Oʻzbekiston Respublikasi Prezidentining “Oʻzbekiston Respublikasi Makroiqtisodiyot va statistika vazirligini qayta tashkil etish toʻgʻrisida” 2002-yil 24-dekabrdagi PF-3183-son Farmonini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Iqtisodiyot vazirligi hamda uning markaziy apparati tuzilmasi 1 va 1a-ilovalarga muvofiq tasdiqlansin.

2. Oʻzbekiston Respublikasi Iqtisodiyot vazirligi markaziy apparati shtatdagi xodimlarining cheklangan soni 146 nafar (xizmat koʻrsatuvchi xodimlardan tashqari) etib belgilansin.

Oʻzbekiston Respublikasi Iqtisodiyot vazirligida vazirning bir nafar birinchi oʻrinbosari, vazirning uch nafar oʻrinbosari hamda shaxsiy tarkibi Oʻzbekiston Respublikasi Vazirlar Mahkamasi tomonidan tasdiqlanadigan toʻqqiz kishidan iborat Hayʼat boʻlishiga ruxsat etilsin.

Iqtisodiyot vazirining birinchi oʻrinbosari maqomiga koʻra vazirga, vazir oʻrinbosarlari esa vazirning birinchi oʻrinbosariga tenglashtirilsin.

Oʻzbekiston Respublikasi Iqtisodiyot vaziriga shtatdagi xodimlarning belgilangan soni va mehnatga haq toʻlash fondi doirasida vazirlik markaziy apparatining tasdiqlangan tuzilmasiga oʻzgartirishlar kiritish huquqi berilsin.

3. Quyidagilar:

viloyatlar va Toshkent shahar iqtisodiyot bosh boshqarmalarining namunaviy tuzilmasi 2 va 2a-ilovalarga muvofiq, shahar, tuman iqtisodiyot boʻlimlarining namunaviy tuzilmasi 3-ilovaga muvofiq;

koʻrsatib oʻtilgan hududiy iqtisodiyot organlari xodimlarining cheklangan soni 4-ilovaga muvofiq;

Oʻzbekiston Respublikasi Iqtisodiyot vazirligi toʻgʻrisidagi Nizom 5-ilovaga muvofiq tasdiqlansin.

4. Belgilab qoʻyilsinki:

Qoraqalpogʻiston Respublikasi Iqtisodiyot vaziri Oʻzbekiston Respublikasi Iqtisodiyot vaziri bilan kelishilgan holda Qoraqalpogʻiston Respublikasi Joʻqorgʻi Kengesi tomonidan lavozimga tayinlanadi;

viloyatlar va Toshkent shahar iqtisodiyot bosh boshqarmalari boshliqlari tegishli ravishda viloyatlar va Toshkent shahar hokimlarining taqdimnomasiga koʻra Oʻzbekiston Respublikasi Iqtisodiyot vazirligi tomonidan lavozimga tayinlanadi;

iqtisodiyot bosh boshqarmasi boshligʻi lavozimiga koʻra viloyat, Toshkent shahar hokimlarining oʻrinbosari hisoblanadi;

tuman va shahar iqtisodiyot boʻlimlari boshliqlari tuman va shahar hokimlarining taqdimnomasiga koʻra hamda Oʻzbekiston Respublikasi Iqtisodiyot vaziri bilan kelishilgan holda Qoraqalpogʻiston Respublikasi Iqtisodiyot vaziri, viloyatlar va Toshkent shahar iqtisodiyot bosh boshqarmalari boshliqlari tomonidan lavozimga tayinlanadi.

5. Oʻzbekiston Respublikasi Iqtisodiyot vazirligi bir oy muddatda bosh boshqarmalar, shahar va tuman iqtisodiyot boʻlimlari toʻgʻrisidagi Namunaviy nizomlarni belgilangan tartibda tasdiqlasin.

6. Belgilansinki, Oʻzbekiston Respublikasi Iqtisodiyot vazirligining oʻz vakolatlari doirasida qabul qilingan qarorlarining markaziy iqtisodiy organlar, vazirliklar, idoralar, ijro etuvchi hokimiyat mahalliy organlari va xoʻjalik yurituvchi subyektlar tomonidan bajarilishi majburiy hisoblanadi.

7. Oʻzbekiston Respublikasi Iqtisodiyot vazirligi xodimlarini ragʻbatlantirish va moddiy-texnika bazasini mustahkamlash maqsadida Vazirlikka budjetdan tashqari Rivojlantirish va moddiy ragʻbatlantirish jamgʻarmasi tashkil etish huquqi berilsin.

