Oʻzbekiston Respublikasi Prezidentining “Chet tillarni oʻrganish tizimini yanada takomillashtirish chora-tadbirlari toʻgʻrisida” 2012-yil 10-dekabrdagi PQ–1875-sonli qaroriga muvofiq hamda umumiy oʻrta va oʻrta maxsus, kasb-hunar taʼlimi muassasalari uchun darsliklar va oʻquv-metodik komplekslarni chop etish hamda yetkazib berishni moliyalashtirish mexanizmini takomillashtirish maqsadida:

1. Oʻzbekiston Respublikasi Prezidentining baʼzi qarorlariga ilovaga muvofiq oʻzgartish va qoʻshimchalar kiritilsin.

2. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

1. Oʻzbekiston Respublikasi Prezidentining “Umumtaʼlim maktablari oʻquvchilarini darsliklar bilan taʼminlash tizimini takomillashtirish borasidagi qoʻshimcha chora-tadbirlar toʻgʻrisida” 2006-yil 31-maydagi PQ-362-sonli qarorida:

a) 2-bandning ikkinchi xatboshidagi “(R.S.Qosimov)” soʻzlari “(A.I.Ikromov)” soʻzlari bilan almashtirilsin;

b) 8-bandi quyidagi tahrirda bayon etilsin:

“8. Oʻzbekiston Respublikasi Xususiylashtirish, monopoliyadan chiqarish va raqobatni rivojlantirish davlat qoʻmitasi umumtaʼlim maktablari uchun darsliklar hamda oʻquv-metodik qoʻllanmalarni nashr qilish va qayta nashr qilish boʻyicha tanlov (tender) savdolarini oʻtkazishda raqobat toʻgʻrisidagi qonun talablariga rioya etilishi ustidan nazoratni kuchaytirsin”;

v) quyidagi mazmundagi 8¹ bandi bilan toʻldirilsin:

“8¹. Oʻzbekiston Respublikasi Moliya vazirligi:

Oʻzbekiston Respublikasi Hukumati qarorlari bilan tartibga solish nazarda tutilgan taʼlim muassasalari uchun darsliklar va oʻquv-metodik qoʻllanmalarni yetkazib berish boʻyicha xizmatlar haqi, shuningdek ayrim oʻquv adabiyotlarini deklaratsiya qilishda ularning narxi sunʼiy ravishda oshirilishiga yoʻl qoʻymaslik ustidan qattiq nazorat oʻrnatsin;

belgilangan tartibda oʻquv adabiyotlarini yangilashda ularning narxlari dinamikasi monitoringini yuritsin va monitoring natijalari boʻyicha yangi oʻquv dasturlari, uzluksiz taʼlim tizimi uchun darsliklarni qayta koʻrib chiqish va yaratish boʻyicha Hukumat komissiyasiga maʼlumot kiritsin”;

g) 9-bandi quyidagi tahrirda bayon etilsin:

“9. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov va Oʻzbekiston Respublikasi Bosh vazirining oʻrinbosari A.I.Ikromov zimmasiga yuklansin”.

2. Oʻzbekiston Respublikasi Prezidentining “Oʻzbekiston Respublikasi Moliya vazirligi huzurida Respublika maqsadli kitob jamgʻarmasini tashkil etish chora-tadbirlari toʻgʻrisida” 2006-yil 1-iyundagi PQ-363-sonli qarorida:

a) kirish qismidagi “chop etish, yetkazib berish va sotilishining” soʻzlari “chop etish va yetkazib berish” soʻzlari bilan almashtirilsin”;

b) 2-bandida:

ikkinchi xatboshi quyidagi tahrirda bayon etilsin:

“umumtaʼlim maktablari oʻquvchilari va oʻqituvchilarini darsliklar hamda oʻquv-metodik qoʻllanmalar, oʻrta maxsus, kasb-hunar taʼlimi muassasalari oʻquvchilari va oʻqituvchilarini chet tillari boʻyicha darsliklar va oʻquv-metodik qoʻllanmalar bilan taʼminlash uchun moʻljallangan budjet va homiylik mablagʻlari, xalqaro moliya institutlarining kredit va grant mablagʻlari, darsliklarning ijara toʻlovlarini jamlash, ushbu mablagʻlardan samarali foydalanishni tashkil etish;

quyidagi mazmundagi toʻrtinchi xatboshi bilan toʻldirilsin:

