Oʻzbekiston Respublikasi Vazirlar Mahkamasining “Oʻzbekiston Respublikasi psixiatriya xizmati faoliyatini yanada takomillashtirish chora-tadbirlari toʻgʻrisida” 2013-yil 25-iyuldagi 207-son qarorini bajarish yuzasidan, psixiatriya xizmati muassasalarining tibbiyot xodimlari mehnatini moddiy ragʻbatlantirishni yaxshilash, shuningdek tibbiyot xodimlari mehnatiga haq toʻlashning amaldagi tizimini yanada takomillashtirish maqsadida Vazirlar Mahkamasi qaror qiladi:

1. Vazirlar Mahkamasining 2005-yil 21-dekabrdagi 276-son qarori (Oʻzbekiston Respublikasi QT, 2005-y., 12-son, 64-modda) bilan tasdiqlangan Oʻzbekiston Respublikasi davlat muassasalari tibbiyot va farmatsevtika xodimlari mehnatiga haq toʻlash tartibi va shartlari toʻgʻrisidagi nizomga ilovaga muvofiq oʻzgartirish va qoʻshimcha kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

1. 24-bandga quyidagi mazmundagi xatboshi qoʻshilsin:

“bemorlarga ularning uyida xizmat koʻrsatadigan psixonevrologiya dispanserlarining (psixiatriya shifoxonalari dispanser boʻlimlarining) psixiatr vrachlariga va oʻrta tibbiyot xodimlariga: uzluksiz ish stajining dastlabki uch yili uchun hamda har bir keyingi ikki yili uchun — tarif stavkasiga nisbatan 10 foizdan miqdorda belgilanadi, ustamaning eng koʻp miqdori — 30 foiz”.

2. 2-ilovaning 3.13-bandi quyidagi tahrirda bayon qilinsin:

“3.13. Tez tibbiy yordam stansiyalari (boʻlimlari).

Ruhiy kasallangan bemorlarga va ularni avtomobilda shifoxonaga olib borishda tibbiy yordam koʻrsatish boʻyicha ixtisoslashtirilgan brigadalarning vrachlari, oʻrta va kichik tibbiyot xodimlari lavozimlari.

Ruhiy kasallangan bemorlarga va ularni avtomobilda shifoxonaga olib borishda tibbiy yordam koʻrsatish boʻyicha ixtisoslashtirilgan brigadalar avtomobillarining haydovchilari”.