Oʻzbekiston Respublikasi Prezidentining “Elektrlashtirilgan Angren — Pop temir yoʻl liniyasi qurilishini tashkil etish chora-tadbirlari toʻgʻrisida” 2013-yil 18-iyundagi PQ–1985-son qaroriga muvofiq hamda davlat mulki obyektlaridan samarali foydalanish maqsadida Vazirlar Mahkamasi qaror qiladi:

1. “Oʻzbekiston temir yoʻllari” Davlat aksiyadorlik temir yoʻl kompaniyasi (keyingi oʻrinlarda “Kompaniya” deb ataladi) hamda Toshkent viloyati hokimligining Angren shahar hokimligi balansidagi davlat mulki boʻlgan Angren shahrida joylashgan foydalanilmayotgan 6-son bolalar maktabgacha taʼlim muassasasining bino va inshootlari elektrlashtirilgan Angren — Pop temir yoʻl liniyasi qurilishida ishtirok etadigan mutaxassis va ishchilarni joylashtirish uchun Kompaniyaga bepul foydalanish huquqi bilan berish toʻgʻrisidagi taklifi maʼqullansin.

2. Toshkent viloyati hokimligi ushbu qarorning 1-bandida koʻrsatilgan bino va inshootlarning belgilangan tartibda topshirilishini, Kompaniya ularning qabul qilib olinishini hamda ulardan maqsadli va samarali foydalanilishini taʼminlasin.

3. Oʻzbekiston Respublikasi Vazirlar Mahkamasining “Davlat mulki obyektlaridan kelgusida samarali foydalanish va ularni tasarruf etish boʻyicha qoʻshimcha chora-tadbirlar toʻgʻrisida” 2012-yil 31-maydagi 154-son qarori 2-ilovasining 362-pozitsiyasi oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.