Oʻzbekiston Respublikasining “Jismoniy va yuridik shaxslarning murojaatlari toʻgʻrisida” 2014-yil 3-dekabrdagi OʻRQ-378-son Qonuniga muvofiq Vazirlar Mahkamasi qaror qiladi:

1. Vazirlar Mahkamasining “Interaktiv davlat xizmatlari koʻrsatishni hisobga olgan holda Internet tarmogʻida Oʻzbekiston Respublikasining Hukumat portali faoliyatini yanada takomillashtirish chora-tadbirlari toʻgʻrisida” 2012-yil 30-dekabrdagi 378-son qaroriga (Oʻzbekiston Respublikasi QT, 2012-y., 12-son, 95-modda) ilovaga muvofiq oʻzgartirish va qoʻshimchalar kiritilsin.

2. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. 3-bandning birinchi xatboshidagi “Kompyuterlashtirish va axborot-kommunikatsiya texnologiyalarini rivojlantirish boʻyicha Muvofiqlashtiruvchi kengash” soʻzlari “2013 — 2020-yillarda Oʻzbekiston Respublikasining Milliy axborot-kommunikatsiya texnologiyalarini rivojlantirish kompleks dasturini amalga oshirishni muvofiqlashtirish boʻyicha Respublika komissiyasi” soʻzlari bilan almashtirilsin.

2. 4-bandda:

birinchi xatboshidagi “Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi” soʻzlari “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi” soʻzlari bilan almashtirilsin;

toʻrtinchi xatboshidagi “Kompyuterlashtirish va axborot-kommunikatsiya texnologiyalarini rivojlantirish boʻyicha Muvofiqlashtiruvchi kengashga” soʻzlari “2013 — 2020-yillarda Oʻzbekiston Respublikasining Milliy axborot-kommunikatsiya texnologiyalarini rivojlantirish kompleks dasturini amalga oshirishni muvofiqlashtirish boʻyicha Respublika komissiyasiga” soʻzlari bilan almashtirilsin.

3. 1-ilovada:

a) 5-banddagi “Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasining” soʻzlari “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining” soʻzlari bilan almashtirilsin;

b) 15-banddagi “Kompyuterlashtirish va axborot-kommunikatsiya texnologiyalarini rivojlantirish boʻyicha Muvofiqlashtiruvchi kengash” soʻzlari “2013-2020-yillarda Oʻzbekiston Respublikasining Milliy axborot-kommunikatsiya texnologiyalarini rivojlantirish kompleks dasturini amalga oshirishni muvofiqlashtirish boʻyicha Respublika komissiyasi” soʻzlari bilan almashtirilsin;

v) 17-banddagi “hamda” soʻzidan keyin “murojaatlarda qoʻyilgan masalalarni hal etish vakolatiga kiradigan” soʻzlari qoʻshilsin;

g) quyidagi mazmundagi 17¹-band qoʻshilsin:

“17¹. Foydalanuvchilarning shaxsiy kabineti orqali Oluvchiga yuboriladigan murojaatlari elektron raqamli imzo va ularni identifikatsiyalash imkonini beradigan boshqa rekvizitlar bilan tasdiqlanishi kerak”;

d) 18-bandga quyidagi mazmundagi uchinchi xatboshi qoʻshilsin:

“Foydalanuvchiga uning murojaatiga elektron tarzdagi javob rahbarning yoki Oluvchining boshqa mansabdor vakolatli shaxsining elektron raqamli imzosi bilan tasdiqlanishi kerak”;

e) 23-banddagi “davlat organi rahbarining ichki buyrugʻiga asosan tayinlangan mansabdor shaxs” soʻzlari “Oluvchi yoki murojaatlarni koʻrib chiqish vazifasi yuklangan mansabdor shaxs” soʻzlari bilan almashtirilsin;

j) 24-band quyidagi tahrirda bayon qilinsin:

“24. Qonunda nazarda tutilgan hollarda Oluvchi murojaatni koʻrmay qoldiradi”;

z) 26-bandning ikkinchi va uchinchi xatboshilari quyidagi tahrirda bayon qilinsin:

“takliflar — Oluvchiga kelib tushgan kundan boshlab bir oygacha muddatda, qoʻshimcha oʻrganishlar talab qilinadigan takliflardan tashqari, bu toʻgʻrida taklif kiritgan Foydalanuvchiga oʻn kun muddatda xabar beriladi;

arizalar yoki shikoyatlar — Oluvchiga kelib tushgan kundan boshlab oʻn besh kun mobaynida masalani mohiyati boʻyicha hal etilishi, qoʻshimcha oʻrganish va (yoki) tekshirish oʻtkazish, qoʻshimcha hujjatlar soʻrab olish talab qilingan taqdirda esa — bir oygacha muddatda hal etilishi shart”;

i) 28-banddagi “Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi huzuridagi Aloqa, axborotlashtirish va telekommunikatsiya texnologiyalari sohasida nazorat boʻyicha davlat inspeksiyasi” soʻzlari “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi Aloqa, axborotlashtirish va telekommunikatsiya texnologiyalari sohasida nazorat boʻyicha davlat inspeksiyasi” soʻzlari bilan almashtirilsin.