Oʻzbekiston Respublikasi Iqtisodiyot vaziriga, Qoraqalpogʻiston Respublikasi Iqtisodiyot vaziriga, hududiy Iqtisodiyot bosh boshqarmalari boshliqlariga xodimlarning yuqori malakasi va muayyan xizmat muddati uchun ularga ustama belgilashiga ruxsat berilsin.

Oʻzbekiston Respublikasi Iqtisodiyot vazirligining budjetdan tashqari Rivojlantirish va moddiy ragʻbatlantirish jamgʻarmasi mablagʻlari yuqori malakasi va muayyan xizmat muddati uchun koʻrsatib oʻtilgan ustamalar manbai etib belgilansin.

Oʻzbekiston Respublikasi Iqtisodiyot vazirligi, Monopoliyadan chiqarish va raqobatni rivojlantirish davlat qoʻmitasi, Moliya vazirligi bir oy muddatda Iqtisodiyot vazirligining budjetdan tashqari Rivojlantirish va moddiy ragʻbatlantirish jamgʻarmasi hamda yuqori malaka va muayyan xizmat muddati uchun ustamalar belgilash toʻgʻrisidagi nizomlarni ishlab chiqsinlar va belgilangan tartibda tasdiqlasinlar.

8. Quyidagilar:

Makroiqtisodiyot va statistika vazirligi hamda unga qarashli tashkilotlar egallab turgan xizmat binolari, shuningdek belgilangan texnik xizmat koʻrsatish shart-sharoitlari Oʻzbekiston Respublikasi Iqtisodiyot vazirligi va unga qarashli tashkilotlar ixtiyorida qoldirilsin;

Makroiqtisodiyot va statistika vazirligi xodimlari uchun belgilangan moddiy va tibbiy xizmat koʻrsatish shart-sharoitlari Oʻzbekiston Respublikasi Iqtisodiyot vazirligi xodimlari uchun saqlab qolinsin.

9. Belgilansinki, Oʻzbekiston Respublikasi Iqtisodiyot vazirligi shartnomalar va majburiyatlar boʻyicha Oʻzbekiston Respublikasi Makroiqtisodiyot va statistika vazirligining huquqiy vorisi hisoblanadi.

10. Quyidagilar:

Oʻzbekiston Respublikasi Vazirlar Mahkamasining “Oʻzbekiston Respublikasi Makroiqtisodiyot va statistika vazirligi faoliyatini tashkil etish toʻgʻrisida” 1997-yil 22-maydagi 253-son qarori (Oʻzbekiston Respublikasi QT, 1997-y., 5-son, 18-modda);

Oʻzbekiston Respublikasi Vazirlar Mahkamasining “Oʻzbekiston Respublikasi Makroiqtisodiyot va statistika vazirligi toʻgʻrisidagi Nizomni tasdiqlash haqida” 1997-yil 11-oktabrdagi 474-son qarori (Oʻzbekiston Respublikasi QT, 1997-y., 11-12-son, 37-modda) oʻz kuchini yoʻqotgan deb hisoblansin.

11. Oʻzbekiston Respublikasi Adliya vazirligi Oʻzbekiston Respublikasi Iqtisodiyot vazirligi bilan birgalikda bir oy muddatda amaldagi qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Ushbu Nizom Oʻzbekiston Respublikasi Iqtisodiyot vazirligi (keyingi oʻrinlarda Iqtisodiyot vazirligi deb ataladi)ning maqomi, vazifalari, funksiyalari, vakolatini va faoliyatining tashkiliy asoslarini belgilaydi.

2. Oʻzbekiston Respublikasi Iqtisodiyot vazirligi Oʻzbekiston Respublikasi Prezidentining “Oʻzbekiston Respublikasi Makroiqtisodiyot va statistika vazirligini qayta tashkil etish toʻgʻrisida” 2002-yil 24-dekabrdagi PF-3183-son Farmoniga muvofiq tashkil etilgan.

3. Iqtisodiyot vazirligi quyidagi muhim vazifalarni hal etishga qaratilgan, mamlakatni rivojlantirishning uzoq muddatli strategiyasini va kompleks dasturlarini ishlab chiquvchi va amalga oshiruvchi, chuqur ishlangan va muvozanatli ijtimoiy-iqtisodiy siyosat oʻtkazilishini amalga oshiruvchi davlat boshqaruvi organi hisoblanadi:

makroiqtisodiy barqarorlikni, iqtisodiyotni mutanosib va dinamik rivojlantirishni taʼminlash;

koʻp ukladli va samarali faoliyat koʻrsatuvchi iqtisodiyotni shakllantirish, xususiy mulkchilikning yetakchi rolini taʼminlash, bozor infratuzilmasini rivojlantirish;

