Narx-navo hamon oshib borayotganini va shu munosabat bilan aholi manfaatlarini hamda turmush darajasini himoya qilish zarurligini eʼtiborga olib:

1. 1992-yilning 1-yanvaridan boshlab xalq taʼlimi, sogʻliqni saqlash, madaniyat, ijtimoiy taʼminot, fan, davlat muassasalari va uy-joy-kommunal tarmoq xodimlarining ish haqi 1991-yildagiga nisbatan 2 baravar va asos qilib olingan (1990) yilga nisbatan 4,5 baravar oshirilsin.

2. Oliy oʻquv yurtlari studentlarining, texnikumlar hamda respublika hukumatining qarorlariga binoan kiyim-kechak va ovqat bilan taʼminlanmayotgan hunar-texnika bilim yurtlari talabalarining stipendiyalari 1992-yilning 1-yanvaridan boshlab oʻrta hisobda 2,2 baravar oshirilib, imtiyozli ovqatlanishga qoʻshimcha haq avvalgi miqdorda saqlab qolinsin.

3. 1992-yilning 1-yanvaridan boshlab Oʻzbekiston Respublikasi hududida ish haqi va mehnat nafaqasining eng kam miqdori (kompensatsiyani hisobga olib) oyiga 350 soʻm belgilansin.

4. 1992-yilning 1-yanvaridan boshlab fuqarolarning soliq olinmaydigan daromadlarining eng kam miqdori oyiga 350 soʻm hajmida belgilansin.

5. Vazirliklar, idoralar, korxonalar va xoʻjaliklar ushbu Farmonda belgilangan eng kam ish haqi va mehnat nafaqasini hisobga olib, erkin va shartnomaviy narxlardan keng foydalanilayotganligini nazarda tutib, 1992-yilda ishlovchilarning ish haqi yanada oshirilishini taʼminlovchi tadbirlarni roʻyobga chiqarishni, isteʼmol fondi boʻyicha ilgari belgilangan har qanday cheklashlarni bekor qilishni, ishlab chiqarishni oʻstirishning mavjud zaxiralarini jalb etishni koʻzda tutsinlar.

6. Oʻzbekiston Respublikasi Prezidentining “Barcha turdagi maktablarning oʻqituvchilari, bolalar uylarining tarbiyachilariga qoʻshimcha imtiyozlar berish, yuqori sinf oʻqituvchilarining ish haqini oshirish haqida”gi 1990-yil 13-noyabr Farmoni 1992-yil 1-yanvaridan boshlab respublika maktabgacha tarbiya bolalar muassasalari va maktabdan tashqari muassasalar tarbiyachilariga, oʻqituvchilariga, hunar-texnika taʼlimi sistemasi muallimlari va ishlab chiqarish taʼlimi ustalariga ham joriy etilsin.

7. Oʻzbekiston Respublikasi Prezidenti huzuridagi Vazirlar Mahkamasi mazkur Farmonni amalga oshirish yuzasidan tashkiliy chora-tadbirlarni nazarda tutuvchi qaror loyihasini tayyorlasin va koʻrib chiqish uchun taqdim etsin.

8. Oʻzbekiston Respublikasi Adliya vazirligi bir oy muddat ichida amaldagi qonunchilikni mazkur Farmonga muvofiqlashtirish haqida takliflar tayyorlasin.

9. “Respublikaning davlat taʼminotidagi aholisi turmush darajasiga madad berish chora-tadbirlari toʻgʻrisida”gi Oʻzbekiston Respublikasi Prezidentining 1991-yil 16-noyabr 291-son Farmoni oʻz kuchini yoʻqotgan deb hisoblansin.