“umumiy oʻrta va oʻrta maxsus, kasb-hunar taʼlimi muassasalarining oʻquvchilari va oʻqituvchilarini taʼminlash uchun chet tillari boʻyicha darsliklar va oʻquv-metodik qoʻllanmalarni sotib olish va yetkazib berishni bepul asosda moliyalashtirish”;

toʻrtinchi va beshinchi xatboshilar tegishli ravishda beshinchi va oltinchi xatboshilar deb hisoblansin;

v) 3-bandining ikkinchi xatboshi quyidagi tahrirda bayon etilsin:

“Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan keyingi oʻquv yili uchun taqdim etilgan darsliklar va oʻquv-metodik qoʻllanmalarni nashrdan chiqarish va sotish kvotalarini tasdiqlash”;

g) 4-bandi quyidagi tahrirdagi xatboshi bilan toʻldirilsin:

“zarur hollarda, Jamgʻarmaning Vasiylik kengashiga Oʻzbekiston Respublikasi moliya vaziri bilan kelishib, Jamgʻarma ijroiya direksiyasining tashkiliy tuzilmasiga, tasdiqlangan umumiy xodimlar soni doirasida oʻzgartirish kiritish huquqi berilsin”;

d) 8-bandi quyidagi tahrirda bayon etilsin:

“8. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov va Oʻzbekiston Respublikasi Bosh vazirining oʻrinbosari A.I.Ikromov zimmasiga yuklansin.”;

e) 3-ilovada:

2-bandida “umumtaʼlim maktablari” soʻzlaridan keyin “shuningdek oʻrta maxsus, kasb-hunar taʼlimi muassasalarining kutubxona fondlari uchun chet tillari boʻyicha darsliklar va oʻquv-metodik qoʻllanmalar” soʻzlari qoʻshib qoʻyilsin;

3-bandidagi “(keyingi oʻrinlarda — ijroiya direksiya)” soʻzlari chiqarib tashlansin;

4 va 5-bandlari quyidagi tahrirda bayon etilsin:

“4. Jamgʻarma yuridik shaxs hisoblanadi, mustaqil balansga, Oʻzbekiston Respublikasi Moliya vazirligi Gʻaznachiligida shaxsiy gʻazna hisobvaraqlariga, Oʻzbekiston Respublikasining tijorat banklarida xorijiy valyutada talab qilib olinadigan depozit hisobvaragʻiga, shuningdek oʻz nomi yozilgan Oʻzbekiston Respublikasi Davlat gerbining tasviri tushirilgan muhrga ega.

5. Jamgʻarma faoliyatining maqsadi budjet va budjetdan tashqari manbalar hisobiga moliyaviy mablagʻlarni birlashtirish yoʻli orqali umumtaʼlim maktablarining kutubxona fondlari uchun darsliklar hamda oʻquv-metodik qoʻllanmalarni va oʻrta maxsus, kasb-hunar taʼlimi muassasalarining kutubxona fondlari uchun chet tillari boʻyicha darsliklar hamda oʻquv-metodik qoʻllanmalarni sotib olish va yetkazib berishni barqaror va muttasil moliyalashtirishni taʼminlash hisoblanadi”;

6-bandida:

ikkinchi xatboshidagi “umumtaʼlim maktablari” soʻzlaridan keyin “va oʻrta maxsus, kasb-hunar taʼlimi muassasalari uchun chet tillari boʻyicha darsliklar va oʻquv-metodik qoʻllanmalar” soʻzlari qoʻshib qoʻyilsin”;

quyidagi mazmundagi toʻrtinchi xatboshi bilan toʻldirilsin:

