Eksport salohiyatini kengaytirish, xalqaro moliya va iqtisodiy tashkilotlar bilan aloqalarni mustahkamlash, respublikani ijtimoiy-iqtisodiy rivojlantirishning ustuvor yoʻnalishlarini va dasturlarini amalga oshirish uchun xorijiy investitsiyalarni keng jalb etish boʻyicha ishlarni tashkil etishni yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasi apparati tuzilmasida Oʻzbekiston Respublikasi Vazirlar Mahkamasining Tashqi iqtisodiy faoliyatni muvofiqlashtirish departamenti hamda Investitsiya dasturlari departamenti negizida Tashqi iqtisodiy aloqalar va xorijiy investitsiyalar departamenti tashkil etilsin.

2. Quyidagilar Tashqi iqtisodiy aloqalar va xorijiy investitsiyalar departamentining asosiy vazifalari etib belgilansin:

vazirliklar, idoralar va mulkchilik shakllaridan qatʼi nazar, xoʻjalik birlashmalari, mahalliy boshqaruv organlarining respublikaning eksport salohiyatini rivojlantirish dasturlarini ishlab chiqish va amalga oshirish boʻyicha faoliyatini muvofiqlashtirish;

jahon tovar bozorlarining kompleks marketing tadqiqotlarini oʻtkazish va eksport tarkibini takomillashtirish boʻyicha ishlarni muvofiqlashtirish;

tovarlar (ishlar, xizmatlar) eksportining har yilgi prognozlarini shakllantirish va ularning bajarilishini nazorat qilish. Eksport mahsulotlari miqdorini koʻpaytirish va turlarini kengaytirish potensial imkoniyatlarini tahlil qilish hamda chora-tadbirlarini amalga oshirish;

xomashyo, materiallar va butlovchi buyumlar ayrim turlari importining oʻrnini qoplash tarmoq dasturlarini shakllantirishga doir ishlarni tashkil etish;

ishlab chiqarishlarni mahalliylashtirish dasturlarini shakllantirish ishlarini muvofiqlashtirish va ularni amalga oshirish monitoringini olib borish;

Oʻzbekiston Respublikasining xalqaro moliya va iqtisodiyot tashkilotlari bilan aloqalarini rivojlantirish va mustahkamlash boʻyicha hamkorlik strategiyasini ishlab chiqishda qatnashish va chora-tadbirlarni amalga oshirish;

xalqaro moliya va iqtisodiyot tashkilotlarining uzoq muddatli imtiyozli kreditlari va grantlarini mamlakatni ijtimoiy-iqtisodiy rivojlantirishning ustuvor yoʻnalishlari va dasturlarini amalga oshirish uchun jalb etish ishlarini tashkil qilish;

texnikaviy koʻmaklashish vositalarini jalb etish hamda Oʻzbekiston Respublikasining donor mamlakatlar bilan moliyaviy va texnikaviy hamkorligi dasturlari monitoringini olib borish;

tashqi iqtisodiy faoliyatning qonunchilik va normativ bazasini takomillashtirish, qulay investitsiya muhitini shakllantirish hamda xorijiy kreditlar va bevosita xorijiy investitsiyalarni respublika iqtisodiyotiga keng jalb etish uchun qoʻshimcha shart-sharoitlar yaratish ishlarini muvofiqlashtirish;

vazirliklar, idoralar va barcha darajalardagi mahalliy boshqaruv organlariga xorijiy investitsiyalar ishtirokidagi korxonalar tashkil etish va ularning faoliyatini yoʻlga qoʻyishda koʻmaklashish;

investitsiya dasturiga kiritiladigan xorijiy investitsiyalar ishtirokidagi korxonalar loyihalari roʻyxatini shakllantirish va mazkur loyihalarning amalga oshirilishi ustidan davlat monitoringini tashkil etish. Vazirlar Mahkamasi Komplekslari kotibiyatlari va Departamentlari bilan birgalikda Oʻzbekiston Respublikasi hukumati kafolati ostida amalga oshiriladigan eng yirik va strategik jihatdan muhim investitsiya loyihalarining texnik-iqtisodiy asoslanishlarini, mablagʻ bilan taʼminlash sxemalarini koʻrib chiqish va ekspertizadan oʻtkazilishini tashkil etish;

MDH mamlakatlari bilan ikki tomonlama iqtisodiy hamkorlik shartnomalari va bitimlarini tayyorlash hamda ularning amalga oshirilishini nazorat qilish ishlarini muvofiqlashtirish.

