Oʻzbekiston Respublikasi Bojxona kodeksi (Oʻzbekiston Respublikasi Oliy Majlisining Axborotnomasi, 1998-yil, 2-son, 36-modda), Oʻzbekiston Respublikasi Prezidentining 2012-yil 18-iyuldagi PF-4455-son “Ishbilarmonlik muhitini yanada tubdan yaxshilash va tadbirkorlikka yanada keng erkinlik berish chora-tadbirlari toʻgʻrisida”gi Farmoni (Oʻzbekiston Respublikasi qonun hujjatlari toʻplami, 2012-yil, 29-son, 328-modda) va Oʻzbekiston Respublikasi Vazirlar Mahkamasining 2012-yil 30-dekabrdagi 379-son “Tashqi savdo operatsiyalarini amalga oshirish bilan bogʻliq tartibotlarni liberallashtirishga doir qoʻshimcha chora-tadbirlar toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2013-yil, 2-son, 24-modda) muvofiq Oʻzbekiston Respublikasi Davlat bojxona qoʻmitasi qaror qiladi:

1. Import qilinadigan tovarlarni bojxonada rasmiylashtirishda davriy bojxona deklaratsiyasini taqdim etish tartibi toʻgʻrisida nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Bojxona kodeksi (Oʻzbekiston Respublikasi Oliy Majlisining Axborotnomasi, 1998-yil, 2-son, 36-modda), Oʻzbekiston Respublikasi Prezidentining 2012-yil 18-iyuldagi PF–4455-son “Ishbilarmonlik muhitini yanada tubdan yaxshilash va tadbirkorlikka yanada keng erkinlik berish chora-tadbirlari toʻgʻrisida”gi Farmoni (Oʻzbekiston Respublikasi qonun hujjatlari toʻplami, 2012-yil, 29-son, 328-modda) va Oʻzbekiston Respublikasi Vazirlar Mahkamasining 2012-yil 30-dekabrdagi 379-son “Tashqi savdo operatsiyalarini amalga oshirish bilan bogʻliq tartibotlarni liberallashtirishga doir qoʻshimcha chora-tadbirlar toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2013-yil, 2-son, 24-modda) muvofiq davriy bojxona deklaratsiyasidan foydalangan holda “erkin muomalaga chiqarish” (keyingi oʻrinlarda – import deb yuritiladi) bojxona rejimiga joylashtiriladigan tovarlarni deklaratsiyalash tartibini belgilaydi.

1. Ushbu Nizomda quyidagi asosiy tushunchalardan foydalaniladi:

ayni bir xil tovar — kelib chiqish mamlakati, jismoniy xususiyatlari, sifati, ishlab chiqaruvchisi, Tashqi iqtisodiy faoliyat tovarlar nomenklaturasi (TIF TN) boʻyicha 10 belgili muayyan kodi bir xil boʻlgan tovar;

bir shaxs tomonidan doimiy olib oʻtish — bojxona chegarasi orqali bitta tashqi savdo shartnomasi doirasida, bir xil shartlarda, bir yuk joʻnatuvchidan bir yuk qabul qiluvchiga ayni bir xil tovarlarni 60 (oltmish) kalendar kun mobaynida bir martadan koʻp olib oʻtish;

tovar partiyasi — transport qoidalariga muvofiq bitta transport hujjati (yukxat, konosament va hk.) boʻyicha bir yuk qabul qiluvchiga joʻnatiladigan tovarlar.

2. Davriy bojxona deklaratsiyasi (keyingi oʻrinlarda – DBD deb yuritiladi) ayni bir xil tovarlarni import bojxona rejimida bir shaxs tomonidan doimiy olib oʻtishda rasmiylashtiriladi.

3. Quyidagi tovarlarning bojxona rasmiylashtiruvi jarayonida DBDning qoʻllanilishiga yoʻl qoʻyilmaydi:

a) Oʻzbekiston Respublikasi hududiga import qilinishi taqiqlangan;

b) litsenziyalar boʻyicha import qilinadigan;

v) vakolatli organlarning ruxsatnomasi talab qilinadigan (muvofiqlik, gigiyena, veterinariya sertifikatlari va karantin ruxsatnomasi bundan mustasno).