“umumiy oʻrta va oʻrta maxsus, kasb-hunar taʼlimi muassasalarining oʻquvchilari va oʻqituvchilarini taʼminlash uchun chet tillari boʻyicha darsliklar va oʻquv-metodik qoʻllanmalarni sotib olish va yetkazib berishni bepul asosda moliyalashtirish”;

toʻrtinchi va beshinchi xatboshilar tegishli ravishda beshinchi va oltinchi xatboshilar deb hisoblansin;

8-bandining ikkinchi xatboshi quyidagi tahrirda bayon etilsin:

“Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan keyingi oʻquv yili uchun taqdim etilgan darsliklar va oʻquv-metodik qoʻllanmalarni nashrdan chiqarish va sotish kvotalarini tasdiqlash. Bunda, Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan chet tillari boʻyicha darsliklar va oʻquv-metodik qoʻllanmalarni nashrdan chiqarish va sotish kvotalari taqdim etiladi”;

10-bandida:

toʻrtinchi xatboshi quyidagi tahrirda bayon etilsin:

“umumtaʼlim maktablarining ayrim toifadagi oʻquvchilarini bepul taʼminlash uchun darsliklar sotib olish va yetkazib berish, shuningdek ijaraga berishga moʻljallangan darsliklarni yangilash xarajatlarini budjet va ijara mablagʻlari hisobidan moliyalashtirish”;

quyidagi mazmundagi beshinchi xatboshi bilan toʻldirilsin:

“umumiy oʻrta va oʻrta maxsus, kasb-hunar taʼlimi muassasalarining oʻquvchilari va oʻqituvchilarini bepul taʼminlash uchun chet tillari boʻyicha darsliklar va oʻquv-metodik qoʻllanmalarni sotib olish va yetkazib berish xarajatlarini Jamgʻarmaning aylanma mablagʻlari hisobidan moliyalashtirish”;

beshinchi — toʻqqizinchi xatboshilar tegishli ravishda oltinchi — oʻninchi xatboshilar deb hisoblansin;

toʻqqizinchi xatboshidagi “xarid etilishi” soʻzlaridan keyin “va yetkazib berilishi” soʻzlari qoʻshib qoʻyilsin;

13-bandi quyidagi tahrirda bayon etilsin:

“13. Jamgʻarma mablagʻlari Oʻzbekiston Respublikasi Markaziy bankining Toshkent shahri boʻyicha Bosh boshqarmasi hisob-kassa markazidagi yagona gʻazna hisobvaragʻida mablagʻlarni Jamgʻarmaning shaxsiy gʻazna hisobvaragʻi hisobiga qoʻshish orqali toʻplanadi”;

15 va 16-bandlar quyidagi tahrirda bayon etilsin:

“15. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi (chet tillari boʻyicha darsliklar va oʻquv-metodik qoʻllanmalarga tegishli qismida) hamda Xalq taʼlimi vazirligi zarur darsliklar va oʻquv-metodik qoʻllanmalar bilan taʼminlanganligi boʻyicha umumiy oʻrta va oʻrta maxsus, kasb-hunar taʼlimi muassasalari kutubxona fondlarini har yili inventarizatsiya qilish hamda umumiy oʻrta va oʻrta maxsus, kasb-hunar taʼlimi muassasalari oʻquvchilari va oʻqituvchilarining darsliklar bilan taʼminlanganligini oʻrganish asosida keyingi kalendar yili uchun darsliklar va oʻquv-metodik qoʻllanmalarga boʻlgan ehtiyojning prognoz koʻrsatkichlarini chakana savdo tarmogʻi orqali, kutubxona fondi hisobidan bepul taʼminlanish va ijara asosida taʼminlanish kesimida har yili 1-iyunga qadar Jamgʻarmaning ijroiya direksiyasiga taqdim etish. Bunda keyingi kalendar yili uchun oʻquvchilarning istiqbol kontingenti Oʻzbekiston Respublikasi Iqtisodiyot vazirligi bilan kelishilgan holda aniqlanadi.