3. Tashqi iqtisodiy aloqalar va xorijiy investitsiyalar departamentining tuzilmasi va uning toʻgʻrisidagi Nizom 1 va 2-ilovalarga muvofiq tasdiqlansin.

Tashqi iqtisodiy aloqalar va xorijiy investitsiyalar departamenti boshligʻi maqomiga koʻra Oʻzbekiston Respublikasi vazirining birinchi oʻrinbosariga, guruhlar rahbarlari vazir oʻrinbosariga tenglashtirilsin.

4. Belgilab qoʻyilsinki, Oʻzbekiston Respublikasi vazirliklari va idoralari majburiy tartibda:

tashqi iqtisodiy va investitsiya faoliyati masalalariga taalluqli normativ hujjatlar loyihalarini Tashqi iqtisodiy aloqalar va xorijiy investitsiyalar departamenti bilan kelishib oladilar;

moliyaviy va texnikaviy yordam koʻrsatish toʻgʻrisida xalqaro tashkilotlardan va ixtisoslashgan xorijiy agentliklardan soʻrovlarni faqat Tashqi iqtisodiy aloqalar va xorijiy investitsiyalar departamenti orqali amalga oshiradilar.

5. Tashqi iqtisodiy aloqalar va xorijiy investitsiyalar departamenti:

Oʻzbekiston Respublikasi Prezidentining farmonlari va farmoyishlari, Vazirlar Mahkamasining qarorlari va farmoyishlari, Hukumatning boshqa qarorlari majburiy tartibda joʻnatiladigan tashkilotlar roʻyxatiga;

Oʻzbekiston Respublikasi Makroiqtisodiyot va statistika vazirligi, Davlat bojxona qoʻmitasi, Moliya vazirligi, Markaziy banki va boshqa idoralarining statistik axborotnomalari majburiy tartibda joʻnatiladigan reyestrga kiritilsin.

6. Oʻzbekiston Respublikasining Bosh vaziri Oʻ. T. Sultonov oʻn kun muddatda Tashqi iqtisodiy aloqalar va xorijiy investitsiyalar departamenti guruhlari toʻgʻrisidagi Nizomni, guruhlar rahbarlari va mutaxassislari funksional vazifalari taqsimotini tasdiqlasin, shuningdek guruhlarni malakali kadrlar bilan taʼminlasin.

7. Oʻzbekiston Respublikasi Hukumatining 3-ilovaga muvofiq qarorlari oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T.Sultonov zimmasiga yuklansin.

1. Tashqi iqtisodiy aloqalar va xorijiy investitsiyalar departamenti (keyingi oʻrinlarda “Departament” deb ataladi) Oʻzbekiston Respublikasi Vazirlar Mahkamasi apparatining tarkibiy boʻlinmasi hisoblanadi.

2. Departament oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisining qarorlariga, Oʻzbekiston Respublikasi Prezidentining farmonlariga, Vazirlar Mahkamasining qarorlari va farmoyishlariga, shuningdek mazkur Nizomga amal qiladi.

3. Departament oʻz faoliyatini bevosita Oʻzbekiston Respublikasi Vazirlar Mahkamasining Raisi, Bosh vaziri rahbarligida amalga oshiradi hamda ularga hisob beradi, ijro intizomini mustahkamlash masalalari boʻyicha esa Vazirlar Mahkamasi Apparati Rahbariga hisob beradi.

4. Departament oʻzbek tilida yozilgan va Oʻzbekiston Respublikasining Davlat gerbi tasviri tushirilgan oʻz blankasiga egadir.