4. Deklarantda bojxona toʻlovlaridan qarzdorlik va ular boʻyicha penyalar, ushbu toʻlovlar boʻyicha kechiktirib va boʻlib-boʻlib toʻlash imtiyozi berilganligi uchun foizlar hamda bojxona qoidalarini buzganligi uchun jarimalar mavjud boʻlgan holatlarda davriy bojxona rasmiylashtiruvi amalga oshirilmaydi.

5. Tovarlarning davriy bojxona rasmiylashtiruvi bojxona postida ikki bosqichda amalga oshiriladi:

birinchi bosqichda DBD rasmiylashtiriladi;

ikkinchi bosqichda toʻliq bojxona yuk deklaratsiyasi (keyingi oʻrinlarda – BYuD deb yuritiladi) rasmiylashtiriladi.

6. Davriy bojxona rasmiylashtiruvida transport va tovar kuzatuv hujjatlari deklarant tomonidan bojxona postiga DBDda koʻrsatilgan har bir tovarlar partiyasi uchun bojxona koʻrigi boshlanishidan oldin taqdim etiladi.

7. DBDda rasmiylashtirilgan tovarlarning qolgan partiyasi DBD rasmiylashtirilgan bojxona postiga taqdim etiladi.

8. Davriy bojxona rasmiylashtiruvini amalga oshirish uchun DBD bilan birga bojxona organlariga tovarlarni rasmiylashtiruv davomida taqdim qilinishi lozim boʻlgan hujjatlar deklarant tomonidan bojxona postiga tovarlarning dastlabki partiyasini bojxona rasmiylashtiruvidan oʻtkazish paytida taqdim etiladi.

Hujjatlar bojxona postiga “Tovarlarni elektron deklaratsiyalash” avtomatlashtirilgan axborot tizimi orqali vakolatli organlar va bojxona rasmiylashtiruvi mutaxassisi tomonidan elektron raqamli imzo bilan tasdiqlangan holda elektron koʻrinishda ham taqdim etilishi mumkin.

9. DBD olib kelingan dastlabki tovarlar partiyasining shartnomada koʻrsatilgan umumiy miqdoriga BYuD blanklarida yoki elektron shaklda rasmiylashtiriladi.

Bunda DBDda koʻrsatilgan tovarlarning toʻliq miqdori uchun bojxona toʻlovlari toʻlanadi.

10. DBDda koʻrsatilgan tovarlarning har bir partiyasi import bojxona rejimi asosida tovarga nisbatan vakolatga ega boʻlgan shaxsning toʻla ixtiyoriga berilishi ularni bojxona koʻrigidan oʻtkazilgandan soʻng amalga oshiriladi. Kelgusida har bir tovarlar partiyasining nazorati va hisobini yuritish uchun bojxona koʻrigi dalolatnomasi, transport va tovar kuzatuv hujjatlarining nusxalari, tegishli sertifikatlar (sertifikatlanishi majburiy boʻlgan tovarlar uchun) va ruxsatnomalar bojxona posti yigʻma jildida saqlanadi.

11. Tovarlarni bojxona koʻrigini amalga oshiruvchi bojxona postining mansabdor shaxsi DBDning 1 va 6-asl nusxalarining orqa qismida DBD boʻyicha tovarning tartib raqami, TIF TN kodi, miqdori va bojxona koʻrigi dalolatnomasi tartib raqami boʻyicha maʼlumotlarni qayd etib boradi. Mazkur yozuv bojxona posti mansabdor shaxsining shaxsiy raqamli muhri va bojxona postining tegishli shtampi bilan tasdiqlanadi.

