Vazirlar Mahkamasi qayd etadiki, iqtisodiyotning bir qator tarmoqlarida elektr va issiqlik energiyasi uchun hisob-kitob qilish boʻyicha nomaqbul holat saqlanib qolmoqda. Energiya uchun toʻlov boʻyicha qarzlarning koʻpayishi, hisobga olish priborlari koʻrsatkichlarini notoʻgʻri aks ettirish, elektr va issiqlik energiyasi berish tarmoqlariga ruxsatsiz ulanish hollariga yoʻl qoʻyilmoqda. “Oʻzbekenergo” davlat-aksiyadorlik kompaniyasi rahbariyati tomonidan mazkur kamchiliklarni bartaraf etish, toʻlov muddati oʻtgan qarzlari boʻlgan isteʼmolchilarga energiya berilishiga yoʻl qoʻymaslik boʻyicha mufassal chora-tadbirlar koʻrilmayapti.

Oʻzaro hisob-kitob qilishda toʻlov intizomini kuchaytirish, yetkazib berilayotgan elektr energiyasi uchun isteʼmolchilarning barcha toifalari tomonidan haqning soʻzsiz toʻlanishini taʼminlash, energetika kompleksi korxonalarini zamonaviylashtirish va texnika bilan qayta jihozlash uchun shart-sharoitlar yaratish maqsadida Vazirlar Mahkamasi qaror qiladi:

1. “Oʻzbekenergo” davlat-aksiyadorlik kompaniyasi rahbariyatiga elektr energiyasini uzatish vaqtida uning isrof boʻlish darajasini kamaytirish boʻyicha amalga oshirilayotgan ishlarining yetarli emasligi, yetkazib berilayotgan elektr va issiqlik energiyasi uchun isteʼmolchilar tomonidan oʻz vaqtida va toʻliq hisob-kitob qilinishi, ularni hisobga olish priborlaridan toʻgʻri foydalanilishini taʼminlash yuzasidan talabchanlikning susaytirib yuborilganligi va zarur nazoratning yoʻqligi koʻrsatib oʻtilsin.

2. “Oʻzdavenergonazorat” davlat inspeksiyasi Oʻzbekiston Respublikasi Bosh prokuraturasi bilan birgalikda:

elektr va issiqlik energiyasi oʻgʻirlanishi, hisobga olish priborlari koʻrsatkichlarining notoʻgʻri aks ettirilishi, elektr va issiqlik energiyasi uzatish tarmoqlariga ruxsatsiz ulanish, shu jumladan “Oʻzbekenergo” davlat-aksiyadorlik kompaniyasi korxonalari xodimlari tomonidan ulab berish;

isteʼmolchilarda oʻrnatilgan elektr va issiqlik energiyasini hisobga olish priborlari holatini tekshirishga va koʻrsatkichlarini yozib olishga toʻsqinlik qilish hollari aniqlangan taqdirda aybdor shaxslarni qonun hujjatlarida nazarda tutilgan jinoiy javobgarlikkacha boʻlgan darajadagi javobgarlikka tortsin.

3. Belgilab qoʻyilsinki:

aholidan tashqari, barcha toifalardagi isteʼmolchilar uchun energiya (quvvat) yetkazib berish “Oʻzbekenergo” davlat-aksiyadorlik kompaniyasi korxonalari tomonidan belgilangan muddatlarda va shartnoma shartlarida nazarda tutilgan hajmlarda yetkazib beriladigan elektr va issiqlik energiyasi uchun majburiy ravishda oldindan haq (avans toʻlovi) toʻlagan holda hamda oʻz vaqtida yakuniy hisob-kitob qilgan holda amalga oshiriladi;

isteʼmolchining hisob-kitob qilinadigan davri boshlangungacha haqni oldindan toʻlamagan yoki yakuniy hisob-kitobni oʻz vaqtida amalga oshirmagan energiya isteʼmolchilariga energiya berish toʻxtatiladi;

qarzi boʻlgan elektr va issiqlik energiyasi isteʼmolchilarini uzib qoʻyish hamda ularni qaytadan ulash boʻyicha xarajatlar isteʼmolchilarning oʻz hisobidan qoplanadi;

4. Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi bir oy muddatda:

isteʼmolchilarning moliyaviy ahvolini hisobga olgan holda, elektr va issiqlik energiyasi uchun 2003-yil 1-sentabrgacha vujudga kelgan qarzlarni;

“Oʻzbekenergo” davlat-aksiyadorlik kompaniyasi korxonalarining budjetga va davlat maqsadli jamgʻarmalariga toʻlovlar boʻyicha, yoqilgʻi va temir yoʻl tashuvlari uchun qarzlarini toʻlash jadvallarini tasdiqlasin va ularning bajarilishini qattiq nazoratga olsin.

5. “Oʻzbekenergo” davlat-aksiyadorlik kompaniyasining elektr tarmoqlarida elektr energiyasi berishda energiya sarfi koʻrsatkichlarini buzib koʻrsatishdan himoya qilish va texnologik sarf hajmlarini aniqlash uchun isteʼmolchilarda (maishiy isteʼmolchilardan tashqari) oʻrnatilgan elektr va issiqlik energiyasini hisobga olish priborlaridan koʻrsatkichlarni har oyda yozib olish, elektr va issiqlik energiyasidan foydalanish qoidalarini buzuvchilarga nisbatan tegishli javobgarlik choralarini koʻrish taʼminlansin.

6. “Oʻzdavenergonazorat” davlat inspeksiyasi va “Oʻzbekenergo” davlat-aksiyadorlik kompaniyasi:

manfaatdor vazirliklar va idoralar bilan birgalikda ikki oy muddatda elektr energiyasini uzatishda uning magistral va taqsimlash tarmoqlarida isrof boʻlishining yoʻl qoʻyiladigan cheklangan normativlarini tasdiqlasinlar;

quvvati 10 kilovattgacha boʻlgan elektr qurilmalarini elektr tarmoqlariga ulashda xoʻjalik yurituvchi subyektlarga soddalashtirilgan talablar toʻgʻrisidagi nizomni bir oy muddatda ishlab chiqsinlar va belgilangan tartibda tasdiqlasinlar.

7. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

8. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda:

amaldagi qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin;

idoraviy normativ hujjatlarning ushbu qarorga muvofiqlashtirilishini taʼminlasin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N. Toʻlaganov zimmasiga yuklansin.

2. Quyidagilar:

Oʻzbekiston Respublikasi Vazirlar Mahkamasining “Suv taqchilligi munosabati bilan Qoraqalpogʻiston Respublikasiga va Xorazm viloyatiga yordam koʻrsatish chora-tadbirlari toʻgʻrisida” 2000-yil 20-iyuldagi 279-son qarorining 8-bandi;

Oʻzbekiston Respublikasi Vazirlar Mahkamasining “Foydalanilayotgan elektr energiyasi uchun oʻzaro hisob-kitoblar tizimini tartibga solish chora-tadbirlari toʻgʻrisida” 2000-yil 5-dekabrdagi 469-son qaroriga (Oʻzbekiston Respublikasi QT, 2000-y., 12-son, 74-modda) 1-ilovaning 7-bandi va 8-bandining uchinchi xatboshi;

Oʻzbekiston Respublikasi Vazirlar Mahkamasining “2001-yilda respublika qishloq xoʻjaligini mineral oʻgʻitlar bilan taʼminlash chora-tadbirlari toʻgʻrisida” 2001-yil 15-fevraldagi 79-son qarorining 4-bandi oʻz kuchini yoʻqotgan deb hisoblansin.