Oʻzbekiston Respublikasi Prezidentining “Aksiyadorlik jamiyatlariga xorijiy investorlarni jalb etish borasidagi qoʻshimcha chora-tadbirlar toʻgʻrisida” 2015-yil 21-dekabrdagi PQ-2454-son qarorini bajarish yuzasidan, shuningdek aksiyadorlik jamiyatlariga xorijiy investorlarni keng jalb etish, ularning korporativ boshqaruvda, ishlab chiqarishni modernizatsiya qilish, texnik va texnologik jihatdan qayta jihozlashda, sifatli, raqobatbardoshli mahsulotlar ishlab chiqarishni va ularni tashqi bozorlarga yetkazib berishni tashkil etishda faol ishtirok etishi uchun qulay shart-sharoitlar yaratish, aksiyadorlik jamiyatlarining ustav kapitallaridagi davlat aktivlari va ulushlarini qisqartirish hisobiga iqtisodiyotda davlat ishtirokini tubdan kamaytirish maqsadida Vazirlar Mahkamasi qaror qiladi:

1. Quyidagilar:

ustav kapitalidagi davlat ulushining kamida 15 foizi xorijiy investorlarga sotiladigan aksiyadorlik jamiyatlarining roʻyxati 1-ilovaga* muvofiq;

ustav kapitalidagi kamida 15 foiz ulushi, shu jumladan qoʻshimcha aksiyalarni chiqarish yoʻli bilan, xorijiy investorlarga sotiladigan aksiyadorlik jamiyatlarining roʻyxati 2-ilovaga* muvofiq;

ishlab chiqarish va strategik xomashyoni dastlabki qayta ishlash sohasida faoliyatni amalga oshiruvchi aksiyadorlik jamiyatlarining, shuningdek tabiiy monopoliyalar subyektlarining hamda ijtimoiy ahamiyatga ega boʻlgan tovarlar va xizmatlarni tartibga solib boriladigan narxlar boʻyicha yetkazib beruvchilarning roʻyxati 3-ilovaga* muvofiq tasdiqlansin.

2. Oʻzbekiston Respublikasi Prezidentining 2015-yil 31-martdagi PQ-2327-son qarori bilan tuzilgan Aksiyadorlik jamiyatlari faoliyatining samaradorligini oshirish va korporativ boshqaruv tizimini takomillashtirish boʻyicha komissiya (keyingi oʻrinlarda Komissiya deb ataladi) hamda Vazirlar Mahkamasining tegishli komplekslari:

ushbu qarorga 1-ilovaga muvofiq xorijiy investorlarga sotiladigan aksiyalar paketlarini baholash va savdolarga qoʻyish jadvallarining bir oy muddatda tasdiqlanishini;

davlat va xoʻjalik boshqaruvi organlari rahbarlarining aksiyadorlik jamiyatlariga xorijiy investorlarni jalb etish boʻyicha amalga oshirilgan ishlar toʻgʻrisidagi hisobotlari Komissiyaning va Vazirlar Mahkamasi tegishli komplekslarining majlislarida tizimli ravishda eshitilishini;

aksiyadorlik jamiyatlarining ustav kapitallaridagi belgilangan muddatlarda sotilmagan davlat ulushlarini keyinchalik tasarruf etish yuzasidan Vazirlar Mahkamasiga takliflar kiritilishini taʼminlasinlar.

3. Davlat va xoʻjalik boshqaruvi organlari Oʻzbekiston Respublikasi “Yergeodezkadastr” davlat qoʻmitasi, mahalliy davlat hokimiyati organlari bilan birgalikda ushbu qarorga 1 va 2-ilovalarga kiritilgan aksiyadorlik jamiyatlari aksiyalari paketlarini xatlovdan oʻtkazish va baholash uchun zarur boʻlgan kadastr hujjatlarining toʻliq hajmda tayyorlanishini oʻn kun muddatda taʼminlasinlar.

4. Vazirlar Mahkamasining tegishli komplekslari rahbarlari:

xoʻjalik boshqaruvi organlarining taqdim etilgan takliflari asosida ushbu qarorning 1 va 2-ilovalariga kiritilgan aksiyadorlik jamiyatlariga xorijiy investorlarni jalb etish jadvallarini oʻn kun muddatda tasdiqlasinlar;

aksiyadorlik jamiyatlariga xorijiy investorlarni jalb etish jadvallarini bajarilishining borishi yuzasidan doimiy nazorat oʻrnatsinlar.

