1991-yilning 15-fevralida respublikada qabul qilingan «Jamoat birlashmalari toʻgʻrisida»gi Qonun haqiqiy mustaqillikka erishish, respublikada ijtimoiy-siyosiy vaziyatni barqarorlashtirish yoʻlida jamiyatni jipslashtirishga umuman ijobiy taʼsir koʻrsatmoqda.

Shu bilan birga keyingi paytda ayrim jamoat birlashmalarini ana shu birlashmalarining roʻyxatdan oʻtkazilgan ustavlarida koʻzda tutilmagan mablagʻlar hisobidan qonunga xilof ravishda mablagʻ bilan taʼminlash hollari qayd etilmoqda.

Yuqorida koʻrsatilgan qonunga amal qilgan holda va unda koʻzda tutilgan qoidalarni soʻzsiz bajarish maqsadlarida Oʻzbekiston Respublikasi Oliy Kengashining Rayosati qaror qiladi:

1. Oʻzbekiston Respublikasi Adliya vazirligi «Oʻzbekiston Respublikasida jamoat birlashmalari toʻgʻrisida»gi Qonunning 1-moddasida koʻzda tutilgan jamoat birlashmalarining ustavlarini ular oʻz faoliyatlarini, shu jumladan noshirlik faoliyatlarini, matbaa nashrlarini mablagʻ bilan taʼminlash manbaalari xususidagi dalolatnoma (deklaratsiya) taqdim etganlaridan keyingina roʻyxatdan oʻtkazsin.

2. Oʻzbekiston Respublikasi Moliya vazirligi, Prokuraturasi, Davlat soliq bosh boshqarmasi yuqorida qayd etib oʻtilgan Qonunga muvofiq tarzda roʻyxatdan oʻtgan jamoat birlashmalari faoliyatining mablagʻ bilan taʼminlanishining qonunda koʻzda tutilgan tartibi va manbalari toʻgʻrisidagi qoidalariga qatʼiy rioya etsin.

Moliya intizomi buzilganligi hollari aniqlansa ularga nisbatan qonunda belgilangan choralar, hatto materiallarni sud idoralariga oʻtkazish choralari qoʻllansin.

3. Belgilab qoʻyilsinki, siyosiy maqsadlarni koʻzlovchi siyosiy partiyalar va ommaviy harakatlar diniy tashkilotlardan, shuningdek xorijiy davlatlar, tashkilot va fuqarolardan tushayotgan mablagʻlar hisobidan noshirlik faoliyatini amalga oshirishga hamda matbaa nashrini pul bilan taʼminlashga haqli emaslar.

4. Qonunchilik, qonuniylik va huquq-tartibot masalalari qoʻmitasi jamoat birlashmalari toʻgʻrisidagi Qonunga tegishli qoʻshimchalar va oʻzgartishlar kiritish xususida takliflar tayyorlasin va uni Oʻzbekiston Respublikasi Oliy Kengashining navbatdagi sessiyasiga kiritsin.