LexUZ sharhi
Mazkur Farmon O‘zbekiston Respublikasi Prezidentining 1996-yil 8-avgustdagi PF-1503-son “Tekshirishlarni tartibga solish va nazorat qiluvchi organlar faoliyatini muvofiqlashtirishni takomillashtirish to‘g‘risida”gi Farmoniga muvofiq o‘z kuchini yo‘qotgan.
Qaysi idoraga bo‘ysunishidan va mulkchilik shaklidan qat’i nazar, savdo va xizmat ko‘rsatish sohasi korxonalarida tekshirishni tartibga solish, xodimlarni asosiy faoliyatdan noo‘rin chalg‘itish hollariga barham berish, bu ishda takrorlash va parallelizmga yo‘l qo‘ymaslik maqsadida:
1. Belgilab qo‘yilsinki, qaysi idoraga bo‘ysunishidan va mulkchilik shaklidan qat’i nazar, savdo va xizmat ko‘rsatish sohasi korxonalarining faoliyatini faqat O‘zbekiston Respublikasi Vazirlar Mahkamasi huzuridagi Bosh davlat soliq boshqarmasi va uning hududiy bo‘linmalari O‘zbekiston Respublikasi Moliya vazirligining moliya va taftish organlari ishtirokida amaldagi qonunlarga muvofiq tekshiradilar.
Bosh davlat soliq boshqarmasiga bir hafta muddat ichida savdo va xizmat ko‘rsatish sohasi korxonalari faoliyatini har jihatdan tekshirishni muvofiqlashtirish to‘g‘risidagi Nizomni ishlab chiqish topshirilsin.
2. Takrorlash va parallelizmga barham berish maqsadida, qaysi idoraga bo‘ysunishidan va mulkchilik shaklidan qat’i nazar, savdo va xizmat ko‘rsatish sohasi korxonalarida mahalliy boshqaruv organlari, davlat nazorati, ichki ishlar, sog‘liqni saqlash, standartlashtirish, metrologiya va sertifikatsiya organlari o‘zlarining respublika tashkilotlari tomonidan tekshirish uchun aniq topshiriq ko‘rsatib berilgan tegishli ruxsatnomalarsiz tekshirishlarni o‘tkazishi taqiqlansin.
3. Vazirliklar, davlat qo‘mitalari, idoralar, korporatsiyalar, konsernlar, uyushmalar va respublika birlashmalari Qoraqalpog‘iston Respublikasining Vazirlar Kengashi, viloyatlar va Toshkent shahar hokimliklari bilan birgalikda ushbu Farmon talablari joylarda qat’iy bajarilishini ta’minlasinlar.
4. Vazirlar Mahkamasi 10 kun muddat ichida amaldagi normativ hujjatlarga tegishli o‘zgartirishlar kiritsin.