boy tabiiy va mineral — xomashyo resurslaridan, yaratilgan ishlab chiqarish va ilmiy-texnik potensialdan samarali va oqilona foydalanishga yoʻnaltirilgan aniq maqsadli tarkibiy siyosatni amalga oshirish, eksport imkoniyatini rivojlantirish va mamlakat iqtisodiyotini jahon iqtisodiy tizimiga keng integratsiyalashni taʼminlash;

yangi ish oʻrinlari yaratish, mehnat resurslarini ish bilan oqilona taʼminlash muammolarini hal etish, aholini aniq tarzda ijtimoiy muhofaza qilishni kuchaytirish, aholi turmush darajasining barqaror, izchil oʻsishini, ijtimoiy infratuzilmaning rivojlanishini taʼminlash;

mamlakat mintaqalari iqtisodiyotining mutanosib va kompleks rivojlanishini, ishlab chiqarish kuchlarining maqbul va samarali rivojlanishini hamda respublika hududlari boʻyicha joylashtirilishini taʼminlash.

Iqtisodiyot vazirligi oʻziga yuklangan vazifalarni mamlakatni ijtimoiy-iqtisodiy rivojlantirishning qisqa va oʻrta muddatli prognozlarini ishlab chiqish va amalga oshirishni taʼminlash hamda Oʻzbekiston Respublikasi Vazirlar Mahkamasining Umumiqtisodiyot kompleksiga kiruvchi vazirliklar va idoralar faoliyatini muvofiqlashtirish yoʻli bilan roʻyobga chiqaradi.

Iqtisodiyot vazirligining Umumiqtisodiyot kompleksi faoliyatidagi muvofiqlashtiruvchi roli Iqtisodiyot vazirligi huzuridagi Qoʻshma hayʼat orqali amalga oshiriladi. Iqtisodiyot vazirligi huzuridagi Qoʻshma hayʼat toʻgʻrisidagi nizom Oʻzbekiston Respublikasi Vazirlar Mahkamasi tomonidan tasdiqlanadi.

4. Iqtisodiyot vazirligi oʻz faoliyatida Oʻzbekiston Respublikasi Vazirlar Mahkamasiga hisob beradi.

5. Iqtisodiyot vazirligi oʻz faoliyatida Oʻzbekiston Respublikasi Konstitutsiyasiga va qonunlariga, Oliy Majlis qarorlariga, Oʻzbekiston Respublikasi Prezidenti farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga hamda boshqa qonun hujjatlariga amal qiladi.

6. Iqtisodiyot vazirligining oʻz vakolatlari doirasida qabul qilgan qarorlari markaziy iqtisodiyot organlari, vazirliklar, idoralar, ijro etuvchi hokimiyat mahalliy organlari va xoʻjalik yurituvchi subyektlar tomonidan bajarilishi majburiydir.

7. Iqtisodiyot vazirligi oʻz vazifalari va funksiyalarini amalga oshirishda davlatning boshqa organlari hamda joylardagi ijro etuvchi hokimiyat organlari bilan oʻzaro hamkorlik qiladi.

8. Iqtisodiyot vazirligi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga, mustaqil balansga, oʻz hisob-kitob raqamlariga, shu jumladan valyuta hisob-kitob raqamlariga ega boʻladi.

9. Quyidagilar Iqtisodiyot vazirligining asosiy vazifalari hisoblanadi:

jamiyatni rivojlantirish va demokratik qayta oʻzgartirishlar maqsadi va ustuvorliklaridan kelib chiqqan holda iqtisodiyotni yanada erkinlashtirish va isloh qilishning, iqtisodiyotni boshqarishning bozor metodlari va mexanizmlarini joriy etishning puxta oʻylangan strategiyasi ishlab chiqilishini tashkil etish;

asosiy makroiqtisodiy koʻrsatkichlarni, respublikaning, mintaqalarning iqtisodiy va ijtimoiy rivojlanishi darajasini kompleks ravishda izchil tahlil qilish, iqtisodiy va ijtimoiy jarayonlarning rivojlanish tendensiyalarini oʻrganish, iqtisodiyotdagi mavjud nomutanosibliklarni aniqlash va ularni bartaraf etish yoʻllarini asoslash;

iqtisodiyotni rivojlantirishning koʻp variantli ssenariylarini, mamlakatni ijtimoiy-iqtisodiy rivojlantirishning mintaqalar, tarmoqlar va iqtisodiyot sektorlari boʻyicha qisqa va oʻrta muddatli prognozlari va dasturlarini ishlab chiqish;

muhim qiymat, moddiy va mehnat balanslarini ishlab chiqishni tashkil etish;

asosiy makroiqtisodiy koʻrsatkichlarning pul-kredit agregatlari, davlat budjeti parametrlari, tashqi savdo, toʻlov balanslari va tarmoqlararo balanslar bilan oʻzaro bogʻliqligini taʼminlovchi taʼsirchan mexanizmni shakllantirish;

