Vazirlar Mahkamasi qayd etadiki, “O‘zbek ipagi” uyushmasi rahbarlari tomonidan sohani boshqarishning zamonaviy bozor shart-sharoitlariga javob beradigan samarali tizimi ta’minlanmagan.

Sohaning iqtisodiy nochor korxonalarini isloh qilish juda qoniqarsiz amalga oshirilmoqda. Davlat tasarrufidan chiqarish va xususiylashtirish, shuningdek ishlab chiqarishlarni zamonaviylashtirish va texnika bilan qayta jihozlash uchun chet el investitsiyalarini jalb qilish bo‘yicha amaliy chora-tadbirlar ko‘rilmayapti. Soha mahsulotlariga jahon bozorining tendensiyalarini marketing tadqiq etishning amaliy tizimi tashkil etilmagan. Ko‘pchilik korxonalarda kreditorlik qarzlar darajasi yuqoriligicha qolmoqda, natijada qoniqarsiz moliyaviy ahvol vujudga kelgan.

“O‘zbek ipagi” uyushmasining qishloq aholisi — pilla yetishtiruvchilar oldida qarzdor ekanligi jiddiy, toqat qilib bo‘lmaydigan muammo bo‘lib qolmoqda.

Pillachilik sohasini barqaror rivojlantirish uchun qo‘shimcha shart-sharoitlar yaratish, tarmoq korxonalarining moliyaviy faoliyatini barqarorlashtirish va mustahkamlash maqsadida Vazirlar Mahkamasi qaror qiladi:

1. “O‘zbek ipagi” uyushmasi rahbarlarining pillachilik sohasini isloh qilish va rivojlantirish, korxonalarni zamonaviylashtirish va texnika bilan qayta jihozlash, sohaga chet el investitsiyalarini jalb qilish bo‘yicha ishi qoniqarsiz deb hisoblansin.

2. O‘zbekiston Respublikasi Moliya vazirligi, Iqtisodiyot vazirligi “O‘zbek ipagi” uyushmasi va tijorat banklari – kreditorlar bilan birgalikda ikki hafta muddatda 2003-yil hosilidan yetkazib berilgan pilla uchun qishloq xo‘jaligi korxonalari oldidagi qarzlar 2003-yil 1-dekabrgacha qaytarilishini ta’minlaydigan uyushma korxonalarini moliyaviy sog‘lomlashtirish tadbirlarini va jadvalini aniq ishlab chiqsinlar va tasdiqlasinlar.

3. “O‘zbekyengilsanoat” davlat-aksiyadorlik kompaniyasi korxonalarini aylanma mablag‘lar bilan to‘ldirish va ularning qishloq xo‘jaligi korxonalari oldidagi qarzlarini o‘z vaqtida qaytarish uchun:

istisno tariqasida, “O‘zbekipaksanoat” uyushmasi tarkibiga kiruvchi tashkilotlarga ipak ipining bo‘sh qoldiqlarini, shuningdek ishlab chiqarilayotgan quruq pillaning 50 foizgachasini, shu jumladan, ipak chiqindilari (titishga yaroqsiz pilla, ipak ipi chiqitlari va titilgan xom ashyo)ni jahon darajasiga muvofiq bo‘lgan narxlarda eksportga, shu jumladan, tovar-xom ashyo birjalari orqali erkin almashtiriladigan valyutaga va milliy valyutaga sotishga ruxsat berilsin;

“O‘zbek ipagi” uyushmasining uyushma korxonalari tomonidan 2 yil muomalada bo‘ladigan 680 mln. so‘mlik korporativ obligatsiyalar chiqarilishi to‘g‘risidagi taklifi qabul qilinsin.

4. Belgilansinki, 2004-yil hosilidan boshlab:

pilla yetishtiruvchilar bilan “O‘zbekipaksanoat” uyushmasi korxonalari o‘rtasidagi pilla tayyorlash uchun kontraktatsiya shartnomalari har yili 1-fevralgacha tuziladi va unda pilla yetishtiruvchilar bilan o‘z vaqtida hisob-kitob qilinmaganligi uchun qonunchilikka muvofiq jarima jazolari qo‘llanilishi nazarda tutiladi;

pilla yetishtiruvchi xo‘jaliklarga 1-apreldan kechikmay avans beriladi;

tayyorlanayotgan pilla uchun avans berish ular umumiy qiymatining kamida 30 foizi miqdorida, shu jumladan fyuchers asosida ipak ipni sotishdan olinadigan mablag‘lar hisobiga amalga oshiriladi;

“O‘zbekipaksanoat” uyushmasi korxonalarining pilla yetishtiruvchilar bilan pilla uchun uzil-kesil hisob-kitobi har yili 1-noyabrdan kechikmay amalga oshiriladi.

5. “O‘zbekyengilsanoat” davlat-aksiyadorlik kompaniyasi” korxonalariga 2004—2006-yillar davrida pilla yetishtirish uchun yetishmayotgan importdan keltiriladigan ipak qurti urug‘ini “bojxona hududida qayta ishlash” bojxona rejimidan foydalangan holda belgilangan tartibda olib kelishga ruxsat berilsin.

8. O‘zbekiston Respublikasi Davlat mulki qo‘mitasi:

Vazirlar Mahkamasining 2002-yil 8-oktabrdagi 347-son va 2003-yil 17-apreldagi 185-son qarorlari talablariga muvofiq uyushma korxonalarining ustav fondidagi davlat ulushi va joylashtirilmagan aktivlar jadal sotilishini hamda sohada xususiy korxonalar har tomonlama rivojlantirilishini ta’minlasin;

soha korxonalarini rekonstruksiya qilish va qayta jihozlashdan keyin bo‘shab qoladigan ma’naviy eskirgan asbob-uskunalar belgilangan tartibda sotilishini tashkil etsin.

9. Vazirlar Mahkamasining Iste’mol tovarlari ishlab chiqarish va savdo kompleksi, Qoraqalpog‘iston Respublikasi Vazirlar Kengashi, viloyatlar hokimliklari mavjud tutzorlar saqlab qolinishini, yangi tut daraxtlari ekilishini ta’minlasinlar hamda O‘zbekiston Respublikasi Vazirlar Mahkamasining “O‘zbekiston Respublikasi pillachilik sohasini yanada rivojlantirish chora-tadbirlari to‘g‘risida” 2002-yil 5-apreldagi 118-son qarori talablarini so‘zsiz bajarish chora-tadbirlarini ko‘rsinlar.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari M. Z. Usmonov va R. S. Azimov zimmasiga yuklansin.

Qarorning bajarilishining borishi to‘g‘risida 2004-yil yanvar oyida Vazirlar Mahkamasiga axborot berilsin.