Oʻzbekiston Respublikasi Vazirlar Mahkamasining “Tadbirkorlik faoliyati sohasidagi ruxsat berish tartib-taomillari toʻgʻrisida”gi Oʻzbekiston Respublikasi Qonunini amalga oshirish chora-tadbirlari haqida” 2013-yil 15-avgustdagi 225-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirishlar va qoʻshimcha kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Vazirlar Mahkamasining 1991-yil 25-oktabrdagi 270-son qarori (Oʻzbekiston Respublikasi QT, 1991-y., 10-son, 36-modda) bilan tasdiqlangan Oʻzbekiston Respublikasi Ichki ishlar vazirligi haqidagi nizomning 14-bandida:

yigirma beshinchi xatboshi quyidagi tahrirda bayon qilinsin:

“qonunchilikka muvofiq oʻt sochar qurollar, oʻq-dorilar, portlovchi moddalar, kuchli taʼsir etuvchi zaharli moddalarni sotib olish, saqlash, narkotik va radioaktiv moddalarni tashish, oʻq otish tirlari va otishma joylarini, qurol-yarogʻlarni tuzatish va pirotexnika korxonalari, ov va sport qurollari bilan savdo qiluvchi doʻkonlarni ochishni va ularning ishlashini nazorat qilib boradi”;

quyidagi mazmundagi xatboshi qoʻshilsin;

“qonun hujjatlarida nazarda tutilgan boshqa funksiyalarni amalga oshiradi”.

2. Vazirlar Mahkamasining “Yer osti suvlaridan foydalanishni tartibga solish, ularni ifloslanishdan hamda kamayib ketishdan muhofaza qilishni kuchaytirish chora-tadbirlari toʻgʻrisida” 1992-yil 8-apreldagi 179-son qarorining oʻzbek tili matnidagi 5-bandi oʻz kuchini yoʻqotgan deb hisoblansin.

3. Vazirlar Mahkamasining 1995-yil 5-dekabrdagi 449-son qarori (Oʻzbekiston Respublikasi QT, 1995-y., 12-son, 47-modda) bilan tasdiqlangan Qishloq va suv xoʻjaligi vazirligi huzuridagi Oʻzbekiston Respublikasi Oʻsimliklar karantini bosh davlat inspeksiyasi toʻgʻrisidagi nizom 7-bandining oʻn ikkinchi xatboshi quyidagi tahrirda bayon qilinsin:

“urugʻlarni, oʻsimliklar va boshqa oʻsimlik mahsulotlarini import qilishga, shuningdek respublika hududi orqali tranzit boʻyicha olib oʻtiladigan tarkibida urugʻlar, oʻsimliklar va oʻsimlik mahsulotlari boʻlgan yuklarga karantin ruxsatnomalari beradi”.

4. Vazirlar Mahkamasining 1997-yil 18-dekabrdagi 553-son qarori bilan tasdiqlangan Oʻzbekiston Respublikasi Qishloq va suv xoʻjaligi vazirligi huzuridagi Qishloq xoʻjaligi ekinlari urugʻlarini sertifikatsiyalash va sifatini nazorat qilish davlat markazi toʻgʻrisidagi nizom 12-bandining sakkizinchi xatboshidagi “import”soʻzi chiqarib tashlansin.

5. Vazirlar Mahkamasining 1998-yil 31-martdagi 137-son qarori bilan tasdiqlangan Oʻzbekiston Respublikasining vakolatli organlari tomonidan beriladigan ruxsatnomalar boʻyicha eksport va import qilinadigan maxsus tovarlar (ishlar, xizmatlar) roʻyxatining 8-bandi oʻz kuchini yoʻqotgan deb hisoblansin.

6. Vazirlar Mahkamasining 1998-yil 10-iyuldagi 293-son qarori (Oʻzbekiston Respublikasi QT, 1998-y., 7-son, 26-modda) bilan tasdiqlangan Oʻzbekiston Respublikasi hududida Radioelektron vositalarni va yuqori chastotali qurilmalarni sotib olish (berish), loyihalashtirish, qurish (oʻrnatish), foydalanish, sotish va ularni chet ellardan olib kelish tartibi toʻgʻrisidagi nizomning 5-bandi oʻz kuchini yoʻqotgan deb hisoblansin.

7. Vazirlar Mahkamasining 2000-yil 11-dekabrdagi 472-son qarori (Oʻzbekiston Respublikasi QT, 2000-y., 12-son, 75-modda) bilan tasdiqlangan Yoʻl harakati qoidalarining 26.5-bandi quyidagi tahrirda bayon qilinsin:

“26.5. Ogʻir, katta oʻlchamli yoki oʻta xavfli yuklarni tashish uchun tasarrufida avtomobil yoʻllari boʻlgan yuridik shaxslarning hamda ichki ishlar organlarining ruxsatnomasi talab qilinadi”.

8. Vazirlar Mahkamasining “Biologiya resurslaridan oqilona foydalanish, ularni Oʻzbekiston Respublikasiga olib kirish va uning tashqarisiga olib chiqish ustidan nazoratni kuchaytirish toʻgʻrisida” 2004-yil 28-oktabrdagi 508-son qarorida (Oʻzbekiston Respublikasi QT, 2004-y., 10-son, 102-modda):

a) 1-ilova 21-bandning yettinchi xatboshidagi “import” soʻzi chiqarib tashlansin;

b) 2-ilovaning 33-bandidagi “shuningdek joʻnatish va tashish” soʻzlari chiqarib tashlansin.

9. Vazirlar Mahkamasining 2007-yil 9-noyabrdagi 232-son qarori (Oʻzbekiston Respublikasi QT, 2007-y., 11-son, 63-modda) bilan tasdiqlangan Sanoat uchun ahamiyatini yoʻqotgan yoki keyinchalik oʻtkazilgan geologiya-qidiruv ishlarida yoxud konni ishga solishda tasdiqlanmagan foydali qazilma zaxiralarini yer osti boyliklaridan foydalanuvchining hisobidan chiqarish tartibi toʻgʻrisidagi nizom 8-bandi “g” kichik bandining beshinchi xatboshidagi “va maʼlumotnomasi” soʻzlari chiqarib tashlansin.

10. Vazirlar Mahkamasining 2010-yil 2-apreldagi 62-son qarori (Oʻzbekiston Respublikasi QT, 2000-y., 4-son, 14-modda) bilan tasdiqlangan Vazirliklar va idoralarning budjetdan tashqari jamgʻarmalariga yoʻnaltirilayotgan davlat bojlari, yigʻimlar va soliq boʻlmagan toʻlovlardan, maʼmuriy va moliyaviy jazolardan ajratmalar miqdorlari 29-bandining “Shakllantirish manbai” ustunidagi “import qilishga” soʻzlaridan keyingi “import” soʻzi chiqarib tashlansin.

11. Vazirlar Mahkamasining 2011-yil 8-iyundagi 165-son qarori (Oʻzbekiston Respublikasi QT, 2011-y., 6-son, 46-modda) bilan tasdiqlangan Oʻzbekiston Respublikasi Davlat geologiya va mineral resurslar qoʻmitasi toʻgʻrisidagi nizom 6-bandining oʻttiz toʻrtinchi xatboshidagi “suvdan foydalanish uchun quduqlarni” soʻzlari “suv quduqlari” soʻzlari bilan almashtirilsin.