budjet-soliq, pul-kredit, valyuta va monopoliyaga qarshi siyosatning umumiy yoʻnalishlari, tabiiy monopoliyalar mahsulotlari, tovarlari va xizmatlariga narxlar va tariflarni tartibga solish mexanizmini takomillashtirish, toʻlov, moliya va moddiy balanslarni shakllantirish va ularning amalga oshirilishini nazorat qilish boʻyicha takliflar tayyorlashda qatnashish;

demografik prognozlarni, aholini aniq tarzda ijtimoiy muhofaza qilish, ichki isteʼmol bozorini toʻldirish, odamlar farovonligini oshirish, ijtimoiy infratuzilmani rivojlantirish dasturlarini ishlab chiqish;

iqtisodiyotni tarkibiy qayta oʻzgartirishlarning oʻrta muddatli prognozlarini, tarmoqlarni rivojlantirish, zamonaviylashtirish va texnologiya bilan qayta jihozlash, ishlab chiqarishlarni mahalliylashtirish, ilgʻor, resurslarni tejaydigan texnologiyalarni joriy etish dasturlarini ishlab chiqish;

tarkibiy siyosat maqsadlariga erishishni, mintaqalarni kompleks rivojlantirishni taʼminlovchi qisqa va oʻrta muddatli investitsiya dasturlarini ishlab chiqish boʻyicha ishlarni muvofiqlashtirish;

ijtimoiy-iqtisodiy rivojlantirishning maqbul surʼatlari va nisbatlarini, mineral va xomashyo resurslaridan oqilona foydalanishni, Oʻzbekiston iqtisodiyotini barqaror rivojlantirishni taʼminlovchi zamonaviy ishlab chiqarish infratuzilmasini, telekommunikatsiyalar vositalarini rivojlantirish;

eksport potensialini rivojlantirishni ragʻbatlantirish, tashqi savdo va toʻlov balanslarini maqbullashtirish boʻyicha takliflar ishlab chiqish, tovarlar (ishlar, xizmatlar) eksporti prognozlarini tayyorlash, respublikani jahon iqtisodiy tizimiga integratsiyalash strategiyasini ishlab chiqishda qatnashish;

10. Iqtisodiyot vazirligi oʻziga yuklangan vazifalarga muvofiq quyidagi funksiyalarni bajaradi:

jamiyatni rivojlantirish va demokratik qayta oʻzgartirishlar maqsadlari va ustuvor vazifalaridan kelib chiqqan holda iqtisodiyotni yanada isloh qilish va barqaror, mutanosib rivojlantirishning puxta oʻylangan strategiyasini ishlab chiqishni tashkil qiladi va muvofiqlashtiradi, bozor metodlari va vositalari asosida iqtisodiy siyosatni amalga oshirishning taʼsirchan mexanizmini ishlab chiqadi;

mamlakatni ijtimoiy-iqtisodiy rivojlantirishning mintaqalar, iqtisodiyot tarmoqlari va sektorlari boʻyicha mamlakatdagi mavjud tabiiy, mineral-xomashyo, ishlab chiqarish, ilmiy-texnik va mehnat resurslari potensialidan samarali foydalanishni taʼminlovchi qisqa va oʻrta muddatli prognozlarini ishlab chiqishni tashkil etadi va muvofiqlashtiradi;

respublikaning iqtisodiy va ijtimoiy ahvoli darajasini, asosiy makroiqtisodiy koʻrsatkichlarni chuqur tahlil qiladi, ijtimoiy-iqtisodiy rivojlantirish tendensiyalarini belgilaydi, iqtisodiyotdagi nomutanosibliklarni aniqlaydi va ularni bartaraf etish yoʻllarini asoslaydi, respublika iqtisodiyotining rivojlanishi ahvoli toʻgʻrisida yillik va har choraklik maʼruzalar tayyorlaydi, shuningdek Oʻzbekiston Respublikasi Prezidenti va Oʻzbekiston Respublikasi Hukumati tomonidan iqtisodiyotni rivojlantirish va isloh qilish boʻyicha qabul qilinadigan qarorlarning bajarilishini nazorat qiladi;

iqtisodiyotni rivojlantirishning har yilgi koʻp variantli ssenariylarini, muhim qiymat, moddiy va mehnat resurslari balanslarini ishlab chiqadi, iqtisodiyotni barqaror, dinamik va mutanosib rivojlantirishni taʼminlash yoʻllarini asoslab beradi va metodlarini ishlab chiqadi;

