Iqtisodiy nochor korxonalarni tugatish jarayonini tezlashtirish, vaqtincha iqtisodiy qiyinchilikka duch kelgan, biroq moliya-xoʻjalik faoliyatini sogʻlomlashtirish uchun haqiqiy imkoniyatga ega boʻlgan korxonalarni qoʻllab-quvvatlash maqsadida:

1. Korxonalar bankrotligi va sanatsiyasi masalalari boʻyicha hukumat komissiyasining yangi tarkibi ilovaga* muvofiq tasdiqlansin.

2. Iqtisodiy nochor korxonalar ishi boʻyicha qoʻmita Oʻzbekiston Respublikasi Davlat mulkini boshqarish va tadbirkorlikni qoʻllab-quvvatlash davlat qoʻmitasi tizimidan chiqarilib, Oʻzbekiston Respublikasi Iqtisodiyot vazirligiga boʻysundirilsin.

3. Mol-mulkida davlat mulki ulushi boʻlgan bankrot korxonalarni tugatish komissiyalari ishining eng uzoq muddati bir yil bilan chegaralansin. Ushbu muddatni yana uzogʻi bilan yarim yilga uzaytirish Korxonalar bankrotligi va sanatsiyasi masalalari boʻyicha hukumat komissiyasining qarori bilangina amalga oshirilsin.

Tugatish komissiyasi bankrot korxonani tugatish boʻyicha barcha ishlarni belgilangan muddatda nihoyasiga yetkaza olmagan taqdirda mulkning sotilmagan qismi Korxonalar bankrotligi va sanatsiyasi masalalari boʻyicha hukumat komissiyasining qarori bilan davlat mulkiga oʻtkaziladi hamda Oʻzbekiston Respublikasi Davlat mulki qoʻmitasi tasarrufiga beriladi, xoʻjalik sudlari esa Hukumat komissiyasi qarori asosida tugatish ishining yakunlangani haqida ajrim chiqaradi.

4. Tashqi boshqaruvchilar va ishonchli shaxslarga qarzdor korxonalar yoki ularning mulkini sotishda kreditorlar yigʻilishi (qoʻmitasi) roziligi bilan quyidagilarga ruxsat berilsin:

xaridorga xizmat koʻrsatadigan tijorat banki tegishli kafolatni taqdim qilgan taqdirda korxona yoki mulkni bir yildan ortiq boʻlmagan muddatga haqini boʻlib-boʻlib toʻlash sharti bilan sotish;

arzon-garov va tez ishlatib boʻlinadigan mulkni, shuningdek xom-ashyo va tayyor mahsulotning qolgan qismini kim oshdi savdosi oʻtkazmasdan, oldi-sotdi shartnomasi boʻyicha sotish.

5. Oʻzbekiston Respublikasi xoʻjalik sudlari ishonchli shaxslar va bankrot korxonalarni tugatish komissiyalari tomonidan debitorlik qarzini majburiy tarzda undirib olish boʻyicha taqdim etilgan materiallarni davlat boji toʻlanmasdan turib ham bu bojni aybdor tomondan keyinchalik undirib olinishini belgilagan holda koʻrib chiqishni taʼminlasin.

6. “Korxonalarning bankrotligi toʻgʻrisidagi qonunchilikni amalga oshirish chora-tadbirlari haqida” Oʻzbekiston Respublikasi Prezidentining 1996-yil 11-dekabrdagi PF-1658-son Farmoniga quyidagi oʻzgartishlar kiritilsin:

Farmonning 1-bandi hamda ilovasi oʻz kuchini yoʻqotgan deb hisoblansin;

2-band quyidagi mazmundagi oʻninchi xatboshi bilan toʻldirilsin:

“mol-mulkida davlat mulkining ulushi boʻlgan iqtisodiy nochor korxonalarning ishlab chiqarish quvvatlarini maʼlum muddatga toʻxtatib qoʻyish haqida qaror qabul qilish, bu qaror keyinchalik Vazirlar Mahkamasining qarori yoki farmoyishi bilan tasdiqlanishi shart”;

3-banddagi “Oʻzbekiston Respublikasi Davlat mulkini boshqarish va tadbirkorlikni qoʻllab-quvvatlash Davlat qoʻmitasi” hamda 4-bandning 2-xatboshisidagi “Oʻzbekiston Respublikasi Davlat mulki qoʻmitasining” soʻzlari “Oʻzbekiston Respublikasi Makroiqtisodiyot va statistika vazirligi” soʻzlari bilan almashtirilsin.

6-bandning uchinchi xatboshisi quyidagi tahrirda berilsin:

“tugatish jarayonini amalga oshirishda faol ishtirok etish va ishonchli shaxs sifatida qatnashish, mol-mulkida davlat mulkining ulushi boʻlgan hamda xoʻjalik sudlari tomonidan bankrot deb eʼtirof etilgan qarzdorlar boʻyicha tugatish komissiyalarini tashkil etish”;

6-bandning oltinchi xatboshisi quyidagi tahrirda berilsin:

“qonunchilikda belgilangan tartibda soliq organlari, iqtisodiyot va statistika organlaridan korxonalarning iqtisodiy nochorligi haqidagi maʼlumotlarni olish”;

8-bandning beshinchi xatboshisi quyidagi tahrirda berilsin:

“Iqtisodiy nochor korxonalar ishi boʻyicha qoʻmita mansabdor shaxslardan korxonalarning moliya-xoʻjalik faoliyati haqidagi materiallar taqdim qilinmagani yoki oʻz vaqtida taqdim qilinmagani uchun undirib olinadigan jarimalar;

bankrot korxonalarni kim oshdi savdosi orqali davlat tasarrufidan chiqarish va xususiylashtirishdan, kreditorlarning talabi qondirilgan taqdirda mulkning baholanish va sotilish qiymati oʻrtasidagi farqdan tushgan mablagʻlarning bir qismi”.

7. Oʻzbekiston Respublikasi Adliya vazirligi Korxonalar bankrotligi va sanatsiyasi boʻyicha hukumat komissiyasi, Iqtisodiy nochor korxonalar ishi boʻyicha qoʻmita va boshqa manfaatdor idoralar bilan birgalikda ikki hafta muddat ichida Vazirlar Mahkamasiga Oʻzbekiston Respublikasining “Bankrotlik toʻgʻrisida”gi Qonuni hamda boshqa qonun hujjatlarini mazkur Farmon asosida oʻzgartirish va ularga qoʻshimchalar kiritish boʻyicha takliflar kiritsin.

8. Oʻzbekiston Respublikasi Vazirlar Mahkamasi bir hafta muddatda mazkur Farmonning bajarilishi boʻyicha qaror qabul qilsin.