5. Departament tarkibiga quyidagi guruhlar kiradi:

Eksport salohiyatini kengaytirish va import oʻrnini toʻldirish (ishlab chiqarishni mahalliylashtirish) masalalari guruhi;

Xalqaro moliya va iqtisodiy tashkilotlar bilan aloqalar guruhi;

Xorijiy investitsiyalarni jalb etish va xorijiy investorlar bilan ishlash masalalari guruhi;

Mustaqil Davlatlar Hamdoʻstligi mamlakatlari bilan iqtisodiy hamkorlik masalalari guruhi;

Eksport salohiyatini rivojlantirishni ragʻbatlantirish Respublika kengashi kotibiyati.

Departament tarkibiga, shuningdek mustaqil yuridik shaxs boʻlgan Oʻzbekistonda Yevropa Ittifoqi Komissiyasining texnikaviy yordamni muvofiqlashtirish Byurosi (OʻZbyuroKES) ham kiradi.

6. Departament ishlariga maqomiga koʻra Oʻzbekiston Respublikasi vazirining birinchi oʻrinbosariga tenglashtirilgan Departament boshligʻi rahbarlik qiladi.

7. Departament boʻlinmalari ishiga Oʻzbekiston Respublikasi vazirining oʻrinbosariga tenglashtirilgan guruh rahbarlari rahbarlik qiladi.

8. Departament boshligʻi va boʻlinmalar rahbarlari Oʻzbekiston Respublikasi Vazirlar Mahkamasining qarori bilan lavozimga tayinlanadi va lavozimdan ozod qilinadi.

9. Quyidagilar Departamentning asosiy vazifalari hisoblanadi:

a) eksport salohiyatini kengaytirish va import oʻrnini toʻldirish (ishlab chiqarishni mahalliylashtirish) sohasida

vazirliklar, idoralar va mulkchilik shakllaridan qatʼi nazar, xoʻjalik birlashmalari, mahalliy boshqaruv organlarining respublikaning eksport salohiyatini rivojlantirish dasturlarini ishlab chiqish va amalga oshirish boʻyicha faoliyatini muvofiqlashtirish;

jahon tovar bozorlarining kompleks marketing tadqiqotlarini oʻtkazish va eksport tarkibini yanada takomillashtirish boʻyicha ishlarni muvofiqlashtirish;

Oʻzbekiston Respublikasi Tashqi iqtisodiy aloqalar vazirligi, Makroiqtisodiyot va statistika vazirligi hamda Davlat bojxona qoʻmitasi bilan birgalikda tovarlar (ishlar, xizmatlar) eksportining har yilgi prognozlarini shakllantirish va ularning bajarilishini nazorat qilish;

eksport mahsulotlari miqdorini koʻpaytirish va turlarini kengaytirish potensial imkoniyatlarini tahlil qilish;

tashqi iqtisodiy faoliyatni yanada erkinlashtirishga doir takliflar tayyorlash;

xomashyo, materiallar va butlovchi buyumlar ayrim turlari importining oʻrnini qoplash tarmoq dasturlarini shakllantirishga doir ishlarni tashkil etish;

ishlab chiqarishlarni mahalliylashtirish dasturlarini shakllantirish ishlarini muvofiqlashtirish va ularni amalga oshirish monitoringini olib borish;

respublika vazirliklari va idoralarining xorijiy mamlakatlar bilan harbiy-texnikaviy hamkorlik dasturlarini amalga oshirishga doir faoliyatini muvofiqlashtirish;

b) xalqaro moliya va iqtisodiy tashkilotlar bilan iqtisodiy hamkorlik sohasida

Oʻzbekiston Respublikasining xalqaro moliya va iqtisodiyot tashkilotlari bilan aloqalarini rivojlantirish va mustahkamlash boʻyicha hamkorlik strategiyasini ishlab chiqishda qatnashish va chora-tadbirlarni amalga oshirish;

xalqaro moliya va iqtisodiyot tashkilotlarining imtiyozli kreditlari va grantlarini mamlakatni ijtimoiy-iqtisodiy rivojlantirishning ustuvor yoʻnalishlari va dasturlarini amalga oshirish uchun jalb etish ishlarini tashkil qilish;

texnikaviy koʻmaklashish vositalarini jalb etish hamda Oʻzbekiston Respublikasining donor mamlakatlar bilan moliyaviy va texnikaviy hamkorligi dasturlari monitoringini olib borish;

vakolatli tijorat banklarining xalqaro moliya institutlari mablagʻlarini Oʻzbekiston Respublikasini ijtimoiy-iqtisodiy rivojlantirishning ustuvor vazifalarini amalga oshirishga jalb etishga doir ishlarini muvofiqlashtirish;

v) xorijiy investitsiyalarni jalb etish va xorijiy investorlar bilan ishlash sohasida