budjet-soliq, pul-kredit, valyuta, narx va monopoliyaga qarshi siyosatning umumiy yoʻnalishlari boʻyicha takliflar tayyorlashda, mahsulotlar, tovarlar va xizmatlarga narxlar va tariflarni tartibga solish mexanizmini takomillashtirishda, toʻlov, moliya va moddiy balanslarni shakllantirishda va ularning amalga oshirilishini nazorat qilishda qatnashadi;

asosiy makroiqtisodiy koʻrsatkichlarning pul-kredit agregatlari, davlat budjeti parametrlari, tashqi savdo, toʻlov va tarmoqlararo balanslar bilan oʻzaro bogʻliqligini taʼminlovchi taʼsirchan mexanizmni shakllantiradi;

rivojlanishning ahvoli va tendensiyalarini chuqur tahlil qilish asosida iqtisodiyotda tarkibiy qayta oʻzgartirishlarning aniq maqsadli siyosatini shakllantirish va amalga oshirish, uning kompleks va samarali rivojlanishini taʼminlash boʻyicha takliflar ishlab chiqadi;

uglevodorod xomashyo va mineral-xomashyo resurslari asosiy turlarini razvedka qilish, zaxiralarini, qazib olish, ishlab chiqarishni koʻpaytirish va ulardan foydalanishning uzoq muddatli balanslarini ishlab chiqadi;

er-suv resurslarini oʻrganish va baholashni tashkil qiladi, yer va suv resurslarining qisqa muddatli va uzoq muddatli balanslarini ishlab chiqadi hamda yuqori samarali agrotexnologiyalarni, yerdan foydalanish va qishloq xoʻjaligi ekinlarini istiqbolli joylashtirishning ilmiy asoslangan tizimlarini joriy etishni hisobga olgan holda yer fondidan oqilona foydalanish chora-tadbirlarini asoslaydi;

konyunkturaning vujudga kelgan ahvoli boʻyicha muntazam monitoringni amalga oshiradi, undan kelib chiqqan holda tarmoqlar va tarmoqlararo komplekslarni (mahalliylashtiruvchi va eksportga yoʻnaltirilgan ishlab chiqarishlarni) rivojlantirish, ularni resurslarni tejaydigan ilgʻor texnologiyalar asosida zamonaviylashtirish va texnika bilan qayta jihozlash dasturlarini ishlab chiqadi;

davlat investitsiya siyosatini ishlab chiqishni tashkil etadi va muvofiqlashtiradi hamda davlat tarkibiy siyosatining maqsadi va vazifalaridan kelib chiqqan holda davlat investitsiya dasturlarini ishlab chiqadi va ularning bajarilishini muvofiqlashtiradi, qurilishlarning tegishli aniq roʻyxatlarini kelishib oladi, xorijiy investitsiyalarni jalb etish boʻyicha davlat siyosatini ishlab chiqishda va amalga oshirishda qatnashadi, eng muhim va yirik investitsiya loyihalarining yigʻma ekspertizasini oʻtkazadi, markazlashtirilgan kapital qoʻyilmalar va Oʻzbekiston Respublikasi Hukumati kafolati ostidagi xorijiy kreditlar hisobiga moliyalashtiriladigan loyihalarni tanlov asosida tanlab olishni va ularning roʻyobga chiqarilishi ustidan nazoratni amalga oshiradi;

qisqa muddatli, oʻrta muddatli va uzoq muddatli davrlarga moʻljallangan demografik prognozlarni ishlab chiqadi, ijtimoiy siyosatni, shu jumladan ish oʻrinlari yaratish, aholini ish bilan taʼminlash, aholi daromadlarini va ularning xarid qobiliyatini oshirish, ichki isteʼmol bozorini toʻldirish, ijtimoiy va bozor infratuzilmasini rivojlantirish, aholining ayrim qatlamlarini aniq tarzda ijtimoiy qoʻllab-quvvatlash va muhofaza qilish, xalqning moddiy farovonligini barqaror ravishda jadal oshirish masalalarini ishlab chiqishni tashkil qiladi va muvofiqlashtiradi;

mehnat resurslari bozori mutanosibligini taʼminlashdan kelib chiqqan holda iqtisodiyotning barcha sohalari va sektorlari uchun malakali kadrlar tayyorlash strategiyasini ishlab chiqish ishlarini muvofiqlashtiradi;

eksport salohiyotini rivojlantirishni ragʻbatlantirish va importni, savdo balansini maqbullashtirish boʻyicha takliflar ishlab chiqadi hamda har yilgi eksport, tashqi savdo va toʻlov balansini tayyorlaydi;

xalqaro iqtisodiy hamkorlik sohasidagi iqtisodiy siyosat, tashqi iqtisodiy aloqalarni tartibga solish mexanizmlarini rivojlantirish va takomillashtirish, xorijiy mamlakatlar bilan oʻzaro manfaatli iqtisodiy hamkorlik qilish hamda qoʻshma loyihalar va dasturlarni amalga oshirish boʻyicha takliflar ishlab chiqishda qatnashadi;

