O‘zbekiston Respublikasi Hukumati bilan Gruziya Hukumati, bundan keyin Tomonlar deb ataladilar,

ishlab chiqarish, investitsiya, tijorat va moliya-kredit faoliyati sohasida o‘zaro aloqalarning zamonaviy shakllaridan foydalanishga muhim ahamiyat berib,

ikkala davlat manfaatlari yo‘lida iqtisodiy hamkorlikni yanada chuqurlashtirish va rivojlantirish zarurligidan kelib chiqib,

sanoat ishlab chiqarishini barqarorlashtirish va yuksaltirish uchun zarur sharoitlarni yaratish, investitsiya sohasidagi faollikni oshirish hamda ilmiy-texnika taraqqiyoti yutuqlaridan samaraliroq foydalanish maqsadida,

ikkala davlat korxonalari va tashkilotlari o‘rtasidagi xo‘jalik, ilmiy-texnik hamda ishlab chiqarish-texnologik aloqalarni saqlash va ularni yangi asoslarda amalga oshirish maqsadida,

quyidagilar to‘g‘risida kelishdilar:

Tomonlar O‘zbekiston Respublikasi va Gruziya xo‘jalik subyektlari bazasida moliya-sanoat guruhlarini tashkil etishda yordam beradilar.

Tomonlar moliya-sanoat guruhi deganda ishlab chiqarish faoliyatini birgalikda yuritish, ilmiy-texnologik va kooperatsiya aloqalarini qaror toptirish va rivojlantirish, foyda olish, ijtimoiy va iqtisodiy dasturlar hamda loyihalarni ishlab chiqish va amalga oshirish maqsadida ishtirokchilarning sarmoyalarini birlashtirish asosida tashkil etilgan korxonalar, muassasalar, tashkilotlar, kredit-moliya muassasalari va investitsiya muassasalari guruhini tushunadilar.

Tomonlar moliya-sanoat guruhlari xo‘jalik subyektlari tomonidan muassislarning o‘zaro kelishuvi bo‘yicha ixtiyoriylik tartibida ikkala davlatdagi monopoliyaga qarshi qonunchilik talablariga muvofiq, shuningdek hukumatlararo bitimlar asosida tashkil etilishiga rozilik bildirdilar.

Tomonlar moliya-sanoat guruhlarini ixtiyoriy tartibda shakllantirish quyidagi yo‘llar bilan amalga oshirilishini belgilaydilar:

guruhlar qatnashchilari tomonidan aksionerlik jamiyatining ta’sis etilishi;

guruhlar qatnashchilari tomonidan guruh tarkibiga kiruvchi korxonalar va moliya-kredit muassasalarining o‘zlariga tegishli bo‘lgan aksiyalar paketlarini guruh qatnashchilaridan biri bo‘lgan bosh korxonaga boshqarish uchun berilishi;

guruh qatnashchilaridan biri tomonidan boshqa korxonalar, shuningdek guruh qatnashchisi bo‘layotgan muassasa va tashkilotlar aksiyalar paketlarining sotib olinishi.

Tomonlar moliya-sanoat guruhlarini ixtiyoriy tartibda tashkil etishda amaldagi milliy qonunchilikda belgilangan cheklashlarga rioya qiladilar.

Tomonlar hukumatlararo bitimlar asosida moliya-sanoat guruhlarini tashkil etishda hududida guruhlar ro‘yxatga olinadigan davlatning vakolatli tashkilotlari shu guruhni tashkil etish loyihasini ekspertizadan o‘tkazishni milliy qonunchilikda belgilangan tartib va muddatlarda amalga oshirishidan kelib chiqadilar.

Tomonlar moliya-sanoat guruhini tashkil etish loyihasini tayyorlash va uni ekspertizadan o‘tkazish maqsadida guruh qatnashchilari — xo‘jalik subyektlari to‘g‘risidagi zarur axborotni olishda ko‘maklashadilar.

Moliya-sanoat guruhini hukumatlararo bitim asosida tashkil etishda o‘zbekistonlik va gruziyalik qatnashchilar tarkibi, qatnashish shakllari, sarmoyalarni birlashtirish mexanizmlarini Tomonlardan har biri o‘z milliy qonunchiligiga muvofiq belgilaydi.

Tomonlar moliya-sanoat guruhlarini ro‘yxatdan o‘tkazish ta’sis hujjatlariga muvofiq hududida guruhning bosh korxonasi joylashadigan davlat vakolatli organlari tomonidan shu davlat qonunchiligida belgilangan tartibda amalga oshirilishiga kelishib oldilar.

Tomonlar moliya-sanoat guruhlarini tashkil etish va ular faoliyatini rag‘batlantirish maqsadida milliy qonunchilikka muvofiq davlat kafolatlari va imtiyozlar berishlari mumkin.

Tomonlar moliya-sanoat guruhlarini tashkil etishning ustuvor yo‘nalishlari paxtani qayta ishlash va kimyo sanoati, mashina va samolyotsozlik, energetika, transport va aloqa, tabiatdan foydalanish va atrof muhitni muhofaza qilish sohasida hamkorlik qilishda deb hisoblaydilar.

Tomonlar tegishli organlarga tomonlardan har birining davlati hududida moliya-sanoat guruhlarini tashkil etish masalalariga oid qabul qilinayotgan normativ hujjatlar to‘g‘risida muntazam axborot almashishni amalga oshirishni topshiradilar.

Tomonlarning o‘zaro roziliklariga ko‘ra mazkur Bitimga o‘zgartirishlar va qo‘shimchalar kiritilishi mumkin.

Mazkur Bitim Tomonlar u kuchga kirishi uchun zarur bo‘lgan ichki davlat tartib-qoidalarini bajarganliklari to‘g‘risida bir-birlarini xabardor qilgan kundan boshlab kuchga kiradi va Tomonlardan biri uning amalda bo‘lishini to‘xtatish to‘g‘risidagi niyati haqida boshqa Tomonga yozma shaklda ma’lum qilgan kundan boshlab olti oy o‘tgunga qadar amalda bo‘ladi.

Mazkur Bitim shartlariga muvofiq imzolangan kontraktlar, shartnomalar va boshqa bitimlar bo‘yicha majburiyatlar uning amal qilishi to‘xtagandan keyin ham ular to‘liq bajarilgunga qadar o‘z kuchini saqlab qoladi.

1996-yil 28-mayda, Tbilisi shahrida, o‘zbek, gruzin va rus tillarida bo‘lgan ikki nusxada tuzildi. Barcha matnlar bir xil kuchga ega.

Mazkur Bitim qoidalarini talqin qilishda rus tilidagi matndan foydalaniladi.