O‘zbekiston Respublikasi Hukumati va Pokiston Islom Respublikasi Hukumati, quyida “Ahdlashuvchi Tomonlar” deb ataluvchilar,

1992-yil 27-iyunda O‘zbekiston Respublikasi Hukumati va Pokiston Islom Respublikasi Hukumati o‘rtasida imzolangan madaniyat, sog‘liqni saqlash, fan, texnika, kadrlar tayyorlash, turizm, sport va ommaviy axborot sohasida hamkorlik to‘g‘risidagi Bitimni e’tiborga olgan holda,

o‘zaro tenglik va manfaatdorlik asosida har ikki mamlakat o‘rtasida turizm sohasini rivojlantirishga intilib,

ushbu sohada ikki yoqlama asosda hamkorlikni istagan holda,

quyidagilar xususida ahdlashib oldilar:

Ahdlashuvchi Tomonlar sayyohlarning har ikki mamlakatga tashriflarini rag‘batlantirish uchun tegishli qulay sharoitlarni kengaytirish yo‘li bilan turizmni ikki yoqlama asosda rivojlantiradilar.

Ahdlashuvchi Tomonlar har ikki mamlakatda turizm faoliyatini amalga oshirayotgan firmalar va tashkilotlar o‘rtasida yaqin hamkorlik aloqalarini rivojlantirish yo‘li bilan o‘zaro sayyohlar oqimini ko‘paytirishga ko‘maklashadilar. Ular umumiy va ikki yoqlama asoslarda turizmga oid nashrlarni va reklama materiallarini, shu jumladan, kino va televideniyedan foydalanib, ayniqsa, filmlar va audio-vizual materiallarni tarqatishni rag‘batlantiradilar.

Ahdlashuvchi Tomonlar o‘zlarining elchixonalari orqali turizm sohasiga doir ma’lumotlarni tarqatish maqsadida o‘zaro tegishli sharoitlarni ta’minlaydilar va buning uchun ma’lumotlar, ko‘rgazmalar hamda mutaxassislarning delegatsiyalari bilan o‘zaro ayirboshlashga ko‘maklashadilar.

Turizmni rivojlantirishni ko‘zda tutadigan turistik ko‘rgazmalar va filmlarni o‘z ichiga olgan reklama materiallari Ahdlashuvchi Tomonlardan biri imzolagan turistik reklama hujjatlar va materiallarni olib kirishga doir turizm bo‘yicha bojxona imtiyozlari to‘g‘risidagi Konvensiyaning qo‘shimcha Protokoliga muvofiq bojxona soliqlari va importga solinadigan boshqa soliqlardan ozod qilinadi.

Ahdlashuvchi Tomonlar har ikki mamlakatda turizmni rivojlantirishning asosiy omili hisoblanadigan mehmonxonalar va boshqa turizm muassasalarini qurish, ta’sis etish hamda ulardan foydalanish sohasida hamkorlik qilish imkoniyatlarini o‘rganadilar. Har ikkala mamlakatning hukumatlari o‘zlarining tegishli moliyaviy qonunlari doirasida qulay sharoitlarni yaratib berish bilan shu sohadagi o‘zaro hamkorlikni rag‘batlantiradi.

Ahdlashuvchi Tomonlar turizm sohasida sarmoya qo‘yish bo‘yicha o‘zaro hamkorlik qilishning imkoniyatlarini o‘rganadilar va bu maqsadda mutaxassislar bilan ayirboshlashni amalga oshiradilar hamda qo‘yilishi mumkin bo‘lgan sarmoyalarni rag‘batlantiruvchi materiallarni reklama bilan ta’minlaydilar, shuningdek ikkala mamlakatdagi mavjud turizm imkoniyatlarini reklama qiladilar.

Ahdlashuvchi Tomonlar qo‘shma korxonalar tuzish va turizm sohasida boshqa sarmoya qo‘yish loyihalarini amalga oshirishda va vakolatli mahkamalarga manfaatdor tashkilotlarga ko‘maklashadilar.

Ahdlashuvchi Tomonlar xalqaro turizm sohasida o‘zaro hamkorlik qilish, jumladan, xalqaro turistik tashkilotlar ishida qatnashish xususida fikr almashib turadilar.

Ahdlashuvchi Tomonlar vakolatli mahkamalar va manfaatdor tashkilotlarni jalb etib, turizm sohasini o‘qitish va o‘rgatish, ayniqsa turizm sanoatida band bo‘lgan kadrlarni tayyorlash borasida texnikaviy hamkorlikni kengaytirishning imkoniyatlarini ko‘rib chiqadilar.

Ushbu Bitimni amalga oshirishda O‘zbekiston Respublikasi nomidan “O‘zbekturizm” milliy kompaniyasi, Pokiston Islom Respublikasi nomidan Madaniyat, sport va turizm vazirligi mas’uldirlar.

Ushbu Bitimning maqsadlarini tegishlicha amalga oshirish uchun ikkala Tomonning vakillaridan iborat bo‘lgan qo‘shma ishchi guruhi tashkil etiladi.

Turizm sohasida almashuv va hamkorlikni rag‘batlantirish bo‘yicha foydali tavsiyanomalarni ishlab chiqish uchun qo‘shma ishchi guruhining yig‘ilishlari bir yilda kamida bir marotaba har bir mamlakatda navbatma-navbat o‘tkazib turiladi.

Ushbu Bitim besh yil muddatda amalda bo‘ladi va imzolangan kundan e’tiboran kuchga kiradi. Tomonlardan biri ikkinchi Tomonni Bitim muddati tugashiga kamida 6 oy qolgunicha uni bekor qilishi to‘g‘risidagi niyati haqida yozma ravishda xabardor qilmasa, Bitim o‘z-o‘zidan navbatdagi besh yillik muddatga uzaytirilaveradi.

Ushbu Bitim Toshkent shahrida 1995-yil 22-mayda o‘zbek va ingliz tillarida, har biri ikki asl nusxada tuzildi, bunda barcha matnlar mazmuni jihatidan bir xil va teng kuchga ega.