davlat ehtiyojlari uchun mahsulotlar yetkazib berish (ishlar va xizmatlarni bajarish) hajmlari va tarkibini belgilangan tartibda shakllantiradi;

mamlakatning iqtisodiy safarbarlik rejasini belgilangan tartibda shakllantiradi va uning bajarilishi ustidan nazoratni taʼminlaydi;

mintaqaviy iqtisodiy siyosatni ishlab chiqishda va amalga oshirishda qatnashadi, respublikani ijtimoiy-iqtisodiy rivojlantirish prognozining mintaqaviy aspektini shakllantiradi, iqtisodiyot tuzilmalarini joylashtirish va iqtisodiyotning hududiy tuzilmasini takomillashtirish strategiyasini asoslaydi, iqtisodiyot tuzilmalarini (ishlab chiqaruvchi kuchlarni) joylashtirishning oʻrta muddatli davrga moʻljallangan sxemalarini ishlab chiqadi;

davlat ekologiya siyosatini shakllantirishda va amalga oshirishda hamda Oʻzbekistonning ekologik xavfsizligini taʼminlash chora-tadbirlarini ishlab chiqishda qatnashadi;

vazirliklar va idoralar bilan birgalikda Oʻzbekiston Respublikasi Prezidenti Devoniga, Vazirlar Mahkamasiga yirik strategik ijtimoiy-iqtisodiy muammolarni hal etishga, normativ-huquqiy bazani shakllantirishga, iqtisodiyotni chuqurlashtirish va erkinlashtirishga yoʻnaltirilgan takliflar, tavsiyalar va tahliliy axborotlar tayyorlaydi;

11. Iqtisodiyot vazirligiga unga yuklangan funksiyalarni amalga oshirishi uchun quyidagi huquqlar beriladi:

vazirliklar, idoralar, korporatsiyalar, konsernlar, uyushmalar, kompaniyalar, boshqa xoʻjalik birlashmalari, Qoraqalpogʻiston Respublikasi Vazirlar Kengashi, mahalliy boshqaruv organlarining islohotlarning eng muhim ustuvorliklarini prognozlash va amalga oshirish hamda mamlakatni ijtimoiy-iqtisodiy jihatdan mutanosib rivojlantirish sohasidagi faoliyatini belgilangan tartibda muvofiqlashtirish;

oʻz vakolatiga kiruvchi masalalarni hal etish uchun zarur boʻlgan materiallarni ijro etuvchi hokimiyat organlari, korxonalar, muassasalar va tashkilotlardan soʻrash va belgilangan tartibda olish;

oʻz vakolatiga kiruvchi masalalar boʻyicha metodik materiallar va tavsiyalarni ishlab chiqish;

Oʻzbekiston Hukumati topshirigʻiga koʻra xalqaro darajada oʻz vakolatiga kiruvchi masalalar boʻyicha Oʻzbekiston Respublikasi manfaatlarini ifodalash, xorijiy davlatlar, savdo-iqtisodiy ittifoqlar bilan savdo-iqtisodiy bitimlarni tayyorlashda va tuzishda, xalqaro iqtisodiyot va moliya tashkilotlari, xorijiy davlatlar bilan iqtisodiy hamkorlik boʻyicha hukumatlararo komissiyalar ishlarida qatnashish;

vazirlik doirasida iqtisodiyot sohasida ilmiy tadqiqotlar va ishlanmalarni amalga oshirish boʻyicha loyihalarni tanlab olish uchun ushbu ishlarni bajarish yuzasidan davlat buyurtmasiga muvofiq tanlovlar eʼlon qilish va tanlov komissiyalari tuzish;

markazlashtirilgan kapital qoʻyilmalar va Oʻzbekiston Respublikasi Hukumati kafolati ostida olingan xorijiy kreditlar hisobiga amalga oshiriladigan investitsiya loyihalarini tanlov asosida tanlab olishni tashkil etish;

ilmiy tadqiqotlarga yoʻnaltiriladigan budjet moliya resurslarini taqsimlashda qatnashish;

vazirliklar, idoralar, korporatsiyalar, konsernlar, uyushmalar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan respublika iqtisodiyotining safarbarlik tayyorgarligi boʻyicha tadbirlarning bajarilishi ustidan nazoratni amalga oshirish, (zarurat boʻlganda) sanoat, transport va boshqa moddiy ishlab chiqarish tarmoqlarining yirik obyektlarini joylashtirish loyihalarini, ularning muayyan davrda iqtisodiyotning barqaror ishlashi talablariga muvofiqligi yuzasidan, ekspertizadan oʻtkazish va ushbu masalalar boʻyicha Vazirlar Mahkamasiga takliflar kiritish;