Yakuniy ehtiyoj Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan aniqlanadi va keyingi oʻquv yili uchun predmetlar boʻyicha taʼlim tili, nomi, sinflar va kurslar kesimida darsliklar hamda oʻquv-metodik qoʻllanmalarni ishlab chiqarish va sotishga prognoz kvotalar shakllantirilgandan soʻng Jamgʻarmaga taqdim etiladi.

16. Ijroiya direksiya Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan hamkorlikda har yili 1-iyulga qadar keyingi kalendar yil uchun Jamgʻarmaning daromadlari va xarajatlari istiqbol parametrlarini ishlab chiqadilar va Jamgʻarmaning Vasiylik kengashiga koʻrib chiqishi uchun taqdim etadi”;

18-bandida:

ikkinchi xatboshidagi “chop etilishi” soʻzlaridan keyin “va qayta chop etilishi” soʻzlari yozilsin;

quyidagi mazmundagi toʻrtinchi xatboshi bilan toʻldirilsin:

“Jamgʻarmaning aylanma mablagʻlari hisobidan umumiy oʻrta va oʻrta maxsus, kasb-hunar taʼlimi muassasalari oʻquvchilari hamda oʻqituvchilarini bepul taʼminlash uchun chet tillari boʻyicha darsliklar va oʻquv-metodik qoʻllanmalarni sotib olish hamda yetkazib berish xarajatlarini moliyalashga”;

toʻrtinchi va beshinchi xatboshilar tegishli ravishda beshinchi va oltinchi xatboshilar deb hisoblansin;

19-bandi quyidagi tahrirda bayon etilsin:

“19. Jamgʻarma:

a) Oʻzbekiston Respublikasi Xalq taʼlimi vazirligiga quyidagi yoʻnalishlar boʻyicha maktab kutubxonalarini darslik va oʻquv-metodik qoʻllanmalar bilan taʼminlash xarajatlarini qoplashga mablagʻlar ajratadi:

birinchi sinf oʻquvchilari uchun;

“Mehribonlik” uylari, maxsus maktab va maktab-internatlarning tarbiyalanuvchilari boʻlgan oʻquvchilar uchun;

ijtimoiy yordamga muhtoj boʻlgan oilalardagi oʻquvchilar uchun;

ijara tizimi uchun;

b) Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markaziga chet tillari boʻyicha darsliklar va oʻquv-metodik qoʻllanmalarni sotib olish va yetkazib berish xarajatlarini toʻlash uchun”;

quyidagi mazmundagi 19¹ band bilan toʻldirilsin:

“19¹. Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan xarajatlar smetasida nazarda tutilmagan mablagʻlarni (shu jumladan, nashriyotlar, bosmaxonalar va kitob savdosi korxonalari, shuningdek darsliklar va oʻquv-metodik qoʻllanmalarni yetkazib berishni amalga oshiruvchi tashkilotlar tomonidan shartnoma majburiyatlari bajarilmagani uchun jarimalar va/yoki penyalarni qoʻllashdan olingan mablagʻlar)ni sarflash taqiqlanadi va mazkur mablagʻlar Jamgʻarmaga qaytarilishi lozim”;

20-bandi quyidagi tahrirda bayon etilsin:

“20. Xaridlar boʻyicha tasdiqlangan kvotalariga muvofiq:

Oʻzbekiston Respublikasi Xalq taʼlimi vazirligi darsliklar va oʻquv-metodik qoʻllanmalarni xarid qilish uchun buyurtmalarni tanlov asosida joylashtiradi. Bunda darslik va oʻquv-metodik qoʻllanmalarni umumtaʼlim maktablariga yetkazib berish “Oʻquv taʼlim-taʼminot” davlat unitar korxonasi tomonidan amalga oshiriladi;

Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi chet tillari boʻyicha darsliklar va oʻquv-metodik qoʻllanmalarni xarid qilish va yetkazib berish uchun buyurtmalarni tanlov asosida joylashtirishni amalga oshiradi.