Oʻzbekiston Respublikasida qulay investitsiya muhitining ahvolini tahlil qilish va uni yanada takomillashtirish boʻyicha takliflar tayyorlash;

xorijiy investitsiyalarni jalb etishning qonunchilik va normativ bazasini yanada takomillashtirish, qoʻshma korxonalar tashkil etish va ularning faoliyatini yoʻlga qoʻyish, xorijiy investorlar manfaatlarini muhofaza qilish ishlarini muvofiqlashtirish;

potensial investorlarni Oʻzbekiston Respublikasida investitsiya muhiti toʻgʻrisidagi axborotlar bilan taʼminlash ishlarini muvofiqlashtirish;

xorijiy kreditlar va bevosita investitsiyalarni investitsiya dasturlari hamda ustuvor loyihalarni amalga oshirish uchun jalb etish boʻyicha kompleks chora-tadbirlarni ishlab chiqish va roʻyobga chiqarish;

vazirliklar, idoralar va mahalliy boshqaruv organlariga xorijiy investitsiyalar ishtirokidagi korxonalar tashkil etish va ularning faoliyatini yoʻlga qoʻyishda koʻmaklashish;

Oʻzbekiston Respublikasining investitsiya dasturiga kiritilgan xorijiy investitsiyalar ishtirokidagi korxonalar loyihalari roʻyxatini shakllantirishda va mazkur loyihalarning amalga oshirilishi ustidan monitoring tashkil etishda qatnashish;

Vazirlar Mahkamasi kotibiyatlari va Departamentlari bilan birgalikda Oʻzbekiston Respublikasi Hukumati kafolati ostida amalga oshiriladigan eng yirik va strategik jihatdan muhim investitsiya loyihalarining texnik-iqtisodiy asoslanishlarini, mablagʻ bilan taʼminlash sxemalarini koʻrib chiqish va ekspertizadan oʻtkazilishini tashkil etish;

g) Mustaqil Davlatlar Hamdoʻstligi mamlakatlari bilan hamkorlik sohasida

MDH mamlakatlari bilan davlatlararo munosabatlarni rivojlantirish va mustahkamlash boʻyicha takliflar tayyorlash;

MDH mamlakatlari bilan ikki tomonlama iqtisodiy hamkorlik shartnomalari va bitimlarini tayyorlash hamda ularning amalga oshirilishini nazorat qilish ishlarini muvofiqlashtirish;

vazirliklar va idoralarning mintaqaviy hamkorlik doirasidagi bitimlarni bajarish masalalarida oʻzaro hamkorligini taʼminlash;

Oʻzbekiston Respublikasi vazirliklari, idoralari hamda xoʻjalik yurituvchi subyektlari tomonidan imzolangan ikki tomonlama va koʻp tomonlama idoralararo bitimlarning bajarilishini nazorat qilish.

10. Departament oʻz zimmasiga yuklangan vazifalarga muvofiq quyidagi funksiyalarni bajaradi:

Departamentning yuritishiga tegishli masalalar boʻyicha Oʻzbekiston Respublikasi Prezidentining Farmonlari va Hukumat qarorlari, shuningdek Vazirlar Mahkamasi rahbariyatining topshiriqlari bajarilishini nazorat qilish;

a) eksport salohiyatini kengaytirish va import oʻrnini toʻldirish (ishlab chiqarishni mahalliylashtirish) sohasida

tashqi iqtisodiy faoliyatning normativ-huquqiy bazasini takomillashtirish ishlarini muvofiqlashtirish va ular yuzasidan takliflar tayyorlash;

manfaatdor vazirliklar va idoralar bilan birgalikda tovarlar (ishlar, xizmatlar) eksporti hajmini koʻpaytirish va ular turlarini kengaytirish boʻyicha eksport qiluvchi korxonalarni ragʻbatlantirish yuzasidan takliflar tayyorlash;