oʻz vakolatiga kiruvchi masalalar boʻyicha, ijro etuvchi hokimiyat boshqa organlarining va yirik xoʻjalik yurituvchi subyektlarning rahbarlari va mutaxassislarini jalb etgan holda belgilangan tartibda kengashlar chaqirish;

qonunchilikda nazarda tutilgan tartibda va xalqaro huquqiy normalarga muvofiq boshqa davlatlarning iqtisodiyot idoralari bilan prognozlash metodologiyasi va amaliyotini takomillashtirish masalalari boʻyicha hamkorlik qilish toʻgʻrisida shartnomalar tuzish;

oʻziga bevosita yoki oʻziga qarashli boʻlinmalar orqali yuklangan vazifalar doirasida xorijiy iqtisodiy idoralar va ilmiy institutlar bilan hamkorlikni amalga oshirish;

kadrlar tayyorlash va xodimlarning malakasini oshirish uchun belgilangan tartibda idoraviy va ilmiy-oʻquv markazlari, xoʻjalik hisobidagi konsultatsiya va axborot markazlari tashkil etish;

belgilangan tartibda noshirlik faoliyatini amalga oshirish hamda iqtisodiyot sohasidagi joriy va strategik vazifalarni yoritish uchun matbuot organlari taʼsis etish;

Iqtisodiyot vazirligi tizimiga kiruvchi vazirliklar va tashkilotlarning moddiy-texnika bazasini yaxshilash chora-tadbirlarini koʻrish;

amaldagi qonunchilikka muvofiq vazirlikning ijtimoiy infratuzilmasini yaratish va takomillashtirish, Iqtisodiyot vazirligi tizimi xodimlari mehnatini ragʻbatlantirishning yagona tizimini shakllantirish.

12. Iqtisodiyot vazirligi iqtisodiyotni samarali, barqaror rivojlantirish yoʻllarini belgilashning asoslanganligi va metodlarining ishlab chiqilishi, Hukumatga taqdim etiladigan mamlakatni ijtimoiy-iqtisodiy rivojlantirishning tahliliy hujjatlari, takliflari, prognozlari va dasturlarining obyektivligi va kompleksliligi uchun javob beradi.

13. Iqtisodiyot vazirligiga Vazir rahbarlik qiladi. Vazirni lavozimga tayinlash va lavozimdan ozod qilish Oʻzbekiston Respublikasi Konstitutsiyasiga muvofiq amalga oshiriladi.

Iqtisodiyot vazirining bir nafar birinchi oʻrinbosari va Bosh boshqarmalar boshliqlari hisoblanadigan uch nafar oʻrinbosari boʻladi. Vazirning birinchi oʻrinbosari maqomiga koʻra Vazirga, Vazir oʻrinbosarlari — Bosh boshqarmalar boshliqlari Vazirning birinchi oʻrinbosarlariga tenglashtiriladi.

14. Iqtisodiyot vaziri:

Oʻzbekiston Respublikasi Iqtisodiyot vazirligi faoliyatiga rahbarlik qiladi hamda Vazirlikka yuklangan vazifalarning bajarilishi va funksiyalarning amalga oshirilishi uchun shaxsan javob beradi;

markaziy apparat tarkibiy boʻlinmalari rahbarlarining Vazirlik faoliyatining ayrim yoʻnalishlariga rahbarligi yuzasidan shaxsiy javobgarligi darajasini belgilaydi;

Iqtisodiyot vazirligi markaziy apparati va uning hududiy organlari tuzilmasiga xodimlarning belgilangan soni va mehnatga haq toʻlash fondi doirasida oʻzgartirishlar kiritadi;

Vazirlik markaziy apparati boʻlinmalari va unga qarashli tashkilotlar tomonidan bajarilishi majburiy boʻlgan buyruqlar chiqaradi va koʻrsatmalar beradi;

Iqtisodiyot vazirligi markaziy apparati tarkibiy boʻlinmalari toʻgʻrisidagi nizomlarni tasdiqlaydi;

Iqtisodiyot vazirligi markaziy apparati shtatlar roʻyxatini tasdiqlaydi;

qonun hujjatlarida belgilangan vakolatlar doirasida boshqa vakolatlarni amalga oshiradi.

15. Iqtisodiyot vazirligida 9 kishidan iborat Hayʼat tuziladi, uning shaxsiy tarkibi Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat oʻzining muntazam oʻtkazib turiladigan majlislarida mamlakatni, tarmoqlarni va hududlarni ijtimoiy-iqtisodiy rivojlantirishning muhim muammolarini, prognozlash metodologiyasini va uni tashkil etishni yaxshilash, kadrlarni tanlash va joy-joyiga qoʻyish masalalarini koʻrib chiqadi.