5. Davlat va xoʻjalik boshqaruvi organlari, ushbu qarorga 1 va 2-ilovalarda koʻrsatilgan aksiyadorlik jamiyatlari Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Davlat raqobat qoʻmitasi bilan birgalikda:

potensial xorijiy investorlarni qidirib topish va aksiyadorlik jamiyatlariga jalb etish;

Oʻzbekiston milliy teleradiokompaniyasini, ommaviy axborot vositalarini, shu jumladan xorijiy ommaviy axborot vositalarini jalb etgan holda, shuningdek Internet tarmogʻida aksiyalar paketlarini sotish va beriladigan imtiyozlar va preferensiyalar toʻgʻrisidagi axborotlarni keng yoritish chora-tadbirlari amalga oshirilishini taʼminlasinlar.

6. Oʻzbekiston Respublikasi Adliya vazirligi, mahalliy davlat hokimiyati organlari xoʻjalik boshqaruvi organlari va aksiyadorlik jamiyatlari muassislari bilan birgalikda, oʻzlarining ustav kapitallarida xorijiy investorlarni kamida 15 foiz miqdoridagi ulushlar bilan qatnashishga jalb etishni belgilangan muddatlarda taʼminlamagan aksiyadorlik jamiyatlarini boshqa tashkiliy-huquqiy shakllarga aylantirishni 2016-yil 1-dekabrgacha boʻlgan muddatda taʼminlasinlar.

7. Oʻzbekiston Respublikasi Moliya vazirligi va Davlat soliq qoʻmitasi Oʻzbekiston Respublikasi Prezidentining “Aksiyadorlik jamiyatlariga xorijiy investorlarni jalb etish borasidagi qoʻshimcha chora-tadbirlar toʻgʻrisida” 2015-yil 21-dekabrdagi PQ-2454-son qarorining 8-bandida belgilangan muddatda qonun hujjatlariga Oʻzbekiston Respublikasi Prezidentining koʻrsatib oʻtilgan qarorida nazarda tutilgan soliq imtiyozlari va preferensiyalari berishga doir tegishli oʻzgartirish va qoʻshimchalar kiritish boʻyicha Vazirlar Mahkamasiga takliflar taqdim etsinlar.

8. Oʻzbekiston Respublikasi Hukumatining 4-ilovaga muvofiq ayrim qarorlariga oʻzgartirish va qoʻshimchalar kiritilsin.

9. Oʻzbekiston Respublikasi Hukumatining 5-ilovaga muvofiq baʼzi qarorlari oʻz kuchini yoʻqotgan deb hisoblansin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — moliya vaziri R.S. Azimov zimmasiga yuklansin.

1. Vazirlar Mahkamasining 1995-yil 12-oktabrdagi 398-son qarori (Oʻzbekiston Respublikasi QT, 1995-y., 10-son, 39-modda) bilan tasdiqlangan Xoldinglar toʻgʻrisidagi nizomda:

a) I boʻlimning 1-bandi birinchi xatboshidagi “ochiq” soʻzlari chiqarib tashlansin;

b) III boʻlimning 3-bandidagi “Oʻzbekiston Respublikasi Davlat mulki qoʻmitasi va uning hududiy boshqarmalari” soʻzlari “Oʻzbekiston Respublikasi Davlat raqobat qoʻmitasi va uning hududiy organlari” soʻzlari bilan almashtirilsin;

v) IV boʻlimning 1-bandidagi “Davlat mulki qoʻmitasi tomonidan” soʻzlari chiqarib tashlansin.

2. Vazirlar Mahkamasining 1998-yil 26-oktabrdagi 452-son qarori (Oʻzbekiston Respublikasi QT, 1998-y., 10-son, 39-modda) bilan tasdiqlangan Ulgurji qishloq xoʻjaligi bozori toʻgʻrisidagi Namunaviy nizomda:

a) 1-banddagi “ochiq turdagi” soʻzlari chiqarib tashlansin;

b) 22-banddagi “ochiq” soʻzi chiqarib tashlansin.