Oʻzbekiston Respublikasi Tashqi iqtisodiy aloqalar vazirligi, Makroiqtisodiyot va statistika vazirligi, Davlat bojxona qoʻmitasi, boshqa manfaatdor vazirliklar va idoralar bilan birgalikda tovarlar (ishlar, xizmatlar) eksporti prognozini ishlab chiqish va uning boʻyicha Vazirlar Mahkamasi qarorini tayyorlash;

importning oʻrnini toʻldirish va mahalliy xomashyo negizida ishlab chiqarishni mahalliylashtirish dasturlarini ishlab chiqish, shakllantirish va amalga oshirish yuzasidan vazirliklar, idoralar, davlat va xoʻjalik boshqaruvi organlarining ishini muvofiqlashtirish;

Oʻzbekiston Respublikasi Qurolli Kuchlarini jihozlash, mamlakatning korxonalari va tashkilotlarini harbiy-texnik mol-mulk va maxsus texnologiyalar bilan jihozlash masalalari boʻyicha Vazirlar Mahkamasi faoliyatini tashkiliy-texnik jihatdan taʼminlash;

b) xalqaro moliya va iqtisodiy tashkilotlar bilan hamkorlik sohasida

Oʻzbekiston Respublikasining xalqaro moliya va iqtisodiy tashkilotlar bilan hamkorligi, shuningdek ham qarz olingan, ham qarz olinmagan operatsiyalarni kengaytirish strategiyasini ishlab chiqishda qatnashish;

xalqaro moliya va iqtisodiy tashkilotlar bilan hamkorlikning ustuvor yoʻnalishlari, texnik koʻmaklashish vositalarini jalb etish boʻyicha takliflar tayyorlash, Oʻzbekiston Respublikasining xalqaro moliya va iqtisodiy tashkilotlar va donor mamlakatlar bilan moliyaviy va texnik hamkorligi dasturlarini monitoring qilish;

xalqaro moliya va iqtisodiy tashkilotlar bilan bitimlar loyihalarini tayyorlash, shuningdek imzolangan bitimlar bajarilishini nazorat qilish;

xalqaro moliya va iqtisodiy tashkilotlarning Oʻzbekiston Respublikasidagi vakolatxonalari faoliyatiga koʻmaklashish, ularga zarur iqtisodiy axborot tayyorlash va taqdim etish ishlarini muvofiqlashtirish;

respublika vazirliklari, idoralari va tashkilotlarining mablagʻ bilan taʼminlash va sugʻurtalashni tashkil etish yuzasidan xalqaro moliya institutlari, xorijiy mamlakatlarning eksport-kredit agentliklari bilan oʻzaro hamkorligini muvofiqlashtirish;

v) xorijiy investitsiyalarni jalb etish va xorijiy investorlar bilan ishlash sohasida

xorijiy investitsiyalarni jalb etishning qonunchilik va normativ bazasini hamda xorijiy investitsiyalar ishtirokidagi korxonalar faoliyatini takomillashtirish yuzasidan chora-tadbirlar ishlab chiqish;

xorijiy davlatlarning siyosiy va ishbilarmon doiralari, xalqaro moliya-iqtisodiy institutlar va xorijiy banklar respublikadagi investitsiya muhiti va amalga oshirilishida xorijiy investorlar qatnashishi mumkin boʻlgan loyihalar toʻgʻrisida keng xabardor etilishini tashkil etish;

xorijiy investitsiyalar jalb etilgan holda amalga oshiriladigan respublikaning ustuvor investitsiya loyihalari boʻyicha yagona maʼlumotlar bazasini shakllantirish;

bevosita xorijiy investitsiyalar jalb etilishiga, shuningdek investitsiya loyihalari, shu jumladan texnik-iqtisodiy asoslash ishlab chiqilishiga koʻmaklashish;

xalqaro tashkilotlarning texnik-iqtisodiy asoslash ishlab chiqilishiga moʻljallangan kreditlari va texnik yordamidan samarali foydalanilishini va xorijiy investitsiyalar ishtirokidagi investitsiya loyihalari amalga oshirilishini taʼminlash;