Hayʼat qarorlari Iqtisodiyot vaziri buyruqlari bilan hayotga tatbiq etiladi.

16. Vazir oʻrinbosarlari — Bosh boshqarma boshliqlari rahbarlik qiladigan Bosh boshqarmalar, boʻlimlar, guruhlar Iqtisodiyot vazirligining asosiy tarkibiy boʻlinmalari hisoblanadi.

Boʻlim boshliqlari maqomiga koʻra boshqarma boshligʻiga, guruh rahbarlari esa boshqarma boshligʻining oʻrinbosariga tenglashtiriladi.

Iqtisodiyot vazirligining boʻlim, guruh boshliqlari Vazir qarori bilan lavozimga tayinlanadi va lavozimdan ozod qilinadi.

17. Iqtisodiyot vazirligi oʻz huzuridagi:

Samarali iqtisodiy siyosat markazi;

Iqtisodiy nochor korxonalar ishlari qoʻmitasi;

Tovar bozorlari konyunkturasini oʻrganish hamda investitsiya loyihalari va dasturlarini ekspertizadan oʻtkazish respublika markazi;

Vazirlik maʼmuriy binosidan foydalanish boshqarmasi;

“Oʻzbekiston iqtisodiy axborotnomasi” jurnali tahririyati faoliyatiga rahbarlik qiladi.

18. Qoraqalpogʻiston Respublikasi Iqtisodiyot vazirligi, viloyatlar va Toshkent shahar Iqtisodiyot bosh boshqarmalari, shuningdek respublika shaharlari va tumanlaridagi iqtisodiyot boʻlimlari tegishli ravishda Qoraqalpogʻiston Respublikasi Vazirlar Kengashiga, viloyatlar, shaharlar va tumanlar hokimliklariga hamda Oʻzbekiston Respublikasi Iqtisodiyot vazirligiga qarashli boʻladi.

Ularning faoliyatiga bevosita rahbarlik qilish va muvofiqlashtirishni Oʻzbekiston Respublikasi Iqtisodiyot vazirligi amalga oshiradi.

Qoraqalpogʻiston Respublikasi Iqtisodiyot vaziri Oʻzbekiston Respublikasi Iqtisodiyot vaziri bilan kelishilgan holda Qoraqalpogʻiston Respublikasi Joʻqorgʻi Kengesi tomonidan tayinlanadi.

Viloyatlar va Toshkent shahar Iqtisodiyot bosh boshqarmalari rahbarlari tegishli ravishda viloyatlar va Toshkent shahar hokimlarining taqdimnomasiga koʻra Oʻzbekiston Respublikasi Iqtisodiyot vazirligi tomonidan tayinlanadi.

19. Oʻzbekiston Respublikasi Iqtisodiyot vazirligi tizimi tashkilotlari va muassasalari boshqaruv apparati xodimlari soni, shuningdek uning markaziy apparati tuzilmasi Oʻzbekiston Respublikasi Vazirlar Mahkamasi tomonidan tasdiqlanadi.

20. Iqtisodiyot vazirligi xodimlarini moddiy ragʻbatlantirish amaldagi qonun hujjatlariga muvofiq amalga oshiriladi.

21. Iqtisodiyot vazirligi xodimlarining ish haqi lavozim maoshidan, amaldagi qonun hujjatlarida nazarda tutilgan mukofotlardan, qoʻshimcha haq, ustama va ragʻbatlantiruvchi toʻlovlardan iborat boʻladi.

22. Iqtisodiyot vazirligi va uning hududiy boʻlinmalari xodimlari lavozim maoshlariga muayyan muddatli xizmati uchun har oylik ustamalar Vazir tomonidan tasdiqlanadigan Iqtisodiyot vazirligi xodimlariga muayyan muddatli xizmati uchun har oylik ustama toʻlash tartibi toʻgʻrisidagi Nizomga muvofiq toʻlanadi.

23. Mehnatga haq toʻlash fondi, Iqtisodiyot vazirligining Rivojlantirish va moddiy ragʻbatlantirish jamgʻarmasi, qonun hujjatlarida belgilangan tartibda budjet mablagʻlari hamda budjet muassasalari va tashkilotlarini rivojlantirish jamgʻarmasi mablagʻlari hisobiga shakllantiriladigan budjet muassasalari va tashkilotlari xodimlarini moddiy ragʻbatlantirish maxsus jamgʻarmasi mablagʻlari Iqtisodiyot vazirligi xodimlariga ish haqi toʻlash va ularni moddiy ragʻbatlantirish manbalari hisoblanadi.