O‘zbekiston Respublikasi Prezidentining “O‘zbekiston Respublikasining 2015-yilgi asosiy makroiqtisodiy ko‘rsatkichlari prognozi va Davlat budjeti parametrlari to‘g‘risida” 2014-yil 4-dekabrdagi PQ-2270-son qarorini amalga oshirish maqsadida Vazirlar Mahkamasi qaror qiladi:

1. 2015-yil 1-yanvardan boshlab mikrofirmalar va kichik korxonalar uchun, shuningdek fermer xo‘jaliklari uchun yagona ijtimoiy to‘lov stavkasi 25 foizdan 15 foizgacha pasaytirilganligi ma’lumot uchun qabul qilinsin.

2. Belgilansinki, mikrofirmalar va kichik korxonalar, fermer xo‘jaliklari bundan mustasno, 2015-yil 1-yanvardan boshlab yagona ijtimoiy to‘lovni belgilangan stavka bo‘yicha, biroq har bir xodimga bazaviy hisoblash miqdorining 65 foizidan kam bo‘lmagan miqdorda hisoblaydilar.

Fermer xo‘jaliklari uchun yagona ijtimoiy to‘lovni belgilangan stavka bo‘yicha, biroq har bir xodimga bazaviy hisoblash miqdorining 50 foizidan kam bo‘lmagan miqdorda hisoblash tartibi saqlanib qoladi.

2¹. O‘zbekiston Respublikasi Prezidentining “Aholining ijtimoiy zaif qatlami bandligini ta’minlashni rag‘batlantirishning tashkiliy chora-tadbirlari to‘g‘risida” 2018-yil 11-iyundagi PQ-3782-son qaroriga muvofiq, shunday tartib o‘rnatiladiki, unga ko‘ra shtatdagi xodimlarining 50 foizi nogironligi bo‘lgan shaxslardan tashkil topgan nogironligi bo‘lgan shaxslarning jamoat birlashmalari korxonalari jami xodimlarining mehnatiga haq to‘lash fondi uchun yagona ijtimoiy to‘lov stavkasi 4,7 foiz miqdorida belgilanadi va yagona ijtimoiy to‘lov summasi belgilangan tartibda taqsimlanadi.

3. O‘zbekiston Respublikasi Moliya vazirligi manfaatdor vazirliklar va idoralar bilan birgalikda idoraviy normativ-huquqiy hujjatlarga ushbu qarordan kelib chiquvchi o‘zgartirishlar kiritsin.

4. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.