O‘zbekiston Respublikasining Havo kodeksiga va Havo kemalarining xalqaro parvozlari uchun O‘zbekiston Respublikasi fuqaro aviatsiyasi aeroportlarini (aerodromlarini) ochish tartibi to‘g‘risidagi nizomga muvofiq Vazirlar Mahkamasi qaror qiladi:

1. O‘zbekiston Respublikasi Parvozlar xavfsizligini nazorat qilish davlat inspeksiyasining xalqaro parvozlar uchun Andijon, Namangan, Farg‘ona, Qarshi va Termiz shaharlari aeroportlarini ochish to‘g‘risidagi taklifi qabul qilinsin.

2. “O‘zbekiston havo yo‘llari” milliy aviakompaniyasi O‘zbekiston Respublikasi Parvozlar xavfsizligini nazorat qilish davlat inspeksiyasi bilan birgalikda Andijon, Namangan, Farg‘ona, Qarshi va Termiz shaharlari aeroportlarining maqomi bo‘yicha ma’lumotlar tayyorlanishini va xalqaro aeronavigatsiya axboroti to‘plamlarida e’lon qilinishini tashkil etsin.

3. O‘zbekiston Respublikasi Davlat xavfsizlik xizmati, Davlat bojxona qo‘mitasi, Sog‘liqni saqlash vazirligi, Qishloq va suv xo‘jaligi vazirligi, Tashqi ishlar vazirligi va Ichki ishlar vazirligi Andijon, Namangan, Farg‘ona, Qarshi va Termiz shaharlari aeroportlarining o‘tkazish punktlarida chegara, bojxona, sanitariya va veterinariya nazoratini, shuningdek, pasport-viza ta’minotini qonun hujjatlarida belgilangan tartibda amalga oshirsin.

4. “O‘zbekiston havo yo‘llari” milliy aviakompaniyasi O‘zbekiston Respublikasi Milliy xavfsizlik xizmati, Davlat bojxona qo‘mitasi, Sog‘liqni saqlash vazirligi, Qishloq va suv xo‘jaligi vazirligi, Tashqi ishlar vazirligi va Ichki ishlar vazirligining tegishli bo‘linmalarini Andijon, Namangan, Farg‘ona, Qarshi va Termiz shaharlari aeroportlarining o‘tkazish punktlarida chegara, bojxona, sanitariya va veterinariya nazoratini, shuningdek, pasport-viza ta’minotini samarali amalga oshirish uchun zarur xizmat xonalari, aloqa vositalari, asbob-uskunalar va maxsus texnika bilan beg‘araz asosda ta’minlasin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B.I. Zakirov zimmasiga yuklansin.