4. Vazirlar Mahkamasining 2003-yil 29-apreldagi 196-son qarori (Oʻzbekiston Respublikasi QT, 2003-y., 4-son, 33-modda) bilan tasdiqlangan Qimmatli qogʻozlar bozorida hisob-kitob-kliring palatalari toʻgʻrisidagi nizomda:

6-bandning toʻrtinchi xatboshi quyidagi tahrirda bayon qilinsin:

“investitsiya vositachilarining va (yoki) Markaziy depozitariyning elektron topshiriqlari yoxud hisob-kitob-kliring palatasining boshqa aʼzolari tomonidan taqdim etilgan hujjatlar asosida “toʻlovga qarab yetkazib berish” tamoyili boʻyicha bitishuvlar natijalariga koʻra majburiyatlarning bajarilishini taʼminlash”;

quyidagi mazmundagi 7¹ va 7²-bandlar qoʻshilsin:

“7¹. Uchinchi shaxslarning, shu jumladan sudlarning va boshqa davlat organlarining qimmatli qogʻozlar savdolari tashkilotchisi majburiyatlari boʻyicha talablari hisob-kitob-kliring palatasining talab qilib olinguncha ikkilamchi depozit hisob raqamidagi savdolar qatnashchilarining pul mablagʻlari hisobiga qondirilishi mumkin emas.

7². Qimmatli qogʻozlar bilan bitimlar natijalari boʻyicha hisob-kitob-kliring palatasining talab qilib olinguncha ikkilamchi depozit hisob raqamiga pul mablagʻlarini qabul qilishda va oʻtkazishda vakolatli bank tomonidan vositachilik xizmatlari haqi undirilmaydi”.

5. Vazirlar Mahkamasining 2006-yil 16-oktabrdagi 215-son qarori (Oʻzbekiston Respublikasi QT, 2006-y ., 10-son, 77-modda) bilan tasdiqlangan Korxonalardagi ichki audit xizmati toʻgʻrisidagi nizomning 1-bandi birinchi xatboshidagi “1 mlrd soʻmdan ortiq boʻlgan korxonalarda” soʻzlaridan keyin “shuningdek aktivlarning balans qiymati eng kam oylik ish haqining yuz ming baravaridan ortiq boʻlgan aksiyadorlik jamiyatlarida” soʻzlari qoʻshilsin.

6. Vazirlar Mahkamasining 2007-yil 24-iyuldagi 151-son qarori (Oʻzbekiston Respublikasi QT, 2007-y., 7-son, 42-modda) bilan tasdiqlangan Davlat tomonidan aksiyadorlik jamiyatlarini boshqarishda ishtirok etish maxsus huquqi (“oltin aksiya”)dan foydalanish tartibi toʻgʻrisidagi nizomda:

a) 6-bandning toʻrtinchi xatboshi chiqarib tashlansin;

b) 12-bandda:

beshinchi xatboshidagi “manfaatdorlik mavjud boʻlgan” soʻzlari “affillangan shaxslar bilan” soʻzlari bilan almashtirilsin;

oltinchi xatboshidagi “boshqa xoʻjalik jamiyatlarida” soʻzlari “tijorat va notijorat tashkilotlarida” soʻzlari bilan almashtirilsin.

7. Vazirlar Mahkamasining “Oʻzbekiston Respublikasi Prezidentining “Fond bozorini yanada rivojlantirish chora-tadbirlari toʻgʻrisida” 2012-yil 19-martdagi PQ-1727-son qarorini amalga oshirish chora-tadbirlari haqida” 2012-yil 22-maydagi 140-son qarorining 1-bandi beshinchi xatboshidagi “fond bozorini yanada rivojlantirish uchun” soʻzlaridan keyin “shu jumladan “Eng yaxshi korporativ boshqaruv”, “Eng yaxshi investitsiya vositachisi” va “Eng yaxshi investitsiya konsultanti” har yilgi tanlovini oʻtkazish uchun, shuningdek korporativ boshqaruv va moliya bozori sohasida xalqaro konferensiyalar, “davra suhbatlari” va seminarlar oʻtkazish uchun” soʻzlari qoʻshilsin.

8. Vazirlar Mahkamasining 2012-yil 28-avgustdagi 253-son qarori (Oʻzbekiston Respublikasi QT, 2012-y., 8-son, 61-modda) bilan tasdiqlangan Oʻzbekiston Respublikasi bozorlarida savdo faoliyatini tashkil etish qoidalarining 7-bandidagi “ochiq” soʻzi chiqarib tashlansin.