12. DBD import bojxona rejimiga asosan BYuDni toʻldirish tartibiga muvofiq, quyidagi xususiyatlarni inobatga olgan holda toʻldiriladi:

a) DBDning 1-ustuni birinchi qismida “PE” harfli belgi koʻrsatiladi;

b) 44-ustunida 8-raqam bilan “Tovarlar KK.OO.YYgacha taqdim etiladi” degan qoʻshimcha yozuv yoziladi, bunda KK.OO.YY – (kun, oy va yilning oxirgi ikki raqami) tovarni bojxona rasmiylashtiruvini amalga oshiradigan bojxona postiga taqdim etishning oxirgi sanasi hisoblanadi.

v) 50-ustunda “Taqdim etilgan maʼlumotlar uchun javobgarlik ...” degan soʻzlardan keyin “BYuDni “20__” yil “___”_______gacha taqdim etish majburiyatini olaman” degan soʻzlar bilan toʻldiriladi.

13. DBDda koʻrsatilgan muddat tugagunga qadar deklarant tomonidan toʻliq BYuD taqdim etiladi.

14. Toʻliq BYuDni taqdim etish muddati DBD rasmiylashtirilgan sanadan 60 (oltmish) kalendar kunidan oshmasligi lozim. DBD rasmiylashtirgan bojxona posti toʻliq BYuDni taqdim etish muddatini nazorat qiladi.

15. Olib kirilayotgan tovarlarning umumiy miqdori DBDda koʻrsatilgan miqdordan oshmasligi kerak.

16. Bojxona toʻlovlari summasini hisoblashda, toʻliq BYuDda DBD qabul qilingan kunda amalda boʻlgan bojxona toʻlovlari stavkalari va xorijiy valyutalar kursi qoʻllaniladi.

Agarda taqdim etilgan hujjatlardagi maʼlumotlarga aniqlik kiritish natijasida hisoblangan bojxona toʻlovlari summasi DBDda koʻrsatilgan toʻlovlar summasidan ortadigan boʻlsa ular qoʻshimcha toʻlanadi, kamayish holatlarida esa bojxona organi oʻrtadagi farqni toʻlovchiga qonun hujjatlarida belgilangan tartibda qaytaradi yoki toʻlovchining xohishiga koʻra uni keyingi toʻlovlar hisobiga kiritadi.

17. Toʻliq BYuD quyidagi hollarda rasmiylashtirilmaydi:

DBDda koʻrsatilmagan tovarlar kelganda;

qolgan tovarlar partiyasi olib kirilganda dastlabki tovarlar partiyasini bojxona rasmiylashtiruvidan oʻtkazishda koʻrsatilmagan, iqtisodiy siyosat choralari qoʻllanilishiga taʼsir koʻrsatuvchi hujjatlar taqdim etilgan taqdirda;

dastlabki tovarlar partiyasini rasmiylashtirishda iqtisodiy siyosat choralari qoʻllanilishiga asos boʻlgan hujjatlarni qolgan partiya tovarlarni olib kirishda taqdim etmaganda.

Mazkur holatlarda yangi BYuD Oʻzbekiston Respublikasi Bojxona kodeksining 92-moddasida belgilangan 15 kunlik muddat ichida taqdim etilishi shart.

18. Toʻliq BYuDni rasmiylashtirishda quyidagi xususiyatlar inobatga olinadi:

a) BYuDga aynan DBDga berilgan tartib raqam qoʻyiladi va ular bir-biridan ajralmas qismlar hisoblanadi.

b) BYuDning 44-ustunida 8-raqam bilan “PE dan keyingi deklaratsiyalash” degan soʻzlar yoziladi.

19. Toʻliq BYuDning “D” ustunida bojxona postining mansabdor shaxsi tomonidan tovarlarni haqiqatda rasmiylashtirilgan sanasi qoʻshimcha yoziladi (DBDda koʻrsatilgan tovarlarning oxirgi partiyasining rasmiylashtiruv sanasi).

20. Bojxona rasmiylashtiruvida taqdim etilgan hujjatlardagi maʼlumotlarning haqqoniyligi uchun deklarant javobgardir.

21. Mazkur Nizom talablari buzilishida aybdor boʻlgan shaxslar, qonun hujjatlarida belgilangan tartibda javobgarlikka tortiladilar.