Umumtaʼlim maktablari uchun darsliklar va oʻquv-metodik qoʻllanmalarni, shuningdek oʻrta maxsus, kasb-hunar taʼlimi muassasalari uchun chet tillari boʻyicha darsliklar va oʻquv-metodik qoʻllanmalarni xarid qilish va yetkazib berish borasida Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan tuzilgan shartnomalar boʻyicha xarajatlarni Jamgʻarma hisobidan moliyalashtirish Oʻzbekiston Respublikasi Moliya vazirligi tomonidan belgilanadigan tartibga muvofiq amalga oshiriladi”;

22-bandi quyidagi tahrirda bayon etilsin:

“22.Darsliklar va oʻquv-metodik qoʻllanmalar boʻyicha buxgalterlik hisobi va hisoboti umumiy oʻrta va oʻrta maxsus, kasb-hunar taʼlimi muassasalari tomonidan olib boriladi.

Umumtaʼlim maktablari tomonidan darsliklarning ijara haqi toʻlovlari va boshqa tushumlar boʻyicha ham hisob va hisobot olib boriladi”;

uchinchi xatboshidagi “darsliklar va oʻquv-metodik qoʻllanmalarga” soʻzlari oʻrniga “umumtaʼlim maktablari uchun darsliklar va oʻquv-metodik qoʻllanmalarga” soʻzlari yozilsin;

quyidagi mazmundagi toʻrtinchi xatboshi bilan toʻldirilsin:

“oʻrta maxsus, kasb-hunar taʼlimi boshqarmalari bilan birgalikda oʻrta maxsus, kasb-hunar taʼlimi muassasalari uchun chet tili boʻyicha darsliklar va oʻquv-metodik qoʻllanmalarga buyurtmalarni umumlashtiradi”;

toʻrtinchi va beshinchi xatboshilar tegishli ravishda beshinchi va oltinchi xatboshilar deb hisoblansin;

25-bandi quyidagi tahrirda bayon etilsin:

“25. Qoraqalpogʻiston Respublikasi Xalq taʼlimi vazirligi, hududiy xalq taʼlimi boshqarmalari va oʻrta maxsus, kasb-hunar taʼlimi boshqarmalari, Jamgʻarma ijroiya direksiyasining hududiy vakillari har yarim yilda bir marotaba tegishli hududlar boʻyicha darsliklar harakati va saqlanishi toʻgʻrisida umumlashtirilgan hisobotlarni, hisobotdan keyin keluvchi oyning 15-sanasidan kechiktirmasdan Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hamda Jamgʻarmaning ijroiya direksiyasiga taqdim etishadi”;

28-bandi quyidagi tahrirda bayon etilsin:

“28. Darsliklar va oʻquv-metodik qoʻllanmalarni xarid qilish uchun Jamgʻarma tomonidan moliyalashtirilgan mablagʻlardan maqsadli va samarali foydalanish uchun javobgarlik Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi zimmasiga yuklatiladi”;

30-bandidagi “Xalq taʼlimining hududiy boshqaruv idoralari” soʻzlaridan soʻng “hamda oʻrta maxsus, kasb-hunar taʼlimi boshqarmalari” soʻzlari yozilsin;

31-bandi quyidagi tahrirda bayon etilsin:

“31. Ijara haqi toʻlovlari tushumlarini, darsliklarning oʻrnatilgan tartibda saqlanishi va foydalanilishini taʼminlash, shuningdek maktablar tomonidan darsliklar va ijara haqlari boʻyicha dastlabki hisob-kitob hujjatlarining yuritilishini nazorat qilish tegishli hududiy xalq taʼlimi va moliya organlari hamda Jamgʻarmaning ijroiya direksiyasi hududiy vakillari tomonidan amalga oshiriladi;

chet tillari boʻyicha darsliklarning oʻrnatilgan tartibda saqlanishi va foydalanilishini taʼminlash, shuningdek oʻrta maxsus, kasb-hunar taʼlimi muassasalari tomonidan ularning hisobini yuritishga oid dastlabki hujjatlarni nazorat qilish oʻrta maxsus, kasb-hunar taʼlimining tegishli hududiy boshqarmalari va moliya organlari tomonidan amalga oshiriladi”.

Mazkur Nizomda uchraydigan “ijrochi direksiya” soʻzlari hamma joyda “ijroiya direksiya” deb yozilsin.