1994-yilgi paxta hosilini yigʻib-terib olish va tayyorlashga oʻz vaqtida hozirlik koʻrish, paxtakor xoʻjaliklarning yetishtirilayotgan paxta tolasi miqdori va sifati boʻyicha manfaatdorligini hamda masʼuliyatini oshirish, shuningdek paxta zavodlari davlat tasarrufidan chiqarilishini va tarmoqda rivojlanayotgan bozor munosabatlarini hisobga olgan holda “paxta xom ashyosini qabul qilish-saqlash-qayta ishlash” texnologik siklini bosqichma-bosqich oʻzgartirish uchun shart-sharoitlar yaratish maqsadida Vazirlar Mahkamasi qaror qiladi:

1. Paxtachilik kompleksining moddiy-texnika negizini yangi hosil paxta xom ashyosini yigʻib-terib olishga va qabul qilishga oʻz vaqtida tayyorlashni taʼminlash Qishloq xoʻjaligi vazirligi (Qayumov), “Oʻzqishloqxoʻjaliktaʼminottuzatish” (Husanov), “Oʻzdavpaxtasanoatsotish” (Zikriyoyev)ning asosiy vazifasi hisoblansin. Bunda paxtani yigʻib-terib olish texnikasining barcha turlarini taʼmirlash va tayyorlab qoʻyishni hamda defoliantlar zaxiralarini yaratishni shu yilning 1-avgustigacha, tayyorlov shoxobchalarini va paxta tozalash zavodlarini toʻliq hozirlab qoʻyishni esa 20-avgustgacha tugallash nazarda tutilsin.

Paxta xom ashyosini har bir xoʻjalik boʻyicha navlari va tiplariga qarab alohida-alohida saqlash uchun shart-sharoitlarni yaratishga, har bir viloyatda bittadan paxta zavodini urugʻlik paxtani qayta ishlashga ixtisoslashtirishga alohida eʼtibor berilsin.

2. Qishloq xoʻjaligi vazirligi bilan “Oʻzdavpaxtasanoatsotish” uyushmasining paxtakor xoʻjaliklarga 1994-yil hosilidan topshirilayotgan paxta xom ashyosi xarid narxining 90 foizini toʻlash toʻgʻrisidagi taklifi qabul qilinsin. Xoʻjaliklar bilan uzil-kesil hisob-kitob paxta xom ashyosini qayta ishlash yakunlari boʻyicha, qoʻshimcha olingan mahsulotni hisobga olgan holda amalga oshirilsin.

3. “Oʻzdavpaxtasanoatsotish” uyushmasi (Zikriyoyev):

“Oʻzdavstandart” markazi (Asriyans) bilan birgalikda qabul qilinayotgan paxta (tola) sifatini aniqlash laboratoriyalarini texnika bilan qayta qurollantirish, ularni zamonaviy nazorat-oʻlchov asboblari va uskunalari bilan jihozlash dasturini ishlab chiqsin. Ushbu masala boʻyicha takliflarni bir oy muddatda Vazirlar Mahkamasiga taqdim etsin;

Tashqi iqtisodiy faoliyat milliy banki (Azimov) bilan birgalikda, paxta tolasi sifatini aniqlash boʻyicha laboratoriya asboblarini sotib olish uchun Jahon tiklanish va taraqqiyot banki kreditini olishni tezlashtirish chora-tadbirlarini koʻrsin.

4. “Oʻzdavpaxtasanoatsotish” uyushmasi, Qishloq xoʻjaligi vazirligi, Oʻzbekiston qishloq xoʻjaligi fanlari akademiyasi, “Oʻzdavstandart” markazi 1994-yilning 1-iyuligacha paxta xom ashyosi uchun yangi standartni ishlab chiqsinlar, tasdiqlasinlar va amalda joriy etsinlar.

5. “Oʻzdavpaxtasanoatsotish” uyushmasi:

2 oy muddatda laboratoriyalar xodimlarini, qabul qiluvchilar-sarxillovchilarni malaka koʻrigidan oʻtkazsin, ularning mehnatiga haq toʻlashni, qabul qilinadigan paxta xom ashyosi sifatiga xolisona baho berishda mavqeyini va javobgarligini oshirsin;

viloyatlarning hokimliklari bilan birgalikda paxta tozalash zavodlarini viloyatlar markazlaridan va boshqa yirik shaharlardan koʻchirish, ularni paxta yetishtiriladigan joylarga joylashtirish masalalarini hal etsin.

6. Mazkur qarorning bajarilishini nazorat qilish Vazirlar Mahkamasining Dehqonchilik sanoati majmui (Joʻrabekov)ga yuklatilsin.