasaga yetkazilishini taʼminlaydi.

26. Vasiylikka olinganni bir tibbiy-ijtimoiy muassasadan boshqasiga oʻtkazishda (koʻchirishda) u tibbiy-ijtimoiy muassasaga rasmiylashtirilishi bilan bogʻliq boʻlgan barcha hujjatlari hamda shaxsiy kiyim-kechagi va buyumlari bilan birga oʻtkaziladi (koʻchiriladi).

27. Mazkur Qoidalar talablarining buzilishida aybdor boʻlgan shaxslar qonun hujjatlarida belgilangan tartibda javobgarlikka tortiladilar.

1. Ambulator kartadan yoki kasallik tarixidan koʻchirma (qon va siydik tahlili, qonning Vasserman reaksiyasi va Avstraliya antigeniga tahlili, koʻkrak qafasi flyurografiyasi boʻlishi lozim).

2. Ruhiy-asab kasalliklari dispanseri Tibbiy-maslahat komissiyasi xulosasi.

3. Silga qarshi kurashish dispanseri xulosasi.

4. Onkologik dispanser xulosasi.

5. Teri-tanosil kasalliklari dispanseri xulosasi.