O‘zbekiston Respublikasi Fuqarolik kodeksining 46-moddasiga, “Firma nomlari to‘g‘risida”gi O‘zbekiston Respublikasi Qonuniga muvofiq, shuningdek yuridik shaxslarning nomlarini tartibga solish maqsadida Vazirlar Mahkamasi qaror qiladi:
1. Belgilansinki, “O‘zbekiston Respublikasi” va “O‘zbekiston” rasmiy nomlaridan, shuningdek ulardan hosila so‘zlardan quyidagilar o‘z nomlari va ramzlarida foydalanish huquqiga ega:
O‘zbekiston Respublikasi qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidenti va O‘zbekiston Respublikasi Vazirlar Mahkamasining qarorlariga muvofiq tashkil etiladigan yoki faoliyatini tashkil etish amalga oshiriladigan yuridik shaxslar, agar ularning nomlari tegishli hujjatlarda to‘g‘ridan to‘g‘ri nazarga tutilgan bo‘lsa;
Oldingi tahrirga qarang.
O‘zbekiston Respublikasi Vazirlar Mahkamasi qaroriga ko‘ra tashkil etiladigan davlat unitar korxonalari hamda davlat organlari va respublika ahamiyatiga molik tashkilotlar tomonidan tashkil etiladigan davlat muassasalari.
(1-bandning uchinchi xatboshisi O‘zbekiston Respublikasi Vazirlar Mahkamasining 2017-yil 13-noyabrdagi 907-sonli qarori tahririda — Qonun hujjatlari ma’lumotlari milliy bazasi, 14.11.2017-y., 09/17/907/0245-son)
respublika nodavlat notijorat tashkilotlari, shuningdek nomlarida bosh tashkilotning to‘liq nomi ko‘rsatiladigan ularning alohida bo‘linmalari;
davlat va xo‘jalik boshqaruvi organlari, mahalliy davlat hokimiyati organlarining O‘zbekiston Respublikasi Adliya vazirligiga taqdim etilgan murojaatlari asosida xorijiy investitsiyalar ishtirokidagi korxonalar.
2. O‘zbekiston Respublikasi Adliya vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, tumanlar (shaharlar) hokimliklari:
O‘zbekiston Respublikasi Davlat statistika qo‘mitasi bilan birgalikda 2018-yil 1-yanvargacha bo‘lgan muddatda qonun hujjatlarida belgilangan tartibda yagona davlat reyestriga kiritilgan yuridik shaxslarning nomlarini ushbu qarorga muvofiqlashtirish chora-tadbirlarini ko‘rsinlar;
yuridik shaxslarni va nodavlat notijorat tashkilotlarining ramzlarini ro‘yxatga olishda ushbu qaror talablariga qat’iy amal qilsinlar.
3. Ro‘yxatga oluvchi organlar rahbarlariga ushbu qaror talablariga so‘zsiz rioya qilinishi uchun shaxsiy javobgarlik yuklansin.
4. O‘zbekiston Respublikasi Adliya vazirligi manfaatdor vazirliklar va idoralar bilan birgalikda ikki oy muddatda Yuridik shaxslarning nomiga davlatning rasmiy nomini, shuningdek undan hosila so‘zlarni qo‘shish tartibi to‘g‘risidagi yo‘riqnomani ishlab chiqsin va belgilangan tartibda tasdiqlasin.
5. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.