Vazirlar Mahkamasining Komplekslari kotibiyatlari va Departamentlari koʻmagida xorijiy investitsiyalar jalb etilgan holda amalga oshiriladigan ayrim investitsiya loyihalari boʻyicha Hukumat qarorlari tayyorlanishi, qabul qilinishi va ularning ijro etilishi nazorat qilinishi jarayonini taʼminlash;

Oʻzbekiston Respublikasi Davlat mulki qoʻmitasi, Makroiqtisodiyot va statistika vazirligi va Tashqi iqtisodiy aloqalar vazirligi huzurida tashkil etiladigan xorijiy investitsiyalar jalb etilishini axborot bilan taʼminlashga doir maxsus guruhlar faoliyatini muvofiqlashtirish;

xorijiy investitsiyalar ishtirokidagi korxonalar faoliyatining tashkiliy masalalari oʻz vaqtida hal etilishini monitoring qilish;

xorijiy investitsiyalarni jalb qilish va xorijiy investorlar bilan ishlash masalalarida “Oʻzinvestloyiha” respublika injiniring kompaniyasi, Xorijiy investitsiyalar boʻyicha agentlik va investitsiya jarayonining boshqa qatnashchilari faoliyatini muvofiqlashtirish;

g) Mustaqil Davlatlar Hamdoʻstligi mamlakatlari bilan iqtisodiy hamkorlik sohasida

Mustaqil Davlatlar Hamdoʻstligi mamlakatlari iqtisodiyotining rivojlanishi ahvolini va ularda iqtisodiy islohotlarning borishini tahlil qilish hamda ular bilan iqtisodiy hamkorlik qilish strategiyasining asosiy yoʻnalishlari boʻyicha takliflar tayyorlash;

Vazirlar Mahkamasi Kompleksi kotibiyatlari va Departamentlari bilan birgalikda Mustaqil Davlatlar Hamdoʻstligi mamlakatlari bilan ikki tomonlama hamkorlik shartnomalari va bitimlari tayyorlash va ularning amalga oshirilishini nazorat qilish ishlarini muvofiqlashtirish;

Oʻzbekiston Respublikasi vazirliklari, idoralari va xoʻjalik yurituvchi subyektlari Mustaqil Davlatlar Hamdoʻstligi mamlakatlari subyektlari bilan imzolagan ikki tomonlama va koʻp tomonlama idoralararo bitimlar bajarilishini nazorat qilish.

11. Departament quyidagi huquqlarga ega:

Vazirlar Mahkamasi Komplekslari kotibiyatlari va boʻlimlari va Departamentlaridan, vazirliklar, idoralar, korporatsiyalar, uyushmalar, birlashmalar, korxonalardan, shuningdek barcha darajalardagi davlat boshqaruvi organlaridan Departament vakolatiga kiruvchi masalalar boʻyicha materiallarni soʻrab olish;

xorijiy investitsiyalarni jalb qilish, tashqi iqtisodiy aloqalar masalalari boʻyicha Oʻzbekiston Respublikasi Makroiqtisodiyot va statistika vazirligi, Tashqi iqtisodiy aloqalar vazirligi, Moliya vazirligi, Davlat mulki qoʻmitasi, barcha darajalardagi davlat va xoʻjalik boshqaruvi organlarining, shuningdek davlat-tijorat banklarining hisobotlarini eshitish va oʻz vakolatlari doirasida ularga topshiriqlar berish;

tashqi iqtisodiy aloqalar sohasidagi eng muhim muammolarni maslahatlashish, oʻrganish va hal etish, ushbu sohada takliflar tayyorlash uchun vaqtinchalik ishchi guruhlar tuzish uchun Oʻzbekiston Respublikasi olimlari va mutaxassislarini hamda xorijiy ekspertlarni jalb qilish;

moliyaviy va texnik koʻmaklashish yuzasidan xalqaro moliya va iqtisodiy tashkilotlarga va xorijiy agentliklarga soʻrovlar berish;