9. Vazirlar Mahkamasining “Zarar koʻrib ishlayotgan, iqtisodiy nochor va past rentabelli tashkilotlarning foydalanilmayotgan hududlari va ortiqcha ishlab chiqarish maydonlarini yanada optimallashtirish chora-tadbirlari toʻgʻrisida” 2014-yil 15-iyuldagi 192-son qaroriga 3-ilovadagi 42-pozitsiya chiqarib tashlansin.

10. Vazirlar Mahkamasining “Davlat mulki obyektlaridan samarali va oqilona foydalanish boʻyicha qoʻshimcha chora-tadbirlar toʻgʻrisida” 2015-yil 9-oktabrdagi 289-son qarorida:

a) 1-ilovada:

19 va 104-pozitsiyalar chiqarib tashlansin;

185-pozitsiyadagi “Oʻzavtosanoat” AK” soʻzlari “Oʻzavtosanoat” AK” (“QIZIL SUV” ShARBATI)” soʻzlari bilan almashtirilsin;

193 — 194-pozitsiyalar chiqarib tashlansin;

226-pozitsiyadagi “27,22%” raqamlari “1,37%” raqamlari bilan almashtirilsin;

b) 3-ilovada:

11-pozitsiya chiqarib tashlansin;

23-pozitsiyadagi “Oʻzbekiston qattiq qotishmalar va oʻtga chidamli metallar kombinati” AJ” soʻzlari ““Oʻzbekiston qattiq qotishmalar va oʻtga chidamli metallar kombinati***” soʻzlari bilan almashtirilsin;

60-pozitsiyadagi “Kogon-yogʻ” soʻzlari ““Oʻzpaxtayogʻ” soʻzi bilan almashtirilsin;

62-pozitsiyadagi “Qizilqumsement” AJ” soʻzlari “Oʻzqurilishmateriallari” AK” soʻzlari bilan almashtirilsin;

quyidagi mazmundagi izoh qoʻshilsin:

“*** Davlat aktivlarini oʻtkazish aksiyalarni nominal qiymati boʻyicha qoʻshish va konvertatsiya qilish yoʻli bilan amalga oshiriladi”.

1. Vazirlar Mahkamasining “Aksiyadorlik jamiyatlarini boshqarish tizimini takomillashtirishga doir chora-tadbirlar toʻgʻrisida” 1998-yil 22-avgustdagi 361-son qarori (Oʻzbekiston Respublikasi QT, 1998-y., 8-son, 31-modda).

2. Vazirlar Mahkamasining “1999-2000-yillarda xususiylashtirishni chuqurlashtirish va davlat mulkini sotishdan mablagʻlar tushishini koʻpaytirish chora-tadbirlari toʻgʻrisida” 1998-yil 17-dekabrdagi 525-son qaroriga 8-ilovaning 8-bandi.

3. Vazirlar Mahkamasining “2001-2002-yillarda xorijiy investorlarni jalb etgan holda korxonalarni davlat tasarrufidan chiqarish va xususiylashtirish boʻyicha kelgusidagi chora-tadbirlar toʻgʻrisida” 2001-yil 9-martdagi 119-son qaroriga 6-ilova II boʻlimining 15-bandi (Oʻzbekiston Respublikasi QT, 2001-y., 3-son, 17-modda).

4. Vazirlar Mahkamasining “Xususiylashtirilgan korxonalarni korporativ boshqarishni takomillashtirish chora-tadbirlari toʻgʻrisida” 2003-yil 19-apreldagi 189-son qarori 1-bandining ikkinchi va beshinchi xatboshi, shuningdek uning 1, 4-ilovalari hamda 5-ilovaning 3-bandi (Oʻzbekiston Respublikasi QT, 2003-y., 4-son, 32-modda).

5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish hamda baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasining “Qimmatli qogʻozlar bozori toʻgʻrisida” 2008-yil 22-iyuldagi OʻRQ-163-son hamda “Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi Oʻzbekiston Respublikasi Qonuniga oʻzgartirish va qoʻshimchalar kiritish haqida” 2008-yil 26-sentabrdagi OʻRQ-183-son qonunlari)” 2009-yil 22-dekabrdagi 323-son qaroriga ilovaning 2-bandi (Oʻzbekiston Respublikasi QT, 2009-y., 12-son, 79-modda).