O‘zbekiston Respublikasi Hukumati bilan Ozarbayjon Respublikasi Hukumati, keyingi o‘rinlarda “Tomonlar” deb ataladi,

har ikkala davlat xalqlari o‘rtasidagi umumiy tarixiy ildizlarni va an’anaviy do‘stlik munosabatlarni e’tiborga olib,

O‘zbekiston Respublikasi bilan Ozarbayjon Respublikasi o‘rtasida madaniyat sohasidagi hamkorlikni yanada rivojlantirish va mustahkamlashga intilib,

bunday hamkorlik har ikkala davlat xalqlarining tub manfaatlariga javob berishiga, davlatlararo aloqalarni kengaytirishi va mustahkamlashiga, umuminsoniy qadriyatlar qaror topishiga, ikki mamlakat madaniyatlari boyishiga ko‘maklashishiga ishonch hosil qilib,

quyidagilar to‘g‘risida ahdlashdilar:

Tomonlar an’anaviy madaniy aloqalarni saqlash va rivojlantirish, teatr, musiqa, tasviriy san’at, estrada va sirk san’ati, kino, televideniye va radioeshittirish, kutubxona va muzey ishi, tarixiy va madaniy yodgorliklarni muhofaza qilish, ta’mirlash va ulardan foydalanish, xalq badiiy havaskorligi, xalq hunarmandligi va madaniy faoliyatning boshqa turlari sohalarida almashish va hamkorlik qilish uchun qulay sharoitlar yaratilishiga yordam beradilar.

Tomonlar har ikkala davlatning tegishli vazirliklari, idoralari o‘rtasida, shuningdek jamoat tashkilotlari, ijodiy birlashmalar, uyushmalar, jamg‘armalar yo‘nalishidagi hamkorlikni va to‘g‘ridan to‘g‘ri aloqalarni rag‘batlantiradilar.

Tomonlar boshqa davlatning fuqarolariga o‘z mamlakatlari xalqlarining madaniy boyliklariga, jumladan tarixan shakllangan butunligini o‘zlari tasdiqlaydigan madaniy qadriyatlar kolleksiyalari bilan keng tanishish imkoniyatini ta’minlaydilar.

Tomonlar o‘zaro foydali ikki tomonlama madaniy hamkorlik rivojlanishiga ko‘maklashadilar.

Mana shu maqsadlarda ular mamlakatlarning har biridagi madaniy hayot to‘g‘risidagi axborot ayirboshlanishini rag‘batlantiradilar, festivallar, gastrollarni o‘tkazishga boshqa mamlakat mualliflarining musiqali va teatr asarlari sahnalashtirilishiga, delegatsiyalar ayirboshlanishiga, ijodiy uchrashuvlar o‘tkazilishiga, badiiy ko‘rgazmalar ayirboshlanishiga ko‘maklashadilar.

Tomonlar har ikkala davlat madaniy boyliklarini, shu jumladan tarixiy, madaniy va diniy yodgorliklarini saqlash sohasida hamkorlik qiladilar.

U yoki bu madaniy va tarixiy boyliklarga egalik qilish huquqi masalasida nizolar paydo bo‘lgan taqdirda, Tomonlar ularni o‘z davlatlarining amaldagi qonunchiligi asosida muzokaralar yo‘li bilan hal etish majburiyatini o‘z zimmalariga oladilar.

Tomonlar madaniyatning moddiy-texnika bazasini rivojlantirish va mustahkamlash, yangi texnologiyalarni ayirboshlash, madaniyat va san’at muassasalari uchun asbob-uskunalar va texnik vositalarni o‘zaro foydali asosda yetkazib berish tashkil etilishi masalalaridagi hamkorlikni qo‘llab-quvvatlaydilar.

Tomonlar madaniyat va san’at sohasida xalqaro tashkilotlar yo‘nalishida o‘z faoliyatlarini muvofiqlashtiradilar.

Tomonlar kinofestivallar o‘tkazilishiga, kinofilmlar, delegatsiya va mutaxassislar ayirboshlanishiga, birgalikda sahna asarlari qo‘yilishiga, kino arxivlari o‘rtasidagi hamkorlikka, kinematografiya sohasida adabiyot va materiallar ayirboshlanishiga ko‘maklashadilar.

Tomonlar televideniye va radioeshittirish sohasida hamkorlik qiladilar.

Tomonlar kitob nashr etish ishi sohasidagi ayirboshlashni rag‘batlantiradilar, kutubxonalararo aloqalarni, yozuvchilar, jurnalistlar va noshirlar delegatsiyalari ayirboshlanishini, siyosiy, iqtisodiy, madaniy va ilmiy hayot to‘g‘risidagi materiallar e’lon qilinishini, gazeta va jurnallar nashr qilinishini har tomonlama qo‘llab-quvvatlaydilar.

Tomonlar O‘zbekiston Respublikasi bilan Ozarbayjon Respublikasi o‘rtasida mualliflik huquqini himoya qilish sohasidagi hamkorlikni rivojlantirishga ko‘maklashadilar.

Tomonlar jismoniy tarbiya va sport sohasidagi aloqalar, eng avvalo sport tashkilotlari, jamiyatlari va klublari o‘rtasidagi bevosita hamkorlikni rivojlantirishga, musobaqalar o‘tkazilishiga, sportchilar va trenyerlarni, ilmiy-metodiy axborotni va xalqaro musobaqalarda qatnashish tajribasini ayirboshlash yo‘li bilan ko‘maklashadilar.

Mazkur Bitimni bajarish maqsadida almashishlar davlat dasturlari va tegishli vazirliklar, idoralar va tashkilotlar o‘rtasidagi hamkorlikning ishchi rejalari (protokollari) ishlab chiqiladi va imzolanadi.

Mazkur Bitimda nazarda tutilgan sohalardagi hamkorlikning aniq shakllari va shartlari tegishli vazirliklar, idoralar va tashkilotlar o‘rtasidagi alohida Bitimlar bilan tartibga solinadi.

Tomonlar zarurat bo‘lganda mazkur Bitimni amalga oshirish, Tomonlarning o‘zaro hamkorligi bo‘yicha tavsiyalar tayyorlash uchun Aralash Komissiya tashkil etishlari mumkin.

Mazkur Bitim imzolangan kundan boshlab kuchga kiradi, besh yil davomida amal qiladi va, agar Tomonlardan biri tegishli muddat tamom bo‘lguniga qadar uning amal qilishini to‘xtatish haqidagi o‘z niyati haqida kamida olti oy oldin ikkinchi Tomonni yozma ravishda xabardor qilmasa, keyingi besh yillik davrlarga o‘z-o‘zidan uzaytiriladi.

1996-yil 27-mayda Baku shahrida har biri o‘zbek, ozarbayjon va rus tillarida bo‘lgan ikki nusxada tuzildi, barcha matnlar bir xil kuchga egadir.

Mazkur Bitimning qoidalarini talqin qilish maqsadida rus tilidagi matndan foydalaniladi.