xalqaro hamkorlik masalalari boʻyicha xalqaro konferensiyalar, kongresslar, simpoziumlar va kengashlar ishida, davlatlararo va hukumatlararo hamkorlik masalalariga doir muzokaralarda qatnashish;

vazirliklar va idoralar rahbarlari ishtirokida kengashlar oʻtkazish, ularning hayʼatlari ishida, Vazirlar Mahkamasi majlislarida, ijroiya hokimiyat mahalliy organlari majlislarida, vazirliklar, idoralar, korporatsiyalar, uyushmalar va korxonalardagi kengashlarda qatnashish;

Oʻzbekiston Respublikasi qonunchiligini tashqi iqtisodiy va investitsiya faoliyati yuzasidan takomillashtirishga doir takliflar kiritish;

Oʻzbekiston Respublikasi vazirliklari va idoralari bilan, shuningdek oʻzaro hamkorlik masalalari boʻyicha xalqaro, xorijiy, moliyaviy va iqtisodiy tashkilotlar bilan mustaqil ravishda yozishmalar olib borish;

oʻz vakolatlari doirasida Oʻzbekiston Respublikasining vazirliklari va idoralari axborotidan va maʼlumotlar elektron bazalaridan foydalanish;

“Oʻzmaxsusimpeks” davlat korxonasi orqali davlat xaridlari portfelini shakllantirishda Oʻzbekiston Respublikasining harbiylashtirilgan tuzilmalaridan harbiy-texnik mol-mulkka va maxsus texnologiyalarga boʻlgan ehtiyoj toʻgʻrisida axborotni belgilangan tartibda soʻrab olish.

12. Departament quyidagilarga majburdir:

xorijiy investitsiyalar jalb qilingan investitsiya loyihalari amalga oshirilishi samaradorligi monitoringi natijalarini, tovarlar (xizmatlar) eksporti va importining yillik va uzoq muddati prognozini, importning oʻrnini toʻldirish va ishlab chiqarishni mahalliylashtirish dasturlari bajarilishini, shuningdek Vazirlar Mahkamasining tegishli qarorlari va Oʻzbekiston Respublikasi Prezidentining farmonlari bajarilishi boʻyicha hisobotlarni Vazirlar Mahkamasi rahbariyati koʻrib chiqishi uchun taqdim etish;

vazirliklar va idoralar tomonidan Oʻzbekiston Respublikasi Prezidenti Farmonlarining, Vazirlar Mahkamasi qarorlarining tashqi iqtisodiy aloqalar va xorijiy investitsiyalar jalb qilingan investitsiya loyihalari amalga oshirilishi yuzasidan bajarilishi ustidan taʼsirchan nazorat qilish;

xorijiy hukumat muassasalarining moliyaviy va iqtisodiy tashkilotlarining va yirik investorlarning oʻzaro hamkorlik qilish toʻgʻrisidagi takliflarini ishlab chiqish.

13. Departament oʻzi qabul qilgan qarorlar uchun amaldagi qonun hujjatlari va mazkur Nizomda belgilangan oʻz vakolatlari doirasida javob beradi.

1. Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasining Tashqi iqtisodiy faoliyatni muvofiqlashtirish departamenti toʻgʻrisida” 1995-yil 4-iyuldagi 254-son qarori;

2. Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasi Investitsiya dasturlari departamentini tashkil etish toʻgʻrisida” 1997-yil 27-dekabrdagi 572-son qarori;

3. Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasining Tashqi iqtisodiy faoliyatni muvofiqlashtirish departamenti toʻgʻrisidagi Nizomni tasdiqlash haqida” 1999-yil 8-fevraldagi 55-son qarori;

4. Vazirlar Mahkamasining “Oʻzbekiston Respublikasi Vazirlar Mahkamasi apparati tuzilmasiga oʻzgartirishlar kiritish toʻgʻrisida” 1999-yil 17-iyundagi 304-son qaroriga ilovaning Tashqi iqtisodiy faoliyatni muvofiqlashtirish departamenti hamda Investitsiya dasturlari departamentiga oid qismi.